1, 2. (a) Aw wi no se i pɔsibul fɔ mek wi gɛt di nyu abit dɛn? (b) Us kwaliti dɛn we pɔsin we gɛt di nyu abit dɛn kin gɛt we Lɛta Fɔ Kɔlɔse 3:​10-14 tɔk bɔt?

INSAY di New World Translation of the Holy Scriptures, dɛn tɔk bɔt “nyu abit dɛn” tu tɛm. (Lɛta Fɔ Ɛfisɔs 4:​24, NW; Lɛta Fɔ Kɔlɔse 3:​10, NW) Dis na di abit dɛn we gri wit wetin “Gɔd want.” Yu tink se i pɔsibul fɔ mek wi gɛt dɛn nyu abit dɛn de? Yɛs, i pɔsibul. Jiova mek mɔtalman lɛk aw i tan, so wi ebul fɔ falamakata in fayn fayn kwaliti dɛn.—Jɛnɛsis 1:​26, 27; Lɛta Fɔ Ɛfisɔs 5:​1.

² Na tru se bikɔs wi nɔ pafɛkt, sɔntɛnde wi kin tink bɔt bad tin dɛn. Dɔn, di tin dɛn we de arawnd wi kin afɛkt wi. Bɔt Jiova de sɔri fɔ wi ɛn ɛp wi fɔ mek wi bi di kayn pɔsin we i want wi fɔ bi. Fɔ mek wi mekɔp wi maynd fɔ du dis, lɛ wi tɔk bɔt kwaliti dɛn we pɔsin we gɛt di nyu abit dɛn kin gɛt. (Rid Lɛta Fɔ Kɔlɔse 3:​10-14.) Dɔn wi go si aw wi  go sho dɛn kwaliti dɛn ya we wi de du wi prichin wok.

3. Wetin na wan pan di kwaliti dɛn we pɔsin we gɛt di nyu abit dɛn fɔ gɛt?

³ Pɔl bin ɛksplen se we wi nɔ lɛk wan pɔsin pas di ɔda wan, dat na wan impɔtant we fɔ sho se wi gɛt di nyu abit dɛn. I tɔk se: “Dɛn Ju pipul ɛn dɛn pipul we nɔto Ju, dɛn pipul we sakɔmsayz ɛn dɛn wan we nɔ sakɔmsayz, dɛn pipul we na trenja, dɛn pipul we nɔ sivilayz, dɛn pipul we na slev ɛn dɛn wan we nɔto slev, dɛn ɔl na wan na Gɔd in yay.” Insay di kɔngrigeshɔn, nɔbɔdi nɔ fɔ fil se i bɛtɛ pas in kɔmpin bikɔs i gɛt difrɛn kɔlɔ, i kɔmɔt na difrɛn kɔntri, ɔ i gɛt pozishɔn na di eria usay i de. Wetin mek? Na bikɔs Krays in disaypul dɛn ɔl “dɔn bi wan.”—Lɛta Fɔ Kɔlɔse 3:​11; Lɛta Fɔ Galeshya 3:​28.

4. (a) Aw Jiova in savant dɛn fɔ trit ɔda pipul dɛn? (b) Wetin kin apin we kin mek i nɔ izi fɔ mek Kristian dɛn gɛt wanwɔd?

⁴ We wi gɛt di nyu abit dɛn, wi go trit ɔda pipul dɛn wit rɛspɛkt ɛn sho ɔnɔ to dɛn ilɛk us kɔlɔ dɛn gɛt ɔ usay dɛn kɔmɔt. (Lɛta Fɔ Rom 2:​11) Na sɔm say dɛn na di wɔl, dis nɔ kin izi. Fɔ ɛgzampul, trade na Sawt Afrika, di gɔvmɛnt bin mek ples dɛn usay pipul dɛn we gɛt difrɛn kɔlɔ fɔ de. Bɔku pipul dɛn stil de de, ivin sɔm Jiova Witnɛs dɛn. Di Gɔvnin Bɔdi bin want fɔ ɛnkɔrej wi brɔda dɛn fɔ ‘opin dɛn at.’ So insay Ɔktoba 2013, dɛn mek wan spɛshal arenjmɛnt we go ɛp di brɔda dɛn we gɛt difrɛn difrɛn kɔlɔ fɔ no dɛnsɛf bɛtɛ bɛtɛ wan.—Sɛkɛn Lɛta Fɔ Kɔrint 6:​13.

