1, 2. (a) Wetin kin mek wi aks di kwɛstyɔn, “Aw lɔŋ?” (b) Aw di ɛgzampul we Jiova in fetful savant dɛn bin sɛt trade kin ɛnkɔrej wi?

“AW LƆŊ?” Dis na di kwɛstyɔn we fetful prɔfɛt dɛn lɛk Ayzaya ɛn Abakɔk bin aks. (Ayzaya 6:​11; Abakɔk 1:​2) We Kiŋ Devid bin de rayt Sam 13, i bin aks dis sem kwɛstyɔn 4 tɛm. (Sam 13:​1, 2, NW) We Jizɔs Krays bin de wit pipul dɛn we nɔ bin gɛt fet pan am, i bin aks: “Aw lɔŋ?” (Matyu 17:​17) So wi nɔ fɔ sɔprayz if wisɛf de aks dis sem kwɛstyɔn.

² Wetin kin mek wi aks di kwɛstyɔn: “Aw lɔŋ?” Sɔntɛm pipul dɛn nɔ de trit wi di rayt we. Ɔ sɔntɛm wi gɛt wɛlbɔdi prɔblɛm ɔ wi dɔn ol. Ɔ i go bi se wi at pwɛl bikɔs i nɔ izi fɔ liv insay dis tɛm we tin “traŋa.” (Sɛkɛn Lɛta To Timoti 3:​1) Ɔ sɔntɛm di bad abit we ɔda pipul dɛn gɛt de mek wi at pwɛl. I lɛk us prɔblɛm de mɔna yu,  i fayn fɔ no se Jiova nɔ bin pɔnish in fetful savant dɛn we bin de trade we dɛn aks dis kwɛstyɔn.

3. Wetin go ɛp wi we wi gɛt prɔblɛm dɛn?

³ Wetin go ɛp wi we tin nɔ izi fɔ wi? Jizɔs in brɔda Jems, we na bin wan pan in disaypul dɛn bin rayt fɔ tɛl wi se: “Una fɔ bia sote di Masta kam.” (Jems 5:​7) So wi ɔl nid fɔ bia wet. Bɔt wetin i min fɔ bia wet? Aw wi go sho se wi gɛt dis fayn kwaliti?

4, 5. (a) Wetin i min fɔ bia wet? Aw wi go sho se wi de bia wet? (b) Us ɛgzampul di disaypul Jems bin gi fɔ sho wi aw fɔ bia wet? (Luk di pikchɔ nia dis atikul in taytul.)

⁴ Di Baybul se fɔ bia wet na kwaliti we Gɔd in spirit de gi. If Gɔd nɔ ɛp mɔtalman, wi nɔ go ebul bia wet di tɛm we tin nɔ rili izi fɔ wi. Fɔ bia wet na gift we Gɔd de gi. Na fayn we fɔ sho se wi lɛk Jiova ɛn ɔda pipul dɛn. If wi nɔ de bia wet, dat go mek wi nɔ lɛk ɔda pipul dɛn lɛk aw wi bin lɛk dɛn. (Sɛkɛn Lɛta Fɔ Kɔrint 13:​4; Lɛta Fɔ Galeshya 5:​22) Wetin i min fɔ bia wet? Fɔ bia wet min fɔ peshɛnt we tin nɔ izi fɔ wi ɛn fɔ tink di rayt we. (Lɛta Fɔ Kɔlɔse 1:​11; Jems 1:​3, 4) We wi peshɛnt, dat go ɛp wi fɔ fetful to Jiova ilɛk uskayn prɔblɛm mit wi. I de ɛp wi lɛ wi nɔ tɔn-dɛt we wi de sɔfa. Di Baybul tɛl wi se wi fɔ rɛdi fɔ bia wet. Wi go si dis insay Jems 5:​7, 8. (Rid.)

