1, 2. Us big wok Jɔshwa bin gɛt we Mozis day?

JIOVA bin tɛl Jɔshwa se: “Mozis we na bin in yon wokman dɔn day. So mek in ɛn di Izrɛlayt dɛn rɛdi mek in de bifo dɛn fɔ go krɔs oba Riva Jɔdan ɛn go na di land we in de gi di Izrɛlayt dɛn.” (Jɔshwa 1:​1, 2) Dis na big chenj fɔ Jɔshwa we bin dɔn de wok ɔnda Mozis fɔ lɛk 40 ia.

² Mozis bin dɔn de lid di Izrɛlayt dɛn fɔ lɔng tɛm, bɔt naw na Jɔshwa go lid dɛn. So i go dɔn de wɔnda if di pipul dɛn go gri fɔ mek i bi dɛn lida. (Ditarɔnɔmi 34:​8, 10-12) We dɛn bin de tɔk bɔt wetin de na Jɔshwa 1:​1, 2, wan buk we de tɔk bɔt di Baybul bin ɛksplen se, trade ɔ ivin insay wi yon tɛm, di tɛm mɔ we prɔblɛm kin de na kɔntri, na we dɛn de chenj lida.

3, 4. Aw Gɔd bin blɛs Jɔshwa bikɔs i bin abop pan am? Us kwɛstyɔn wi fɔ aks wisɛf?

 ³ Jɔshwa bin gɛt gud rizin fɔ wɔri. Bɔt i bin abop pan Jiova ɛn i nɔ bin de westɛm fɔ du wetin Jiova tɛl am. (Jɔshwa 1:​9-11) Gɔd bin blɛs Jɔshwa bikɔs i bin abop pan am ɛn i bin yuz wan enjɛl fɔ gayd Jɔshwa ɛn di Izrɛlayt dɛn. I go mɔs bi se dis enjɛl na di Wɔd we na Gɔd in fɔs Bɔy pikin.—Ɛksodɔs 23:​20-23; Jɔn 1:​1, NW.

⁴ Jiova bin ɛp di Izrɛlayt dɛn fɔ mek dɛn go ebul fɔ ajɔst fayn fayn wan to di chenj dɛn we dɛn go gɛt we Jɔshwa bigin lid dɛn. Insay wi yon tɛm, wisɛf gɛt bɔku chenj dɛn we de apin. Sɔntɛm wi go de aks wisɛf dis kwɛstyɔn, ‘As Gɔd in ɔganayzeshɔn de go bifo, wi gɛt gud rizin fɔ abop pan Jizɔs we Gɔd dɔn pik fɔ lid wi?’ (Rid Matyu 23:​10.) Fɔ ansa dis kwɛstyɔn, wi go tɔk bɔt aw Jiova bin lid in pipul dɛn trade we tin bin de chenj.

5. We Jɔshwa bin de nia Jɛriko, wetin bin apin to am we nɔ kin bi so nɔmɔ? (Luk di pikchɔ nia dis atikul in taytul.)

⁵ I nɔ tu te afta di Izrɛlayt dɛn krɔs Riva Jɔdan, sɔntin bin apin to Jɔshwa we nɔ kin bi so nɔmɔ. I bin mit wan man we ol sɔd nia Jɛriko. Jɔshwa bin aks di man “if i de fɔ dɛn ɔ i nɔ de fɔ dɛn?” Jɔshwa bin sɔprayz we di man bin tɛl am se in “na di kɔmanda fɔ PAPA GƆD [“Jiova,” NW] in ami,” di enjɛl we bin rɛdi fɔ fɛt fɔ Gɔd in pipul dɛn. (Rid Jɔshwa 5:​13-15) Pan ɔl we di ɔda vas dɛn na dis stori tɔk se na Jiova insɛf sɛf bin de tɔk to Jɔshwa, i tan lɛk se Gɔd bin de yuz wan enjɛl fɔ tɔk fɔ am lɛk aw i bin de du ɔda tɛm dɛn.—Ɛksodɔs 3:​2-4; Jɔshwa 4:​1, 15; 5:​2, 9; Di Apɔsul Dɛn Wok [Akt] 7:​38; Lɛta Fɔ Galeshya 3:​19.

