1, 2. Wetin mek wi fɔ tren ɔda pipul dɛn fɔ du di wok we go mek di gud nyus go bifo?

JIZƆS bin wok tranga wan fɔ prich bɔt Gɔd in Kiŋdɔm. I bin spɛn bɔku tɛm de tren in disaypul dɛn. I bin sho dɛn aw fɔ tich ɛn aw fɔ kia fɔ Gɔd in pipul dɛn. Di disaypul dɛn bin lan fɔ bi lɛk shɛpad we de kia fɔ ship. (Matyu 10:​5-7) Filip bin rili bizi de prich di gud nyus bɔt i bin tren in gyal pikin dɛn bak fɔ du di sem wok. (Di Apɔsul Dɛn Wok 21:​8, 9) Tide, wisɛf nid fɔ tren ɔda pipul dɛn. Wetin mek?

² Insay kɔngrigeshɔn dɛn we de ɔlsay na di wɔl, plɛnti nyu wan dɛn de we nɔ baptayz yet. Wi nid fɔ tren dɛn nyu wan dɛn ya. Wi fɔ ɛp dɛn fɔ ɔndastand wetin mek i fayn fɔ mek dɛn rid ɛn stɔdi di Baybul fɔ dɛnsɛf. Ɛn wi nid fɔ tren dɛn bak fɔ prich ɛn tich di gud nyus. Wi nid fɔ tren brɔda dɛn we jɔs baptayz so dat as tɛm de go dɛn go bi ministerial savant ɛn ɛlda dɛn. Wi ɔl na di kɔngrigeshɔn  kin du mɔ fɔ ɛp dɛn nyu wan dɛn ya.—Prɔvabs 4:​2.

3, 4. (a) Aw wetin Pɔl bin tɔk bɔt fɔ stɔdi di Baybul gɛt sɔntin fɔ du wit fɔ ebul prich fayn? (b) Bifo wi ɛnkɔrej wi Baybul stɔdi dɛn fɔ stɔdi di Baybul fɔ dɛnsɛf, wetin wisɛf fɔ de du?

³ Jiova in savant dɛn nid fɔ rid ɛn stɔdi di Baybul so dat dɛn go no wetin Gɔd want. Di apɔsul Pɔl bin ɛksplen dis to in brɔda ɛn sista dɛn na Kɔlɔse we i se: “Wi de pre fɔ una ɔltɛm. Wi de aks Gɔd mek in Spirit gi una sɛns ɛn mek una sabi bɔt am.” Wetin mek i impɔtant fɔ mek dɛn rid ɛn stɔdi di Baybul? Bikɔs dis go gi dɛn sɛns ɛn ɛp dɛn fɔ ɔndastand aw dɛn go “ebul du wetin di Masta [Jiova, NW] want,” ɛn ɔltɛm dɛn “go de du di tin we go mek i gladi.” I go ɛp dɛn bak fɔ “du ɔl kayn gud wok” we Jiova want dɛn fɔ du, mɔ fɔ prich di gud nyus. (Lɛta Fɔ Kɔlɔse 1:​9, 10) So if wi de stɔdi wit pɔsin, wi nid fɔ ɛp am fɔ ɔndastand se we i rid ɛn stɔdi di Baybul ɔltɛm, dat go ɛp am fɔ sav Jiova.

⁴ Wi nɔ go ebul fɔ ɛp wi Baybul stɔdi fɔ ɔndastand wetin mek i impɔtant fɔ stɔdi fɔ insɛf if wisɛf nɔ de stɔdi di Baybul. Infakt, if wisɛf de rid di Baybul ɔltɛm ɛn de tink gud wan bɔt wetin wi de rid, dis go ɛp wi na wi layf ɛn we wi de prich. Fɔ ɛgzampul, we wi kin de fil savis ɛn pɔsin aks wi kwɛstyɔn we at fɔ ansa, wi go ebul fɔ yuz di Baybul fɔ ansa di pɔsin. Ɔ we wi rid bɔt Jizɔs, Pɔl, ɛn ɔda wan dɛn we nɔ bin ɛva giv ɔp we dɛn bin de prich, dis go gi wi kɔrej ɛn wi go kɔntinyu fɔ prich pan ɔl we i nɔ izi. Ɛn we wi tɛl ɔda pipul dɛn wetin wi dɔn lan frɔm wetin wi stɔdi ɛn aw i dɔn ɛp wi, wi de ɛp dɛn fɔ lɛ dɛn stɔdi di Baybul gud gud wan so dat dɛnsɛf go gɛt di bɛnifit we wi de gɛt.

