1, 2. Wetin bin apin to Pɔl ɛn Saylas na Filipay? (Luk di pikchɔ nia dis atikul in taytul.)

IMAJIN dis! Na lɛk midul nɛt so. Tu mishɔnari dɛn we nem Pɔl ɛn Saylas bin de rayt insay di dak dak say na di jel insay wan siti we nem Filipay. Dɛn nɔ bin ebul fɔ muv bikɔs dɛn bin chen dɛn fut dɛn ɛn dɛn bin de fil pen na dɛn bak bikɔs dɛn bin jɔs dɔn bit dɛn bad bad wan. (Di Apɔsul Dɛn Wok [Akt] 16:​23, 24) Da sem de de bifo dɛn put dɛn na jel, bɔku pipul dɛn bin jɔs kam ɛn drɛg dɛn go na di makit usay dɛn jɔj dɛn kwik kwik wan. Dɛn chɛr chɛr dɛn klos dɛn ɛn bit dɛn bad bad wan. (Di Apɔsul Dɛn Wok [Akt] 16:​16-22) Dis na tin we nɔ bin rayt! Pɔl na bin Roman ɛn i bin gɛt di rayt fɔ mek dɛn jɔj am di rayt we. *—Luk di futnot.

² We Pɔl bin de na jel, i go bi se i bin de tink bɔt wetin  bin dɔn apin to dɛn da de de ɛn di pipul dɛn we de na Filipay. Dɛn nɔ bin ivin gɛt Ju mitin os na dɛn siti, lɛk bɔku ɔda siti dɛn we Pɔl dɔn go. So di Ju pipul dɛn bin gɛt fɔ kɔmɔt na di siti ɛn go nia wan watasay fɔ ol dɛn mitin. (Di Apɔsul Dɛn Wok [Akt] 16:​13, 14) Fɔ lɛ ɛni siti gɛt Ju mitin os, dɛn fɔ gɛt lɛk tɛn Ju pipul dɛn so. Fɔ se na dat mek dɛn nɔ bin gɛt Ju mitin os insay Filipay? Yu tink se na di nɔmba go mek dɛn gɛt Ju mitin os? Di pipul dɛn we de na Fililpay bin rili prawd fɔ we dɛn na Roman pipul dɛn. Sɔntɛm na dat mek dɛn nɔ bin tink se Pɔl ɛn Saylas, we na Ju pipul dɛn go bi Roman pipul dɛn bak. Wi nɔ rili no wetin mek dɛn tink so, bɔt wi no se dɛn bin put Pɔl ɛn Saylas na jel fɔ sɔntin we dɛn nɔ du.

3. Wetin bin mek Pɔl kɔnfyuz we dɛn sɛn am go na jel? Wetin i bin du?

³ Sɔntɛm Pɔl bin tink bak bɔt aw i bin kam na Filipay. Bifo Pɔl bin kam na Filipay, i bin de na di ɔda say na di Ejian Si, insay Eshia Maynɔ. We i bin de de, di oli spirit bin de stɔp am bɔku tɛm fɔ mek i nɔ prich na sɔm say dɛn. I tan lɛk se di oli spirit bin de push am fɔ go ɔda say. (Di Apɔsul Dɛn Wok [Akt] 16:​6, 7) Bɔt usay di oli spirit bin want am fɔ go? We Pɔl bin de na Troas, i bin si wan vishɔn we wan man de tɛl am se: “Duya, kam ɛp wi na Masidonia.” Jiova bin mek i no klia wan wetin I bin want am fɔ du! So Pɔl bin go na Masidonia wantɛm wantɛm. (Rid Di Apɔsul Dɛn Wok [Akt] 16:​8-10.) Bɔt wetin bin apin? Jɔs afta we i go na Masidonia, i bin fɛn insɛf na jel! Wetin mek Jiova bin alaw dis fɔ apin to Pɔl? Aw lɔng Pɔl go de na jel? Ivin if Pɔl bin de tink bɔt dɛn tin ya, i bin stil gɛt strɔng fet ɛn i bin gɛt gladi at. Pɔl ɛn Saylas bin bigin fɔ “pre ɛn siŋ to Gɔd.” (Di Apɔsul Dɛn Wok [Akt] 16:​25) Di pis we Gɔd de gi bin mek dɛn gɛt kol at ɛn nɔ wɔri fɔ ɛnitin.