6-8. (a) Wetin mek sɔm pan di tin dɛn we di enjɛl bin de tɛl di Izrɛlayt dɛn fɔ du bin tan lɛk tin dɛn we strenj? (b) Aw wi no se di tin dɛn we di enjɛl bin de tɛl di Izrɛlayt dɛn fɔ du bin mek sɛns ɛn i bin tɛl dɛn di rayt tɛm? (Luk di futnot.)

⁶ Di enjɛl bin tɛl Jɔshwa ɔl wetin i bin nid fɔ du fɔ dɔnawe wit Jɛriko. Fɔs, sɔm pan di tin dɛn we di enjɛl bin de tɛl Jɔshwa go dɔn tan lɛk tin dɛn we strenj. Fɔ ɛgzampul, di enjɛl bin tɛl Jɔshwa fɔ sakɔmsayz ɔl di sojaman dɛn. Dis min se i go tek sɔm dez bifo dɛn go ebul fɔ fet. Fɔ se dat na bin di bɛst tɛm fɔ sakɔmsayz di man dɛn?—Jɛnɛsis 34:​24, 25; Jɔshwa 5:​2, 8.

⁷ Sɔntɛm di sojaman dɛn bin dɔn de tink se, ‘Aw wi go ebul fɔ protɛkt wi famili dɛn if ɛnimi dɛn kam atak wi kamp?’ Bɔt sɔntin we dɛn nɔ bin de ɛkspɛkt bin apin. Di man dɛn na Jɛriko bin fred di Izrɛlayt dɛn, so dɛn nɔ bin atak dɛn. Di Baybul se: “Di pipul dɛn na Jɛriko bin lɔk dɛn get lɛ di Izrɛlayt dɛn nɔ ebul go insay; nɔbɔdi nɔ bin de go insay ɔ kɔmɔt na do.” (Jɔshwa 6:​1) We di Izrɛlayt dɛn yɛri da nyuz de, dat go mɔs dɔn mek dɛn abop pan Gɔd mɔ fɔ dayrɛkt dɛn.

⁸ Di enjɛl bin tɛl Jɔshwa se di Izrɛlayt dɛn nɔ fɔ atak Jɛriko. Bifo dat, dɛn fɔ mach rawnd di siti wan tɛm fɔ siks dez ɛn di de we mek sɛvin, dɛn fɔ mach sɛvin tɛm. Sɔntɛm di sojaman dɛn go  dɔn de tink se ‘na jɔs tɛm ɛn trɛnk dɛn de west.’ Bɔt dɛn Lida we dɛn nɔ de si bin no wetin i bin de du. We di Izrɛlayt dɛn bin du ɔl wetin i bin de tɛl dɛn dat bin mek dɛn gɛt mɔ fet, ɛn dɛn nɔ bin nid fɔ fɛt agens di sojaman dɛn na Jɛriko.—Jɔshwa 6:​2-5; Di Ibru Pipul Dɛn 11:​30. * (Luk di futnot.)

9. Wetin mek wi fɔ du di tin dɛn we Gɔd in ɔganayzeshɔn de tɛl wi fɔ du? Gi wan ɛgzampul.

⁹ Wetin wi go lan frɔm dis stori? Sɔntɛnde, Jiova in ɔganayzeshɔn kin du nyu tin dɛn ɛn nɔto ɔltɛm wi kin ɔndastand wetin mek dɛn du am. Fɔ ɛgzampul, i go bi se fɔs wi nɔ bin tink se i mek sɛns fɔ yuz fon ɔ tablɛt fɔ du pasɔnal stɔdi, prich, ɔ yuz na mitin. Bɔt naw, if wi gɛt am, i go mɔs bi se wi dɔn si se i fayn fɔ yuz dɛn. We wi si aw dɛn chenj dɛn ya de wok fayn, dat de mek wi gɛt mɔ fet ɛn gɛt wanwɔd wit wi brɔda ɛn sista dɛn.

