Yu Go Ebul Win!
Yu Go Ebul Win!
DI TƐM dɔn kam fɔ lɛ yu sho se yu gɛt maynd ɛn du sɔntin. (Fɔs Kronikul 28:10) Wetin na sɔm ɔda tin dɛn we yu go du fɔ lɛ yu ebul lɛf fɔ smok?
Sɛt det. Di U.S. Department of Health and Human Services se i go fayn fɔ mek di de we yu disayd se yu go lɛf fɔ smok, yu du am insay tu wiks. We yu du dat, i go mek yu mɛmba di rizin we mek yu wan lɛf fɔ smok. Mak di det na yu kalɛnda, tɛl yu padi dɛn, ɛn lɛf fɔ smok di de we yu dɔn mak ilɛksɛf di tin dɛn we de apin to yu chenj.
Rayt smɔl not. Yu kin rayt di tin dɛn we de dɔŋ wit ɛni ɔda tin we go ɛp yu fɔ lɛf fɔ smok:
● Di rizin dɛn we mek yu want fɔ lɛf fɔ smok
● Pipul dɛn fon nɔmba we yu go kɔl ɛnitɛm yu fil fɔ smok
● Skripchɔ fɔ tink bɔt lɛk Galeshians 5:22, 23 we go ɛp yu fɔ lɛf fɔ smok
Go de waka wit dis not ɔltɛm, ɛn go de rid am bɔku tɛm insay di de. Ivin afta we yu dɔn lɛf fɔ smok, kɔntinyu fɔ rid di tin dɛn we de na dis not ɛnitɛm we yu fil fɔ smok.
Du sɔntin. Bifo di det rich we yu fɔ lɛf fɔ smok, bigin chenj tin dɛn we yu kin du we kin mek yu smok. Fɔ ɛgzampul, if yu kin smok fɔs tin we yu wek na mɔnin, nɔ du dat te afta wan ɔ tu awa. If yu kin smok we yu de it ɔ jɔs afta we yu it, chenj da abit de. Avɔyd ples dɛn usay ɔda pipul dɛn de smok. Go de praktis to yusɛf fɔ tɔk lawd wan se: “Nɔ, tɛnki. A dɔn lɛf fɔ smok.” Dɛn kayn tin dɛn ya go mek yu rili rɛdi fɔ di de we yu go lɛf fɔ smok. I go mek yu mɛmba bak se i nɔ go te, yu go bi pɔsin we nɔ de smok igen.
Rɛdi yusɛf. As di det de nia fɔ lɛ yu lɛf fɔ smok, bay af af cham-cham dɛn lɛk karɔt, chingɔm, nɔts, ɛn ɔda tin dɛn. Mɛmba yu padi ɛn fambul dɛn bɔt di det we yu go lɛf fɔ smok ɛn aw yu want mek dɛn sɔpɔt yu. Jɔs bifo di de rich we yu fɔ lɛf fɔ smok, trowe yu ashtre, layta, ɛn ɛnitin we go tɛmt yu fɔ smok lɛk sigrɛt dɛn we kin de arawnd yu os, na yu motoka ɔ pɔkit dɛn, ɔ na yu wokples. Fɔ tru, i at fɔ beg yu padi wan sigrɛt ɔ fɔ bay wan pakɛt sigrɛt pas fɔ jɔs pul wan insay yu drɔa! Dɔn bak, kɔntinyu fɔ pre to Gɔd fɔ mek i ɛp yu, ɛn yu fɔ du dat mɔ afta we yu smok yu las sigrɛt.—Lyuk 11:13.
Bɔku pipul dɛn dɔn kɔmɔt biɛn dɛn fek padi we de ambɔg dɛn bad bad wan, we na sigrɛt. Yusɛf go ebul fɔ kɔmɔt biɛn am. If yu du dat, yu go gɛt wɛlbɔdi ɛn yu go fil fayn we yu gɛt fridɔm.
[Pikchɔ]
Go de waka wit yu not ɔltɛm, ɛn go de rid am bɔku tɛm insay di de.