1. Wetin Ayzaya bin tɔk bɔt Jizɔs? Wetin mek dat de gi wi kɔrej?

DI TIN we Ayzaya bin tɔk bɔt Jizɔs Krays de ɛnkɔrej wi ɛn mek wi gɛt op. Ayzaya bin tɔk se Jizɔs “nɔ go jɔj bay wetin in yay de si, ɔ disayd bay wetin in yes de yɛri,” ɛn i go jɔj di po pipul dɛn fia wan. (Ayzaya 11:​3, 4) Wetin mek dis go ɛnkɔrej wi? Na bikɔs di wɔl we wi de fulɔp wit pipul dɛn we de jɔj ɔda pipul dɛn bay wetin dɛn de si. Wi rili nid Jizɔs we na pafɛkt Jɔj, we nɔ go ɛva jɔj wi bay wetin i de si!

2. Wetin Jizɔs bin tɛl wi fɔ du? Wetin wi go tɔk insay dis atikul?

² Ɛvride, wi kin tink wan kayn we bɔt ɔda pipul dɛn. Bɔt wi nɔ pafɛkt lɛk Jizɔs, so di we aw wi kin tink nɔ pafɛkt. I kin izi fɔ mek wi jɔj bay wetin wi de si. Bɔt Jizɔs bin tɛl wi se: “Una lɛf fɔ jɔj bay wetin una de si, una jɔj bay aw tin bi.” (Jɔn 7:​24) So Jizɔs want mek wi tan lɛk am ɛn nɔ jɔj ɔda pipul dɛn bay aw wi si dɛn. Insay dis atikul, wi go tɔk bɔt tri tin dɛn we kin afɛkt di we aw wi kin tink bɔt pɔsin. Tin dɛn lɛk, pɔsin in kɔlɔ, in kɔntri, ɔmɔs mɔni i gɛt, ɛn ɔmɔs  ia i ol. Fɔ ɛni wan pan dɛn, wi go lan aw wi go obe Jizɔs ɛn nɔ jɔj pipul dɛn bay aw wi si dɛn.

3, 4. (a) Wetin mek Pita bin chenj di we aw i bin de si pipul dɛn we nɔto Ju? (Luk di pikchɔ nia dis atikul in taytul.) (b) Us nyu tin Jiova bin tich Pita?

³ Imajin aw Pita bin fil we dɛn bin tɛl am fɔ go na Sizaria, to wan man we nɔto Ju we nem Kɔnilyɔs! (Di Apɔsul Dɛn Wok [Akt] 10:​17-29) Pita bin dɔn biliv frɔm we i smɔl se pipul dɛn we nɔto Jɔ nɔ klin. Bɔt sɔntin bin apin we bin mek i bigin tink ɔda we. Fɔ ɛgzampul, i bin gɛt wan vishɔn frɔm Gɔd. (Di Apɔsul Dɛn Wok [Akt] 10:​9-16) Insay di vishɔn, Pita bin si sɔntin we tan lɛk klos we fulɔp wit animal dɛn we dɛn bin de si as animal dɛn we nɔ klin, de kɔmɔt na ɛvin. Dɔn wan vɔys tɛl am se: “Pita, grap; kil ɛnitin ɛn it am!” Pita nɔ bin gri fɔ du wetin di vɔys tɛl am. Dɔn di vɔys bin se: “Ɛni tin we Gɔd se klin, yu nɔ fɔ se i dɔti.” Afta di vishɔn, Pita nɔ bin ɔndastand wetin di vɔys bin de tray fɔ tɛl am. I nɔ tu te, mɛsenja dɛn we Kɔnilyɔs bin sɛn bin rich to am. Di oli spirit bin tɛl Pita fɔ go na Kɔnilyɔs in os, so i bin go wit di mɛsenja dɛn.

⁴ If Pita bin de jɔj ‘bay wetin i de si,’ i nɔ fɔ ɛva go na Kɔnilyɔs in os. Di Ju dɛn nɔ bin de go na pipul dɛn we nɔto Ju dɛn os. So wetin mek Pita in go de? Pan ɔl we Pita nɔ bin lɛk pipul dɛn we nɔto Ju, di vishɔn we i bin gɛt ɛn wetin di oli spirit bin tɛl am, bin mek i chenj di we aw i de tink. Afta we Pita bin lisin to wetin Kɔnilyɔs tɔk, i bin tɔk se: “Fɔ tru, Gɔd nɔ de luk ɛnibɔdi bɛtɛ pas in kɔmpin. Gɔd go mek ɛnibɔdi we rɛspɛkt am ɛn du wetin i want, bi in yon.” (Di Apɔsul Dɛn Wok [Akt] 10:​34, 35) Dis nyu tin we Pita bin lan bin mek i gladi, ɛn i go afɛkt ɔl Kristian dɛn. Aw?