10. Udat rili bin arenj fɔ di impɔtant mitin we di gɔvnin bɔdi bin gɛt na Jerusɛlɛm we di brɔda dɛn bin gɛt prɔblɛm bɔt fɔ sakɔmsayz ɔ nɔ fɔ sakɔmsayz?

¹⁰ Ivin we i bin dɔn pas lɛk 13 ia we wan Jɛntayl man we nem Kɔnilyɔs, bi Kristian, sɔm Ju Kristian dɛn bin stil tink se i impɔtant fɔ mek pɔsin sakɔmsayz. (Di Apɔsul Dɛn Wok [Akt] 15:​1, 2) Insay Antiɔk, di brɔda dɛn bin  de agyu bɔt dis. So di ɛlda dɛn bin arenj fɔ mek Pɔl go na Jerusɛlɛm ɛn aks di gɔvnin bɔdi bɔt dat. Bɔt udat bin rili de arenj fɔ mek i go? Pɔl bin ɛksplen se: “A bin go bikɔs a gɛt vishɔn fɔ go de.” Dis sho klia wan se, na Krays bin dayrɛkt di gɔvnin bɔdi fɔ mek dɛn ebul ansa di kwɛstyɔn.—Lɛta fɔ Galeshya 2:​1-3, NW.

11. (a) Wetin sɔm Ju Kristian dɛn bin stil biliv bɔt fɔ sakɔmsayz ɔ nɔ fɔ sakɔmsayz? (b) Aw Pɔl bin sho se i bin rɛdi fɔ sɔpɔt di ɛlda dɛn na Jerusɛlɛm? (Luk di futnot.)

¹¹ Na Krays bin dayrɛkt di gɔvnin bɔdi fɔ mek dɛn no klia wan se di Kristian dɛn we nɔto Ju nɔ nid fɔ sakɔmsayz. (Di Apɔsul Dɛn Wok [Akt] 15:​19, 20) Bɔt stil, bɔku Ju Kristian dɛn bin kɔntinyu fɔ de sakɔmsayz dɛn bɔy pikin dɛn. Dɔn di ɛlda dɛn na Jerusɛlɛm bin yɛri se Pɔl nɔ rɛspɛkt di Lɔ we Gɔd bin gi Mozis. So di ɛlda dɛn bin tɛl Pɔl fɔ du sɔntin fɔ sho se i rɛspɛkt di Lɔ.  * (Luk di futnot.) (Di Apɔsul Dɛn Wok [Akt] 21:​20-26) Dɛn bin tɛl Pɔl fɔ tek 4 man dɛn fɔ go na di tɛmpul so dat pipul dɛn go si se i rili rɛspɛkt di Lɔ. Pɔl bin fɔ dɔn se: ‘Dis nɔ mek sɛns. Wetin mek una fɔ tɛl mi fɔ du dis? Di Ju Kristian dɛn we nɔ ɔndastand di ansa we di gɔvnin bɔdi gi fɔ se di Kristian dɛn we nɔto Ju nɔ nid fɔ sakɔmsayz, na dɛn gɛt di prɔblɛm.’ Bɔt Pɔl bin put insɛf dɔŋ ɛn du wetin dɛn tɛl am, bikɔs i bin ɔndastand se di ɛlda dɛn bin want mek ɔl di Kristian dɛn gɛt wanwɔd. Bɔt stil, sɔntɛm wi go de wɔnda wetin mek Jizɔs bin alaw dis prɔblɛm fɔ kɔntinyu fɔ lɔng tɛm, pan ɔl we di Lɔ we Gɔd bin gi Mozis bin dɔn ɛnd we Jizɔs day.—Lɛta fɔ Kɔlɔse 2:​13, 14, NW.

