Di lɔ we Gɔd bin gi Mozis bin se if man tink se i fɔ dayvɔs in wɛf i fɔ mek satifiket. Dis bin de ɛp fɔ mek dɛn tink gud wan if dɛn fɔ rili skata. Bɔt di Bigman dɛn pan Gɔd biznɛs insay Jizɔs in tɛm, bin mek am izi fɔ dayvɔs. Man dɛn bin de dayvɔs dɛn wɛf dɛn fɔseka ɛni smɔl tin. (“certificate of dismissal” stɔdi not fɔ Mak 10:4, nwtsty-E; “divorces his wife,” “commits adultery against her” stɔdi not dɛn fɔ Mak 10:11, nwtsty-E) Jizɔs bin ɛp di pipul dɛn fɔ no se na Jiova mek di fɔs mared ɛn i want dɛn fɔ de togɛda. (Mak 10:2-12) We man ɛn uman mared dɛn de bi “wan pɔsin” ɛn dɛn nɔ fɔ skata sote go. Insay Matyu, di wangren rizin we di Baybul gi fɔ mek maredman ɛn mareduman dayvɔs na we di man ɔ di uman du “mami ɛn dadi biznɛs di we aw Gɔd nɔ want.”—Mat 19:9.

Tide, bɔku pipul dɛn nɔ de si mared lɛk aw Jizɔs bin si am, dɛn de si am di sem we lɛk aw di Faresi dɛn bin de si am. Insay di wɔl, we prɔblɛm de na mared os, dɛn kwik fɔ dayvɔs. Bɔt maredman ɛn mareduman dɛn we na Kristian, kin tek dɛn mared vaw siriɔs ɛn tray tranga wan fɔ fala di Baybul in advays we prɔblɛm de insay dɛn mared os. We yu dɔn fɔ wach di fim we gɛt di taytul, Lɔv ɛn Rɛspɛkt De Mek Famili Gɛt Wanwɔd, una ansa dɛn kwɛstyɔn dɛn ya:

•  Aw yu go du wetin Prɔvabs 15:1 se insay yu mared os? Wetin mek dat impɔtant?

• Aw Prɔvabs 19:11 go ɛp yu fɔ avɔyd prɔblɛm dɛn insay yu famili?

• If yu mared wan skata, us kwɛstyɔn dɛn yu fɔ tink bɔt bifo yu tink fɔ dayvɔs?

• Aw Matyu 7:12 go ɛp yu fɔ bi gud maredman ɔ gud mareduman?