4, 5. (a) Aw di tin dɛn we de apin to wi fiba lɛk wetin bin apin to Pɔl? (b) Aw di tin we bin de apin to Pɔl chenj di kayn we we i nɔ bin de tink se i go apin?

⁴ Yu dɔn ɛva fil lɛk aw Pɔl bin de fil? Sɔntɛm, sɔntin bin dɔn apin na yu layf we mek yu aks Gɔd fɔ ɛp yu fɔ disayd wetin fɔ du, ɛn i tan lɛk se yu de fala wetin di oli spirit de tɛl yu fɔ du. Bɔt afta dat, bɔku prɔblɛm bin mit yu ɔ yu bin gɛt fɔ mek big chenj na yu layf. (Ɛkliziastis 9:​11) Naw we yu de tink bɔt di tin dɛn we dɔn apin to yu, yu go de wɔnda wetin mek Jiova alaw dɛn tin dɛn de fɔ apin to yu. Wetin go ɛp yu fɔ kɔntinyu fɔ bia ɛn abop pan Jiova wit ɔl yu at? Wi go fɛn di ansa frɔm di nɛks tin we bin apin to Pɔl ɛn Saylas.

⁵ We Pɔl ɛn Saylas bin de siŋ, bɔku tin dɛn we dɛn nɔ bin de tink se go apin bin bigin fɔ apin. Fɔs, di grɔn bigin fɔ trimbul siriɔs wan. Di prizin domɔt dɛn bin opin wantɛm wantɛm. Dɔn, ɔl di jelman dɛn chen dɛn lus. Afta dat, Pɔl bin stɔp di ɔfisa we bin de wach oba dɛn fɔ lɛ i nɔ kil insɛf, ɛn dis man we bin de wach oba dɛn ɛn ɔlman na in famili bin baptayz. Dɔn, ali mɔnin, di bigman dɛn na di siti bin sɛn sɔm  ɔfisa dɛn fɔ go pul Pɔl ɛn Saylas na jel ɛn dɛn bin tɛl dɛn fɔ kɔmɔt insay di siti saful wan. We di bigman dɛn na di siti kam fɔ no se Pɔl ɛn Saylas na Roman dɛn, dɛn bin no se dɛn dɔn mek big mistek, so na dɛnsɛf sɛf go lɛf. Bɔt bifo Pɔl ɛn Saylas kɔmɔt na di siti, dɛn bin tray tranga fɔ se gud bay to wan sista we bin jɔs baptayz we nem Lidia, ɛn dɛn yuz da chans de fɔ ɛnkɔrej ɔda brɔda dɛn na Filipay. (Di Apɔsul Dɛn Wok [Akt] 16: 26-40) Ɔltin bin chenj kwik kwik wan!

6. Wetin wi de kam tɔk bɔt naw?

⁶ Wetin wi lan frɔm di tin dɛn we bin apin? Jiova kin du wetin wi nɔ de tink se go apin, so wi nɔ nid fɔ wɔri we wi gɛt prɔblɛm. Wi no se da lɛsin we Pɔl bin lan, bin rili tɔch iin at. Wi no dis we i bin rayt to in brɔda dɛn na Filipay bɔt di wɔri we dɛn bin de wɔri ɛn di pis we Gɔd de gi. Insay dis atikul wi go tɔk bɔt di wɔd dɛn we Pɔl tɔk na Lɛta Fɔ Filipay 4:​6, NW (Rid.) Dɔn, wi go tɔk bɔt ɔda ɛgzampul dɛn we Jiova du sɔntin we pipul dɛn nɔ bin de tink se go apin. Dɔn, wi go tɔk bɔt aw di pis we Jiova de gi go ɛp wi fɔ bia wit wi prɔblɛm dɛn bay we wi rili abop pan am.

