MƐKSIKO siti na wan bizi siti we gɛt pas wan milyɔn pipul dɛn, ɛn na bin Novɛmba ɛndin 1932. Wan wik bifo dis tɛm, dɛn bin jɔs dɔn fiks trafik layt dɛn fɔ di fɔstɛm. Bɔt na ɔda tin mek di pipul dɛn gladi. Ripɔta dɛn de na di tren steshɔn wit dɛn kamera dɛn de wet fɔ wan spɛshal pɔsin we fɔ kam. Udat na dis pɔsin? Na Josɛf F. Rutafɔd, we na di prɛsidɛnt fɔ di Wach Tawa Sosayti. Di Witnɛs dɛnsɛf we bin de na di siti, bin de wet fɔ wɛlkɔm Brɔda Rutafɔd we de kam fɔ atɛnd dɛn tri dez kɔnvɛnshɔn.

Di Golden Age magazin bin se: “Wan dawt nɔ de fɔ se, fɔ lɔng tɛm pipul dɛn go mɛmba dis kɔnvɛnshɔn as wan impɔtant program” we go ɛp pipul dɛn fɔ no di tru insay Mɛksiko. Bɔt dis na bin smɔl kɔnvɛnshɔn we na lɛk 150 pipul dɛn bin atɛnd. Wetin mek dis bin rili impɔtant?

Bifo da kɔnvɛnshɔn de, di trut nɔ bin de go bifo bɛtɛ na Mɛksiko. Frɔm 1919, na smɔl asɛmbli dɛn, dɛn bin de gɛt, bɔt afta da ia de, di kɔngrigeshɔn bin ridyus. We dɛn bin opin di branch ɔfis na Mɛksiko Siti insay 1929, i bin tan lɛk se tin go bɛtɛ smɔl, bɔt stil dɛn bin gɛt sɔm prɔblɛm dɛn. Di ɔganayzeshɔn bin tɛl di payɔnia dɛn we dɛn bin de kɔl kɔlpɔta dɛn trade, fɔ se dɛn nɔ fɔ du biznɛs we dɛn de prich. Dis bin mek wan kɔlpɔta in at wam bad, ɛn dat bin mek i lɛf di trut ɛn go mek in yon Baybul stɔdi grup. Dɔn insay da tɛm de, dɛn bin gɛt fɔ chenj di branch ovasia bikɔs i nɔ bin de biev fayn. Di Witnɛs dɛn we bin kɔntinyu fɔ de biɛn Jiova na Mɛksiko bin nid ɛnkɔrejmɛnt.

Di tɛm we Brɔda Rutafɔd bin go fɛn dɛn, i bin ɛnkɔrej dɛn bay we i gi tu tɔk dɛn na di kɔnvɛnshɔn, ɛn fayv lɛkchɔ dɛn we dɛn bin ple na redio. Na bin di fɔs tɛm fɔ mek di brɔda dɛn yuz redio steshɔn fɔ prich di gud nyuz ɔlsay na Mɛksiko. Afta di kɔnvɛnshɔn, dɛn bin pik nyu branch ovasia fɔ ɔganayz di wok. Di Witnɛs dɛn dɔn gɛt zil naw fɔ kɔntinyu fɔ prich ɛn Jiova bin de ɛp dɛn.

Insay di nɛks ia, 1933, dɛn bin gɛt tu kɔnvɛnshɔn dɛn na di kɔntri, wan na Vɛrakruz ɛn wan na Mɛksiko Siti. Di brɔda dɛn bin de wok tranga wan na di eria usay dɛn fɔ prich, ɛn pipul dɛn bin de lisin. Fɔ ɛgzampul, insay 1931, na bin 82 pɔblisha dɛn bin de. Bay 1941, dɛn bin bɔku pas tɛn tɛm so! Na lɛk 1,000 pipul dɛn bin kam na Mɛksiko Siti fɔ di 1941 Tiokratik Asɛmbli.

Insay 1943, di Witnɛs dɛn bin bigin fɔ advatayz di “Free Nation’s” Tiokratik Asɛmbli, we dɛn go ol na 12 siti dɛn na Mɛksiko. * (Luk di futnot.) Dɛn bin du dat bay we dɛn de wɛr kad dɛn we gɛt raytin bifo ɛn biɛn. Dɛn bin mek tu kad dɛn we dɛn jɔyn togɛda, ɛn dɛn bin de wɛr am oba dɛn sholda, wit sayn we de bifo ɛn biɛn. Frɔm 1936, di Witnɛs dɛn bin de yuz dɛn sayn dɛn ya fɔ advatayz dɛn kɔnvɛnshɔn.

