1. Us we dɛn wi kin wok togɛda wit Jiova?

WE Jiova bin mek mɔtalman, i bin want in ɛn dɛn fɔ wok togɛda. Pan ɔl we mɔtalman dɛn nɔ pafɛkt tide, fetful pipul dɛn stil de wok wit Jiova ɛvride. Fɔ ɛgzampul, “wi ɛn Gɔd de wok togɛda” we wi de prich di gud nyuz bɔt in Kiŋdɔm ɛn mek disaypul dɛn. (Fɔs Lɛta fɔ Kɔrint 3:​5-9, NW) Na big big ɔnɔ wi gɛt fɔ lɛ di Wan we mek ɔltin pik wi fɔ du dis wok we rili impɔtant! Bɔt fɔ prich nɔto di wangren we dat we wi de wok wit Jiova. Insay dis atikul, wi go lan bak aw wi go wok wit Jiova we wi ɛp wi famili ɛn ɔda pipul dɛn na di kɔngrigeshɔn, we wi de du gud, we wi de ɛp wit sɔm wok dɛn we di ɔganayzeshɔn de du ɔlsay na di wɔl, ɛn we wi de tray fɔ du mɔ na di prichin wok fɔ Jiova.—Lɛta Fɔ Kɔlɔse 3:​23.

2. Wetin mek wi nɔ fɔ ɛva kɔmpia wetin wi de du fɔ Jiova wit wetin ɔda pipul dɛn de du?

² We wi de stɔdi dis atikul, i fayn fɔ mek wi mɛmba se ɔlman difrɛn. Wi difrɛn pan ej, wɛlbɔdi, tin dɛn we kin  apin to wi, ɛn wi gɛt difrɛn tin dɛn we wi ebul fɔ du. So nɔ kɔmpia wetin yu de du fɔ Jiova wit wetin ɔda pipul dɛn de du. Di apɔsul Pɔl bin tɔk se: “Ɔlman fɔ tink bɔt wetin i de du ɛn jɔj insɛf if wetin i de du rayt; if i de du wetin rayt, dɛn i kin bost. I nɔ fɔ luk wetin ɔda pipul de du fɔ jɔj wetin in de du.”—Lɛta Fɔ Galeshya 6:​4.

3. Wetin mek wi se ɛnibɔdi we de kia fɔ in famili de wok wit Gɔd?

³ Jiova want wi fɔ kia fɔ wi famili. Fɔ ɛgzampul, yu gɛt fɔ fɛn mɔni fɔ di tin dɛn we yu famili go nid. Bɔku mama dɛn kin de na os fɔ kia fɔ dɛn smɔl pikin dɛn. Ɛn we wi mama ɛn papa dɛn nɔ ebul fɔ kia fɔ dɛnsɛf, na wi go gɛt fɔ kia fɔ dɛn. Dɛn tin ya impɔtant fɔ du. Di Baybul se: “If ɛnibɔdi nɔ kia fɔ di wan dɛn we na in yon, mɔ di wan dɛn we de na in famili, i dɔn lɛf fɔ biliv di tin dɛn we i dɔn lan ɛn i wɔs pas pɔsin we nɔ gɛt fet.” (Fɔs Lɛta to Timoti 5:​8, NW) If yu gɛt famili fɔ kia fɔ, yu nɔ go ebul fɔ de du mɔ fɔ Jiova lɛk aw yu want fɔ du. Bɔt lɛ dat nɔ mek yu at pwɛl! Jiova gladi fɔ we yu de kia fɔ yu famili.—Fɔs Lɛta Fɔ Kɔrint 10:​31.

