1, 2. (a) We tin chenj kwik kwik wan, aw dat kin afɛkt wi? (Luk di pikchɔ nia dis atikul in taytul.) (b) Akɔdin to Sam 131, wetin go ɛp wi fɔ mek wi nɔ wɔri?

AFTA we Lɔyd ɛn Alɛgzandra dɔn wok na Bɛtɛl fɔ di pas 25 ia, dɛn bin sɛn dɛn na di fil. Fɔs, dɛn bin fil bad. Lɔyd bin se: “I bin tan lɛk se Bɛtɛl ɛn di wok we a de du de na dat pipul dɛn dɔn sabi mi fɔ. Na mi maynd, a bin gladi fɔ di rizin dɛn we mek tin bin chenj, bɔt as tɛm de go, a bigin fɔ fil lɛk se dɛn nɔ nid mi.” Fɔs, Lɔyd bin gladi fɔ di chenj bɔt sɔntɛnde, i bin de fil bad.

² As tɛm de go, sɔm chenj dɛn go apin na wi layf we wi nɔ de ɛkspɛkt ɛn dat go mek wi strɛs ɛn wɔri. (Prɔvabs 12:​25) We i nɔ izi fɔ mek wi ajɔst to sɔm chenj dɛn, wetin wi go du fɔ mek wi nɔ wɔri?  (Rid Sam 131:​1-3.) Lɛ wi si wetin bin ɛp sɔm pan Jiova in savant dɛn we bin de trade ɛn we de insay wi yon tɛm, fɔ mek dɛn nɔ wɔri we tin chenj na dɛn layf kwik kwik wan.

3. Aw tin dɛn bin chenj na Josɛf in layf kwik kwik wan?

³ Fɔ ɛgzampul, tink bɔt Josɛf. Na Josɛf Jekɔp bin lɛk pas ɔl in ɔda bɔy pikin dɛn. Dis bin mek in brɔda dɛn jɛlɔs am. We Josɛf bin ol 17 ia, dɛn sɛl am as slev. (Jɛnɛsis 37:​2-4, 23-28) I bin sɔfa na Ijipt fɔ lɛk 13 ia. Fɔs, i bin de as slev ɛn leta dɛn put am na jel. Josɛf bin rili lɛk in papa bɔt i bin de fa frɔm am. Di tin we bin de apin to am fɔ dɔn mek i fil lɛk se i nɔ gɛt wan op ɔ mek i vɛks; bɔt i nɔ bin fil da we de. Wetin bin ɛp am?

4. (a) Wetin Josɛf bin du we i bin de na jel? (b) Aw Jiova bin ansa Josɛf in prea?

⁴ We Josɛf bin de sɔfa na jel, i go mɔs dɔn de tink bɔt aw Jiova dɔn de ɛp am. (Jɛnɛsis 39:​21; Sam 105:​17-19) Sɔntɛm, i bin de tink bak bɔt di drim dɛn we i bin drim we i bin yɔŋ, dat bin mek i fil se Jiova de wit am. (Jɛnɛsis 37:​5-11) Sɔntɛm i go dɔn de pre fast-fast ɛn tɛl Jiova ɔl wetin de na in at. (Sam 145:​18) Ɛn Jiova bin ansa Josɛf in prea bay we i gi am kɔnfidɛns fɔ se I go “de wit” am ilɛk wetin apin.—Di Apɔsul Dɛn Wok [Akt] 7:​9, 10. * (Luk di futnot.)

5. Aw di “pis we Gɔd de gi” go ɛp wi fɔ mekɔp wi maynd fɔ kɔntinyu fɔ sav Jiova?

⁵ Ilɛk aw tin nɔ izi fɔ wi, wi go gɛt “di pis we Gɔd de gi” we go protɛkt wi “maynd” ɛn mek wi nɔ wɔri. (Rid Lɛta fɔ Filipay 4:​6, 7, NW.) We wi wɔri bɔt sɔntin, “di pis we Gɔd de gi” go ɛp wi fɔ kɔntinyu fɔ sav Jiova ɛn nɔ giv-ɔp. Lɛ wi lan bɔt sɔm brɔda ɛn sista dɛn ɛgzampul we dɛn kayn tin ya dɔn apin to.

6, 7. Aw prea go ɛp wi fɔ gɛt di pis we Gɔd de gi? Gi wan ɛgzampul.

⁶ We Rayan ɛn Juliɛt bin yɛri se dɛn wok as tɛmporari spɛshal payɔnia dɔn dɔn, dɛn at bin pwɛl. Rayan se: “Wi pre to Jiova wantɛm wantɛm. Wi no se dat na bin fayn chans fɔ sho se wi abop pan am. Bɔku pan di wan dɛn we bin de na di kɔngrigeshɔn bin jɔs kam na di trut, so wi pre to Jiova fɔ mek i ɛp wi fɔ sɛt fayn ɛgzampul fɔ sho se wi gɛt fet.”

