1, 2. (a) Aw mared bin bigin? (b) Wetin di fɔs man ɛn uman bin kam fɔ no bɔt mared? (Luk di pikchɔ nia dis atikul in taytul.)

NA NƆMAL tin fɔ lɛ pipul dɛn want fɔ mared. Bɔt aw mared bin bigin, ɛn wetin mek Gɔd mek mared? If wi no dat, i go ɛp wi fɔ tink di rayt we bɔt mared ɛn di blɛsin dɛn. Gɔd bin mek di fɔs man we na Adam ɛn aks am fɔ gi nem to ɔl di animal dɛn. Adam bin si se ɔl di animal dɛn we Jiova mek na bin man ɛn uman, bɔt nɔbɔdi nɔ bin de fɔ “ɛp am.” So Gɔd mek Adam slip dip dip wan, ɛn i bin tek wan pan in bon na in sayd fɔ mek wan uman. Jiova bin briŋ di uman to Adam, ɛn di uman bi in wɛf. (Rid Jɛnɛsis 2:​20-24.) As wi dɔn si, mared na gift we Jiova gi.

² Afta lɔng tɛm, Jizɔs bin ripit wetin Jiova bin tɔk na di gadin we bin de na Idɛn we i se: “Man go lɛf in papa ɛn mama, so dat in ɛn in wɛf go de wan ples, ɛn dɛn tu go de lɛkɛ se dɛn na wan pɔsin.” (Matyu 19:​4, 5) Bikɔs Gɔd bin tek wan bon na Adam in sayd fɔ mek di fɔs uman, dɛn bin kam fɔ no se dɛn fɔ de togɛda. Jiova nɔ bin ɛva want fɔ mek maredman ɛn in wɛf dayvɔs ɔ fɔ mek dɛn gɛt pas wan man ɔ wɛf di sem tɛm.

3. Wetin na wan impɔtant rizin we mek Gɔd mek mared?

³ Adam bin gladi wit in wɛf, ɛn gi am nem Iv. Na in na bin di uman we Gɔd gi Adam fɔ ɛp am. Adam ɛn Iv bin gladi fɔ de togɛda as maredman ɛn mareduman. (Jɛnɛsis 1:​28) Wan impɔtant rizin we mek Gɔd mek mared na fɔ bɔn pikin dɛn ɛn ful-ɔp di wɔl. (Jɛnɛsis 2:​18) Bɔy pikin dɛn ɛn gyal pikin dɛn kin lɛk dɛn mama ɛn papa bɔt as tɛm de go dɛn kin mared ɛn lɛf dɛn mama ɛn papa fɔ bigin dɛn yon famili. Mɔtalman dɛn fɔ ful-ɔp di wan ol wɔl ɛn mek am Paradays.

4. Wetin bin apin to di fɔs mared?

⁴ Di fɔs mared bin pwɛl we Adam ɛn Iv dɛn nɔ bin obe Jiova. Di “snek we dɛn kɔl Dɛbul ɔ Setan,” bin ful Iv ɛn tɛl am se if i it di frut we de na di “sɛns tik” i go gɛt spɛshal sɛns. Setan de tɛl Iv se if i it di frut, dat go alaw am fɔ no wetin gud ɛn wetin bad. Iv nɔ bin sho rɛspɛkt fɔ Adam as in man we de oba am we i bin disayd fɔ it di frut ɛn nɔ fɔs tɔk to in man bɔt am. Ɛn Adam nɔ bin obe Gɔd we i gri fɔ it di frut we in wɛf bin gi am.—Rɛvɛleshɔn 12:​9; Jɛnɛsis 2:​9, 16, 17; 3:​1-6.