4. Aw mama ɛn papa dɛn dɔn put di Kiŋdɔm fɔs na dɛn layf? Wetin kin apin we dɛn du dat?

⁴ Mama ɛn papa dɛn we na Kristian kin wok wit Jiova bay we dɛn de ɛp dɛn pikin dɛn fɔ plan fɔ du mɔ na Jiova in savis. Bɔku mama ɛn papa dɛn dɔn du dis. Dis dɔn mek dɛn bɔypikin ɛn galpikin dɛn dɔn disayd leta fɔ yuz bɔku pan dɛn tɛm fɔ sav Jiova, ɛn sɔm dɔn ivin go fa say fɔ du dat. Sɔm na mishɔnari, ɔda wan dɛn de payɔnia na say usay dɛn nid mɔ pɔblisha dɛn fɔ prich, ɛn ɔda wan dɛn de sav na Bɛtɛl. Na tru se we pikin dɛn de fa say, mama ɛn papa dɛn nɔ kin gɛt bɛtɛ tɛm fɔ spɛn wit dɛn lɛk aw dɛn go want fɔ du. Bɔt dɛn nɔ de tink mɔ bɔt dɛnsɛf we dɛn kin ɛnkɔrej dɛn pikin dɛn fɔ kɔntinyu fɔ sav Jiova ɛnisay we dɛn de. Wetin mek? Na bikɔs dɛn rili gladi fɔ we dɛn pikin dɛn de put Jiova fɔs na dɛn layf. (Jɔn In Tɔd Lɛta 4) Bɔku pan dɛn mama ɛn papa dɛn ya kin fil lɛk aw Ana bin de fil we i bin tɔk se i dɔn lɛnt in bɔypikin we nem Samiɛl to Jiova. Dɛn tink se na big big ɔnɔ dɛn gɛt fɔ wok wit Jiova dis kayn we.—Fɔs Samiɛl 1:​28.

5. Aw yu go ɛp di brɔda ɛn sista dɛn na yu kɔngrigeshɔn? (Luk di pikchɔ nia dis atikul in taytul.)

⁵ If yu nɔ gɛt fɔ kia fɔ yu famili rayt naw, yu nɔ tink se yu kin ɛp di brɔda ɛn sista dɛn we sik ɔ we dɔn ol ɔ we nid pɔsin fɔ ɛp dɛn? Ɔ yu nɔ tink se yu kin ɛp di wan dɛn we de kia fɔ dɛn? Luk fɔ di wan dɛn we go nid pɔsin fɔ ɛp dɛn insay yu kɔngrigeshɔn. Fɔ ɛgzampul, sɔntɛm wan sista de we de kia fɔ in mama ɛn papa we dɔn ol. Yu nɔ tink se yu kin spɛn tɛm wit dis sista in mama ɛn papa so dat di sista go ebul du ɔda tin dɛn? Ɔ sɔntɛm yu kin ɛp sɔmbɔdi bay we yu de go wit am na di mitin dɛn, fɔ go bay bay, ɔ fɔ go fɛn pɔsin na ɔspitul. We yu de du dat, yu de ɛp fɔ wok wit Jiova fɔ ansa pɔsin in prea.—Rid Fɔs Lɛta Fɔ Kɔrint 10:​24.

6. Aw wi go bi pɔsin we de du gud?

⁶ Dɛn no di wan dɛn we de wok wit Gɔd se na pipul dɛn we de du gud. (Di Ibru Pipul Dɛn 13:​2) Insay di Baybul, wi kin rid bɔt sɔm ɛgzampul dɛn we de tich wi aw fɔ du gud. (Jɛnɛsis 18:​1-5) Wi fɔ ɛp ɔda pipul dɛn ɛnitɛm we wi gɛt di chans fɔ du dat, ilɛksɛf dɛn na wi “kɔmpin Kristiɛn” ɔ nɔto wi kɔmpin Kristian dɛn.—Lɛta Fɔ Galeshya 6:​10.

7. Us bɛnifit yu go gɛt we yu du gud to di wan dɛn we de yuz bɔku pan dɛn tɛm fɔ sav Jiova?

⁷ Yu tink se yu kin wok wit Jiova bay we yu de du gud to pipul dɛn we de yuz bɔku pan dɛn tɛm fɔ sav Jiova, lɛk if dɛn nid say fɔ de? (Rid Jɔn In Tɔd Lɛta 5, 8.) We yu du dis, dɛn go bɛnifit ɛn yusɛf go bɛnifit. Di Baybul se na we dat we wi de “ɛp” ɔ ɛnkɔrej wisɛf. (Lɛta Fɔ Rom 1:​11, 12) Lɛ wi tɔk bɔt wetin bin apin to Olaf. We i bin yɔŋ, wan sakit ovasia we nɔ mared bin visit in kɔngrigeshɔn ɛn i bin nid say fɔ de, bɔt nɔbɔdi nɔ bin ebul fɔ ɛp am insay di kɔngrigeshɔn. Olaf bin aks in mama ɛn papa we nɔto bin Jiova Witnɛs if dɛn go alaw di sakit ovasia fɔ kam de na dɛn os. Dɛn bin gri, bɔt dɛn bin tɛl Olaf se i go de slip na di sɛti chia. Na dat Olaf bin du, ɛn i nɔ bin ɛva rigrɛt am. I bin gɛt wɔndaful wik wit di sakit ovasia! Ɛni mɔnin dɛn kin grap kwik ɛn tɔk bɔt bɔku fayn fayn tɔpik dɛn we dɛn de it. Di sakit ovasia bin rili ɛnkɔrej Olaf ɛn dat bin mek i disayd fɔ bigin yuz bɔku pan in tɛm fɔ sav Jiova. I dɔn pas 40 ia we Olaf dɔn de sav as mishɔnari na bɔku kɔntri dɛn.