5. (a) Wetin Jiova want ɔl Kristian dɛn fɔ no? (b) Pan ɔl we wi no di tru tin, aw wi kin stil de fil?

⁵ Jiova bin yuz Pita fɔ ɛp ɔl di Kristian dɛn fɔ ɔndastand se I nɔ de trit wan pɔsin bɛtɛ pas ɔda pɔsin. Wi kɔlɔ, wi kɔntri, wi trayb, ɔ wi langwej nɔ min ɛnitin to Jiova. Wans wi de fred Gɔd ɛn du wetin rayt, i go gladi fɔ wi. (Lɛta Fɔ Galeshya 3:​26-28; Rɛvɛleshɔn 7:​9, 10) Sɔntɛm yu go dɔn no dis. Bɔt wetin yu go du if yu mɛn na kɔntri ɔ famili usay dɛn bin de trit pipul dɛn bad ɔltɛm? Pan ɔl we yu go tink se yu nɔ de trit pipul dɛn bad, yu nɔ tink se i pɔsibul se yu stil de fil bad bɔt ɔda pipul dɛn? Ivin afta we Pita bin ɛp pipul dɛn fɔ no se Gɔd nɔ de trit wan pɔsin bɛtɛ pas in kɔmpin, i bin stil de fil bad bɔt ɔda pipul dɛn. (Lɛta Fɔ  Galeshya 2:​11-14) So aw wi go obe Jizɔs ɛn stɔp fɔ jɔj ɔda pipul dɛn bay wetin wi de si?

6. (a) Wetin go ɛp wi fɔ mek wi lɛf fɔ fil bad bɔt ɔda pipul dɛn? (b) Wetin wan brɔda we de tek di lid na di kɔngrigeshɔn in ripɔt bin tɛl wi bɔt am?

⁶ Fɔ mek wi no if wi stil de fil bad bɔt ɔda pipul dɛn, wi nid chɛk wisɛf. Wi nid fɔ kɔmpia di we aw wi de biev wit wetin wi de lan frɔm Gɔd in Wɔd. (Sam 119:​105) Dɔn bak, wi kin aks wi padi if i notis se wi de trit ɔda pipul dɛn bad, pan ɔl we wi nɔ go no if wi gɛt da abit de. (Lɛta Fɔ Galeshya 2:​11, 14) Sɔntɛnde, bikɔs wi dɔn yus fɔ trit pipul dɛn bad, dat kin mek wi nɔ ivin no se wi gɛt da bad abit de! Na dis sem tin bin apin to wan brɔda we de tek di lid na wan kɔngrigeshɔn. I bin rayt wan ripɔt to di branch ɔfis bɔt wan brɔda ɛn in wɛf we bin de yuz bɔku pan dɛn tɛm fɔ sav Jiova. Di brɔda bin kɔmɔt frɔm wan trayb we bɔku pipul dɛn tink se nɔ impɔtant. Di brɔda we de tek di lid na di kɔngrigeshɔn bin rayt bɔku gud tin dɛn bɔt dis brɔda bɔt i bin tɔk se: “Pan ɔl we na [so-so kɔntri] i kɔmɔt, di we aw i de biev ɛn di we aw i de liv de ɛp ɔda pipul dɛn fɔ no se fɔ kɔmɔt na [so-so trayb] nɔ min se i dɔti ɛn i nɔ impɔtant jɔs lɛk aw bɔku pipul dɛn de tink bɔt pipul dɛn we kɔmɔt na [dis] trayb.” Us lɛsin wi lan frɔm dis? Ilɛk us wok wi gɛt na Jiova in ɔganayzeshɔn, wi fɔ chɛk wisɛf ɛn mek dɛn ɛp wi fɔ no if wi stil de fil bad bɔt ɔda pipul dɛn. Wetin bak wi go du?