5. Wetin wi lan frɔm di we aw Adam ɛn Iv bin ansa Jiova?

⁵ We Jiova bin aks dɛn bɔt wetin dɛn dɔn du, Adam bin blem in wɛf. I bin tɔk se: “Na di uman we yu put ya wit mi, gi mi fɔ it.” Iv insɛf bin blem di snek fɔ we i ful am. (Jɛnɛsis 3:​12, 13) Adam ɛn Iv bin gi ɛksyuz fɔ we dɛn nɔ obe Jiova, ɛn Jiova bin jɔj dɛn fɔ we dɛn tɔn dɛn bak pan am. So dɛn ɛgzampul na wɔnin to wi! Fɔ mek mared kɔmɔt fayn, maredman ɛn mareduman dɛn nid fɔ obe Jiova ɛn tek blem fɔ wetin dɛn de du.

6. Aw yu go ɛksplen Jɛnɛsis 3: 15?

⁶ Pan ɔl wetin Setan bin du na di gadin we bin de na Idɛn, Jiova bin mek shɔ se mɔtalman gɛt op fɔ tumara bambay. Wi go fɛn dis op pan di fɔs tin we di Baybul bin tɔk se go apin. (Rid Jɛnɛsis 3:​15.) Wetin di Baybul bin dɔn tɔk bin sho se “di uman” in “pikin” go dɔnawe wit Setan. Di bɔku bɔku enjɛl dɛn na ɛvin we de sav Jiova ɛn de du wetin rayt, gɛt tayt padi biznɛs wit Gɔd. Dɛn tan lɛk wɛf to Jiova. I go sɛn wan pan in enjɛl dɛn fɔ “wap” di Dɛbul. Dis pikin go mek am pɔsibul fɔ mɔtalman dɛn we de obe Gɔd fɔ ɛnjɔy wetin di fɔs man ɛn uman we bin mared lɔs. Mɔtalman dɛn we de obe go gɛt di chans fɔ de sote go na dis wɔl, jɔs lɛk aw Jiova bin want.—Jɔn 3:​16.

7. (a) Wetin dɔn apin to mared dɛn frɔm di tɛm we Adam ɛn Iv nɔ bin obe Gɔd? (b) Aw di Baybul se man ɛn uman we mared fɔ liv?

⁷ We Adam ɛn Iv nɔ bin obe Jiova,  dat bin afɛkt dɛn mared ɛn ɛni ɔda mared we bin apin afta dɛn. Fɔ ɛgzampul, Iv ɛn ɔl ɔda uman dɛn go sɔfa siriɔs pen bifo dɛn bɔn pikin. Uman dɛn go want fɔ lɛ dɛn man dɛn lɛk dɛn, bɔt dɛn man dɛn go yuz dɛn pawa fɔ kɔntrol dɛn, sɔntɛm dɛn go ivin de trit dɛn bad jɔs lɛk aw wi de si tide. (Jɛnɛsis 3:​16) Jiova want man dɛn we de oba dɛn famili fɔ bi pɔsin we lɛk dɛn famili, ɛn i want uman dɛn fɔ put dɛnsɛf dɔŋ to dɛn man dɛn. (Lɛta Fɔ Ɛfisɔs 5:​33) We man ɛn uman we na Kristian wok togɛda, dɛn go ebul fɔ ridyuz bɔku prɔblɛm dɛn.

8. Wetin na di istri bɔt mared frɔm Adam in tɛm te to di tɛm we di Ebi Ren bigin?

⁸ Bifo Adam ɛn Iv day, dɛn bin bɔn bɔy pikin ɛn gyal pikin dɛn. (Jɛnɛsis 5:​4) Dɛn fɔs bɔy pikin we nem Ken bin leta mared wan uman we na in fambul. Lamɛk we kɔmɔt na Ken in layn na bin di fɔs man we di Baybul tɔk bɔt se i mared tu wɛf dɛn. (Jɛnɛsis 4:​17, 19) Frɔm Adam in tɛm te to Noa in tɛm, di pipul dɛn we bin de wɔship Jiova nɔ bin bɔku. Sɔm pan dɛn fetful pipul dɛn de na bin Ebɛl, Inɔk, ɛn Noa wit in famili. Di Baybul se insay Noa in tɛm, “sɔm pan PAPA GƆD in pikin dɛn dɛn bin si se dɛn gyal pikin ya so fayn, so dɛn fɔl fɔ dɛn ɛn bigin mared dɛn.” Bɔt Gɔd nɔ bin mek enjɛl dɛn fɔ mared, ɛn di bɔy pikin dɛn we di enjɛl ɛn di uman dɛn bin bɔn na bin jayant dɛn we dɛn kɔl Nɛfilin, dɛn pikin ya bin lɛk fɛt-fɛt. Insay da tɛm de, “mɔtalman in wikɛdnɛs [bin] dɔn pasmak, ɛn na bad nɔmɔ i [bin] de mɛmba ɔl tɛm.”—Jɛnɛsis 6:​1-5.