7. Us lɛsin Pɔl bin de tich in brɔda ɛn sista dɛn na Filipay insay di lɛta we i bin rayt? Wetin wi go lan?

⁷ Wetin di brɔda dɛn na Filipay bin tink bɔt we dɛn bin rid di lɛta we Pɔl rayt to dɛn? Bɔku pan dɛn go dɔn mɛmba wetin bin apin to Pɔl ɛn Saylas ɛn di tin we Jiova bin du fɔ ɛp dɛn we dɛn nɔ bin de tink se go apin. Us lɛsin Pɔl bin de tich dɛn insay di lɛta we i rayt? Di lɛsin na dat: Dɛn nɔ fɔ wɔri. Dɛn fɔ pre so dat dɛn go gɛt “di pis we Gɔd de gi we pas di we aw mɔtalman ebul ɔndastand.” Pɔl bin tɛl dɛn se di pis we Gɔd de gi “pas di we aw mɔtalman ebul ɔndastand.” Wetin dɛn wɔd ya min? Sɔm Baybul transleshɔn dɛn se di pis we Gɔd de gi “pas ɔl drim dɛn” ɔ “pas ɔl di plan dɛn we mɔtalman de mek.” So Pɔl bin de se “di pis we Gɔd de gi,” rili wɔndaful pas aw wi go imajin. Pan ɔl we sɔntɛnde wi nɔ kin no aw wi go sɔlv wi prɔblɛm dɛn, Jiova in no. Ɛn i go du fɔ wi wetin wi nɔ de tink se go apin.—Rid Pita In Sɛkɛn Lɛta 2:​9.

8, 9. (a) Pan ɔl we Pɔl bin sɔfa na Filipay, wetin na di gud tin we bin apin? (b) Wetin mek di brɔda dɛn na Filipay bin rili biliv di wɔd dɛn we Pɔl bin tɔk?

⁸ Di lɛta we Pɔl bin rayt to in brɔda ɛn sista dɛn na Filipay go mɔs dɔn ɛp dɛn fɔ tinap tranga wan as dɛn de tink bɔt wetin Jiova bin dɔn du fɔ dɛn fɔ  lɛk tɛn ia so. Pan ɔl we Jiova bin alaw Pɔl ɛn Saylas fɔ sɔfa fɔ tin we dɛn nɔ du, dɛn tin ya we apin to dɛn bin mek dɛn “fri fɔ tɛl ɔlman di Gud Nyuz.” (Lɛta Fɔ Filipay 1:​7) Di big man dɛn we bin de na Filipay nɔ gɛt maynd fɔ du ɛni bad tin to di nyu Kristian kɔngrigeshɔn. Sɔntɛm, na we Pɔl bin tɔk se insɛf na Roman, na dat mek wan disaypul we nem Lyuk bin ebul fɔ kɔntinyu fɔ de na Filipay afta we Pɔl ɛn Saylas bin dɔn go. Lyuk go ebul ɛp di nyu Kristian dɛn na Filipay mɔ.

⁹ We di brɔda dɛn na Filipay bin rid Pɔl in lɛta, dɛn bin no se Pɔl nɔ bin jɔs de tɔk bɔt wetin i sabi. Pɔl bin mitɔp wit siriɔs prɔblɛm dɛn. Ivin we i bin de rayt to di brɔda dɛn, i bin de na prizin insay in os na Rom. Bɔt i bin de stil sho se i gɛt “di pis we Gɔd de gi.”—Lɛta Fɔ Filipay 1:​12-14; 4:​7, NW, 11, 22.

10, 11. Wetin wi nid fɔ du we wi de wɔri bɔt wi prɔblɛm dɛn? Wetin wi fɔ tink se go apin?

¹⁰ Wetin go ɛp wi fɔ lɛ wi nɔ ‘wɔri fɔ ɛnitin,’ bɔt gɛt “di pis we Gɔd de gi”? Di tin we Pɔl bin tɔk to di pipul dɛn we bin de na Filipay sho se we wi de wɔri bɔt wi prɔblɛm dɛn, di wangren tin we wi fɔ du na fɔ pre. So ɛnitɛm we wi de wɔri, wi nid fɔ pre bɔt wetin de wɔri wi. (Rid Pita In Fɔs Lɛta 5:​6, 7.) We yu de pre to Jiova, na fɔ biliv tranga wan se i bisin bɔt yu. Tɛl am tɛnki ɔltɛm fɔ ɔl di tin dɛn we i dɔn du fɔ yu. Ɛn nɔ ɛva fɔgɛt se Jiova kin “du tin we pas wetin wi kin aks fɔ ɛn tink bɔt.”—Lɛta Fɔ Ɛfisɔs 3:​20.

