BIKƆS wi de insay dis las dez we tin rili tranga, wi nid fɔ peshɛnt pas ɛni ɔda tɛm. (Sɛkɛn Lɛta To Timoti 3:​1-5) Bɔku pipul dɛn we de arawnd wi nɔ peshɛnt. Dis de mek dɛn de tink bɔt dɛnsɛf nɔmɔ, dɛn lɛk fɔ agyu, ɛn dɛn nɔ ebul kɔntrol dɛnsɛf. So i fayn fɔ aks wisɛf dɛn kwɛstyɔn dɛn ya: ‘Fɔ se a nɔ peshɛnt igen lɛk di pipul dɛn we de arawnd mi? Wetin i min fɔ rili peshɛnt? Wetin a go du fɔ mek a kɔntinyu fɔ gɛt peshɛnt?’

Wetin di Baybul min we i tɔk bɔt “peshɛnt”? I nɔ jɔs min fɔ bia wit prɔblɛm. Pɔsin we peshɛnt go kɔntinyu fɔ bia bikɔs i op se tin go bɛtɛ. I nɔ jɔs de tink bɔt insɛf, bɔt i de tink bɔt aw ɔda pipul dɛn de fil ivin di wan dɛn we de mek i vɛks ɔ we nɔ de trit am fayn. I de op se dɛn padi biznɛs go go bifo. Wi nɔ sɔprayz we di Baybul tɔk se pɔsin we gɛt lɔv de ebul peshɛnt. * (Luk di futnot.) Peshɛnt na wan pan di “kwaliti dɛn we di spirit de ɛp wi fɔ gɛt.” (Lɛta fɔ Galeshya 5:​22, 23, NW) So wetin wi nid fɔ du fɔ bi pɔsin we rili peshɛnt?

Fɔ bi pɔsin we peshɛnt, wi nid fɔ pre to Jiova fɔ in oli spirit, we i de gi to di wan dɛn we abop pan am. (Lyuk 11:​13) Da spirit de rili pawaful, bɔt wi stil nid fɔ du sɔntin bɔt wetin wi de pre fɔ. (Sam 86:​10, 11) Dis min se ɛvride wi nid fɔ du ɔl wetin wi ebul fɔ sho se wi peshɛnt ɛn fɔ kɔntinyu fɔ bi pɔsin we peshɛnt. Bɔt sɔntɛnde wi nɔ kin ebul. Wetin go ɛp wi?

Wi nid fɔ stɔdi ɛn falamakata Jizɔs in fayn ɛgzampul. We di apɔsul Pɔl bin de tɔk bɔt di nyu abit dɛn, i bin tɔk bɔt peshɛnt we na wan pan di kwaliti dɛn we pɔsin fɔ gɛt. I bin ɛnkɔrej wi se: “Mek di pis we Krays de gi de na una at.” (Lɛta fɔ Kɔlɔse 3:​10, 12, 15, futnot, NW) Fɔ du dat, wi gɛt fɔ falamakata Jizɔs in fayn ɛgzampul ɛn abop pan Jiova wit ɔl wi at fɔ se i go kɔrɛkt di prɔblɛm di rayt tɛm. If wi abop pan Jiova da kayn we de, wi nɔ go stɔp fɔ peshɛnt ilɛk wetin de apin arawnd wi.—Jɔn 14:​27; 16:​33.

Wi ɔl want mek di nyu wɔl kam kwik kwik wan. Bɔt wi go lan fɔ peshɛnt mɔ ɛn mɔ we wi tink bɔt aw Jiova dɔn peshɛnt wit wi. Di Baybul tɔk se: “Jiova nɔ slo fɔ du wetin i dɔn prɔmis, lɛk aw sɔm pipul dɛn de tink, bɔt i de peshɛnt wit una bikɔs i nɔ want mek ɛnibɔdi day, bɔt i want mek ɔlman lɛf fɔ du bad.” (Pita in Sɛkɔn Lɛta 3:​9, NW) So we wi tink bɔt aw Jiova de peshɛnt wit wi, dat go ɛp wi fɔ peshɛnt wit ɔda pipul dɛn. (Lɛta Fɔ Rom 2:​4) Wetin na sɔm pan di tin dɛn we go apin we go mek wi nid fɔ peshɛnt?