⁷ Wetin Jiova bin du fɔ ansa dɛn prea? Rayan se: “As wi dɔn fɔ pre so, wi bin lɛf fɔ wɔri ɛn wi nɔ bin de fil bad igen. Di pis we Gɔd de gi bin de gayd wi at ɛn wi maynd. Wi kam fɔ si se Jiova go kɔntinyu fɔ yuz wi if wi kɔntinyu fɔ tink di rayt we.”

8-10. (a) Aw Gɔd in spirit go ɛp wi we wi gɛt tin we de wɔri wi? (b)  Aw Jiova go ɛp wi we wi kɔntinyu fɔ sav am fetful wan?

⁸ Gɔd in spirit kin mek wi nɔ wɔri, ɛn i de dayrɛkt wi bak to vas dɛn na di Baybul we go ɛp wi fɔ ɔndastand wetin rili impɔtant na layf.  (Rid Jɔn 14:​26, 27.) Tink bɔt wetin bin apin to Filip ɛn in wɛf Meri. Dɛn bin dɔn de wok na Bɛtɛl fɔ lɛk 25 ia. Insay 4 mɔnt, dɛn ɔl tu mama dɛn day ɛn Filip wan in ɔda fambul sɛf bin day. Ɛn arawnd da sem tɛm de, dɛn bin gɛt fɔ kia fɔ Meri in papa we bin gɛt wan sik we dɛn kɔl, dementia.

⁹ Filip bin se: “Fɔ sɔm tɛm, a bin tink se a bin ebul fɔ bia wit di prɔblɛm, bɔt sɔntin de we a nɔ bin de du. A rid Lɛta Fɔ Kɔlɔse 1:​11 insay wan Wachtawa stɔdi atikul. Fɔ tru a bin de bia bɔt di skripchɔ ɛp mi fɔ si se a nid fɔ rili bia. A bin nid fɔ ‘peshɛnt ɛn gladi as a de bia ɔltin.’ Dis vas mɛmba mi se nɔto di tin dɛn we de apin to mi go mek a gladi ɔ nɔ gladi; na Gɔd in spirit nɔmɔ go mek dat apin na mi layf.”

¹⁰ Jiova bin blɛs Filip ɛn Meri bɔku we dɛn bikɔs dɛn bin kɔntinyu fɔ sav am fetful wan. Jɔs afta dɛn lɛf Bɛtɛl, dɛn ɔl tu bin ebul fɔ gɛt Baybul stɔdi dɛn we de go bifo ɛn we want fɔ stɔdi pas wan tɛm insay di wik. Meri bin se: “Na dɛn bin de mek wi gladi ɛn na wan we dat we Jiova bin de yuz fɔ tɛl wi se ɔltin go fayn.”

11, 12. (a) Wetin Josɛf bin du we mek Jiova blɛs am? (b) Aw Jiova bin blɛs Josɛf?

¹¹ We tin chenj na wi layf kwik kwik wan, wi kin so wɔri dat na wi prɔblɛm dɛn nɔmɔ wi de tink bɔt. Da kayn tin de bin fɔ dɔn apin to Josɛf. Bɔt ilɛk wetin bin de apin to am, i bin disayd fɔ du di bɛst tin we i ebul fɔ du. Jɔs lɛk aw Josɛf bin de wok tranga wan fɔ Pɔtifa, na so i bin de wok tranga wan fɔ du ɛntin we di chif ɔfisa bin de tɛl am fɔ du.—Jɛnɛsis 39:​21-23.

¹² Wan de, dɛn bin put Josɛf fɔ kia fɔ tu jelman dɛn we bin de wok na Fɛro in pales. Josɛf bin de trit dɛn fayn ɛn mek dɛn fil fri fɔ tɔk to am bɔt ɛnitin we bin de wɔri dɛn. Dɛn bin ivin tɛl am bɔt di drim dɛn we dɛn bin drim we bin de mek dɛn fred. (Jɛnɛsis 40:​5-8) Josɛf nɔ bin no se di tɔk we i bin tɔk to dɛn bɔt dɛn drim dɛn na in go mek i kɔmɔt na jel. Tu ia afta dat, dɛn bin pul am na jel ɛn i kam fɔ bi pawaful pɔsin na Ijipt. Na Fɛro nɔmɔ bin gɛt pawa pas Josɛf!—Jɛnɛsis 41:​1, 14-16, 39-41.

13. Ilɛk uskayn prɔblɛm wi gɛt, wetin wi fɔ du fɔ mek Jiova go blɛs wi?

 ¹³ Lɛk Josɛf, prɔblɛm kin mit wi we wi nɔ go ebul fɔ kɔntrol. Bɔt if wi peshɛnt ɛn du wetin wi ebul, Jiova go blɛs wi. (Sam 37:​5) Ivin if wi kɔnfyus ɛn de wɔri bɔt wi prɔblɛm, wi stil gɛt op. (Sɛkɛn Lɛta Fɔ Kɔrint 4:​8) Jiova go de wit wi, mɔ if wi pe atɛnshɔn fɔ du di prichin wok.