9. Wetin Jiova bin du to di bad pipul dɛn insay Noa in tɛm? Us lɛsin wi lan frɔm wetin bin apin da tɛm de?

⁹ Jiova bin se i go mek di Ebi Ren kam na di wɔl fɔ dɔnawe with di bad pipul dɛn. Di Baybul se: “Na Noa nɔmɔ we bin de tɛl pipul fɔ du wetin rayt” bin tɛl di pipul dɛn bɔt di Ebi Ren we gɛt fɔ kam. (Pita In Sɛkɛn Lɛta 2:​5) Bɔt dɛn nɔ bin lisin to Noa bikɔs dɛn bin bizi de du ɔda tin dɛn lɛk fɔ mared. Jizɔs bin kɔmpia Noa in tɛm to wi tɛm. (Rid Matyu 24:​37-39.) Tide, bɔku pipul dɛn nɔ de lisin to di gud nyus bɔt Gɔd in Kiŋdɔm. Wi de prich dis mɛsej bifo Gɔd dɔnawe wit di bad bad pipul dɛn. Us lɛsin we wi go lan frɔm di Ebi Ren? Wi nɔ fɔ alaw mared ɛn fɔ bɔn pikin fɔ bi di tin we impɔtant na wi layf te wi fɔgɛt se Jiova in de dɔn kam nia.

10. (a) Insay bɔku kɔlchɔ dɛn, aw pipul dɛn bin de si mared ɛn mami ɛn dadi biznɛs di we aw Gɔd nɔ want? (b) Aw Ebraam ɛn Sera bin sɛt fayn ɛgzampul na dɛn mared?

¹⁰ Noa ɛn in tri bɔy pikin dɛn ɔl bin mared wan wɛf. Bɔt afta di Ebi Ren, bɔku man dɛn bin mared pas wan wɛf. Insay bɔku kɔlchɔ dɛn, fɔ du mami ɛn dadi biznɛs di we aw Gɔd nɔ want na tin we bin kɔmɔn ɛn na tin we dɛn bin ivin de du insay dɛn rilijɔn. We Ebraam ɛn Sera bin go de na Kenan, di pipul dɛn we bin de rawnd dɛn bin de du mami ɛn dadi biznɛs di we aw Gɔd nɔ  want ɛn dɛn nɔ bin gɛt wan rɛspɛkt fɔ mared. Jiova bin dɔnawe wit di siti dɛn we nem Sɔdɔm ɛn Gomɔra bikɔs di pipul dɛn we bin de de bin de du mami ɛn dadi biznɛs di we aw Gɔd nɔ want. Ebraam bin difrɛn frɔm dɛn pipul dɛn de. In na bin gud pɔsin we bin de oba in famili, ɛn Sera we na in wɛf bin sɛt fayn ɛgzampul bay we i bin put insɛf ɔnda in man. (Rid Pita In Fɔ Lɛta 3:​3-6.) Ebraam bin mek shɔ se in bɔy pikin Ayzak mared uman we de wɔship Jiova. Ɛn Ayzak bin du di sem tin fɔ in bɔy pikin Jekɔb, ɛn na in bɔy pikin dɛn bin bi gret gret granpa dɛn fɔ di 12 trayb dɛn na Izrɛl.

