A BIN bɔn insay 1934. Mi mama ɛn papa we na Frɛd ɛn Ɛdna Moloan bin dɔn ɔlrɛdi bi Baybul Studɛnt dɛn (Jiova Witnɛs dɛn) fɔ 20 ia. A bin gladi we dɛn bin tich mi fɔ lɛk Jiova. Wi bin de na Pasin, we na wan smɔl tɔŋ insay sawtistɛn Kansas. Bɔku pan di wan dɛn we bin de na wi kɔngrigeshɔn na bin anɔyntɛd. Wi famili bin de go di mitin dɛn ɛn de prich ɔltɛm. Satide aftanun wi kin prich na strit, we wi de kɔl naw pɔblik witnɛsin. Sɔntɛnde wi kin taya, bɔt Papa kin bay ayskrim fɔ wi ɔltɛm we wi dɔn.

Wi smɔl kɔngrigeshɔn gɛt big tɛritri we gɛt smɔl smɔl tɔŋ dɛn ɛn bɔku fam dɛn. Bifo dɛn gi wi mɔni fɔ di buk ɛn magazin dɛn, sɔm pan di fama dɛn go gi wi vɛjitebul dɛn we dɛn plant, frɛsh eg dɛn (we dɛn jɔs pul na di nɛst), ɔ ivin layf fɔl dɛn. Papa kin dɔn ɔlrɛdi gi mɔni fɔ di buk ɛn magazin dɛn, so wi kin yuz di it dɛn fɔ fid di famili.

Mi mama ɛn papa bin gɛt fonograf we dɛn de yuz fɔ prich. A bin smɔl fɔ yuz am, bɔt a bin de ɛnjɔy we a de ɛp mama ɛn papa fɔ ple Brɔda Rutafɔd in tɔk dɛn we dɛn dɔn rɛkɔd fɔ du ritɔn visit ɛn Baybul stɔdi dɛn.

Papa bin put wan big spika pantap wi 1936 Fɔd motoka, ɛn i mek am sawnd ka. I bin rili ɛp wi we wi de prich. Bɔku tɛm, wi kin ple myuzik fɔs fɔ mek pipul dɛn pe atɛnshɔn, dɔn wi kin ple wan tɔk frɔm di Baybul. Afta dat, wi de gi buk ɛn magazin dɛn to pipul dɛn we want fɔ no mɔ.

Na wan smɔl tɔŋ na Chɛrivel, Kansas, Papa bin drayv di sawnd ka go na di tɔŋ in pak, usay bɔku pipul dɛn bin de rilaks dɛn Sɔnde dɛn. Di polis bin kam ɛn tɛl am se i nɔ go ebul yuz di sawnd ka insay di pak. Papa bin muf di motaka go na di strit we de nia di pak so dat di pipul dɛn go stil yɛri di program klia wan. Dɛn tɛm  dɛn de, a bin rili de ɛnjɔy fɔ de wit mi Papa ɛn mi big brɔda we nem Jɛri.

Insay dɛn ia dɛn de, wi bin de du spɛshal kampen dɛn na tɛritri dɛn usay pipul dɛn nɔ bin de lisin. As a bin dɔn tɔk fɔs, wi go wek midul nɛt ɛn put trakt ɔ buklɛt dɛn saful wan ɔnda pipul dɛn domɔt dɛn. Dɔn, wi ɔl go kɔmɔt na di tɔŋ fɔ wet ɛn si if polis dɔn arɛst ɛnibɔdi.

Ɔda tin we a bin ɛnjɔy we wi de prich, na wetin wi bin de kɔl infɔmeshɔn mach dɛn. Wi go wɛr dɛn big sayn dɛn de ɛn mach na wan tɔŋ. A mɛmba se wan tɛm di brɔda dɛn bin kam na wi tɔŋ ɛn mach wit di sayn we bin se “Religion Is a Snare and a Racket.” Dɛn bin bigin na wi os, waka fɔ lɛk wan ɛn af kilomita (1 mayl) na di tɔŋ, ɛn dɛn kam bak to wi. Wi gladi we nɔbɔdi nɔ stɔp dɛn bɔt bɔku pipul dɛn bin rili want fɔ no wetin de apin.