12. Wetin mek Krays bin alaw tɛm fɔ pas bifo i sɔlv di prɔblɛm bɔt fɔ sakɔmsayz ɔ nɔ fɔ sakɔmsayz?

¹² I kin tek tɛm fɔ lɛ wi chenj di we aw wi bin dɔn ɔndastand sɔntin. Sɔm Ju Kristian dɛn bin nid tɛm fɔ mek dɛn gri se dɛn nɔ de ɔnda di Lɔ igen. (Jɔn 16:​12) Dɛn bin dɔn de tink se we pɔsin sakɔmsayz na sayn fɔ sho se i gɛt spɛshal padi biznɛs wit Gɔd. (Jɛnɛsis 17:​9-12) Dɔn sɔm bin de fred se dɛn kɔmpin Ju dɛn go du bad tin to dɛn bikɔs dɛn difrɛn. (Lɛta Fɔ Galeshya 6:​12) Bɔt as tɛm de go, Krays bin yuz di lɛta dɛn we Pɔl bin de rayt fɔ dayrɛkt dɛn.—Lɛta Fɔ Rom 2:​28, 29; Lɛta Fɔ Galeshya 3:​23-25.

13. Wetin go ɛp wi fɔ sɔpɔt di we aw Krays de lid wi tide?

¹³ Na Krays stil de lid di Kristian kɔngrigeshɔn tide. So if di ɔganayzeshɔn mek chenj we yu nɔ ɔndastand, tink bɔt di we aw Krays bin de lid Gɔd in pipul dɛn trade. Insay Jɔshwa in  tɛm ɛn insay di apɔsul dɛn tɛm, Krays dɔn de dayrɛkt ɛn protɛkt Gɔd in pipul dɛn wit sɛns, ɛp dɛn fɔ gɛt mɔ fet, ɛn kɔntinyu fɔ gɛt wanwɔd.—Di Ibru Pipul Dɛn 13:​8.

14-16. Aw di dayrɛkt we di “slev we fetful ɛn gɛt sɛns” de dayrɛkt wi de sho se Krays want fɔ ɛp wi fɔ kɔntinyu fɔ gɛt strɔng fet?

¹⁴ Tide, “di slev we fetful ɛn gɛt sɛns” de tɛl wi wetin wi nid fɔ du di rayt tɛm. (Matyu 24:​45, NW) Di dayrɛkt we dɛn de dayrɛkt wi de sho se Jizɔs bisin bɔt wi. Mak, we gɛt 4 pikin dɛn, tɔk se: “Setan de tray fɔ ambɔg di kɔngrigeshɔn bay we i de atak famili dɛn. Di ɛnkɔrej we dɛn ɛnkɔrej wi fɔ de du wi famili wɔship ɛni wik, sho klia wan se di wan dɛn we de bifo na di famili fɔ protɛkt dɛn famili.”

¹⁵ We wi si aw Krays de lid wi, wi go ɔndastand se i want fɔ ɛp wi fɔ kɔntinyu fɔ gɛt strɔng fet. Fɔ ɛgzampul, wan ɛlda we nem Patrik bin se: “Fɔs, we dɛn bin se wi fɔ de mitɔp na smɔl grup dɛn fɔ fil savis insay di wikɛnd, sɔm nɔ bin lɛk dat.” Bɔt i bin se dis chenj de sho aw Jizɔs bisin bɔt ɔlman na di kɔngrigeshɔn. Fɔ ɛgzampul, sɔm brɔda ɛn sista dɛn we bin de shem ɔ we nɔ bin de go fil savis ɔltɛm, de fil se dɛn nid dɛn ɛn dɛn gɛt sɔntin fɔ du naw. Dis dɔn mek dɛn gɛt mɔ fet.

¹⁶ Krays de ɛp wi bak tide fɔ pe atɛnshɔn pan di prichin wok, we impɔtant pas ɔl di ɔda wok dɛn na di wɔl. (Rid Mak 13:​10.) Wan nyu ɛlda we nem Andre, dɔn de tray ɔltɛm fɔ fala ɛni nyu we we Jiova de dayrɛkt in ɔganayzeshɔn. I se: “We dɛn bin ridyus sɔm pan di wan dɛn we de wok na di branch, dis ɛp wi fɔ no se bɛtɛ tɛm nɔ de igen ɛn wi nid fɔ yuz ɔl wi trɛnk fɔ prich.”