11. Aw di lɔ we Gɔd bin gi Mozis bin de protɛkt di Izrɛlayt dɛn?

¹¹ Leta, Jiova bin mek agrimɛnt wit di pipul dɛn na Izrɛl. I bin gi Mozis Lɔ fɔ gi di pipul dɛn; dis lɔ bin ɛp fɔ protɛkt maredman ɛn mareduman dɛn we bin de wɔship Jiova. Fɔ ɛgzampul, lɔ dɛn bin de fɔ mared, lɛk fɔ mared pas wan uman, ɛn di lɔ nɔ bin de alaw di Izrɛlayt dɛn fɔ mared pipul dɛn we de wɔship lay lay gɔd dɛn. (Rid Ditarɔnɔmi 7:​3, 4.) We siriɔs prɔblɛm de insay mared, di ɛlda dɛn go ɛp dɛn. Dɔn, lɔ dɛn bin de fɔ we pɔsin we mared du mami ɛn dadi biznɛs wit ɔda pɔsin, fɔ jɛlɔs, ɛn dawt di pɔsin we i mared. Dɛn bin de alaw dayvɔs, bɔt lɔ bin de fɔ protɛkt di wan dɛn we mared. Fɔ ɛgzampul, maredman kin dayvɔs in wɛf “bikɔs i nɔ de biev lɛkɛ mared uman.” (Ditarɔnɔmi 24:​1) Di Baybul nɔ ɛksplen wetin in min we i se uman we mared “nɔ de biev lɛkɛ mared uman,” bɔt man we mared nɔ gɛt rayt fɔ yuz di smɔl smɔl mistek dɛn we di uman du as rizin fɔ dayvɔs in wɛf.—Lɛvitikɔs 19:​18.

12, 13. (a) Insay Malakay in tɛm, aw sɔm man dɛn bin de trit dɛn wɛf dɛn? (b) Tide, if pɔsin we baptayz du mami ɛn dadi biznɛs wit ɔda pɔsin we nɔto in man ɔ wɛf, wetin dɛn go du to am?

¹² Insay prɔfɛt Malakay in tɛm, bɔku maredman dɛn we na Ju bin de fɛn ɔlkayn we fɔ dayvɔs dɛn wɛf dɛn. Dɛn man dɛn de bin de dayvɔs dɛn wɛf dɛn so dat dɛn go mared yɔŋ uman dɛn ɔ fɔ mared uman we nɔ de sav Jiova. Insay Jizɔs in tɛm, di Ju man dɛn bin de stil dayvɔs dɛn wɛf dɛn “fɔ ɛnikayn tin.” (Matyu 19:​3, NW) Jiova Gɔd et di wan dɛn we de dayvɔs dɛn maredman ɔ mareduman we dɛn nɔ gɛt rayt fɔ du dat.—Rid Malakay 2:​13-16.

¹³ Tide, Jiova in pipul dɛn nɔ fɔ kɔmɔt biɛn dɛn man ɔ wɛf, ɛn i nɔ kin apin so nɔmɔ. Bɔt lɛ wi se wan baptayz pɔsin we mared go du mami ɛn dadi biznɛs wit pɔsin we nɔto in man ɔ wɛf so dat i go dayvɔs ɛn mared ɔda pɔsin. If di pɔsin nɔ gri fɔ ripɛnt, dɛn go disfɛloship am fɔ mek di kɔngrigeshɔn klin. (Fɔs Lɛta Fɔ Kɔrint 5:​11-13) Di pɔsin gɛt fɔ “lɛf fɔ du dɛn tin we nɔ rayt na Gɔd yay ɛn du dɛn tin we go sho se [i] dɔn lɛf fɔ du dɛn” bifo dɛn tek am bak na di kɔngrigeshɔn. (Lyuk 3:​8; Sɛkɛn Lɛta Fɔ Kɔrint 2:​5-10) No patikyula tɛm nɔ de we fɔ pas fɔs bifo dɛn tek di pɔsin bak na di kɔngrigeshɔn. Infakt, i kin tek lɛk wan ia so ɔ i kin ivin pas dat fɔ lɛ pɔsin we dɔn sin pruv se  i dɔn rili ripɛnt ɛn fɔ mek dɛn tek am bak na di kɔngrigeshɔn. Ɛn pan ɔl dat, di pɔsin go “tinap bifo Gɔd we go jɔj wi.”—Lɛta Fɔ Rom 14:​10-12; luk Di Wachtawa, Novɛmba 15, 1979, pej 31 ɛn pej 32.