Dɛn bin rili ebul fɔ du wɛl we dɛn bin de advatayz wit dɛn sayn we gɛt raytin bifo ɛn biɛn, ɛn dat bin mek dɛn rayt bɔt dɛn na wan magazin we nem, La Nación. Dɛn bin rayt de se, “Di fɔs de, dɛn bin tɛl dɛn fɔ invayt mɔ pipul dɛn. Di ɔda de, di pipul dɛn we kam bin bɔku ɛn di ples bin tayt fɔ dɛn.” Di Katolik Chɔch nɔ bin gladi fɔ dat, so dɛn bin de ambɔg dɛn. Bɔt di brɔda ɛn sista dɛn nɔ bin fred. Dɛn bin kɔntinyu fɔ advatayz dɛn kɔnvɛnshɔn. Wan ɔda atikul we dɛn bin rayt insay di La Nación magazin bin se: “Di wan ol siti bin si dɛn.” Di magazin bin se di brɔda ɛn sista dɛn dɔn “chenj to pipul dɛn we de advatayz ‘sandwich.’” Di atikul bin gɛt pikchɔ bak we de sho brɔda ɛn sista dɛn na Mɛksiko. Di tin we bin rayt dɔŋ di pikchɔ na: “Bɔku Bɔku Witnɛs dɛn na Strit.”

Dɛn tɛm dɛn de, bɔku Witnɛs dɛn bin nid fɔ ajɔst bɔku tin dɛn fɔ mek dɛn go ebul fɔ atɛnd di kɔnvɛnshɔn dɛn we dɛn bin de gɛt na Mɛksiko. Bɔku brɔda ɛn sista dɛn bin de kɔmɔt na vilej dɛn we bin de nia di tren layn ɔ ivin rod dɛn. Na wan kɔngrigeshɔn, dɛn bin rayt se, “Na tɛligraf layn nɔmɔ de pas na dis ples.” So di wan dɛn we bin want fɔ go di kɔnvɛnshɔn, bin nid fɔ rayd dɔnki dɛn, ɔ waka fɔ lɔng tɛm jɔs fɔ mek dɛn go rich usay di tren de.

Bɔku Witnɛs dɛn bin po ɛn i bin rili at fɔ mek dɛn go na di kɔnvɛnshɔn. We dɛn rich, bɔku pan dɛn bin go de wit sɔm ɔda Witnɛs dɛn we bin rili sho dɛn se dɛn lɛk dɛn ɛn kia fɔ dɛn. Sɔm ɔda wan dɛn slip na Kiŋdɔm Ɔl dɛn. Wantɛm, na lɛk 90 brɔda dɛn bin slip na di branch. Dɛn bin slip pan bɔks dɛn we gɛt buk dɛn insay. Di Yearbook se, di brɔda dɛn bin gladi bikɔs di bɔks dɛn bin “sɔft ɛn wam pas di simɛnt grɔn.”

Di Witnɛs dɛn we bin ebul fɔ de wit dɛn brɔda ɛn sista dɛn nɔ bin fil bad fɔ ɔl di tin dɛn we dɛn bin nid fɔ du fɔ mek dɛn go atɛnd di kɔnvɛnshɔn. Tide, i dɔn pas lɛk 850,000 Jiova Witnɛs dɛn we de na Mɛksiko ɛn dɛn gladi. * (Luk di futnot.) Wan ripɔt insay di 1949 Yearbook, bin sho se di tin dɛn we di brɔda dɛn bin nid fɔ du fɔ mek dɛn go ebul fɔ atɛnd di kɔnvɛnshɔn, nɔ bin mek dɛn lɛf fɔ gɛt zil fɔ wɔship Jiova. Afta ɛni asɛmbli, “dɛn bin de tɔk bɔt am fɔ lɔng tɛm.” Ɔltɛm di brɔda dɛn bin de aks se, “Ustɛm wi go gɛt ɔda asɛmbli bak?”—Ol Ol Tin Dɛn We Wi Bin Dɔn Kip na Sɛntral Amɛrika.