5. Sho wan we aw wi go ɛp di nyu wan dɛn fɔ de stɔdi di Baybul fɔ dɛnsɛf ɔltɛm.

⁵ Yu go aks se: ‘Aw a go tren mi Baybul stɔdi fɔ stɔdi di Baybul ɔltɛm?’ Sɔntɛm yu go sho am aw fɔ pripia wetin de insay di buk we una de stɔdi. Yu kin tɛl am bak fɔ rid mɔ bɔt di tɔpik we una de stɔdi na di say na di buk Wetin Rili di Baybul De Tich? we nem Mɔ Tin dɛn fɔ No ɛn mek i luk di skripchɔ dɛn we de de. Dɔn bak yu kin sho am aw fɔ pripia fɔ  di mitin dɛn so dat i go ebul fɔ gi kɔmɛnt. Ɛnkɔrej am fɔ mek i go de rid ɛni Wachtawa ɛn Awake! magazin we kɔmɔt. Fɔ ɛgzampul, yu kin sho am aw fɔ yuz di Watchtower Library ɔ di Wachtawa LAYBRI NA DI INTANƐT fɔ fɛn di Baybul in ansa to sɔm kwɛstyɔn dɛn. We i tray dɛn difrɛn we ya fɔ stɔdi fɔ insɛf, i go de ɛnjɔy am ɛn i go want fɔ lan mɔ.

6. (a) Aw yu go ɛp yu studɛnt fɔ rili lɛk fɔ rid di Baybul? (b) Wetin yu Baybul stɔdi go du if i dɔn rili lɛk fɔ stɔdi di Baybul?

⁶ We wi de stɔdi wit pɔsin, wi want mek i no se di Baybul impɔtant bikɔs i de ɛp am fɔ no Jiova mɔ. Bifo wi mɔna am ɔ fos am fɔ stɔdi, wi fɔ sho am aw i go ɛnjɔy fɔ stɔdi. Di mɔ i de lan frɔm di Baybul, na di mɔ i de fil aw wan pan di man dɛn we rayt di Sam buk bin de fil we i siŋ se: “Bɔt fɔ mi yon say, i fayn fɔ de nia PAPA GƆD. A dɔn de nia PAPA GƆD we na mi PAPA GƆD, fɔ de kɔba mi.” (Sam 73:​28) Jiova in spirit go mɔs ɛp pɔsin we want fɔ kam nia am.

7. Aw Jizɔs bin tren di wan dɛn we de prich di gud nyus? (Luk di pikchɔ nia dis atikul in taytul.)

⁷ Wi kin lan bɔku tin frɔm di we aw Jizɔs bin tren in apɔsul dɛn. Jizɔs bin de go wit dɛn we i bin de go prich, ɛn dɛn bin de wach aw i de tich pipul dɛn. I bin tɛl dɛn klia wan aw dɛn fɔ prich. (Matyu, chapta 10) ^[1] (Luk di ɛndnot ɔnda di las paregraf.) I nɔ tu te, di apɔsul dɛn bin lan frɔm Jizɔs aw fɔ tich pipul dɛn di trut. (Matyu 11:​1) Lɛ wi lan bɔt tu tin dɛn we wi go du we wi de tren nyu wan dɛn fɔ prich.

8, 9. (a) Aw Jizɔs bin de tɔk to pipul dɛn we i bin de prich to wan bay wan? (b) Aw wi go ɛp nyu pɔblisha dɛn fɔ tɔk wit pipul dɛn lɛk aw Jizɔs bin du?