⁵ Wetin mek wi fɔ rɛdi fɔ bia wet fɔ si wetin Jiova go du? Jems bin se di prɔblɛm dɛn we kin apin to wi tan lɛk di tin dɛn we kin apin to fama. Pan ɔl we di fama kin wok tranga wan fɔ mek in fam, i nɔ kin ebul fɔ kɔntrol di wɛda ɔ di we aw di plant fɔ gro. I no se i nid fɔ bia wet fɔ lɛ di “grɔn du in wok fɔ lɛ i gi in valyu tin dɛn.” Semweso, we wi de bia de wet fɔ lɛ di tin dɛn we Jiova dɔn prɔmis wi fɔ apin, bɔku tin dɛn de mit wi we wi nɔ ebul fɔ kɔntrol. (Mak 13:​32, 33; Di Apɔsul Dɛn Wok [Akt] 1:​7) Jɔs lɛk fama, wi nid fɔ bia wet.

6. Wetin wi lan frɔm prɔfɛt Mayka in ɛgzampul?

⁶ Di prɔblɛm dɛn we de mit wi tide tan lɛk di tin dɛn we bin de apin insay prɔfɛt Mayka in tɛm. I bin de insay di tɛm we wan wikɛd kiŋ we nem Eaz bin de rul. Dat bin mek bɔku pipul dɛn bin de du bad tin dɛn. Tin bin so bad-ɔf dat di Baybul se di pipul dɛn ‘bin sabi aw fɔ du bad we i nɔ go pwɛl.’ (Rid Mayka 7:​1-3.) Mayka bin no se i nɔ go ebul fɔ chenj di tin dɛn we de apin. So wetin i go du? I bin tɛl wi se: “In go luk to PAPA GƆD [“Jiova,” NW] nɔmɔ as nain na di Gɔd we de sev am ɛn i go yɛri am.” (Mayka 7:​7) Jɔs lɛk Mayka, wisɛf nid fɔ kɔntinyu fɔ “luk to PAPA GƆD.”

7. Wetin bak wi fɔ du apat frɔm di wet we wi de wet fɔ lɛ Jiova du ɔl wetin i dɔn prɔmis se i go du fɔ wi?

⁷ If wi gɛt fet jɔs lɛk Mayka, wi nɔ go wet nɔmɔ. Bifo dat, wi go rɛdi fɔ bia wet fɔ Jiova. Di prɔblɛm we de mit wi nɔ tan lɛk we sɔmbɔdi de wet na jel fɔ lɛ dɛn kil am. Dɛn de fɔs da pɔsin de fɔ lɛ i wet, ɛn i nɔ de gladi fɔ wet  fɔ wetin gɛt fɔ apin. So di wet we wi de wet difrɛn frɔm di wet we da jelman de wet. Wi rɛdi fɔ wet fɔ Jiova bikɔs wi no se i go du ɔl wetin i dɔn prɔmis se i go du fɔ wi, ɛn i go gi wi layf we go de sote go. So wi go ‘gɛt maynd so dat wi go ebul bia ɔltin. Wi fɔ gladi.’ (Lɛta Fɔ Galeshya 1:​11, 12) We wi de wet, wi fɔ tek tɛm lɛ wi nɔ grɔmbul se Jiova slo we i de du tin bikɔs dat go mek i nɔ gladi.—Lɛta Fɔ Kɔlɔse 3:​12.

8. Wetin wi go lan frɔm fetful man ɛn uman dɛn we bin de trade?

⁸ Wetin go ɛp wi fɔ lɛ wi rɛdi fɔ wet? Lɛ wi tink bɔt fetful man ɛn uman dɛn we bin de trade trade we bin bia wet fɔ lɛ Jiova du ɔl di tin dɛn we i bin dɔn prɔmis se i go du. (Lɛta Fɔ Rom 15:​4) As wi de tink gud wan bɔt di ɛgzampul dɛn we dɛn bin sɛt, i go fayn fɔ lɛ wi mɛmba aw lɔng dɛn bin gɛt fɔ wet, wetin mek dɛn bin rɛdi fɔ wet, ɛn us blɛsin dɛn gɛt fɔ di bia we dɛn bia wet.