7. Aw wi go sho se wi “at opin” fɔ ɔda pipul dɛn?

⁷ If wi “at opin” fɔ pipul dɛn, wi go gɛt lɔv na wi at ɛn nɔ fil bad bɔt dɛn. (Sɛkɛn Lɛta Fɔ Kɔrint 6:​11-13) Yu kin lɛk fɔ spɛn tɛm nɔmɔ wit pipul dɛn we una ɔl gɛt di sem kɔlɔ, una kɔmɔt na di sem kɔntri, trayb, ɔ una de tɔk di sem langwej? If na so i bi, tray fɔ spɛn tɛm wit ɔda pipul dɛn bak. Yu kin invayt ɔda brɔda ɛn sista dɛn we kɔmɔt na difrɛn say fɔ mek una prich togɛda. Ɔ yu kin invayt dɛn na yu os fɔ it togɛda ɔ fɔ smɔl gɛt-togɛda. (Di Apɔsul Dɛn Wok [Akt] 16:​14, 15) As tɛm de go, wi go rili lɛk ɔda pipul dɛn ɛn wi nɔ go fil bad bɔt dɛn igen. Naw lɛ wi tɔk bɔt ɔda we we wi kin jɔj pipul dɛn ‘bay wetin wi de si.’

8. Wetin wi go lan frɔm Lɛvitikɔs 19:​15 bɔt di we aw we pɔsin jɛntri ɔ po kin afɛkt di we aw wi de si dɛn?

⁸ Di we aw pipul dɛn jɛntri ɔ po kin afɛkt di we aw wi kin si dɛn. Insay Lɛvitikɔs 19:​15, Jiova bin tɛl di Izrɛlayt dɛn se dɛn “nɔ fɔ gi pɔsin rayt bikɔs i po ɔ jɛntri bɔt fɔ trit dɛn kɔmpin fia wan.” Aw di we we pɔsin jɛntri ɔ po kin afɛkt di we aw wi de si am?

9. Us sɔri wɔd dɛn we Sɔlɔmɔn bin rayt? Wetin da parebul de tich wi?

 ⁹ Jiova bin tɛl Sɔlɔmɔn fɔ rayt dɛn sɔri wɔd dɛn ya pan ɔl we na tru. I bin tɔk se: “Poman nɔ de gɛt padi, in neba dɛnsɛf nɔ de maks am; as fɔ jɛntri man, in de gɛt bɔku bɔku padi.” (Prɔvabs 14:​20) Wetin dis parebul de tich wi? If wi nɔ tek tɛm, wi go want fɔ mek padi wit brɔda dɛn we jɛntri ɛn nɔ mek padi wit di po wan dɛn. Wetin mek i bad fɔ jɔj pipul dɛn bay wetin dɛn gɛt ɔ wetin dɛn nɔ gɛt?

10. Us prɔblɛm Jems bin wɔn Kristian dɛn bɔt?

¹⁰ If wi de jɔj wi brɔda dɛn bikɔs dɛn jɛntri ɔ po, dat go mek wanwɔd nɔ de na di kɔngrigeshɔn. Dis bin apin na sɔm kɔngrigeshɔn dɛn we bin de insay di fɔstɛm Kristian dɛn tɛm, ɛn Jems bin wɔn dɛn Kristian dɛn bɔt dat. (Rid Jems 2:​1-4.) Wi nɔ fɔ mek wanwɔd nɔ de na di kɔngrigeshɔn. So aw wi go avɔyd fɔ jɔj pipul dɛn bay wetin dɛn gɛt?

11. Yu tink se wetin pɔsin gɛt go afɛkt di pɔsin in padi biznɛs wit Jiova? Ɛksplen.

¹¹ Wi fɔ si wi brɔda dɛn lɛk aw Jiova de si dɛn. Nɔbɔdi nɔ spɛshal to Jiova bikɔs i jɛntri ɔ po. Wi padi biznɛs wit Jiova nɔ gɛt natin fɔ du wit ɔmɔs mɔni ɔ prɔpati dɛn wi gɛt. Na tru se Jizɔs bin tɔk se “i go traŋa bad fɔ mek dɛn jɛntri  pipul kam ɔnda Gɔd in rul,” bɔt i nɔ tɔk se i nɔ pɔsibul. (Matyu 19:​23) Jizɔs bin tɔk bak se: “Una gɛt blɛsin, una dɛn po pipul, bikɔs Gɔd de rul una!” (Lyuk 6: 20) Bɔt dis nɔ min se na ɔl di po pipul dɛn go lisin to Jizɔs ɛn gɛt spɛshal blɛsin. Bɔku po pipul dɛn bin de we nɔ bin fala Jizɔs. Di tru tin na dat, wi nɔ go jɔj pɔsin in padi biznɛs wit Jiova bay di prɔpati dɛn we i gɛt.