5, 6. (a) Us arenjmɛnt we dɛn mek na Sawt Afrika fɔ ɛp Gɔd in pipul dɛn fɔ gɛt wanwɔd mɔ ɛn mɔ? (Luk di pikchɔ nia dis atikul in taytul.) (b) Us gud tin dɛn dɔn apin we dɛn dɔn mek dis arenjmɛnt?

⁵ Di brɔda dɛn mek arenjmɛnt so dat sɔm wikɛnd dɛn, Witnɛs dɛn frɔm tu kɔngrigeshɔn we de tɔk difrɛn langwej ɔ we gɛt difrɛn kɔlɔ go spɛn tɛm togɛda. Brɔda ɛn sista dɛn frɔm di tu kɔngrigeshɔn dɛn kin prich togɛda, go mitin togɛda, ɛn dɛn kin go fɛn dɛnsɛf na dɛn os dɛn. Bɔku bɔku kɔngrigeshɔn dɛn bin tek pat pan dis arenjmɛnt, ɛn di branch ɔfis bin gɛt bɔku fayn ripɔt dɛn. Pipul dɛnsɛf we nɔto Jiova Witnɛs dɛn bin rili kɔle. Fɔ ɛgzampul, wan bigman pan rilijɔn bin se: “Mi nɔto Jiova Witnɛs, bɔt a no go fred fɔ tɔk se una rili ɔganayz we una de du una prichin wok, ɛn una gɛt wanwɔd pan ɔl we una gɛt difrɛn kɔlɔ.” Aw di brɔda ɛn sista dɛn bin fil bɔt dis arenjmɛnt?

⁶ Fɔstɛm, wan sista we nem Noma we de tɔk Zoza langwej bin de shem fɔ invayt Jiova Witnɛs dɛn we de na di Inglish kɔngrigeshɔn fɔ kam na in os. Bɔt afta i prich wit wayt Witnɛs dɛn ɛn i go na dɛn os dɛn, i nɔ bin de shem igen. Noma se: “Dɛn na nɔmɔl pipul dɛn lɛk wi!” So we brɔda ɛn  sista dɛn frɔm di Inglish kɔngrigeshɔn kam fɔ prich wit di Zoza langwej kɔngrigeshɔn, Noma bin invayt sɔm pan dɛn fɔ kam it na in os. I bin kɔle we i notis se wan pan di pipul dɛn we kam fɛn am, we na wan wayt brɔda we na ɛlda, bin gladi fɔ sidɔm pan wan lo sɔv-drink kret. Wi gladi fɔ dis arenjmɛnt, bikɔs bɔku brɔda ɛn sista dɛn dɔn mek nyu padi dɛn ɛn dɛn de kɔntiynu fɔ no di wan dɛn we kɔmɔt na difrɛn say dɛn.

7. Wetin mek wi fɔ gɛt sɔri-at ɔltɛm?

⁷ Te Setan in wɔl dɔn, Jiova in pipul dɛn go gɛt bɔku prɔblɛm dɛn. Dɛn nɔ go gɛt wok, dɛn go sik siriɔs wan, pipul dɛn go mek dɛn sɔfa, bad bad tin dɛn lɛk atwek, ebi ebi ren go de apin to dɛn, dɛn go lɔs dɛn prɔpati dɛn bikɔs bad pipul dɛn de, ɔ ɔda bad tin dɛn go afɛkt wi ɔl. Fɔ mek wi go ebul fɔ ɛp wisɛf di tɛm we wi gɛt prɔblɛm, wi rili nid fɔ gɛt sɔri-at. Sɔri-at go mek wi du gud to ɔda pipul dɛn. (Lɛta Fɔ Ɛfisɔs 4:​32) Dɛn kwaliti dɛn ya na kwaliti dɛn we pɔsin we dɔn gɛt di nyu abit dɛn kin gɛt. Dɛn go ɛp wi fɔ falamakata Gɔd ɛn fɔ kɔrej ɔda pipul dɛn.—Sɛkɛn Lɛta Fɔ Kɔrint 1:​3, 4.