Bɔku tɛm wi famili bin de travul go Tɛksas fɔ kɔnvɛnshɔn. Papa bin de wok fɔ di relwe kɔmni, so wi kin rayd di tren fɔ fri we wi de go kɔnvɛnshɔn dɛn ɛn fɔ go fɛn wi fambul dɛn. Mi mama in big brɔda, Frɛd Wisma, ɛn in wɛf Yulali, bin de na Tɛmpul, insay Tɛksas. Ɔnkul Frɛd bin lan di trut afta di ia 1900 we i bin yɔŋ. I bin baptayz, ɛn i bin tɛl in brɔda ɛn sista dɛn wetin i bin dɔn lan ɛn mi mama na bin wan pan dɛn. Di brɔda dɛn we bin de na sɛntral Tɛksas bin sabi Ɔnkul Frɛd gud gud wan bikɔs in na bin zon savant (we dɛn de kɔl sakit ovasia naw). Na bin pɔsin we gladi, i gud, i gɛt zil, ɛn na bin gud ɛgzampul fɔ mi.

Insay 1941 wi bin yuz tren fɔ travul go Sɛnt Luis na Misori, fɔ wan big kɔnvɛnshɔn. Dɛn bin tɛl ɔl di yɔŋ wan dɛn fɔ sidɔm nia di stej fɔ lisin to Brɔda Rutafɔd in tɔk we gɛt di taytul, “Children of the King.” We i dɔn di tɔk, dɛn bin gi wan big sɔprayz to 15,000 yɔŋ wan dɛn. Brɔda Rutafɔd ɛn di wan dɛn we de ɛp am bin gi wi ɔl di nyu buk we nem Children.

Insay Epril 1943, wi bin atɛnd di “Call to Action” Asɛmbli na Kɔfivil, Kansas. Wi bin de de we dɛn anawns se ɔl di kɔngrigeshɔn dɛn go gɛt wan nyu skul, we na di Tiokratik Ministri Skul. Dɛn bin gi wan smɔl buk bak we gɛt 52 lɛsin dɛn we wi fɔ yuz na di skul. Leta da ia de, a bin gi mi fɔs studɛnt tɔk. Da asɛmbli de bin spɛshal fɔ mi bikɔs mi ɛn ɔda brɔda dɛn, bin baptayz na wan kol wata we de na pɔnd nia wan fam.

A bin dɔn sɛkɔndari skul insay 1951 ɛn a bin gɛt fɔ disayd wetin a go du wit mi layf. Mi brɔda Jɛri dɔn wok na Bɛtɛl. Misɛf bin rili want fɔ go na Bɛtɛl, so a bin aplay. I nɔ bin te nain dɛn kɔl mi na Bɛtɛl ɛn a bin bigin fɔ wok de Mach 10, 1952. Dat na bin rili gud tin we a disayd fɔ du, dat bin ɛp mi fɔ sav Gɔd gud gud wan.

A bin want fɔ wok na di say we dɛn de print fɔ ɛp fɔ mek wi magazin ɛn ɔda buk dɛn. Bɔt dat nɔ ɛva apin. Bifo dat, dɛn bin gi mi wok as weta ɛn leta dɛn sɛn mi na kichin. A bin ɛnjɔy dis wok ɛn lan bɔku tin. Wi bin de wok bay tɔn, ɛn a bin de gɛt tɛm fɔ misɛf insay di de. A kin go na di Bɛtɛl laybri fast-fast ɛn rid di bɔku buk dɛn we de de fɔ du mi pasɔnal stɔdi. Dis bin ɛp mi fɔ gɛt mɔ fet ɛn fɔ gɛt tayt padi biznɛs wit Jiova. A bin mekɔp mi maynd mɔ fɔ sav Jiova na Bɛtɛl wans a ebul fɔ du am. Jɛri bin dɔn kɔmɔt na Bɛtɛl insay 1949 ɛn i bin mared Patrisha, bɔt dɛn bin de nia Bruklin ɛn i bin ɛp ɛn ɛnkɔrej mi bikɔs a bin stil nyu na Bɛtɛl.

