Lɔv na di glu we de mek di famili de togɛda. We lɔv nɔ de i nɔ go izi fɔ mek di famili gɛt wanwɔd ɛn wok togɛda. Aw maredman dɛn, wɛf dɛn, ɛn mama ɛn papa dɛn go sho lɔv na di famili?

Maredman we lɛk in wɛf go tink bɔt wetin in wɛf nid, wetin i tink, ɛn aw i de fil. (Ɛfi 5:​28, 29) I de gi dɛn wetin dɛn nid ɛn ɛp dɛn fɔ gɛt tayt padi biznɛs wit Jiova ɛn i de mek shɔ bak se dɛn gɛt Famili Wɔship ɛni wik. (1Ti 5:​8) Mareduman we lɛk in man de put insɛf ɔnda in man ɛn gi am “dip rɛspɛkt.” (Ɛfi 5:​22, 33; 1Pi 3:​1-6) Dɛn ɔltu fɔ rɛdi fɔ fɔgiv dɛnsɛf. (Ɛfi 4:​32) Mama ɛn papa dɛn we lɛk dɛn pikin dɛn de sho se dɛn bisin bɔt dɛn wan bay wan ɛn de tich dɛn fɔ lɛk Jiova. (Dit 6:​6, 7; Ɛfi 6:​4) Us prɔblɛm dɛn dɛn pikin dɛn kin gɛt na skul? Aw dɛn de ebul bia we dɛn kɔmpin dɛn de mɔna dɛn fɔ du bad? We lɔv de na di famili, ɔlman de fil sef.

WACH DI VIDIO WE GƐT DI TAYTUL, KƆNTINYU FƆ SHO LƆV INSAY YU FAMILI, DƆN UNA ANSA DI KWƐSTYƆN DƐN WE DE DƆŊ:

• Aw maredman we lɛk in wɛf de kia fɔ am ɛn sho se i valyu am?

• Aw mareduman we lɛk in man de sho se i gɛt dip rɛspɛkt fɔ am?

• Aw mama ɛn papa dɛn we lɛk dɛn pikin dɛn de tich dɛn bɔt Gɔd in Wɔd?