8. Wetin mek wi fɔ du gud to ɔda pipul dɛn ilɛksɛf dɛn nɔ tɛl wi tɛnki? Gi wan ɛgzampul.

⁸ Bɔku bɔku we dɛn de we wi kin sho se wi lɛk strenja dɛn, ilɛksɛf dɛn nɔ tɛl wi tɛnki. Fɔ ɛgzampul, wan sista na Spen bin de stɔdi di Baybul wit wan uman we nem Yɛsika we kɔmɔt na Ɛkwedɔ. Wan de, we dɛn bin de stɔdi, Yɛsika bin jɔs de kray. So di sista bin aks am wetin mek i de kray. Yɛsika bin tɔk se i bin rili po bifo i kam na Spen. Wan tɛm, i nɔ bin gɛt natin fɔ gi in gyalpikin fɔ it, pas wata. Yɛsika bin pre to Gɔd fɔ ɛp am we i bin de tray fɔ mek in pikin slip. I nɔ tu te, tu Jiova Witnɛs dɛn kam to Yɛsika ɛn dɛn bin gi am magazin. Bɔt Yɛsika bin rud to dɛn ɛn i bin chɛr chɛr di magazin ɛn tɔk se: “Na dis na di it we una want mi fɔ gi mi gyalpikin?” Di sista dɛn bin tray fɔ ɛnkɔrej am, bɔt i nɔ gri fɔ lisin. Leta, di sista dɛn bin lɛf baskɛt we gɛt it na in domɔt. Naw we i de stɔdi, i de kray bikɔs i dɔn kam fɔ no se i nɔ bin gri fɔ si di we aw Gɔd bin ansa in prea. Bɔt Yɛsika bin mekɔp in maynd fɔ sav Jiova. Dis sho klia wan se di gud we dɛn sista dɛn ya bin du bin mek gud tin apin.—Ɛkliziastis 11:​1, 6.

9, 10. (a) Us chans dɛn di Izrɛlayt dɛn bin gɛt fɔ ɛp fɔ du sɔm wok dɛn? (b) Us we dɛn di brɔda dɛn kin ɛp na di kɔngrigeshɔn tide?

⁹ Trade trade, di Izrɛlayt dɛn bin gɛt bɔku difrɛn chans dɛn fɔ ɛp fɔ du sɔm wok dɛn. (Ɛksodɔs 36:​2; Fɔs Kronikul 29:​5; Nɛimaya 11:​2) Tide, yusɛf gɛt bɔku chans fɔ gi yu tɛm, yu prɔpati, ɛn wetin yu sabi du fɔ ɛp yu brɔda ɛn sista dɛn. We yu du dis, yu go rili gɛt gladi-at ɛn Jiova go blɛs yu fɔ dat.

¹⁰ Di Baybul ɛnkɔrej di brɔda dɛn na di kɔngrigeshɔn fɔ wok wit Jiova bay we dɛn de wok fɔ ɔda pipul dɛn as ministerial savant ɛn ɛlda dɛn. (Fɔs Lɛta To Timoti 3:​1, 8, 9; Pita In Fɔs Lɛta 5:​2, 3) Di wan dɛn we de du dis kin want fɔ du sɔntin fɔ ɛp ɔda pipul dɛn ɛn fɔ ɛp dɛn bak fɔ sav Jiova. (Di Apɔsul Dɛn Wok [Akt] 6:​1-4) Di ɛlda dɛn dɔn ɛva aks yu fɔ bi atɛndant, fɔ ɛp wit di buk ɛn magazin dɛn, fɔ ɛp wit di tɛritri, fɔ ɛp fɔ mek di say dɛn we dɔn pwɛl na di Kiŋdɔm Ɔl, ɔ fɔ du ɔda tin dɛn? Di brɔda dɛn we de ɛp fɔ du dɛn wok dɛn ya tɔk se dɛn rili de ɛnjɔy am.

