LAS ia, dɛn bin pik bɔku brɔda dɛn ɔlsay na di wɔl fɔ bi ɛlda ɛn ministerial savant dɛn. If yu na wan pan dɛn, i go bi se yu rili gladi fɔ sav Jiova ɛn yu brɔda dɛn dis nyu we.

Na nɔmal tin bak if yu de wɔri. Wan yɔŋ ɛlda we nem Jesin bin tɔk se: “We dɛn bin jɔs pik mi fɔ bi ɛlda, a bin de wɔri smɔl bɔt mi nyu wok dɛn we a dɔn gɛt na di kɔngrigeshɔn.” Mozis ɛn Jɛrimaya bin fil se dɛn nɔ fit fɔ gɛt di nyu wok we Jiova bin gi dɛn. (Ɛksodɔs 4:​10; Jɛrimaya 1:​6) If yu de fil dis kayn we, wetin yu tink se yu go du fɔ mek yu go gɛt mɔ kɔnfidɛns ɛn kɔntinyu fɔ du tin dɛn we go mek yu go bifo? Yu kin lan bɔku tin frɔm Timoti in ɛgzampul.—Di Apɔsul Dɛn Wok [Akt] 16:​1-3.

I go bi se Timoti bin ol lɛk 20 ia we i bin stat fɔ travul wit apɔsul Pɔl. Di fɔstɛm we Pɔl bin tɛl Timoti fɔ travul wit am, i go bi se Timoti bin fil se i nɔ fit fɔ tich ɛn advays ɔda pipul dɛn bikɔs i bin tu yɔŋ. (Fɔs Lɛta To Timoti 4:​11, 12; Sɛkɛn Lɛta To Timoti 1:​1, 2, 7) Bɔt i kɔntinyu fɔ du tin dɛn we go mek i go bifo, ɛn afta tɛn ia Pɔl bin rayt to di Kristian dɛn na Filipay se: “If Masta Jizɔs gri, a go sɛn Timoti to una, i nɔ go te igen.” Wetin mek Pɔl bin fil dis kayn we? I bin ɛksplen se: “Nain wangren a si se want fɔ ɛp una, fɔ tru.”—Lɛta Fɔ Filipay 2:​19, 20.

Wetin mek Timoti na fayn ɛgzampul fɔ ɛlda dɛn? Lɛ wi tɔk bɔt siks rizin dɛn.

1. I bin rili bisin bɔt ɔda pipul dɛn. Pɔl bin tɛl di brɔda dɛn na Filipay se Timoti ‘want fɔ ɛp dɛn fɔ tru.’ (Lɛta Fɔ Filipay 2:​20) Timoti bin want di brɔda ɛn sista dɛn fɔ kɔntinyu fɔ de nia Jiova, ɛn i bin rɛdi fɔ sakrifays in tɛm ɛn trɛnk fɔ ɛp dɛn.

Wan brɔda we nem Wiliam we dɔn bi ɛlda pas 20 ia, kin tɛl di brɔda dɛn we dɛn dɔn jɔs pik fɔ bi ɛlda se: “Na fɔ lɛk di brɔda dɛn. Pe atɛnshɔn mɔ pan di tin dɛn we dɛn nid pas di tin dɛn we yu fɔ du ɔ ɔganayz na di kɔngrigeshɔn.” Nɔ tan lɛk sɔm poda poda drayva dɛn we nɔ bisin bɔt di pasenja dɛn, dɛn jɔs bisin bɔt mɔni nɔmɔ ɛn fɔ rich di las steshɔn.

2. I bin put Jiova in wok fɔs na in layf. Pɔl bin se Timoti difrɛn frɔm “ɔl di ɔda pipul dɛn we de wok fɔ dɛnsɛf nɔmɔ, dɛn nɔ de wok fɔ Krays.” (Lɛta Fɔ Filipay 2:​21) Pɔl bin notis se di brɔda dɛn we bin de arawnd am bin jɔs bisin bɔt dɛnsɛf nɔmɔ. Sɔntɛnde, dɛn kin bisin bɔt dɛnsɛf mɔ pas fɔ sav Jiova. Bɔt Timoti nɔ bin de so! Jɔs afta we i gɛt di chans fɔ du mɔ fɔ sav Gɔd, i bin du lɛk aw Ayzaya bin du we i tɔk se: “Luk mi! Sɛn mi.”—Ayzaya 6:​8.

Aw yu go bisin bɔt yusɛf ɛn di tin dɛn we di kɔngrigeshɔn nid? Fɔs, fala Pɔl in advays we se: “Mek shɔ bɔt di tin dɛn we rili impɔtant.” (Lɛta fɔ Filipay 1:​10, NW) Put Jiova in wok fɔs na yu layf. Sɛkɔn, avɔyd tin dɛn we go tek bɔku pan yu tɛm ɛn trɛnk. Pɔl bin tɛl Timoti se: “Nɔ du dɛn tin we dɛn yɔŋ pipul dɛn at kin gi dɛn fɔ du we dɛn nɔba ebul kɔntrol; tray fɔ de du wetin rayt na Gɔd yay, tray fɔ abop pan Gɔd, fɔ lɛk ɔlman ɛn fɔ mek kol at de.”—Sɛkɛn Lɛta To Timoti 2:​22.