14. Wetin mek di Lɔ bin de? Us nyu agrimɛnt Jizɔs bin tɔk bɔt?

¹⁴ I pas 1,500 ia we di Izrɛlayt dɛn bin de ɔnda di Lɔ we Gɔd bin gi Mozis. Bɔku bɔku we dɛn de we da Lɔ de bin de ɛp Gɔd in pipul dɛn. Fɔ ɛgzampul, i bin gi dɛn advays bɔt aw fɔ sɔlv di prɔblɛm dɛn na dɛn famili, ɛn i bin de gayd dɛn fɔ no udat na di Mɛsaya. (Lɛta Fɔ Galeshya 3:​23, 24) We Jizɔs day, di Lɔ bin dɔn ɛn Gɔd bin mek nyu agrimɛnt. (Di Ibru Pipul Dɛn 8:​6) But sɔm tin dɛn bin de we dɛn bin de du ɔnda di Lɔ we Gɔd bin gi Mozis we Kristian dɛn we de tide nɔ de du.

15. (a) Us rayt we Gɔd want mared fɔ de insay di Kristian kɔngrigeshɔn? (b) Wetin-ɛn-wetin pɔsin we na Kristian fɔ tink bɔt bifo i disayd fɔ dayvɔs?

¹⁵ Wan de, di Faresi dɛn bin aks Jizɔs wan kwɛstyɔn bɔt mared. Jizɔs bin ansa dɛn se Gɔd bin de alaw di Izrɛlayt dɛn fɔ dayvɔs we dɛn bin de ɔnda di Lɔ we I bin gi to Mozis pan ɔl we nɔto dat Gɔd bin want. (Matyu 19:​6-8) Di ansa we Jizɔs bin gi sho se di we aw Gɔd bin want mared fɔ de nɔ chenj ɛn na so Kristian dɛn we mared fɔ de tide. (Fɔs Lɛta To Timoti 3:​2, 12) Maredman ɛn in wɛf fɔ de togɛda as “wan pɔsin.” Di lɛk we dɛn lɛk Gɔd ɛn di lɛk we dɛn lɛk dɛnsɛf go mek dɛn kɔntinyu fɔ gɛt wanwɔd. Ɛnibɔdi we dayvɔs in man ɔ in wɛf we i bi se no wan pan dɛn nɔ du mami ɛn dadi biznɛs di we aw Gɔd nɔ want, nɔ fri fɔ mared to ɔda pɔsin. (Matyu 19:​9) Sɔmbɔdi kin disayd fɔ fɔgiv in man ɔ in wɛf we dɔn go du mami ɛn dadi biznɛs wit ɔda pɔsin bɔt we dɔn ripɛnt. Na dat bin mek Jiova bin de fɔgiv di Izrɛlayt dɛn we dɛn ripɛnt, ɛn na dat bin mek Prɔfɛt Ozie fɔgiv in wɛf Goma, we bin de du mami ɛn dadi biznɛs wit ɔda pɔsin. (Ozie 3:​1-5) Dɔn, if di man ɔ wɛf kam fɔ no se in man ɔ in wɛf dɔn du mami ɛn dadi biznɛs wit ɔda pɔsin ɛn i disayd fɔ du mami ɛn dadi biznɛs bak wit am, dat min se i dɔn fɔgiv in man ɔ in wɛf. Da tɛm de, di Baybul nɔ gi am no rayt fɔ dayvɔs.

