Wetin mek nɔbɔdi nɔ fɔ post Jiova Witnɛs dɛn buk, magazin, ɛn ɔda tin dɛn na ɔda wɛbsayt ɔ Intanɛt sayt dɛn we de mek ɔda pipul dɛn no mɔ bɔt pɔsin ɔ ɔda say dɛn na di Intanɛt?

Sɔm pipul dɛn tink se bikɔs wi nɔ de put prayz pan wi buk ɛn magazin dɛn, dat kin mek dɛn kɔpi ɔ post dɛn na ɔda wɛbsayt dɛn ɔ na Intanɛt sayt dɛn we de mek ɔda pipul dɛn no mɔ bɔt pɔsin. Bɔt dis kin kɔz siriɔs prɔblɛm ɛn dis kin go agens wetin de na di say we se Wetin Yu Fɔ No Bifo Yu Yuz Dis Wɛbsayt. * (Luk di futnot.) Dɛn Lɔ dɛn ya sho klia wan se nɔbɔdi nɔ gɛt rayt fɔ “post pikchɔ, ilɛktronik pɔblikeshɔn dɛn, myuzik, fim dɛn, ɔ atikul dɛn frɔm dis Wɛbsayt ɛn put am na di Intanɛt (ɛni wɛbsayt, sayt we yu go ebul fɔ sheb sɔntin, ɔ sayt we yu kin tɔk to yu padi dɛn).” Wetin mek dɛn lɔ ya impɔtant?

Ɔl di tin dɛn we de na wi wɛbsayt na tin dɛn we ɔda pipul dɛn nɔ gɛt rayt fɔ kɔpi, dis min se dɛn gɛt lɔ dɛn we de protɛkt dɛn. Dis rili impɔtant bikɔs i de ɛp fɔ lɛ pipul dɛn nɔ yuz am di rɔŋ we. Pipul dɛn we dɔn lɛf fɔ wɔship Jiova ɛn we de tɔk bad tin bɔt in pipul dɛn ɛn ɔda pipul dɛn we want fɔ ambɔg wi wok, kin put wi buk ɛn magazin dɛn na dɛn wɛbsayt fɔ mek Jiova Witnɛs dɛn ɛn ɔda pipul dɛn go de. Bɔt na dɛn wɛbsayt dɛn ya dɛn kin put tin dɛn we de mek pipul dɛn gɛt dawt. (Sam 26:​4; Prɔvabs 22:​5) Ɔda pipul dɛn de yuz wi buk ɛn magazin dɛn ɔ wi jw.org logo fɔ advatayz, pan ap dɛn na dɛn fon ɔ tablɛt, ɔ ɔda tin dɛn, ɛn pan tin dɛn we dɛn de sɛl. Bɔt bikɔs di lɔ de protɛkt ɔl di tin dɛn we wi de yuz ɛn wi logo, dat de gi wi di rayt fɔ go na kɔt ɛn stɔp dɛn fɔ lɛ dɛn nɔ du dat. (Prɔvabs 27:​12) Bɔt di kɔt nɔ go sɔpɔt wi if wi de alaw sɔm pipul dɛn ɔ ivin wi brɔda ɛn sista dɛn fɔ post wi buk ɛn magazin dɛn na ɔda wɛbsayt dɛn ɔ fɔ yuz wi jw.org logo fɔ sɛl sɔntin.

If wi dawnlod wi buk ɛn magazin dɛn frɔm ɛni ɔda wɛbsayt apat frɔm jw.org, dat de kɔz prɔblɛm. Jiova de yuz “di slev we fetful ɛn gɛt sɛns” fɔ gi wi buk, magazin ɛn ɔda tin dɛn we go ɛp wi fɔ gɛt tayt padi biznɛs wit am. (Matyu 24:​45, NW) Di “slev” we fetful de yuz www.pr418.com, tv.pr418.com, ɛn wol.pr418.com, we na wi ɔfishal wɛbsayt dɛn nɔmɔ fɔ gi wi buk, magazin ɛn ɔda tin dɛn. Ɛn na tri ɔfishal ap dɛn nɔmɔ wi gɛt fɔ mobayl fon ɛn tablɛt dɛn; we na JW Library^®, JW Language^®, ɛn JW Library Sign Language^®. Wi nɔ go fɛn ɛnitin we dɛn de advatayz ɔ ɛnitin we de na Setan in wɔl na dɛn wɛbsayt ɛn ap dɛn ya. Bɔt if wi dawnlod ɔ rid wi buk, magazin ɛn ɔda tin dɛn frɔm ɔda wɛbsayt ɔ ap, na siriɔs prɔblɛm bikɔs dɛn go dɔn chenj sɔntin pan dɛn.—Sam 18:​26; 19:​8.

If wi post wi buk, magazin ɛn ɔda tin dɛn na wɛbsayt usay pipul dɛn de mek kɔmɛnt, dis kin mek pipul dɛn we dɔn lɛf fɔ wɔship Jiova ɛn we de tɔk bad tin bɔt in pipul dɛn ɛn ɔda wan dɛn we de fɛn fɔlt pan Jiova in ɔganayzeshɔn fɔ mek kɔmɛnt dɛn. Sɔm brɔda ɛn sista dɛn kin agyu wit dɛn pipul dɛn ya ɛn dis kin briŋ badnem to Jiova. Fɔ du dɛn kayn tin ya na di Intanɛt nɔto fayn we fɔ kɔrɛkt di we aw pɔsin de tink ɛn ɛp am fɔ ɔndastand di trut. (Fɔs Lɛta To Timoti 6:​3-5; Sɛkɛn Lɛta To Timoti 2:​23-25) Dɔn bak, sɔm pipul dɛn kin mek wɛbsayt ɔ akawnt dɛn na Intanɛt sayt dɛn we de mek ɔda pipul dɛn no mɔ bɔt pɔsin we kin tan lɛk se na frɔm wi ɔganayzeshɔn ɔ na frɔm di brɔda dɛn na di Gɔvnin Bɔdi. Bɔt ɔl na fek. Nɔbɔdi na di Gɔvnin Bɔdi nɔ gɛt in yon Wɛb pej ɔ akawnt na Intanɛt sayt dɛn we de mek ɔda pipul dɛn no mɔ bɔt am.

We wi de tɛl pipul dɛn bɔt jw.org, wi de sɔpɔt di wok fɔ prich di “Gud Nyuz.” (Matyu 24:​14) Wi wɛbsayt ɛn wi ap dɛn de go bifo ɛvride. Wi want ɔlman fɔ bɛnifit frɔm dɛn. So i nɔ bad fɔ sɛn wi buk ɛn magazin dɛn as imel to ɔda pipul dɛn ɔ fɔ sɛn link we go mek dɛn go na wi wɛbsayt. We wi du dis, wi de ɛp pipul dɛn fɔ yuz di tin dɛn we di “slev we fetful ɛn gɛt sɛns,” we na di wangren we we Jiova de yuz fɔ gi wi tin dɛn we go mek wi gɛt tayt padi biznɛs wit am.