¹¹ Jɔs lɛk Pɔl ɛn Saylas, wisɛf kin sɔprayz pan di tin dɛn we Jiova kin du fɔ ɛp wi. Sɔm tɛm de i nɔ kin bi big tin, bɔt i go bi sɔntin we wi nid ɔltɛm. (Fɔs Lɛta Fɔ Kɔrint 10:​13) Dat nɔ min se wi fɔ sidɔm ɛn nɔ du natin ɛn wet fɔ lɛ Jiova du sɔntin ɔ sɔlv wi prɔblɛm fɔ wi. Wi fɔ tray fɔ du sɔntin bɔt wetin wi de pre fɔ. (Lɛta Fɔ Rom 12:​11) Di tin we wi de du de sho se wi rili want fɔ du sɔntin we go mek Jiova blɛs wi. Wi nɔ fɔ fɔgɛt se Jiova kin du mɔ pas wetin wi aks am ɔ tink se i go du. Sɔntɛnde, i kin mek wi sɔprayz bay we i de du tin we wi nɔ de tink se i go du. So lɛ wi tɔk bɔt sɔm ɛgzampul dɛn we go ɛp wi fɔ biliv mɔ ɛn mɔ pan di pawa we Jiova gɛt fɔ du tin dɛn we wi nɔ de tink se go apin.

12. (a) Wetin Kiŋ Ɛzikaya bin du we Kiŋ Sinakɛrib bin de trɛtin am? (b) Wetin wi lan frɔm di we aw Jiova bin sɔlv di prɔblɛm?

¹² Insay di Baybul, wi si bɔku ɛgzampul dɛn bɔt di tin dɛn we Jiova bin de du we pipul dɛn nɔ bin tink se i go du. Fɔ ɛgzampul, we Ɛzikaya na bin kiŋ na Juda, Sinakɛrib, di kiŋ na Asiria bin go na Juda ɛn kapchɔ ɔl di siti dɛn, na Jerusɛlɛm nɔmɔ bin lɛf. (Sɛkɛn Kiŋ 18:​1-3, 13) Dɔn Sinakɛrib bin kam fɔ atak Jerusɛlɛm. Wetin Kiŋ Ɛzikaya go du? Fɔs, i bin pre to Jiova fɔ ɛp am, ɛn i bin aks Jiova in prɔfɛt we nem Ayzaya fɔ advays am. (Sɛkɛn Kiŋ 19:​5, 15-20) Afta dat, Ɛzikaya bin pe di fayn we Sinakɛrib aks am fɔ pe.  (Sɛkɛn Kiŋ 18:​14, 15) Dɔn, Ɛzikaya bin du tin fɔ ɛp di pipul dɛn na di siti fɔ di tɛm we di Asirian dɛn go kam atak dɛn. (Sɛkɛn Kronikul 32:​2-4) Aw dis prɔblɛm bin sɔlv? Jɔs wan nɛt Jiova bin sɛn wan enjɛl fɔ kil 185,000 soja man dɛn we bin de fɛt fɔ Sinakɛrib. Ivin Ɛzikaya insɛf nɔ bin de tink se dis kayn tin go apin!—Sɛkɛn Kiŋ 19:​35.

13. (a) Us lɛsin wi go lan frɔm wetin bin apin to Josɛf? (b) Wetin bin apin to Sera we i nɔ bin de ɛva imajin se go apin?

¹³ Lɛ wi tɔk bɔt wetin bin apin to wan yɔŋ man we nem Josɛf. Di tɛm we Josɛf bin de na jel insay Ijipt, i nɔ bin ivin imajin se i go bi di sɛkɔn pɔsin na Ijipt we gɛt pawa ɔ imajin se Jiova go yuz am fɔ sev in famili frɔm bad bad angri. (Jɛnɛsis 40:​15; 41:​39-43; 50:​20) Di tin dɛn we Jiova bin du na tin dɛn we Josɛf nɔ bin de tink se go apin. Tink bak bɔt Josɛf in gret-grani Sera. Yu tink se Sera bin de fil se Jiova go alaw am fɔ bɔn in yon pikin lɛk aw i bin dɔn ol so, apat frɔm di pikin we in savant bin bɔn fɔ am? Sera nɔ bin de ɛva imajin se i go bɔn Ayzak.—Jɛnɛsis 21:​1-3, 6, 7.