9, 10. Aw lɔng Ebraam ɛn Sera bin wet fɔ mek Jiova du wetin i prɔmis dɛn?

⁹ Lɛ wi tɔk bɔt Ebraam ɛn Sera dɛn ɛgzampul. Bikɔs dɛn bin sho se dɛn peshɛnt ɛn gɛt fet, dɛn bin ebul fɔ gɛt ɔl wetin Gɔd prɔmis. Di Baybul tɛl wi se “bikɔs Ebraam nɔ bin dawt,” Jiova prɔmis am se i go blɛs am ɛn mek i bi papa to bɔku bɔku pikin dɛn we go bi  wan big neshɔn. (Di Ibru Pipul Dɛn 6:​12, 15) Wetin mek Ebraam bin nid fɔ bia wet? Na bikɔs di tin dɛn we Gɔd prɔmis am go tek tɛm fɔ lɛ dɛn apin. Insay Naysan 14, di ia 1943 bifo Krays Ebraam ɛn Sera, ɛn ɔl di pipul dɛn we bin de na dɛn os krɔs di Riva Yufretis, ɛn go na di land we Jiova bin dɔn prɔmis se i go gi dɛn. Ebraam bin gɛt fɔ wet fɔ 25 ia bifo i bɔn in bɔy pikin we nem Ayzak, ɛn i bin gɛt fɔ wet fɔ ɔda 60 ia bifo dɛn bɔn in granpikin dɛn we nem Isɔ ɛn Jekɔp.—Di Ibru Pipul Dɛn 11:​9.

¹⁰ Ɔmɔs land Ebraam bin gɛt? Di Baybul tɛl wi se: “Gɔd nɔ bin gi Ebraam ples fɔ de we go bi in yon; i nɔ gi am lili ples sɛf, bɔt i prɔmis am se i go gi am ples, ɛn da ples go bi Ebraam in yon prɔpati, ɛn da prɔpati de go bi Ebraam in granpikin pikin dɛn yon, wɛn Ebraam dɔn day. Ebraam nɔ bin bɔn pikin yɛt we Gɔd tɛl am dat.” (Di Apɔsul Dɛn Wok [Akt] 7:​5) Lɛk 430 ia afta Ebraam krɔs Riva Yufretis, na da tɛm de in granpikin pikin dɛn bi wan neshɔn we go de na da land de.—Ɛksodɔs 12:​40-42; Lɛta Fɔ Galeshya 3:​17.

11. Wetin mek Ebraam bin rɛdi fɔ wet? Us blɛsin dɛn i go gɛt we i bin wet?

¹¹ Ebraam bin rɛdi fɔ bia wet, bikɔs i bin biliv tranga wan se Jiova go du ɔl wetin i dɔn prɔmis. (Rid Di Ibru Pipul Dɛn 11:​8-12.) Ebraam bin gladi fɔ wet, pan ɔl we i nɔ bin si ɔl di tin dɛn we Jiova bin prɔmis we i bin de alayf. Bɔt jɔs imajin aw Ebraam go gladi we i go gɛt layf bak na Paradays. I go sɔprayz fɔ si aw dɛn rayt bɔt in stori ɛn in famili dɛn stori na bɔku say dɛn na di Baybul. * (Luk di futnot.) Jɔs imajin aw i go gladi fɔ no di impɔtant pat we i bin ple fɔ mek di prɔmis we Jiova bin mek bɔt di Mɛsaya apin! Fɔ tru, i go si se da lɔng tɛm we i bin wet fɔ nɔ bin go fɔ natin.

12, 13. Wetin mek Josɛf bin nid fɔ bia wet? Us fayn kwaliti i bin gɛt?