Bɔku tin dɛn de apin to wi ɛvride we go mek wi nid fɔ sho se wi peshɛnt. Fɔ ɛgzampul, wi nid fɔ peshɛnt so dat wi nɔ go kɔt wɔd na ɔda pipul dɛn mɔt pan ɔl we wi want fɔ tɔk sɔntin we impɔtant. (Jems 1:​19) Wi fɔ sho bak se wi peshɛnt we sɔmbɔdi du tin to wi we mek wi vɛks. Bifo wi tɔk ɔ du sɔntin wantɛm wantɛm, i fayn fɔ mɛmba wetin Jiova ɛn Jizɔs de du we wi du sɔntin di rɔŋ we. Dɛn nɔ de pe atɛnshɔn pan di smɔl smɔl tin dɛn we wi de du we nɔ rayt. Bifo dat, dɛn de si di gud kwaliti dɛn we wi gɛt ɛn dɛn de peshɛnt wit wi ɛn gi wi tɛm fɔ chenj.—Fɔs Lɛta To Timoti 1:​16; Pita In Fɔs Lɛta 3:​12.

Wi nid bak fɔ sho se wi peshɛnt we sɔmbɔdi tɛl wi se wi tɔk ɔ du sɔntin we nɔ rayt. Sɔntɛm di fɔs tin we yu go du na fɔ vɛks ɛn tray fɔ gi ɛkskyuz. Bɔt Gɔd in Wɔd tɛl wi se wi fɔ du tin difrɛn we. I tɔk se: “Pɔsin we peshɛnt . . . bɛtɛ pas di wan we prawd. Nɔ kwik fɔ vɛks bikɔs na fulman gɛt soso vɛksteshɔn nain at.” (Ɛkliziastis 7:​8, 9) So ivin if dɛn se wi du ɔ tɔk sɔntin we nɔto tru, wi nid fɔ peshɛnt ɛn tek tɛm tink bifo wi du sɔntin. Na dat Jizɔs bin du di tɛm we sɔm pipul dɛn bin lay pan am.—Matyu 11:​19.

Mama ɛn papa dɛn nid fɔ peshɛnt mɔ we dɛn de ɛp dɛn pikin dɛn fɔ stɔp sɔm kayn we we dɛn kin biev ɔ fɔ avɔyd di bad tin dɛn we dɛn kin want fɔ du. Fɔ ɛgzampul, lɛ wi tɔk bɔt Matias we de wok na Bɛtɛl na Yurop. We Matias bin yɔŋ, in skulmet dɛn bin de provok am fɔ wetin i biliv. Fɔs, in mama ɛn papa dɛn nɔ bin no se dis kayn tin bin de apin to am. Bɔt dɛn bin kam si se Matias dɔn bigin dawt di tin dɛn we i biliv. Matias in papa we nem Gilis bin tɔk se in ɛn in wɛf bin nid fɔ peshɛnt we dis kayn tin apin. Matias bin de aks kwɛstyɔn dɛn lɛk: “Udat na Gɔd? Wetin go sho se di Baybul na Gɔd in Wɔd? Aw wi no se na Gɔd rili want wi fɔ du dis ɔ dat?” I kin aks in papa bak se: “Wetin mek pɔsin fɔ jɔj mi jɔs bikɔs a nɔ de fil lɛk aw yu de fil ɛn biliv wetin yu biliv?”

Gilis bin ɛksplen se: “Sɔntɛnde, wi bɔypikin kin aks dɛn kwɛstyɔn dɛn de wit wamat; i nɔ  kin vɛks pan mi ɔ in mama, bɔt na pan di trut, bikɔs i de fil se na dat de mek i nɔ de ɛnjɔy in layf.” Aw Gilis bin ɛp in bɔypikin? I tɔk se: “Mi ɛn mi bɔypikin kin sidɔm ɛn tɔk fɔ lɔng tɛm.” Bɔku tɛm, Gilis kin jɔs lisin to Matias ɛn aks am kwɛstyɔn dɛn fɔ tray fɔ ɔndastand wetin i de tink ɛn aw i de fil. Sɔntɛnde, Gilis kin ɛksplen sɔm tin dɛn to in pikin ɛn tɛl am fɔ tink bɔt am fɔ lɛk wan ɔ tu dez bifo dɛn tɔk bɔt da tɔpik de bak. Sɔm ɔda tɛm dɛn, Gilis kin se insɛf kin nid sɔm tɛm fɔ tink bɔt wetin in pikin dɔn tɛl am. Bikɔs dɛn bin de tɔk ɔltɛm, Matias bin bigin fɔ ɔndastand wetin i min fɔ lɛ Jizɔs kam day fɔ fri wi frɔm sin ɛn day. I bin ɔndastand bak se Jiova lɛk wi ɛn na in gɛt di rayt fɔ rul wi. Gilis bin tɔk se: “I kin tek tɛm, ɛn bɔku tɛm i nɔ kin izi. Bɔt smɔl smɔl, i bin kam fɔ lɛk Jiova mɔ ɛn mɔ na in at. Mi ɛn mi wɛf rili gladi fɔ we wi bin peshɛnt fɔ ɛp wi pikin di tɛm we i bin yɔŋ, ɛn dis dɔn mek di trut dɔn rich in at.”