8. Us gud tin dɛn go apin we wi gɛt sɔri-at ɛn du gud to ɔlman na di kɔngrigeshɔn? Gi wan ɛgzampul.

⁸ Aw wi go du gud to pipul dɛn mɔ na wi kɔngrigeshɔn we kɔmɔt na ɔda kɔntri ɔ we nid ɛp? Wi want fɔ wɛlkɔm dɛn, bi dɛn padi dɛn, ɛn ɛp dɛn fɔ no se wi nid dɛn na di kɔngrigeshɔn. (Fɔs Lɛta Fɔ Kɔrint 12:​22, 25) Fɔ ɛgzampul, Dɛnikal bin kɔmɔt na Filipin ɛn go na Jepan. Bikɔs in na bin fɔrina, dɛn nɔ bin de trit am fayn na in wok ples lɛk di ɔda wokman dɛn. Dɔn i bin atɛnd di mitin we Jiova Witnɛs dɛn kin gɛt. Dɛnikal bin se: “Insay di Kiŋdɔm Ɔl, na wan wan pipul dɛn bin de de we nɔto Jepaniz, bɔt dɛn gladi fɔ si mi, lɛk se dɛn na mi padi dɛn we i dɔn te wi si.” Di gud we di brɔda dɛn bin de du to am bin ɛp am fɔ mek i kɔntinyu fɔ kam nia Jiova. As tɛm de go, Dɛnikal bin baptayz, ɛn naw in na ɛlda. In kɔmpin ɛlda dɛn rili gladi fɔ we in ɛn in wɛf, we nem Jɛnifa, de na di kɔngrigeshɔn ɛn dɛn se: “Dɛn de rili liv simpul layf as payɔnia dɛn ɛn dɛn de sɛt fayn ɛgzampul bay we dɛn put di Kiŋdɔm fɔs.”—Lyuk 12:​31.

9, 10. Gi ɛgzampul dɛn bɔt di gud tin dɛn we kin apin we wi gɛt sɔri-at we we de du di prichin wok.

⁹ Wi gɛt di chans fɔ du “gud to ɔlman” we wi de prich di gud nyuz bɔt di Kiŋdɔm. (Lɛta Fɔ Galeshya 6:​10) Bɔku Witnɛs dɛn gɛt sɔri-at fɔ di wan dɛn we de go na dɛn kɔntri ɛn we de tray fɔ lan dɛn langwej. (Fɔs Lɛta Fɔ Kɔrint 9:​23) Di tray we dɛn de tray tranga wan dɔn rili bɛnifit dɛn. Fɔ ɛgzampul, wan payɔnia sista we de na Ɔstralia we nem Tifani bin lan fɔ tɔk di Swaili langwej so dat i go ebul ɛp di pipul dɛn na di kɔngrigeshɔn we de tɔk Swaili na di siti we de na Brizbin. Pan ɔl we i nɔ bin izi fɔ mek i lan di langwej, dat dɔn rili bɛnifit am. Tifani se: “If yu want fɔ ɛnjɔy yu prichin wok, go sav na kɔngrigeshɔn we dɛn de tɔk  fɔrin langwej. I tan lɛk se yu travul go sɔm say, pan ɔl we yu nɔ kɔmɔt na di say we yu de. Yu go rili ɔndastand di ɔganayzeshɔn ɛn si di wanwɔd we wi gɛt.”