17, 18. Wetin mek wi fɔ tink bɔt di we dɛn aw wi de bɛnifit we wi ajɔst to chenj dɛn?

¹⁷ Di dayrɛkt we Jizɔs Krays we na wi Kiŋ de dayrɛkt wi, go ɛp wi naw ɛn tumara bambay. Tray fɔ tink bɔt di bɛnifit dɛn we yu dɔn gɛt bikɔs yu bin ajɔst to nyu chenj dɛn. We una de du una famili wɔship, una kin tɔk bɔt di chenj dɛn we dɔn bi fɔ di mitin dɛn ɔ wi prichin wok we dɔn ɛp una famili.

¹⁸ We wi de tink bɔt di we aw wi go bɛnifit we wi de fala wetin Jiova in ɔganayzeshɔn de tɛl wi fɔ du, dat go mek wi gladi fɔ du wetin dɛn de tɛl wi fɔ du. Fɔ ɛgzampul, bikɔs wi nɔ de print bɔku buk ɛn magazin dɛn igen, wi ebul fɔ sev mɔni. Ɛn bikɔs wi de yuz nyu tɛknɔlɔji dɛn, wi de ebul prich di gud nyuz to bɔku pipul dɛn. Wi de yuz di buk, magazin, ɛn ɔda tin dɛn we de na wi fon ɔ tablɛt? Dis na wan we aw wi go sho se wi de sɔpɔt Krays, we want wi fɔ yuz di tin dɛn we di ɔganayzeshɔn gɛt di rayt we.

19. Wetin mek wi fɔ sɔpɔt di we aw Krays de dayrɛkt wi?

¹⁹ We wi sɔpɔt di we aw Krays de dayrɛkt wi, wi de ɛp wi brɔda ɛn sista dɛn fɔ gɛt strɔng fet ɛn kɔntinyu fɔ gɛt wanwɔd. We Andre bin de tɔk bɔt di nyu chenj dɛn we dɛn bin du dɛn biɛn tɛm ya fɔ ridyus di wan dɛn we de wok na Bɛtɛl ɔlsay na di wɔl, i bin tɔk se: “Di fayn we aw di brɔda ɛn sista dɛn we bin de wok na Bɛtɛl ajɔst to da kayn chenj de, ɛp mi fɔ gɛt mɔ op ɛn rɛspɛkt fɔ Jiova in ɔganayzeshɔn. Dɛn de kɔntinyu fɔ fala Jiova in chariɔt bay we dɛn gladi fɔ du ɛni wok we dɛn gi dɛn.”

20, 21. (a) Wetin mek wi fɔ abop pan Krays we na wi Lida? (b) Us kwɛstyɔn wi go tɔk bɔt insay di nɛks atikul?

²⁰ I nɔ go te igen, Jizɔs Krays go, “go fɔ win ɔda wa dɛn” ɛn i go “du pawaful tin dɛn.” (Rɛvɛleshɔn 6:​2; Sam 45:​4) Bɔt ivin naw, i de ɛp wi fɔ pripia fɔ de na di nyu wɔl ɛn fɔ du di wok we wi go gɛt de; we na fɔ tich di wan dɛn we go gɛt layf bak ɛn mek di wɔl bi Paradays.

²¹ Wans wi abop pan wi Lida ɛn Kiŋ ilɛk wetin apin, i go kɛr wi go na di nyu wɔl. (Rid Sam 46:​1-3.) Tide, i nɔ kin izi fɔ mek wi ajɔst we tin dɛn de chenj, mɔ we i bi se i afɛkt wi di kayn we we wi nɔ bin de ɛkspɛkt. We dat apin, aw wi go kɔntinyu fɔ gɛt kolat ɛn strɔng fet pan Jiova? Wi go tɔk bɔt da kwɛstyɔn de insay di nɛks atikul.