12. Wetin di Baybul tich bɔt pipul dɛn we jɛntri ɛn pipul dɛn we po?

¹² Insay Jiova in ɔganayzeshɔn, wi gɛt brɔda ɛn sista dɛn we jɛntri ɛn ɔda wan dɛn we po. Bɔt dɛn ɔl lɛk Jiova ɛn dɛn de sav am wit ɔl dɛn at. Di Baybul tɛl pipul dɛn we jɛntri se “dɛn nɔ [fɔ] abop pan dɛn jɛntri, we sɔntɛm nɔ go de tumara; mek dɛn abop pan Gɔd we de gi wi ɔltin.” (Rid Fɔs Lɛta To Timoti 6:​17-19.) Di Baybul wɔn ɔl Jiova in savant dɛn se i bad fɔ mek dɛn lɛk mɔni, ilɛk dɛn po ɔ dɛn jɛntri. (Fɔs Lɛta To Timoti 6:​9, 10) We wi de si wi brɔda dɛn lɛk aw Jiova de si dɛn, dat go mek wi nɔ jɔj dɛn bay wetin dɛn gɛt ɔ wetin dɛn nɔ gɛt. Bɔt yu tink se i fayn fɔ jɔj ɔda pipul dɛn bay dɛn ej?

13. Wetin di Baybul tich wi bɔt fɔ sho rɛspɛkt to ol pipul dɛn?

¹³ Bɔku tɛm, di Baybul kin tɔk se wi fɔ rɛspɛkt pipul dɛn we big pas wi. Lɛvitikɔs 19:​32 tɔk se: “Rɛspɛkt ol pipul ɛn fred PAPA GƆD so fɔ du wetin i se.” Prɔvabs 16:​31 tɛl wi se, “wet ia de sho ol ej ɛn ɛkspiriɛns na di pe dat we pɔsin we de waka tret na PAPA GƆD in yay de gɛt.” Pɔl bin tɛl Timoti se i nɔ fɔ fɛn fɔlt pan ol pipul dɛn bɔt i fɔ trit dɛn lɛk papa. (Fɔs Lɛta To Timoti 5:​1, 2) Pan ɔl we Timoti bin de oba brɔda dɛn we bin big pas am, i bin nid fɔ sho sɔri at ɛn rɛspɛkt to dɛn ɔltɛm.

14. Ustɛm wi kin nid fɔ kɔrɛkt pɔsin we big pas wi?

¹⁴ Wetin wi go se if big pɔsin sin bay wilful ɔ i de tray fɔ ɛnkɔrej ɔda pipul dɛn fɔ du sɔntin we Jiova nɔ lɛk? Jiova nɔ de lɛf pɔsin we de sin bay wilful ɛn nɔ pɔnish am, ivin if di pɔsin big ɛn i gɛt rɛspɛkt. Notis di tru tin [prinsipul] we de na Ayzaya 65:​20 (NW) we se: “Di pɔsin we de sin go gɛt swɛ pan ɔl we na ɔndrɛd ia i ol.” Wi go si di sem tin na Izikɛl in vishɔn. (Izikɛl 9:​5-7) Wetin rili impɔtant na dat wi fɔ rɛspɛkt Jiova, we na di Wan We Dɔn De fɔ Lɔng Lɔng Tɛm. (Daniɛl 7:​9, 10, 13, 14) Di rɛspɛkt we wi gɛt fɔ Jiova go ɛp wi fɔ kɔrɛkt sɔmbɔdi we nid pɔsin fɔ ɛp am, ilɛk ɔmɔs ia di pɔsin ol.—Lɛta Fɔ Galeshya 6:​1.

15. Wetin wi lan frɔm di apɔsul Pɔl bɔt aw fɔ sho rɛspɛkt to yɔŋ brɔda dɛn?

¹⁵ Wetin wi go se if di brɔda yɔŋ? Fɔ se wi nɔ fɔ rɛspɛkt am? Nɔ, i nɔ min so. Pɔl bin rayt to Timoti se: “Nɔ mek nɔbɔdi se bikɔs yu smɔl yu nɔ go ebul du dis wok. Na yu fɔ sho dɛn pipul we biliv Gɔd aw dɛn fɔ de du bay aw yu de tɔk, aw yu de du, aw yu lɛk pipul, aw yu biliv Gɔd, ɛn di kayn layf we yu liv.” (Fɔs Lɛta To Timoti 4:​12) We Pɔl bin rayt dis, i go bi se Timoti bin ol lɛk 30 ia. Bɔt stil Pɔl bin gi am wok dɛn we rili impɔtant. Us lɛsin wi lan frɔm dis? Wi nɔ fɔ jɔj yɔŋ brɔda dɛn bay dɛn ej. Tink  bɔt ɔl wetin Jizɔs bin du bay di tɛm we i ol 33 ia!