¹⁰ Wan famili na Jepan bin du di sem tin. Dɛn gyal pikin we nem Sakiko, tɔk se: “Bɔku tɛm wi kin mit pipul dɛn we kɔmɔt na Brazil we wi de du di prichin wok. We wi kin sho dɛn skripchɔ dɛn frɔm di Pɔtigiz Baybul, lɛk Rɛvɛleshɔn 21:​3, 4 ɔ Sam 37:​10, 11, 29, dɛn kin pe atɛnshɔn ɛn sɔntɛnde dɛn kin ivin kray.” Di famili bin gɛt sɔri-at fɔ dɛn pipul dɛn ya ɛn dɛn want fɔ ɛp dɛn fɔ mek dɛn go lan di trut, so dɛn bigin fɔ lan di Pɔtigiz langwej as famili. Leta, di famili bin ɛp fɔ stat wan Pɔtigiz langwej kɔngrigeshɔn. As tɛm de go, dɛn dɔn ɛp bɔku pipul dɛn we kɔmɔt na ɔda kɔntri fɔ bi pipul dɛn we de wɔship Jiova. Sakiko se: “Wi tray tranga wan fɔ lan Pɔtigiz, bɔt di blɛsin dɛn bɔku fawe pas di tray we wi bin tray. Wi rili tɛl Jiova tɛnki.”—Rid Di Apɔsul Dɛn Wok [Akt] 10:​34, 35.

11, 12. (a) Wetin mek wi nid fɔ tink di rayt we fɔ gɛt di nyu abit? (b) Wetin go ɛp wi fɔ kɔntinyu fɔ ɔmbul wisɛf?

¹¹ Di rizin we mek wi want fɔ gɛt di nyu abit na fɔ ɔnɔ Jiova, nɔto fɔ mek ɔda pipul dɛn prez wi. Mɛmba se wan pan di enjɛl dɛn bin bigin fɔ mek prawd ɛn dat bin mek i sin. (Luk Izikɛl 28:​17.) Wi nɔ pafɛkt, so dat de mek i nɔ izi fɔ mek wi avɔyd fɔ de mek prawd. Bɔt pan ɔl dat, wi de tray fɔ bi pɔsin we ɔmbul. Wetin go ɛp wi fɔ du dat?

¹² Wan tin we go ɛp wi fɔ ɔmbul wisɛf na we wi de rid Gɔd in Wɔd ɛvride ɛn we wi tink gud gud wan bɔt wetin wi de rid. (Ditarɔnɔmi 17:​18-20) Wi rili nid fɔ tink gud wan bɔt wetin Jizɔs bin tich wi ɛn in wɔndaful ɛgzampul dɛn we sho se i bin ɔmbul. (Matyu 20:​28) Jizɔs bin so ɔmbul dat i was in disaypul dɛn fut. (Jɔn 13:​12-17) Di ɔda tin we wi go du na fɔ pre to Jiova fɔ in spirit. In spirit go ɛp wi fɔ fɛt tranga wan fɔ mek wi nɔ fil se wi bɛtɛ pas ɔda pipul dɛn.—Lɛta Fɔ Galeshya 6:​3, 4; Lɛta Fɔ Filipay 2:​3.

13. Us bɛnifit wi go gɛt we wi put wisɛf dɔŋ?

¹³ Rid Prɔvabs 22:​4. Jiova want wi fɔ put wisɛf dɔŋ. We wi put wisɛf dɔŋ,  dat de mek wi gɛt bɔku blɛsin dɛn. Ɛn dat go mek pis ɛn wanwɔd kɔntinyu fɔ de na di kɔngrigeshɔn. Dɔn, Jiova go gi wi bak di blɛsin we wi nɔ fit fɔ gɛt. Di apɔsul Pita bin se: “Nɔbɔdi nɔ fɔ mek prawd pan in kɔmpin. . . . Gɔd go tɔn in bak pan dɛn pipul we prawd ɛn i go sho dɛn wan we nɔ prawd aw i gud.”—Pita In Fɔs Lɛta 5:​5.