¹² Ebraam in gret gran pikin we nem Josɛf insɛf bin sho se i rɛdi fɔ bia wet. Dɛn bin du tin dɛn to am we nɔ rayt. Fɔs, we i bin ol 17 ia, in yon brɔda dɛn bin sɛl am as slev. Dɔn, in masta in wɛf lay pan am se i tray fɔ rep am ɛn dɛn bin put am na jel. (Jɛnɛsis 39:​11-20; Sam 105:​17, 18) Pan ɔl we Josɛf bin fetful to Gɔd, i tan lɛk se na sɔfa i bin de sɔfa; i nɔ bin gɛt ɛni blɛsin. Bɔt afta 13 ia, ɔltin bin chenj kwik kwik wan. Dɛn bin pul am na jel, ɛn i bin bi di sɛkɔn impɔtant pɔsin na Ijipt.—Jɛnɛsis 41:​14, 37-43; Di Apɔsul Dɛn Wok [Akt] 7:​9, 10.

¹³ Yu tink se Josɛf in at bin pwɛl pasmak we dɛn nɔ bin trit am di rayt we? Yu tink se i bin fil lɛk se Jiova dɔn fɔgɛt bɔt am? Nɔ, nɔto so i bi. Wetin bin ɛp Josɛf fɔ bia wet? Na di fet we i bin gɛt pan Jiova. I bin no se na Jiova de kɔntrol ɔltin. Wi si dis bay di we aw i bin tɔk to in brɔda dɛn we i bin  se: “Lɛ dɛn nɔ fred. In nɔto PAPA GƆD we de pɔnish ɔ jɔj pɔsin. I se dɛn tay bagin fɔ du am bad, bɔt PAPA GƆD tɔn di bad to gud so dat plɛnti pipul nɔ dɔn day.” (Jɛnɛsis 50:​19, 20) Fɔ tru, Josɛf bin kam fɔ no se i nɔ bin bia wet fɔ natin.

14, 15. (a) Wetin yu rili lɛk bɔt di we aw Devid bin de bia? (b) Wetin bin ɛp Devid fɔ bia wet?

¹⁴ Kiŋ Devid na di ɔda pɔsin we dɛn bin du bɔku tin dɛn to we nɔ rayt. Pan ɔl we Jiova bin dɔn pik am se na in gɛt fɔ bi di Kiŋ na Izrɛl frɔm we i bin smɔl, Devid bin gɛt fɔ wet fɔ 15 ia bifo i bi Kiŋ na in yon trayb. (Sɛkɛn Samiɛl 2:​3, 4) Insay da tɛm de, Kiŋ Sɔl we nɔ bin fetful igen to Jiova bin de tray fɔ kil Devid. * (Luk di futnot.) Dat bin mek Devid bin de rɔnawe go na difrɛn difrɛn ples dɛn fɔ sev in layf, sɔntɛnde i bin de rɔnawe go na ɔda kɔntri ɛn sɔm tɛm dɛn de na insay kev dɛn na di ɛmti land usay nɔbɔdi nɔ go ebul fɔ liv. Ivin we dɛn bin kil Sɔl pan wɔ, Devid bin stil gɛt fɔ wet fɔ lɛk 7 ia mɔ bifo dɛn mek am kiŋ na Izrɛl.—Sɛkɛn Samiɛl 5:​4, 5.

¹⁵ Wetin mek Devid bin rɛdi fɔ bia wet? I bin gi wi di ansa na di sem Sam 13 usay i bin aks 4 tɛm se: “Aw lɔng?” Dis na wetin i bin se: “A trɔs yu bikɔs yu lɛk mi ɔltɛm A gladi bikɔs yu sev mi. A go siŋ ɛn prez yu bikɔs yu gud to mi.” (Sam 13:​5, 6) Devid bin no se Jiova lɛk am ɛn i go kɔntinyu fɔ de biɛn am. I bin de tink bɔt di tɛm dɛn we Jiova bin dɔn de ɛp am, ɛn i bin de mɛmba di tɛm we Jiova go mek i lɛf fɔ sɔfa. Devid bin no se i nɔ bin de bia wet fɔ Jiova in blɛsin dɛn fɔ natin.