We a kam na Bɛtɛl, i nɔ te nain di brɔda dɛn bigin fɔ luk fɔ Bɛtɛlayt dɛn fɔ ad dɛn pan di list fɔ di wan dɛn we de gi tɔk na Bɛtɛl. Dɛn bin de sɛn di brɔda dɛn we de na dis list fɔ go visit kɔngrigeshɔn dɛn we de lɛk 320 kilomita (200 mayl) frɔm Bruklin. Dɛn bin de gi pɔblik tɔk de ɛn wok wit di kɔngrigeshɔn na fil savis. Mi na wan pan di brɔda dɛn we dɛn pik. Pan ɔl we a bin de fred, a bin bigin fɔ go visit dɛn ɛn  gi pɔblik tɔk dɛn. Trade, dɛn bin de gi pɔblik tɔk fɔ wan awa. A bin de travul bay tren fɔ go na di kɔngrigeshɔn dɛn. A mɛmba wan Sɔnde aftanun insay 1954. Na bin winta tɛm. A bin lod na wan tren, de go bak na Nyu Yɔk, a bin nid fɔ rich na Bɛtɛl bifo ples dak. Bɔt as a bin de go bak, wan ebi ebi briz bin blo ɛn bɔku sno bin fɔdɔm. Di ilɛktrik injin na di tren bin stɔp fɔ wok ɛn a nɔ bin rich na Nyu Yɔk siti te fayv oklɔk Mɔnde mɔnin. A pas ɔnda di tren steshɔn fɔ go na Bruklin ɛn as a rich a bigin fɔ wok wantɛm wantɛm na kichin. A bin let smɔl ɛn taya bikɔs a nɔ bin slip ol nɛt. Bɔt di gladi at we a bin gɛt we a de sav di kɔngrigeshɔn dɛn ɛn we a bin mit wit nyu brɔda ɛn sista dɛn bin pas di sakrifays we a bin mek fa fawe.

Insay mi fɔs ia na Bɛtɛl, a bin bigin fɔ tek pat pan wan Baybul stɔdi program we dɛn bin de du ɛni wik na wi redio steshɔn we na, WBBR. Di studio dɛn bin de na di sɛkɔn flɔ na di 124 Kolombia Ayt bildin. Brɔda Alɛgzanda H Makmilan, we bin dɔn wok na Bɛtɛl fɔ lɔng tɛm, bin de tek pat pan di redio program fast-fast. Wi bin yus fɔ kɔl am Brɔda Mak. In na bin gud ɛgzampul fɔ wi di yɔŋ brɔda dɛn na Bɛtɛl, bikɔs i bin kɔntinyu fɔ wok fetul wan pan ɔl we i bin de gɛt prɔblɛm dɛn.

Insay 1958, mi asaymɛnt bin chenj ɛn a bigin fɔ wok wit di wan dɛn we de gradyuet na Giliad Skul. A bin de ɛp dɛn man ɛn uman dɛn ya we gɛt zil fɔ gɛt dɛn visa dɛn ɛn ɛp dɛn bak fɔ arenj fɔ mek dɛn travul. Dɛn tɛm dɛn de i bin dia fɔ travul bay plen, so bɔku pan di wan dɛn we gradyuet we kin go na Afrika ɛn Eshia kin yuz ship fɔ travul. Bɔt afta sɔm tɛm, we i nɔ bin dia igen fɔ travul bay plen, bɔku pan di mishɔnari dɛn bin de travul bay plen fɔ go na dɛn asaynmɛnt.