14. Udat sɛt di bɛst ɛgzampul fɔ peshɛnt ɛn nɔ fɔ de vɛks kwik?

¹⁴ Insay di wɔl tide, if pɔsin nɔ de vɛks kwik ɛn i peshɛnt, bɔku tɛm ɔda pipul dɛn kin tink se i lezi. Bɔt dat nɔto tru. Dɛn fayn fayn kwaliti dɛn ya kɔmɔt frɔm Jiova, di Wan we gɛt pawa pas ɔlman na di wanol wɔl. In na di bɛst ɛgzampul bikɔs i nɔ de vɛks kwik ɛn i peshɛnt. (Pita In Sɛkɛn Lɛta 3:​9, NW) Fɔ ɛgzampul, tink bɔt aw Jiova bin peshɛnt wit Ebraam ɛn Lɔt we i bin yuz In enjɛl dɛn fɔ ansa dɛn kwɛstyɔn dɛn. (Jɛnɛsis 18:​22-33; 19:​18-21) Ɛn tink bɔt aw Jiova bin peshɛnt wit di Izrɛlayt dɛn fɔ lɛk 1,500 ia so pan ɔl we dɛn nɔ bin de obe am.—Izikɛl 33:​11.

15. Us ɛgzampul we Jizɔs bin sɛt we sho se i nɔ de vɛks kwik ɛn i bin peshɛnt?

¹⁵ Jizɔs bin de “bia” wit pipul dɛn. (Matyu 11:​29) I bin de rili peshɛnt wit di mistek dɛn we in disaypul dɛn bin de mek. Di tɛm we Jizɔs bin de du in prichin wok na di wɔl, pipul dɛn bin de tɔk ɔlkayn bad tin bɔt am ɛn di mɛsej wi i de prich. Bɔt i nɔ bin de vɛks ɛn i bin peshɛnt te i day. We Jizɔs bin de sɔfa siriɔs pen na di stik we dɛn bin ɛng am, i bin beg in Papa fɔ mek i go fɔgiv di man dɛn we kil am. I bin se: “Dɛn nɔ no wetin dɛn de du.” (Lyuk 23:​34) Ivin we Jizɔs bin de pan strɛs ɔ bin de sɔfa pen, i nɔ bin de vɛks ɛn i bin peshɛnt.—Rid Pita In Fɔs Lɛta 2:​21-23.

16. Aw wi go sho se wi nɔ de vɛks kwik ɛn wi peshɛnt?

¹⁶ Pɔl bin sho wan we we wi go sho se wi nɔ de vɛks kwik ɛn wi de peshɛnt we i bin rayt se: “Una fɔ de du gud ɛn gɛt sɔri at fɔ una kɔmpin. Una fɔ de padin una kɔmpin lɛkɛ aw Gɔd dɔn padin una bikɔs una na Krays yon pipul.” (Lɛta Fɔ Ɛfisɔs 4:​32) Fɔ mek wi go fɔgiv ɔda pipul dɛn, wi nɔ fɔ vɛks kwik ɛn wi fɔ de peshɛnt. Dis go ɛp fɔ mek wanwɔd kɔntinyu fɔ de na di kɔngrigeshɔn.

17. Wetin mek i rili impɔtant fɔ de peshɛnt ɛn nɔ de vɛks kwik?

¹⁷ Jiova want fɔ mek wi peshɛnt wit ɔda pipul dɛn ɛn nɔ vɛks kwik. Dɛn kwaliti dɛn ya rili impɔtant if wi want fɔ liv na di nyu wɔl. (Matyu 5:​5; Jems 1:​21) We wi nɔ de vɛks kwik ɛn we wi peshɛnt, wi de ɔnɔ Jiova ɛn ɛp ɔda pipul dɛn fɔ du di sem.—Lɛta Fɔ Galeshya 6:​1; Sɛkɛn Lɛta To Timoti 2:​24, 25.