16, 17. Aw Jiova Gɔd ɛn Jizɔs Krays dɔn sɛt di bɛst ɛgzampul fɔ bia wet?

¹⁶ Jiova nɔ de tɛl wi fɔ du sɔntin we insɛf nɔ rɛdi fɔ du. Na Jiova dɔn sɛt di bɛst ɛgzampul fɔ bia wet. (Rid Pita In Sɛkɛn Lɛta 3:​9, NW.) Fɔ ɛgzampul, trade trade insay di gadin we bin de na Idɛn, Setan bin tɔk se Jiova nɔ de du tin di rayt we. Jiova de peshɛnt “wet” fɔ di tɛm we in nɔ go gɛt wan badnem. Dat go mek ɔl di wan dɛn we de “wet fɔ am” gɛt wɔndaful blɛsin dɛn.—Ayzaya 30:​18.

¹⁷ Jizɔs insɛf bin rɛdi fɔ wet. We i bin de na di wɔl, i bin fetful to Gɔd te i day. Insay di ia 33, i go gi Gɔd, in pafɛkt layf we i bin dɔn sakrifays fɔ mɔtalman. Bɔt i bin stil gɛt fɔ wet te di ia 1914 fɔ mek i bigin fɔ rul as Kiŋ. (Di Apɔsul Dɛn Wok [Akt] 2:​33-35; Di Ibru Pipul Dɛn 10:​12, 13) Pan ɔl dat, Jizɔs stil gɛt fɔ wet te di  Wan Tawzin Ia dɔn we i gɛt fɔ rul, bifo i dɔnawe wit ɔl in ɛnimi dɛn. (Fɔs Lɛta Fɔ Kɔrint 15:​25) Dat na lɔng tɛm i gɛt fɔ wet fɔ, bɔt i nɔ go wet fɔ natin.

18, 19. Wetin go ɛp wi fɔ rɛdi fɔ peshɛnt ɛn wet?

¹⁸ Fɔ tru, Jiova want wi fɔ peshɛnt ɛn sho se wi de wet. Bɔt wetin go ɛp wi fɔ du dis? Wi nid fɔ pre to Gɔd fɔ in oli spirit. Mɛmba se, fɔ peshɛnt na kwaliti we Gɔd in oli spirit de gi. (Lɛta Fɔ Ɛfisɔs 3:​16; 6:​18; Fɔs Lɛta Fɔ Tɛsalonayka 5:​17-19) Beg Jiova fɔ ɛp yu fɔ peshɛnt ɛn bia.

¹⁹ Mɛmba bak wetin bin ɛp Ebraam, Josɛf, ɛn Devid fɔ peshɛnt ɛn bia wet fɔ lɛ Jiova du ɔl wetin i dɔn prɔmis se i go du. Wetin bin ɛp dɛn? Na di fet we dɛn bin gɛt ɛn di abop we dɛn abop pan Jiova bin ɛp dɛn. Dɛn nɔ bin tink bɔt dɛnsɛf nɔmɔ ɛn di tin dɛn we dɛn want. We wi de tink bɔt di we aw tin bin fayn fɔ dɛn we dɛn bia wet, wi bak go gɛt di kɔrej fɔ bia wet.

20. Wetin wi ɔl fɔ mekɔp wi maynd fɔ du?

²⁰ Pan ɔl we wi go gɛt prɔblɛm dɛn ɛn tin dɛn go mit wi we nɔ izi, wi dɔn mekɔp wi maynd fɔ “peshɛnt wet.” Sɔntɛnde, wi kin aks Jiova: “Aw lɔŋ?” (Ayzaya 6:​11) Bɔt di trɛnk we Gɔd in oli spirit de gi wi de mek wi falamakata di prɔfɛt Jɛrimaya ɛn wi go tɔk se: “Na PAPA GƆD [“Jiova,” NW] a gɛt, so nain nɔmɔ a go abop pan.”—Lamɛnteshɔn 3:​21, 24.