Fɔ was an na bin wan pan di bɔku tin dɛn we Jizɔs in ɛnimi dɛn bin de tɔk bad bɔt Jizɔs ɛn in disaypul dɛn. Di Lɔ we Gɔd bin gi Mozis bin ɛksplen wetin go mek pɔsin nɔ klin, fɔ ɛgzampul, we pɔsin gɛt dischaj, lɛprɔsi, ɔ we i tɔch mɔtalman ɔ animal we dɔn day. Di Lɔ bin tɔk bɔt aw pɔsin go klin bak. Dɛn go klin bak we dɛn mek sakrifays, we dɛn was, ɔ sɛn sɛn wata.—Lɛvitikɔs, chapta 11-15; Di Nɔmba Dɛm, chapta 19.

Di Ju ticha dɛn we dɛn bin de kɔl rabay, bin ad dɛn yon lɔ dɛn to di Lɔ we Gɔd bin gi Mozis. Sɔmbɔdi bin se di rabay dɛn bin mek bɔku ɔda lɔ dɛn bɔt wetin go mek pɔsin nɔ klin ɛn aw i go mek ɔda pɔsin dɔti. Di rabay dɛn bin mek lɔ dɛn bɔt uskayn tin dɛn we pipul dɛn go yuz we go mek dɛn klin ɔ dɛn nɔ klin ɛn di sɛrimoni we di pipul dɛn nid fɔ pas fɔ mek dɛn klin bak.

Jizɔs in ɛnimi dɛn bin aks am se: “Wetin du yu lanin bɔy dɛn nɔ de du lɛkɛ aw wi grampapa papa dɛn lan wi? Wetin du dɛn nɔ de was dɛn an di spɛshal we bifo dɛn it?” (Mak 7:​5) Dɛn Faresi dɛn de nɔ bin min di gud we aw wi kin was wi an bifo wi it. Di Faresi dɛn bin mek di lɔ se bifo pɔsin it, dɛn fɔ tɔn wata na i an as sɛrimoni. Di sem pɔsin we wi bin dɔn tɔk bɔt fɔs tɔk bak se di rabay dɛn bin “de agyu bɔt uskayn pan ɔ kɔp dɛn fɔ yuz fɔ tɔn di wata, uskayn wata go fayn fɔ yuz, udat fɔ tɔn di wata, ɛn usay di wata fɔ tap we dɛn de was di an.”

Wetin Jizɔs bin se bɔt ɔl dɛn bɔku lɔ ya we mɔtalman dɛn bin mek? I bin tɛl di Ju Lɔ Ticha dɛn se: “Na tru da lɔntɛm prɔfɛt we nem Ayzaya bin tɔk bɔt una wɛn i rayt se, ‘Gɔd se, dɛn pipul ya rɛspɛkt mi wit dɛn mɔt, bɔt dɛn nɔ want du wetin a tɛl dɛn fɔ du, bikɔs dɛn at nɔ de fɔ mi [Jiova]. Di pre we dɛn de pre to mi nɔ min natin, bikɔs dɛn de lan pipul dɛn lɔ we nɔto mi yon!’” Jizɔs kɔntinyu fɔ tɔk se: “Una dɔn tap fɔ du wetin Gɔd tɛl mɔtalman fɔ du, ɛn una de du ɔl wetin mɔtalman tɛl una fɔ du.”—Mak 7:​6-8.