11. Aw wan sista bin bɛnifit we i bin de ɛp fɔ bil di say dɛn we wi de wɔship Jiova?

¹¹ Di wan dɛn we kin ɛp fɔ bil say dɛn we wi de yuz fɔ wɔship Jiova kin mek nyu padi dɛn. Wan sista we nem Magi bin de ɛp fɔ bil Kiŋdɔm Ɔl dɛn fɔ 18 ia. We dɛn kin de bil, dis sista kin pe atɛnshɔn mɔ pan di yɔŋ sista dɛn, ɛn i kin ɛp fɔ tren dɛn. Dis sista tɔk se dis na wan fayn we we wi kin ɛnkɔrej wisɛf. (Lɛta Fɔ Rom 1:​12) Infakt, we i kin gɛt prɔblɛm dɛn we nɔ izi fɔ am, na dɛn in nyu padi dɛn ya we i dɔn mek kin ɛnkɔrej am. Yu dɔn ɛva ɛp fɔ bil say dɛn fɔ wɔship Jiova? Yu kin ɛp fɔ bil ivin if yu nɔ sabi fɔ du natin.

12. Aw yu go ɛp afta we bad bad tin dɛn lɛk atkwek, ebi ebi ren, ɔ big briz apin?

 ¹² Wi kin wok bak wit Jiova bay we wi de ɛp wi brɔda dɛn afta we bad bad tin dɛn lɛk atkwek, ebi ebi ren, ɔ big briz apin na di say we dɛn de. Fɔ ɛgzampul, wi kin gi mɔni. (Jɔn 13:​34, 35; Di Apɔsul Dɛn Wok [Akt] 11:​27-30) Ɔda we dɛn we wi kin ɛp na bay we wi de klin ɔ ɛp fɔ mek say dɛn we dɔn pwɛl afta bad bad tin dɛn lɛk atkwek, ebi ebi ren, ɔ big briz apin. Wan sista na Poland we nem Gabrɛla bin rili gladi we i si brɔda dɛn we kɔmɔt ɔda kɔngrigeshɔn bin kam ɛp am afta we ebi ebi ren bin pwɛl in os. We i tink bɔt wetin bin apin to am, i tɔk se i nɔ bin wɔri bɔt di prɔpati dɛn we i dɔn lɔs, bifo dat i bin pe atɛnshɔn pan di tin dɛn we i dɔn gɛt. I bin tɔk se: “Di tin we bin apin to mi bin mek a no mɔ fɔ se na big big ɔnɔ fɔ de na di Kristian kɔngrigeshɔn ɛn i dɔn mek a gɛt tru tru gladi-at.” Bɔku pipul dɛn we dɛn ɛp afta we bad bad tin dɛn lɛk atkwek, ebi ebi ren, ɔ big briz ambɔg dɛn bin tɔk se dɛn fil di sem we. Ɛn di wan dɛn we de wok wit Jiova fɔ ɛp dɛn brɔda dɛn kin satisfay ɛn gɛt tru tru gladi-at.—Rid Di Apɔsul Dɛn Wok [Akt] 20:​35; Sɛkɛn Lɛta Fɔ Kɔrint 9:​6, 7.

13. We wi rɛdi fɔ ɛp, aw dat go mek wi lɛk Jiova mɔ ɛn mɔ? Gi wan ɛgzampul.

¹³ Wan sista we nem Stɛfini ɛn ɔda pɔblisha dɛn na in eria, bin wok wit Gɔd bay we dɛn ɛp ɔda Witnɛs dɛn we rɔnawe kɔmɔt na dɛn kɔntri go na Amɛrika, bikɔs wɔ bin de na dɛn kɔntri. Dɛn bin ɛp dɛn rɛfyuji dɛn ya fɔ fɛn os ɛn fɔ gɛt tin dɛn lɛk bed, chia, tebul, ɛn ɔda tin dɛn. Stɛfini bin tɔk se: “Wi bin gladi we wi si di kayn gladi-at we dɛn bin gɛt ɛn di kayn we we dɛn bin fil we dɛn si di lɔv we wi brɔda dɛn we de ɔlsay na di wɔl de sho. Di famili dɛn bin tink se wi dɔn ɛp dɛn, bɔt fɔ tru na dɛn ɛp wi mɔ. Di kayn lɔv, wanwɔd, fet, ɛn di we aw wi brɔda ɛn sista dɛn abop pan Jiova dɔn mek wi lɛk Jiova mɔ ɛn mɔ, ɛn dis dɔn mek wi tɛl am tɛnki fɔ ɔl wetin i dɔn yuz in ɔganayzeshɔn fɔ du fɔ wi.”