Insay 1960, a bin chata plen dɛn we de kɔmɔt Amɛrika fɔ go Yurop fɔ di intanashɔnal kɔnvɛnshɔn dɛn insay 1961. A bin travul go na wan pan di kɔnvɛnshɔn dɛn na Ambɔg, Jamani. Afta di kɔnvɛnshɔn, mi ɛn tri ɔda brɔda dɛn we na Bɛtɛlayt bin rɛnt wan motoka ɛn drayv kɔmɔt na Jamani fɔ go Itali fɔ go waka na di branch ɔfis na Rom. Wi kɔmɔt de ɛn go na Frans ɛn pas di Parɛnis mawnten dɛn, ɛn rich na Spen usay dɛn bin dɔn ban wi wok. Wi bin ebul fɔ gi sɔm buk ɛn magazin dɛn to wi brɔda dɛn na Basilona. Wi bin rap dɛn so dat dɛn go luk lɛk gift. I bin rili fayn we wi mit dɛn. Frɔm de, wi drayv go na Amstadam ɛn flay go bak na Nyu Yɔk.

Insay 1962, dɛn bin gi mi wan wok we na fɔ arenj fɔ 583 brɔda ɛn sista dɛn we fɔ travul fɔ go difrɛn say dɛn na di wɔl fɔ go atɛnd wan spɛshal intanashɔnal kɔnvɛnshɔn. Dis na bin di “Everlasting Good News” Asɛmbli fɔ 1963. Di  wan dɛn we fɔ travul, go atɛnd kɔnvɛnshɔn dɛn na Yurop, Eshia, ɛn na di Sawt Pasifik ɛn dɛn kin go bak na Onolulu, Away, ɛn Pasadɛna, Kalifonia. Dɛn fɔ go bak na Libanɔn ɛn Jɔdan fɔ wan spɛshal visit na di say dɛn we dɛn rayt di Baybul. Wi dipatmɛnt bin de arenj fɔ di plen dɛn ɛn rɛnt otɛl dɛn ɛn tray fɔ gɛt ɔl dɛn visa dɛn we dɛn nid.

1963 na bin impɔtant ia to mi fɔ ɔda rizin. Insay Jun 29, a bin mared Lila Rojas frɔm Misori. I bin dɔn kam na Bɛtɛl insay 1960. Afta wan wik we wi mared, mi ɛn Lila bin bigin fɔ travul. Wi bin go na Gris, Ijipt, ɛn Libanɔn. Frɔm de, wi tek plen go na Jɔdan. Bɔt dɛn bin dɔn stɔp wi wok de, ɛn di bigman dɛn nɔ bin de gi Jiova Witnɛs dɛn visa. So wi nɔ bin no wetin go apin we wi rich de. Yu no, wi bin rili gladi ɛn sɔprayz we wi si bɔku brɔda ɛn sista dɛn tinap na di smɔl ia pɔt wit wan big bana we se “Jiova Witnɛs dɛn Una Wɛlkɔm”! I bin rili wɔndaful fɔ go waka na di say dɛn we dɛn rayt di Baybul ɛn si ples dɛn usay Ebraam, Ayzak, ɛn Jekɔp bin de, usay Jizɔs ɛn di apɔsul dɛn prich, ɛn usay Kristianiti bigin fɔ prɛd ɔlsay na “di wɔl.”—Di Apɔsul Dɛn Wok [Akt] 13:​47.

Lila dɔn de sɔpɔt mi fɔ lɛk 55 ia naw pan ɔl wi asaynmɛnt dɛn. Wi bin go na Spen ɛn Pɔtyugal bɔku tɛm we dɛn bin dɔn ban wi wok de. Wi go ɛnkɔrej di brɔda ɛn sista dɛn ɛn kam wit buk ɛn magazin dɛn ɛn ɔda tin dɛn we dɛn bin nid. Wi bin ebul fɔ go fɛn bak sɔm brɔda dɛn we bin de prizin insay Kadiz, Spen. A bin rili gladi fɔ gi tɔk we ɛnkɔrej dɛn.