Gilis ɛn in wɛf bin abop pan Jiova fɔ ɛp dɛn di tɛm we dɛn bin de peshɛnt fɔ ɛp dɛn pikin. Gilis bin tɔk se: “Bɔku tɛm, a kin tɛl Matias se na di kayn we aw wi lɛk am mek mi ɛn in mama bin de pre fɔ mek Jiova ɛp am fɔ ɔndastand.” Gilis ɛn in wɛf bin rili gladi fɔ we dɛn peshɛnt ɛn fɔ we dɛn nɔ giv ɔp!

Wi nid bak fɔ peshɛnt we wi de kia fɔ pɔsin we sik na wi famili ɔ padi we dɔn sik fɔ lɔng tɛm. Fɔ ɛgzampul, lɛ wi tɔk bɔt Ɛlɛn * (luk di futnot), we insɛf de na Yurop.

Ɛlɛn in man bin gɛt strok tu tɛm we bin damej in bren. Dis bin mek in man nɔ bin no igen wetin na gladi-at, pwɛl at, ɔ sɔri-at. Dis nɔ bin rili izi fɔ Ɛlɛn. I bin tɔk se: “A dɔn de peshɛnt ɛn pre bɔku bɔku tɛm.” Ɛlɛn bin kɔntinyu fɔ tɔk se: “Mi bɛst skripchɔ we kin mek a gɛt kɔrej na Lɛta fɔ Filipay 4:​13, (NW) we se: ‘A ebul fɔ du ɔltin bikɔs sɔmbɔdi de we de gi mi pawa.’” Jiova bin sɔpɔt Ɛlɛn ɛn gi am trɛnk fɔ mek i ebul peshɛnt wit dis kayn prɔblɛm.—Sam 62:​5, 6.

Fɔ tru, di bɛst pɔsin we fɔ sho wi aw fɔ peshɛnt na Jiova. (Pita In Sɛkɛn Lɛta 3:​15) Bɔku tɛm, wi dɔn rid insay di Baybul bɔt aw Jiova rili peshɛnt. (Nɛimaya 9:​30; Ayzaya 30:​18) Yu mɛmba wetin Jiova bin du we Ebraam bin aks am bɔku kwɛstyɔn dɛn di tɛm we I bin disayd fɔ dɔnawe wit Sɔdɔm? Jiova nɔ bin kɔt wɔd na Ebraam in mɔt. I bin peshɛnt ɛn lisin to Ebraam in kwɛstyɔn dɛn ɔl ɛn di tin dɛn we bin de wɔri am. Dɔn, Jiova bin sho se i dɔn yɛri wetin Ebraam de wɔri bɔt ɛn i bin mek i no se i nɔ go dɔnawe wit Sɔdɔm ilɛk na jɔs tɛn pipul dɛn de de we de du wetin rayt. (Jɛnɛsis 18:​22-33) Jiova kin peshɛnt fɔ lisin ɔltɛm, i nɔ de ɛva du tin di we aw i nɔ fɔ du am!

Fɔ peshɛnt na wan pan di kwaliti dɛn we rili impɔtant fɔ lɛ ɔl Kristian dɛn gɛt. If wi du ɔl wetin wi ebul fɔ bi pɔsin we rili peshɛnt, wi go briŋ ɔnɔ to wi Papa, Jiova, ɛn wi go bi wan pan di “pipul we biliv pan Gɔd, we de bia, bikɔs dɛn na di wan dɛn, we go gɛt ɔl wetin Gɔd bin dɔn prɔmis fɔ gi in pipul dɛn.”—Di Ibru Pipul Dɛn 6:​10-12.