14, 15. (a) Uskayn pɔsin Ayzaya bin bi? (b) Aw Kristian dɛn go falamakata Ayzaya?

¹⁴ Yu go lɛk fɔ wok wit Jiova mɔ? Yu go rɛdi fɔ go na say usay dɛn nid mɔ pɔblisha dɛn? Na tru se wi nɔ nid fɔ go fa fɔ gɛt fri-an. Bɔt brɔda ɛn sista dɛn de we kin du dat. Dɛn tan lɛk di prɔfɛt Ayzaya. We Jiova bin aks , “Udat a go  sɛn, udat go go fɔ wi?” i bin tɔk se: “Luk mi! Sɛn mi.” (Ayzaya 6:​8) Yu ebul ɛn rɛdi fɔ ɛp Jiova in ɔganayzeshɔn? Us we dɛn yu go ɛp?

¹⁵ Jizɔs bin tɔk bɔt di prichin wok se: “Dɛn pipul ya tan lɛkɛ plɛnti tin we dɛn plant we dɔn du fɔ kɔt, bɔt di wokman dɛn we fɔ gɛda dɛn ɛn briŋ dɛn kam to Gɔd, nɔ plɛnti. Na dat mek una fɔ pre to Gɔd we na di Masta fɔ sɛn mɔ pipul fɔ kam gɛda dɛn pipul ya ɛn briŋ dɛn kam to am.” (Matyu 9:​37, 38) Yu tink se yu kin sav as payɔnia na say usay dɛn nid mɔ pɔblisha dɛn fɔ prich? Ɔ yu tink se yu go ɛp ɔda pɔsin fɔ du dat? Bɔku brɔda ɛn sista dɛn fil se di bɛst we fɔ sho se dɛn lɛk Gɔd ɛn dɛn kɔmpin mɔtalman na bay we dɛn de payɔnia na say usay dɛn nid mɔ pɔblisha dɛn fɔ prich. Yu tink se ɔda we dɛn de we yu kin du mɔ fɔ sav Jiova? If yu du dat, yu go gladi pasmak.

16, 17. Us ɔda we dɛn yu kin du mɔ fɔ sav Jiova?

¹⁶ Yu rɛdi fɔ sav na Bɛtɛl ɔ fɔ ɛp fɔ bil say dɛn we wi de yuz fɔ wɔship Jiova, ilɛksɛf na fɔ shɔt tɛm ɔ fɔ sɔm dez dɛn insay di wik? Jiova in ɔganayzeshɔn nid pipul dɛn ɔltɛm we rɛdi fɔ sav ɛnisay we dɛn nid dɛn ɛn we rɛdi fɔ du ɛnitin we dɛn tɛl dɛn fɔ du pan ɔl we dɛn sabi fɔ du ɔda wok dɛn. Jiova valyu ɛnibɔdi we rɛdi fɔ gi insɛf fɔ sav ɛnisay we dɛn nid pipul dɛn.—Sam 110:​3.

¹⁷ Yu tink se yu go lɛk fɔ lɛ dɛn tren yu so dat yu go sav Jiova mɔ ɛn mɔ? Sɔntɛm yu go lɛk fɔ go di Skul fɔ Pipul dɛn We De Prich bɔt Gɔd in Kiŋdɔm. Dis skul kin tren machɔ brɔda ɛn sista dɛn we de yuz bɔku pan dɛn tɛm fɔ sav Jiova, so dat Jiova in ɔganayzeshɔn go yuz dɛn fɔ du mɔ. Di wan dɛn we go dis skul fɔ rɛdi fɔ sav ɛnisay we dɛn sɛn dɛn. Yu rɛdi fɔ du mɔ fɔ sav Jiova dis kayn we?—Fɔs Lɛta Fɔ Kɔrint 9:​23.

18. Us bɛnifit dɛn wi go gɛt we wi de wok wit Jiova ɛvride?

¹⁸ Bikɔs wi na Jiova in pipul dɛn, wi gɛt frian, wi de du gud, wi de ɛp ɔda pipul dɛn, ɛn wi lɛk dɛn. Wi bisin bɔt ɔda pipul dɛn ɛvride. Dis de mek wi gɛt gladi-at ɛn kolat. (Lɛta Fɔ Galeshya 5:​22, 23) I nɔ mata wetin yu ebul fɔ du, yu go gɛt gladi-at we yu falamakata Jiova fɔ gɛt fri-an ɛn bi pɔsin we de wok wit am!—Prɔvabs 3:​9, 10.