Insay di ia dɛn we dɔn pas frɔm 1963, a bin arenj fɔ travul fɔ go intanashɔnal kɔnvɛnshɔn dɛn na Afrika, Ɔstrelia, Sɛntral ɛn Sawt Amɛrika, Yurop, di Fa Ist, Away, Nyu Ziland, ɛn Poto Riko. Mi ɛn Lila dɔn atɛnd bɔku kɔnvɛnshɔn dɛn we wi nɔ go ɛva fɔgɛt, lɛk di wan na Wasɔ, Pɔland, insay 1989. Brɔda dɛn frɔm Rɔshia bin ebul kam na da big kɔnvɛnshɔn de. Dis na dɛn fɔs kɔnvɛnshɔn we dɛn dɔn ɛva atɛnd! Wi bin mit brɔda ɛn sista dɛn we bin dɔn de na prizin fɔ lɔng lɔng tɛm insay di Soviet Union fɔ dɛn fet.

Wan ɔda asaynmɛnt we a bin rili ɛnjɔy na fɔ fɛn ɛn ɛnkɔrej di wan dɛn we de wok na Bɛtɛl ɛn Mishɔnari dɛn ɔlsay na di wɔl. Wan pan dɛn visit dɛn de, wi bin go na Sawt Koria ɛn wi bin ebul fɔ mit wit 50 pan wi brɔda dɛn we bin de na prizin insay Suwon. Dɛn ɔl bin gladi ɛn de wet fɔ tɛm we dɛn go de sav Jiova we dɛn nɔ ban dɛn. We wi mit dɛn dat bin rili ɛnkɔrej wi!—Lɛta Fɔ Rom 1:​11, 12.

A dɔn si aw Jiova dɔn blɛs in pipul dɛn insay di ia dɛn we dɔn pas. We a bin baptayz insay  1943, na 100,000 pɔblisha dɛn bin de. Naw, i dɔn pas 8,000,000 we de sav Jiova insay 240 kɔntri dɛn. Di wok we di Giliad gradyuet dɛn wok tranga wan, dɔn mek dis apin. I dɔn mek a rili gladi fɔ wok wit bɔku pan dɛn mishɔnari dɛn de ɛn fɔ ɛp dɛn fɔ go na dɛn asaynmɛnt dɛn.

A rili gladi we a bin disayd fɔ yuz mi layf fɔ sav Jiova ɛn aplay fɔ wok na Bɛtɛl we a yɔŋ. Jiova dɔn rili blɛs mi ɔl dɛn tɛm dɛn ya we dɔn pas. Apat frɔm ɔl di tin dɛn we wi ɛnjɔy we wi bin wok na Bɛtɛl, i dɔn pas 50 ia we mi ɛn Lila dɔn ɛnjɔy fɔ prich wit bɔku kɔngrigeshɔn dɛn na Bruklin ɛn wi bin gɛt bɔku padi dɛn.

A stil de wok na Bɛtɛl ɛn Lila de sɔpɔt mi. Pan ɔl we a dɔn pas 84 ia a rili gladi we a ebul wok ɛn ɛp wit di lɛta dɛn we de kam na di branch.

A rili gladi fɔ de na Jiova in fayn ɔganayzeshɔn ɛn fɔ si se di wɔd dɛn na Malakay 3:​18 na tru we i se: “Da tɛm de, dɛnsɛf go no udat de waka tret wit PAPA GƆD ɛn udat. . . de du wetin i fil fɔ du, bitwin udat de du wetin PAPA GƆD want ɛn udat nɔ de du wetin PAPA GƆD want.” Ɛnide, wi de si aw Setan in wɔl de bad-ɔf ɛn pipul dɛn nɔ gɛt op ɛn dɛn nɔ gladi bɛtɛ. Bɔt di wan dɛn we lɛk ɛn de sav Jiova rili gladi na layf, pan ɔl we tin tranga, ɛn dɛn gɛt op fɔ tumara bambay. Na big big chans a gɛt fɔ tɛl ɔda pipul dɛn bɔt di gud nyuz! (Matyu 24:​14) I nɔ go te igen Gɔd in Kiŋdɔm go dɔnawe wit Setan in wɔl ɛn mek dis wɔl bi Paradays. Wi rili want da de de fɔ kam! Dɔn, ɔlman na di wɔl go gladi, gɛt wɛlbɔdi, ɛn de sote go.