⁸ Fɔ tɔk wit pipul dɛn. Nɔto ɔltɛm Jizɔs bin de prich to krawd. Bɔku tɛm, i bin de tɔk to pipul dɛn wan bay wan, ɛn i bin de tɔk to dɛn lɛk padi. Fɔ ɛgzampul, i bin ɛnjɔy fɔ tɔk to wan uman we bin kam gɛt wata frɔm wan watawɛl nia wan siti we dɛn kɔl Sayka. (Jɔn 4:​5-30) Jizɔs bin tɔk bak wit Matyu Livay we na pɔsin we de gɛda tɛks, ɛn i bin tɛl am fɔ bi in disaypul. Matyu bin gri ɛn leta i bin invayt Jizɔs ɛn ɔda pipul dɛn fɔ kam it na in os. Da tɛm de, Jizɔs bin tɔk wit bɔku pipul dɛn.—Matyu 9:​9; Lyuk 5:​27-39.

⁹ Jizɔs bin tɔk to Natanyɛl lɛk padi, pan ɔl we Natanyɛl nɔ bin de tɔk fayn tin bɔt pipul dɛn we kɔmɔt Nazarɛt. Bikɔs Jizɔs bin tɔk to Natanyɛl lɛk padi, i bin chenj di we aw i bin fil bɔt  Jizɔs we kɔmɔt Nazarɛt. Ɛn Natanyɛl bin want fɔ lan mɔ frɔm Jizɔs. (Jɔn 1:​46-51) Frɔm Jizɔs in ɛgzampul, wi lan se if wi de tɔk to pipul dɛn fayn lɛk padi, dɛn go lisin to wetin wi de se. ^[2] [Luk di ɛndnot ɔnda di las paregraf.] We wi tren nyu pɔblisha dɛn fɔ tɔk dis kayn we, dɛn go ɛnjɔy fɔ prich mɔ ɛn mɔ.

10-12. (a) Aw Jizɔs bin de ɛp di wan dɛn we de sho se dɛn want fɔ lisin to di gud nyus? (b) Aw wi go ɛp nyu pɔblisha dɛn fɔ rili sabi fɔ tich pipul dɛn di tru tin dɛn we de na di Baybul?

¹⁰ Fɔ tich di wan dɛn we want fɔ lisin. Jizɔs bin rili gɛt bɔku tin fɔ du. Bɔt we pipul dɛn bin want fɔ lisin to am, i bin de spɛn tɛm wit dɛn ɛn tich dɛn bɔku tin. Fɔ ɛgzampul, wan de bɔku bɔku pipul dɛn bin gɛda nia di si fɔ lisin to Jizɔs. So Jizɔs bin go insay wan bot wit Pita ɛn na insay de i bin de we i bin de tich di pipul dɛn. Afta dat, i bin want fɔ tich Pita wan lɛsin. Jizɔs bin du wan mirekul bay we i mek Pita kech bɔku bɔku fish dɛn. I bin tɛl Pita se: “Frɔm tide sote go, yu go briŋ pipul kam to mi lɛkɛ aw yu bin de kech fish.” Wantɛm wantɛm Pita ɛn di ɔda wan dɛn “drɔ dɛn bot kam na di bich, dɛn lɛf ɔltin we dɛn bin gɛt biɛn, ɛn fala Jizɔs.”—Lyuk 5:​1-11.

¹¹ Nikodimɔs sɛf bin want fɔ lan mɔ frɔm Jizɔs. Bɔt bikɔs Nikodimɔs na bin mɛmba na di Ju Ay kɔt, i bin de fred wetin ɔda pipul dɛn go tɔk if dɛn si am de tɔk to Jizɔs. So i bin go fɛn Jizɔs na nɛt. Bɔt Jizɔs nɔ bin tɛl am fɔ go bak, bifo dat i bin spɛn tɛm wit am fɔ ɛksplen impɔtant tin dɛn bɔt Gɔd to am. (Jɔn 3:​1, 2) Ɔltɛm Jizɔs bin rɛdi fɔ yuz in tɛm fɔ tich pipul dɛn di tru ɛn fɔ mek dɛn gɛt mɔ fet. Semweso, wi nid fɔ rɛdi ɔltɛm fɔ go to pipul dɛn di tɛm we fayn fɔ dɛn, ɛn wi nid fɔ spɛn tɛm wit dɛn fɔ ɛp dɛn fɔ ɔndastand di Baybul.