16, 17. (a) Aw di ɛlda dɛn kin disayd if brɔda dɔn fit fɔ bi ministerial savant ɔ ɛlda? (b) Aw wetin wi kin tink ɔ di we aw wi kin du tin na di say usay wi de kin go agens wetin di Baybul se?

¹⁶ Insay sɔm kɔlchɔ dɛn, pipul dɛn nɔ kin gi yɔŋ man dɛn rɛspɛkt. Dis kin mek sɔm ɛlda dɛn nɔ kin pik yɔŋ brɔda dɛn fɔ bi ministerial savant ɔ ɛlda, pan ɔl we dɛn fit fɔ bi ministerial savant ɔ ɛlda. Bɔt di Baybul nɔ ɛva tɔk se brɔda fɔ rich wan patikyula ej bifo i bi ministerial savant ɔ ɛlda. (Fɔs Lɛta to Timoti 3:​1-10, 12, 13, NW; Taytɔs 1:​5-9) If ɛlda disayd fɔ fala in kɔlchɔ ɛn mek dis as lɔ, dat min se i nɔ de fala Gɔd in Wɔd. Ɛlda dɛn nɔ fɔ fala wetin dɛn tink ɔ di we aw dɛn de du tin na di eria usay dɛn de fɔ jɔj yɔŋ brɔda dɛn, bɔt dɛn fɔ fala wetin de na Gɔd in Wɔd.—Sɛkɛn Lɛta To Timoti 3:​16, 17.

¹⁷ If ɛlda dɛn nɔ fala wetin di Baybul se bɔt aw fɔ pik ministerial savant ɔ ɛlda dɛn, dat kin mek dɛn nɔ pik brɔda dɛn we dɔn fit fɔ bi ministerial savant ɔ ɛlda. Insay wan kɔntri, wan ministerial savant bin de du in wok fayn fayn wan ɛn di ɛlda dɛn bin gri se i fit fɔ bi ɛlda. Bɔt sɔm pan di ɛlda dɛn we dɔn ol bin tɔk se i tu yɔŋ fɔ bi ɛlda, so dɛn nɔ bin tɛl di sakit ovasia bɔt am. I sɔri fɔ no se di kayn we aw dɛn bin luk dis brɔda bin mek dɛn nɔ pik am fɔ bi ɛlda. Ɛn i tan lɛk se dis kayn we aw pipul dɛn de tink rili kɔmɔn na bɔku say dɛn na di wɔl. I rili impɔtant fɔ lɛ wi abop pan di Baybul ɛn nɔ abop pan wetin wi de tink ɔ di kɔstɔm we de na di say we wi de. If wi du dis, dat go mek wi obe Jizɔs ɛn stɔp fɔ jɔj ɔda pipul dɛn bay aw wi de si dɛn.

18, 19. Wetin go ɛp wi fɔ si wi brɔda dɛn lɛk aw Jiova de si dɛn?

¹⁸ Pan ɔl we wi nɔ pafɛkt, wi kin stil lan fɔ tink di rayt we bɔt pipul dɛn jɔs lɛk aw Jiova de tink bɔt dɛn. (Di Apɔsul Dɛn Wok [Akt] 10:​34, 35) So wi fɔ pe atɛnshɔn to di tin dɛn we de na Gɔd in Wɔd ɔltɛm. We wi du wetin di Baybul se, dat de sho se wi de obe di lɔ we Jizɔs gi fɔ se “una lɛf fɔ jɔj bay wetin una de si.”—Jɔn 7:​24.

¹⁹ I nɔ go te igen, Jizɔs Krays we na wi Kiŋ, go jɔj ɔlman. Di we aw i go jɔj go bi di we aw Gɔd want, nɔto bay wetin i si ɔ yɛri. (Ayzaya 11:​3, 4) Wi rili de wet fɔ da wɔndaful tɛm de!