3. I wok tranga wan fɔ Jiova. Pɔl bin tɔk bɔt Timoti se: “I de wok wit mi, lɛkɛ se in na mi pikin ɛn mi na in papa, fɔ mek mɔ ɛn mɔ pipul biliv di Gud Nyuz.” (Lɛta Fɔ Filipay 2:​22) Timoti nɔ bin lezi. I bin  wok tranga wan wit Pɔl, ɛn dis bin mek dɛn padi biznɛs tayt mɔ ɛn mɔ.

Tide, bɔku wok de fɔ du na Jiova in ɔganayzeshɔn. Dis wok de mek yu rili satisfay ɛn i go ɛp yu fɔ kam nia yu brɔda ɛn sista dɛn mɔ ɛn mɔ. So mek shɔ se yu “de du Gɔd in wok ɔltɛm.”—Fɔs Lɛta Fɔ Kɔrint 15:​58.

4. I bin de du wetin i de lan. Pɔl bin rayt to Timoti se: “Yu dɔn yɛri dɛn tin we a lan yu, yu dɔn si aw a de du, ɛn yusɛf no wetin a want du na layf; yu dɔn no wetin a biliv, yu dɔn no aw a de bia, aw a lɛk pipul, aw a tinap traŋa.” (Sɛkɛn Lɛta To Timoti 3:​10) Timoti bin de du wetin i de lan, so dɛn bin gi am mɔ wok dɛn fɔ du.—Fɔs Lɛta Fɔ Kɔrint 4:​17.

Yu nɔ tink se i go fayn fɔ mek yu fɛn wan ɛlda we yu de kɔle pan ɛn we yu go want fɔ falamakata? Wan brɔda we nem Tɔm we dɔn bi ɛlda fɔ lɔng tɛm bin tɔk se i mɛmba we wan ɛlda bin de sho se i bisin bɔt am ɛn i bin tren am gud gud wan. Tɔm bin kɔntinyu fɔ tɔk se: “A bin de aks fɔ in advays ɛn a bin de du wetin i de tɛl mi ɔltɛm. Dis bin mek a gɛt kɔnfidɛns mɔ ɛn mɔ.”

5. I bin kɔntinyu fɔ tren insɛf. Pɔl bin advays Timoti se: “Tren yusɛf fɔ liv fɔ Gɔd nɔmɔ.” (Fɔs Lɛta To Timoti 4:​7) Pan ɔl we rɔnman kin gɛt pɔsin we de tren am, i stil nid fɔ de tren insɛf. Pɔl bin advays Timoti se: “Kɔntinyu fɔ de rid usay bɔku pipul dɛn de, ɛnkɔrej pipul dɛn, tich pipul dɛn. . . . Tink gud wan bɔt dɛn tin ya; ɔndastand dɛn gud gud wan, so dat ɔlman go si klia wan se yu de go bifo pan Gɔd biznɛs.”—Fɔs Lɛta to Timoti 4:​13-15, NW.

Yusɛf nid fɔ de tren yusɛf. Stɔdi di Baybul gud gud wan, tray fɔ no di nyu tin dɛn we Jiova in ɔganayzeshɔn de tɛl wi. Nɔ mek lɛk se yu sabi ɔltin. I nɔ fayn fɔ tink se yu sabi ɔltin ɛn yu go ebul sɔlv ɛni prɔblɛm ilɛksɛf yu nɔ stɔdi bɛtɛ. Jɔs lɛk Timoti, “yu fɔ bikyaful wetin yu de du ɛn wetin yu de lan pipul.”—Fɔs Lɛta To Timoti 4:​16.

6. I bin abop pan Jiova in oli spirit. We Pɔl bin de tɔk bɔt Timoti in prichin wok, i bin mɛmba am se: “Kip dɛn gud tin ya we Gɔd dɔn gi yu bay in Spirit, we de insay wi.” (Sɛkɛn Lɛta To Timoti 1:​14) Timoti bin nid fɔ abop pan Gɔd in oli spirit.

Wan brɔda we nem Dɔnal we dɔn bi ɛlda fɔ lɔng tɛm bin tɔk se: “Ɛlda ɛn ministerial savant dɛn fɔ valyu dɛn padi biznɛs wit Gɔd. Di wan dɛn we go du dat go gɛt trɛnk mɔ ɛn mɔ. If dɛn pre fɔ Gɔd in spirit ɛn tray fɔ gɛt di kwaliti dɛn we di spirit de gi, dɛn go bi big blɛsin to dɛn brɔda ɛn sista dɛn.”—Sam 84:​7; Pita In Fɔs Lɛta 4:​11.

I rili fayn fɔ si nyu ministerial savant ɛn ɛlda dɛn we de go bifo pan Jiova in wok jɔs lɛk yu. Jesin we wi bin dɔn tɔk bɔt tɔk se: “Ɔl dɛn tɛm ya we a dɔn bi ɛlda, a dɔn lan bɔku tin ɛn a dɔn gɛt kɔnfidɛns mɔ ɛn mɔ. Naw a rili de ɛnjɔy mi wok we a gɛt insay di kɔngrigeshɔn ɛn a tek am as big big ɔnɔ!”

Yu tink se yu go kɔntinyu fɔ go bifo? If yu fala Timoti in ɛgzampul, yusɛf go bi blɛsin to yu brɔda ɛn sista dɛn.