¹² We wi de prich wit nyu wan dɛn, wi fɔ tich dɛn fɔ go bak to pɔsin we want fɔ mek wi kɔntinyu fɔ tɔk wit am. Wi kin tɛl nyu wan dɛn bak fɔ jɔyn wi we wi de go du ritɔn visit ɛn Baybul stɔdi. If wi du dat, dɛn go lan aw fɔ tich ɔda pipul dɛn ɛn dɛn go si se we wi de ɛp pipul dɛn fɔ lan di tru bɔt Jiova, dat de mek wi fil fayn. Dɔn dɛn nyu wan ya go gladi fɔ go to pipul dɛn bak ɛn kɔndɔkt Baybul stɔdi wit dɛn. Dɛn go lan bak fɔ peshɛnt ɛn nɔ fɔ giv ɔp kwik we dɛn nɔ mit pɔsin we dɛn bin dɔn prich to na in os.—Lɛta Fɔ Galeshya 5:​22; luk di bɔks we gɛt di taytul “I Nɔ Bin Giv Ɔp.”

13, 14. (a) Wetin yu tink bɔt di wan dɛn we di Baybul tɔk bɔt we bin de ɛp dɛn kɔmpin dɛn? (b) Us we dɛn we yu go tren nyu pɔblisha dɛn ɛn yɔŋ wan dɛn fɔ sho se dɛn lɛk dɛn brɔda ɛn sista dɛn?

¹³ Jiova want in savant dɛn fɔ lɛk dɛnsɛf lɛk brɔda ɛn sista dɛn ɛn fɔ ɛp dɛnsɛf. (Rid Lyuk 22:​24-27; Pita In Fɔs Lɛta 1:​22.) Di Baybul ɛksplen se Jizɔs bin gi ɔltin, ivin in layf fɔ ɛp ɔda pipul dɛn. (Matyu 20:​28) Dɔkas “kin de du gud ɛn i kin de ɛp dɛn po pipul.” (Di Apɔsul Dɛn Wok 9:​36, 39) Meri bin de “wok traŋa wan” fɔ in  brɔda ɛn sista dɛn we bin de na Rom. (Lɛta Fɔ Rom 16:​6) Aw wi go ɛp nyu wan dɛn fɔ ɔndastand se i rili impɔtant fɔ du gud tin dɛn fɔ dɛn brɔda ɛn sista dɛn?

¹⁴ Wi kin tɛl nyu wan dɛn fɔ go wit wi we wi de go fɛn di wan dɛn we ol ɔ di wan dɛn we sik. Ɛn we mama ɛn papa dɛn de go fɛn dɛn wan dɛn we sik ɔ we dɔn ol, dɛn fɔ kɛr dɛn pikin dɛn go if chans de. Di ɛlda dɛn fɔ aks di yɔŋ wan dɛn ɔ di nyu wan dɛn fɔ ɛp dɛn if nid de fɔ mek it fɔ dɛn ol wan dɛn ya ɔ fɔ mek di say dɛn we dɔn pwɛl na dɛn os. We di yɔŋ wan dɛn ɔ di nyu wan dɛn si aw di brɔda ɛn sista dɛn de kia fɔ dɛnsɛf, dɛn go lan fɔ du di sem tin. Fɔ ɛgzampul, we wan ɛlda kin de prich na wan smɔl tɔŋ, i kin lɛk fɔ go fɛn di brɔda dɛn we de de fɔ si aw dɛn de du. Wan yɔŋ brɔda we bin de go wit am bin lan fayn tin frɔm di ɛlda, dat na fɔ tink bɔt wetin i go du fɔ ɛp in brɔda ɛn sista dɛn.—Lɛta Fɔ Rom 12:​10.

15. Wetin mek i impɔtant fɔ mek ɛlda dɛn ɛp brɔda dɛn fɔ go bifo na di kɔngrigeshɔn?

¹⁵ Jiova dɔn gi man dɛn di wok fɔ tich Gɔd in Wɔd na di kɔngrigeshɔn. So i rili impɔtant fɔ lɛ brɔda dɛn lan aw fɔ tich fayn wan we dɛn de gi tɔk. If yu na ɛlda, sɔntɛm yu go lisin to wan ministerial savant we i de praktis in tɔk ɛn ɛp am fɔ du am fayn fayn wan. (Nɛimaya 8:​8.) ^[3]—Luk di ɛndnot ɔnda di las paregraf.

