Luk fɔ Ɛp

“Sɔmbɔdi go ebul fɔ bit wan pɔsin, bɔt tu pipul dɛn go ebul chalenj am.”​—Ɛkliziastis 4:​12, NWT.

WE wi gɛt ɔda pipul dɛn we de sɔpɔt wi, wi de gɛt mɔ trɛnk fɔ fɛt agens wi ɛnimi; i nɔ mata udat ɔ wetin da ɛnimi de bi. So if yu want fɔ lɛf fɔ smok, i go mek sɛns fɔ lɛ yu alaw yu fambul ɛn padi dɛn fɔ ɛp yu; ɔ ɛni ɔda pɔsin we go rili sɔpɔt yu ɛn peshɛnt wit yu.

I go fayn fɔ aks ɔda pipul dɛn we dɔn lɛf fɔ smok fɔ ɛp yu bikɔs dɛn nɔ jɔs ɔndastand aw yu de fil bɔt dɛn go ebul ɛp. Wan Kristian we nem Tɔbɛn we de na Dɛnmak bin se: “A bin rili bɛnifit frɔm di sɔpɔt we ɔda pipul dɛn bin de sɔpɔt mi.” Ebraam we de na India bin rayt se: “Di we aw mi famili ɛn mi kɔmpin Kristian dɛn bin de sho se dɛn rili lɛk mi, bin ɛp mi fɔ mek a lɛf fɔ smok.” Bɔt sɔntɛnde, ivin di sɔpɔt we wi fambul ɛn padi dɛn de gi wi nɔ du.

Wan man we nem Bagwadas bin se: “A bin smok fɔ 27 ia, bɔt bikɔs a lan wetin di Baybul se bɔt dɔti abit dɛn, a bin disayd fɔ lɛf. A tray fɔ ridyus ɔmɔs a de smok, a chenj mi padi dɛn, ɛn a bin ivin de go to pɔsin fɔ ɛp mi, bɔt ɔl dat nɔ wok. So wan nɛt, a pre to Jiova ɛn tɛl am ɔl wetin de na mi at ɛn a beg am fɔ lɛ i ɛp mi fɔ mek a lɛf fɔ smok. Na da tɛm de a bin ebul lɛf fɔ smok!”

Wan ɔda tin we go fayn fɔ mek yu du na fɔ pripia fɔ di tin dɛn we go mek i nɔ izi fɔ mek yu lɛf fɔ smok. Wetin na dɛn tin dɛn de? Di nɛks atikul go tɔk bɔt dɛn.

[Bɔks]

YU FƆ YUZ MƐRƐSIN FƆ LƐF FƆ SMOK?

Mɛrɛsin dɛn de fɔ ɛp pɔsin fɔ lɛf fɔ smok lɛk nicotine patch ɛn bɔku pipul dɛn de yuz am. Bɔt bifo yu disayf fɔ yuz dɛn kayn mɛrɛsin dɛn de, tink bɔt dɛn kwɛstyɔn dɛn ya:

Wetin na di bɛnifit dɛn? Dɛn kin se bɔku tritmɛnt dɛn kin ɛp pɔsin fɔ lɛf fɔ smok bay we i ridyus di we aw di pɔsin de fil we i lɛf fɔ smok. Bɔt pipul dɛn stil de wɔnda if i go ɛp pɔsin fɔ lɔng tɛm.

Wetin na di risk dɛn? Sɔm mɛrɛsin dɛn kin mek pɔsin fil fɔ vɔmit, in at de rili pwɛl ɔltɛm, ɛn i de tink fɔ kil insɛf. Mɛmba bak se tritmɛnt dɛn we dɛn kin gi fɔ lɛ pɔsin lɛf fɔ tek nikotin, na jɔs ɔda we fɔ gi nikotin ɛn i kin ambɔg pɔsin in wɛlbɔdi biznɛs. So di pɔsin in bɔdi stil de yus to nikotin.

Us ɔda tin pɔsin go du? Insay wan sɔve we dɛn bin du, we yu kɔnt 100 pipul dɛn, 88 pan dɛn bin jɔs lɛf fɔ smok lɛk dat, dɛn nɔ tek no mɛrɛsin ɛn dɛn bin ebul lɛf fɔ smok.