16. Wetin Jizɔs bin tɔk bɔt dɛn wan we nɔ mared?

¹⁶ Jizɔs bin se tru Kristian dɛn nɔ fɔ dayvɔs dɛn man ɔ wɛf pas nɔmɔ if i du mami ɛn dadi biznɛs wit ɔda pɔsin. Dɔn Jizɔs tɔk bɔt di wan dɛn we nɔ mared. I ɛnkɔrej di wan dɛn we ebul fɔ de we dɛn nɔ mared fɔ kɔntinyu. (Matyu 19:​10-12, NW) Bɔku Kristian dɛn dɔn disayd nɔ fɔ mared bikɔs dɛn want fɔ du mɔ fɔ sav Jiova, ɛn dɛn nɔ want natin fɔ ambɔg dɛn, so i fayn fɔ tɛl dɛn tɛnki fɔ dat!

17. Wetin kin ɛp Kristian fɔ disayd if i want fɔ mared?

¹⁷ Wetin go ɛp pɔsin fɔ disayd if i fɔ mared ɔ nɔ fɔ mared? Di pɔsin nid fɔ no if i go gladi if i disayd se i nɔ want fɔ mared. Di apɔsul Pɔl bin tɔk gud tin bɔt we pɔsin nɔ mared. Bɔt i bin tɔk bak se:  “Bikɔs fri layf plɛnti na [di] wɔl, i bɛtɛ fɔ lɛ man gɛt in wɛf ɛn mek uman mared.” Pɔl bin tɔk bak se: “If una nɔ ebul kɔntrol unasɛf, una fɔ mared: i bɛtɛ fɔ mared pas fɔ sɔfa bikɔs una want man ɔ uman bad bad.” So pɔsin kin disayd fɔ mared so dat di we aw i de fil nɔ go mek i gɛt di abit fɔ de ple ple wit insɛf ɔ fɔ du mami ɛn dadi biznɛs di we aw Gɔd nɔ want. Bɔt di wan dɛn we nɔ mared yet nid fɔ rili tink if dɛn dɔn rich fɔ mared. Pɔl bin se: “If di man fil se wetin i de du to di uman nɔ fayn we i nɔ ebul kɔntrol insɛf, ɛn i fil se dɛn jɛs gɛt fɔ mared, dɛn fɔ mared. Dat nɔto sin.” (Fɔs Lɛta Fɔ Kɔrint 7:​2, 9, 36; Fɔs Lɛta To Timoti 4:​1-3) Yu nɔ fɔ ɛnkɔrej yɔŋ pɔsin fɔ mared jɔs bikɔs i rili want fɔ du mami ɛn dadi biznɛs. Da pɔsin de nɔ kin machɔ gud wan fɔ du di wok we mared pɔsin fɔ du. (Fɔs Lɛta To Timoti 4:​1-3)

18, 19. (a) Udat Kristian dɛn fɔ mared? (b) Wetin wi go tɔk bɔt na di nɛks atikul?

¹⁸ Kristian mared fɔ apin bitwin man ɛn uman we baptayz ɛn we lɛk Jiova wit ɔl dɛn at. Dɛn fɔ rili lɛk dɛnsɛf ɛn want fɔ de togɛda sote go. Jiova go blɛs dɛn bikɔs dɛn obe di advays fɔ mared to man ɔ uman “we biliv di Masta.” (Fɔs Lɛta Fɔ Kɔrint 7:​39, NW) Ɛn dɛn mared-os go go bifo if dɛn kɔntinyu fɔ obe di advays dɛn we de na di Baybul.

¹⁹ Tide, wi de insay “di las dez” ɛn bɔku pipul dɛn nɔ gɛt di kwaliti dɛn we dɛn nid fɔ mek dɛn mared-os go bifo. (Sɛkɛn Lɛta To Timoti 3:​1-5) Insay di nɛks atikul, wi go tɔk bɔt fayn advays dɛn frɔm di Baybul we go ɛp Kristian dɛn fɔ mɛk dɛn mared-os go bifo ɛn fɔ mek dɛn gɛt gladi at pan ɔl we bɔku prɔblɛm dɛn go de. Dis go ɛp dɛn fɔ kɔntinyu fɔ waka na di rod we go mek dɛn gɛt layf we go de sote go.—Matyu 7:​13, 14.