16, 17. (a) Wetin Pɔl bin du fɔ ɛp Timoti fɔ go bifo na di kɔngrigeshɔn? (b) Aw di ɛlda dɛn go rili tren brɔda dɛn we gɛt fɔ bi ɛlda tumara bambay?

¹⁶ Nid de fɔ mek dɛn tren bɔku brɔda dɛn fɔ bi shɛpad dɛn na di kɔngrigeshɔn. Pɔl bin tren Timoti ɛn i bin ɛnkɔrej am fɔ tren ɔda pipul dɛn. Pɔl bin se: “Lɛ di gud we Gɔd de du fɔ wi, bikɔs wi gɛt wanwɔd wit Jizɔs Krays, mek yu tinap traŋa. Dɛn wɔd we yu kin yɛri a de tɛl plɛnti pipul, yusɛf fɔ tɛl dɛn pipul we yu kin abop pan, we go kip dɛn na dɛn at, so dat dɛnsɛf go ebul lan ɔda pipul dɛn sem tin ya.” (Sɛkɛn Lɛta To Timoti 2:​1, 2) Pɔl na bin ɛlda ɛn apɔsul. Timoti bin lan bɔku tin dɛn frɔm Pɔl bɔt aw fɔ prich ɛn aw fɔ ɛp ɔda pipul dɛn na di kɔngrigeshɔn.—Sɛkɛn Lɛta To Timoti 3:​10-12.

¹⁷ Pɔl bin spɛn bɔku tɛm wit Timoti bikɔs i bin want fɔ mek shɔ se i tren  Timoti gud gud wan. (Di Apɔsul Dɛn Wok 16:​1-5) Ɛlda dɛn kin falamakata Pɔl bay we dɛn de go wit ministerial savant dɛn we fit, fɔ go ɛnkɔrej ɔda brɔda ɛn sista dɛn. We dɛn de du dat, ministerial savant dɛn go lan frɔm ɛlda dɛn aw fɔ tich ɔda pipul dɛn, aw fɔ peshɛnt ɛn lɛk ɔda pipul dɛn, ɛn aw fɔ abop pan Jiova we dɛn de kia fɔ di kɔngrigeshɔn.—Pita In Fɔs Lɛta 5:​2.

18. Wetin mek i rili impɔtant fɔ tren ɔda pipul dɛn fɔ du Jiova in wok?

¹⁸ Dis tɛm we wi de so, nid de fɔ tren bɔku nyu wan dɛn fɔ lɛ dɛn sabi aw fɔ prich fayn fayn wan. Nid de bak fɔ mek brɔda dɛn lan aw fɔ kia fɔ di kɔngrigeshɔn. Jiova want fɔ mek dɛn tren ɔl in savant dɛn fayn fayn wan ɛn i dɔn gi wi di ɔnɔ fɔ ɛp nyu wan dɛn. So i impɔtant fɔ wok tranga wan fɔ tren ɔda pipul dɛn jɔs lɛk aw Jizɔs ɛn Pɔl bin du. Wi nid fɔ tren bɔku bɔku pipul dɛn bikɔs wi stil gɛt bɔku tin fɔ du na di prichin wok bifo di ɛnd kam.

19. Wetin mek wi shɔ se wi go ebul fɔ ɛp ɔda pipul dɛn fɔ du Jiova in wok if wi du ɔl wetin wi ebul fɔ tren dɛn?

¹⁹ Wi nid fɔ yuz plɛnti tɛm ɛn wok tranga wan fɔ ebul tren nyu wan dɛn. Bɔt wi shɔ se Jiova ɛn Jizɔs go ɛp wi fɔ no aw fɔ tren ɔda pipul dɛn fayn fayn wan. Wi kin gladi we wi kin si di wan dɛn we wi dɔn tren “de wok traŋa wan” na di kɔngrigeshɔn ɔ na di prichin wok. (Fɔs Lɛta To Timoti 4:​10) Ɛn wi nid fɔ kɔntinyu fɔ du wi bɛst so dat wi go go bifo pan Gɔd biznɛs, wi go gɛt mɔ fayn kwaliti dɛn, ɛn wi go go nia Jiova mɔ ɛn mɔ.