14. Wetin wi biliv se Jiova go du fɔ wi?

 ¹⁴ Wi nɔ fɔ tink se Jiova go yuz mirekul fɔ pul ɔl di prɔblɛm dɛn we wi gɛt bifo di wɔl dɔn. Ɛn wi nɔ de tɛl Jiova fɔ du big big tin dɛn fɔ wi. Bɔt wi no se Jiova bin ɛp in fetful savant dɛn we bin de trade di kayn we we dɛn nɔ bin de tink se i go apin. Ɛn i nɔ de chenj. (Rid Ayzaya 43:​10-13.) Dat de mek wi biliv am mɔ ɛn mɔ. Wi shɔ se i go gi wi di pawa we wi nid fɔ mek wi go ebul fɔ du wetin i want. (Sɛkɛn Lɛta Fɔ Kɔrint 4:​7-9) Wetin wi lan frɔm Ɛzikaya, Josɛf, ɛn Sera dɛn ɛgzampul dɛn? Jiova go ɛp wi ivin we wi gɛt prɔblɛm we de rili mɔna wi if wi fetful to am.

15. Wetin go ɛp wi fɔ gɛt “di pis we Gɔd de gi,” ivin we wi gɛt prɔblɛm dɛn? Aw wi go ebul fɔ gɛt am?

¹⁵ Aw wi go gɛt “di pis we Gɔd de gi” ivin we wi gɛt prɔblɛm? Wi nid fɔ kɔntinyu fɔ gɛt tayt padi biznɛs wit Jiova. Wi ebul gɛt tayt padi biznɛs wit Jiova bikɔs Jizɔs Krays bin dɔn kam day fɔ wi. Di day we Jizɔs kam day fɔ wi na wan pan Jiova in wɔndaful wok dɛn. Bikɔs Jizɔs kam day fɔ wi, Jiova de fɔgiv wi sin dɛn, ɛn wi go gɛt klin kɔnshɛns ɛn kam nia Jiova mɔ ɛn mɔ.—Jɔn 14:​6; Jems 4:​8; Pita In Fɔs Lɛta 3:​21.

16. Wetin go apin we wi gɛt “di pis we Gɔd de gi”? Ɛksplen.

¹⁶ Wetin go apin we wi gɛt “di pis we Gɔd de gi we pas di we aw mɔtalman ebul ɔndastand”? Di Baybul se i go “gayd” wi at ɛn wi maynd. (Lɛta Fɔ Filipay 4:​7, NW) Di Grik wɔd we dɛn yuz fɔ “gayd” na wɔd we dɛn de yuz fɔ sojaman dɛn we de protɛkt dɛn siti. Na dɛn sojaman dɛn de bin de gayd di pipul dɛn we bin de na Filipay. Di pipul dɛn bin de slip fayn na nɛt bikɔs dɛn no se di siti rili sef. Semweso, we wi gɛt “di pis we Gɔd de gi,” wi nɔ de wɔri ɛn wi go gɛt kolat ɛn wi maynd go rɛst. Wi no se Jiova bisin bɔt wi ɛn i want mek wi bɛtɛ na layf. (Pita In Fɔs Lɛta 5:​10) Dat kin ɛp wi fɔ mek wi nɔ wɔri tumɔs ɔ fɔ mek wi at nɔ pwɛl.

17. Wetin go ɛp wi fɔ mek wi abop pan Jiova di tɛm we da big big trɔbul go kam?

¹⁷ I nɔ go te igen da big big trɔbul go kam. (Matyu 24:​21, 22) Wi nɔ rili no wetin go apin to wi we da de de kam. Bɔt wi nɔ nid fɔ wɔri tumɔs bɔt da tɛm de. Pan ɔl we wi nɔ no ɔl wetin Jiova go du, wi no udat na wi Gɔd. Wi no wetin i bin dɔn du trade trade fɔ in fetful savant dɛn. Wi dɔn si se ilɛk wetin apin, Jiova go mek shɔ se ɔl wetin i want bi. Ɛn i go du so di we we wi nɔ go tink se i go apin! So ɛni tɛm we Jiova du sɔntin fɔ wi de ɛnjɔy “di pis we Gɔd de gi we pas di we aw mɔtalman ebul ɔndastand”