I nɔ go te igen di peshɛnt we Jiova de peshɛnt wit dis wɔl go dɔn. Dɛn go dɔnawe wit lay lay rilijɔn, dɔn ɔl di neshɔn dɛn go gɛda fɔ atak Gɔd in pipul dɛn ɛn Jiova go dɔnawe wit di wikɛd wan dɛn insay Amagɛdɔn. Kristian dɛn de wet fɔ si we dɛn impɔtant tin dɛn ya go apin.

Fɔ tru, wi nɔ no ɔl wetin gɛt fɔ apin insay di big trɔbul. Fɔ ɛgzampul wi nɔ no ustɛm i go bigin. Wi nɔ no us rizin dɛn di wan dɛn we gɛt pawa go yuz fɔ atak rilijɔn. Wi nɔ no aw lɔng di neshɔn dɛn go atak Gɔd in pipul dɛn ɔ wetin dɛn go du. Wi nɔ no bak wetin Jiova go yuz fɔ dɔnawe wit di wikɛd wan dɛn insay Amagɛdɔn.

Bɔt di Skripchɔ dɛn dɔn gi wi ɔl wetin wi nid fɔ no so dat wi go gɛt maynd ɛn kɔnfidɛns as wi de wet fɔ tumara bambay. Fɔ ɛgzampul, wi no se wi de na di las pat na “di las dez.” (2Ti 3:​1) Wi no se dɛn go “ridyus di tɛm” we dɛn go atak rilijɔn so dat dɛn nɔ go dɔnawe wit tru rilijɔn. (Mat 24:​22) Wi no se Jiova go sev in pipul dɛn. (2Pi 2:​9) Ɛn wi no se di wan we Jiova dɔn pik fɔ dɔnawe wit di wikɛd wan dɛn ɛn fɔ sev di bɔku bɔku pipul dɛn insay Amagɛdɔn de du tin tret ɛn i pawaful.—Rɛv 19:​11, 15, 16.

Di tin dɛn we go apin tumara bambay go mek “pipul dɛn fent bikɔs dɛn de fred.” Bɔt, we wi rid ɛn tink gud wan bɔt di tin dɛn we Jiova dɔn du trade fɔ sev in pipul dɛn ɛn wetin i dɔn prɔmis fɔ du tumara bambay, dat go mek wi “tinap stret ɛn es [wi] ed ɔp.”—Lyu 21:​26, 28.