18. Aw di lɛk we wi lɛk ɔda pipul dɛn gɛt sɔntin fɔ du wit di we aw wi de trit dɛn?

¹⁸ Di kwaliti dɛn ɔl we wi dɔn tɔk bɔt gɛt sɔntin fɔ du wit lɔv. Fɔ ɛgzampul, di disaypul Jems bin nid fɔ advays in brɔda dɛn bikɔs dɛn bin de trit jɛntriman dɛn lɛk se dɛn bɛtɛ pas di po wan dɛn. I ɛksplen se dis de agens Gɔd in lɔ we se “una fɔ lɛk una kɔmpin, lɛkɛ aw una lɛk unasɛf.” Dɔn i tɔk bak se: “If una trit wan pɔsin fayn pas in kɔmpin mɔtalman bay aw di pɔsin luk, una dɔn sin.” (Jems 2:​8, 9) If wi lɛk ɔda pipul dɛn, wi nɔ go et dɛn bikɔs dɛn nɔ lan bɛtɛ buk, dɛn gɛt difrɛn kɔlɔ, ɔ udat dɛn bi na di eria usay dɛn de. Wi nɔ fɔ mek lɛk se wi lɛk ɔlman di sem we. Na kwaliti we fɔ de insay wi.

19. Wetin mek i impɔtant fɔ mek wi lɛk wi kɔmpin dɛn?

¹⁹ We wi lɛk wi kɔmpin mɔtalman wi “go de bia” wit dɛn, wi “go gɛt gud at fɔ dɛn,” ɛn wi nɔ go de fil se wi “bɛtɛ pas dɛn.” (Fɔs Lɛta Fɔ Kɔrint 13:​4) Wi nid fɔ peshɛnt, du gud, ɛn put wisɛf dɔŋ fɔ mek wi go kɔntinyu fɔ prich di gud nyuz to wi neba dɛn. (Matyu 28:​19) Dɛn kwaliti dɛn ya kin mek i izi bak fɔ lɛ wi gɛt wanwɔd wit ɔl wi brɔda ɛn sista dɛn na di kɔngrigeshɔn. We wi ɔl sho da kayn lɔv de, wi kɔngrigeshɔn go gɛt wanwɔd ɛn wi go briŋ prez to Jiova. Ɔda pipul dɛn go si dis wanwɔd ɛn dɛn go kam na di trut. Na dat mek i fayn we di Baybul tɔk se: “Pantap ɔl dat, una fɔ lɛk una kɔmpin, dat go mek una gɛt wan at ɛn una go bi wan, nɔ ambɔg nɔ go de.”—Lɛta Fɔ Kɔlɔse 3:​14.

20. (a) Us kwɛstyɔn dɛn wi fɔ aks wisɛf? Wetin mek? (b) Us wɔndaful tin wi de wet fɔ si tumara bambay?

²⁰ Wi fɔ aks wisɛf dis kwɛstyɔn, ‘Us chenj dɛn a stil nid fɔ mek fɔ lɛ a go lɛf ɔl mi ol abit dɛn?’ Wi fɔ pre to Jiova ɛn beg am fɔ mek i ɛp wi. Wi nid fɔ tray tranga wan fɔ chenj di bad we we wi kin tink ɔ du tin so dat wi go “de ɔnda Gɔd in rul.” (Lɛta Fɔ Galeshya 5:​19-21) Wi nid fɔ aks wisɛf dis kwɛstyɔn bak, ‘A de kɔntinyu fɔ ajɔst di we aw a de tink so dat a go mek Jiova gladi?’ (Lɛta Fɔ Ɛfisɔs 4:​23, 24) Wi nɔ pafɛkt, so wi nid fɔ kɔntinyu fɔ tinap tranga wan fɔ gɛt di nyu abit. Dis na tin we wi fɔ kɔntinyu fɔ de du. Layf go rili wɔndaful we ɔlman go gɛt di nyu abit ɛn falamakata Jiova in fayn fayn kwaliti dɛn pafɛkt wan.