Bikɔs Jizɔs bin bigin tɔk to di Samɛritan uman na di wɛl, dat bin mek i ebul fɔ prich to am. Wetin ɛn wetin wi go du fɔ mek i izi fɔ bigin tɔk to strenja dɛn?

• Smayl ɛn tɔk to pipul dɛn lɛk padi. Pan ɔl we Jizɔs bin taya, i bin bigin tɔk to di uman bay we i aks am fɔ wata fɔ drink. So yu kin bigin tɔk to pɔsin bay we yu grit am fayn ɛn sɔntɛm tɔk bɔt di wɛda ɔ sɔntin we dɛn jɔs tɔk bɔt na nyuz. Mɛmba se di fɔs tin na fɔ jɔs bigin tɔk to di pɔsin, so tɔk bɔt sɔntin we sɔntɛm di pɔsin go want fɔ tɔk mɔ bɔt. Nɔ fil bad if di pɔsin nɔ ansa yu. Tray fɔ tɔk to ɔda pɔsin. Pre to Jiova fɔ mek i ɛp yu fɔ gɛt maynd.—Nɛi 2:​4; Akt 4:​29.

• Nɔ fɔgɛt fɔ yuz ɛni chans we yu gɛt fɔ bigin tɔk bɔt di gud nyuz; bɔt nɔ rɔsh. Una tɔk smɔl smɔl te una rich to dat. If yu fos fɔ tɔk bɔt di gud nyuz, sɔntɛm di pɔsin nɔ go lɛk dat ɛn i go lɛf fɔ tɔk to yu. Nɔ fil bad if di tɔk dɔn yu nɔ ebul fɔ prich to di pɔsin. If yu tink se yu de fred fɔ bigin tɔk bɔt di gud nyuz, praktis fɔ jɔs bigin tɔk to pɔsin, nɔto fɔ prich. [Ple di fɔs fim, dɔn una tɔk bɔt am.]

• Fɛn we fɔ bigin prich bay we yu tɔk sɔntin we yu biliv ɛn we go mek pɔsin we de lisin to yu aks kwɛstyɔn. Jizɔs bin tɔk fayn tin we mek di uman aks kwɛtyɔn dɛn. Di tɛm we i bigin tɔk bɔt di gud nyuz, i jɔs tan lɛk se i bin de ansa di uman in kwɛstyɔn dɛn. [Ple di sɛkɔn fim, dɔn una tɔk bɔt am, ɛn ple di tɔd fim, dɔn una tɔk bɔt am.]