14-16. Pan ɔl we tin bin de chenj na Filip in layf, aw i bin kɔntinyu fɔ pe atɛnshɔn fɔ du di prichin wok wit zil?

¹⁴ Filip we bin de prich na bin gud ɛgzampul bɔt pɔsin we bin kɔntinyu fɔ prich wit zil pan ɔl we tin bin de chenj na in layf. Fɔs, i bin de ɛnjɔy fɔ prich na Jerusɛlɛm. (Di Apɔsul Dɛn Wok [Akt] 6:​1-6) Bɔt ɔltin bin chenj. Pipul dɛn bin de mek di Kristian dɛn na Jerusɛlɛm sɔfa bad bad wan, ɛn na da tɛm de dɛn bin kil Stivin. Bikɔs pipul dɛn bin de mek di Kristian dɛn sɔfa, dat bin mek dɛn rɔnawe kɔmɔt na Jerusɛlɛm. Bɔt Filip bin want fɔ kɔntinyu fɔ sav Jiova, so i bin go na Samɛria, usay pipul dɛn bin nid fɔ yɛri di gud nyuz.—Matyu 10:​5; Di Apɔsul Dɛn Wok [Akt] 8:​1, 5.

¹⁵ Filip bin rɛdi fɔ go ɛnisay Gɔd in spirit dayrɛkt am. So Jiova bin yuz am fɔ prich na ples dɛn usay pipul dɛn nɔ bin yɛri di gud nyuz yet. Bɔku Ju pipul dɛn bin de tink se dɛn bɛtɛ pas di Samɛritan dɛn ɛn dɛn bin de trit dɛn bad. Bɔt Filip nɔ bin tink da we de. I bin de prich di gud nyuz to dɛn wit zil. Di Samɛritan dɛn bin “gladi” fɔ lisin to am.—Di Apɔsul Dɛn Wok [Akt] 8:​6-8.

¹⁶ Gɔd in spirit bin dayrɛkt Filip bak fɔ go prich insay Ashdɔd ɛn Sizaria usay bɔku Jɛntayl dɛn bin de. (Di Apɔsul Dɛn Wok [Akt] 8:​39, 40) Tin bin chenj bak na Filip in layf we i bin de de. I bin mared ɛn gɛt in yon famili. Bɔt pan ɔl we tin dɛn bin de chenj na Filip in layf, i bin stil kɔntinyu fɔ pe atɛnshɔn fɔ du di prichin wok wit zil, ɛn Jiova sɛf bin kɔntinyu fɔ blɛs in ɛn in famili.—Di Apɔsul Dɛn Wok [Akt] 21:​8, 9.

17, 18. Aw di prichin wok go ɛp wi we tin chenj na wi layf?

 ¹⁷ Bɔku brɔda ɛn sista dɛn we de ful taym savis dɔn tɔk se, we dɛn pe atɛnshɔn fɔ du di prichin wok, dat dɔn ɛp dɛn fɔ kɔntinyu fɔ gɛt gladi at ɛn tink di rayt we ilɛksɛf tin chenj na dɛn layf. Fɔ ɛgzampul, we wan brɔda na Sawt Afrika we nem Osbɔni ɛn in wɛf Polayt bin lɛf Bɛtɛl, dɛn bin tink se i go izi fɔ mek dɛn gɛt ples fɔ de ɛn wok we dɛn nɔ go de du ɛvride insay di wik. Bɔt Osbɔni bin se: “Bɔt nɔto dat bin apin, wi nɔ bin gɛt wok kwik. Polayt bin se: “Wi nɔ bin gɛt wok fɔ tri mɔnt ɛn wi nɔ bin kip mɔni. I nɔ bin rili izi.”

¹⁸ Wetin bin ɛp Osbɔni ɛn Polayt we tin nɔ bin izi fɔ dɛn? Osbɔni bin se: “We wi bin de prich wit di kɔngrigeshɔn, dat bin ɛp wi fɔ kɔntinyu fɔ put wi maynd pan di prichin wok ɛn tink di rayt we.” Dɛn nɔ bin jɔs sidɔm na os de wɔri, bifo dat dɛn bin disayd fɔ kɔntinyu fɔ du di prichin wok wit zil. Dis bin mek dɛn rili gladi! Ɛn Osbɔni bin kɔntinyu fɔ tɔk se: “Wi bin luk ɔlsay fɔ wok, ɛn wi bin ebul fɔ gɛt.”

19-21. (a) Wetin go ɛp wi fɔ mek wi nɔ wɔri? (b) Aw wi go bɛnifit we wi ajɔst to chenj dɛn we wi nɔ bin de ɛkspɛkt?

¹⁹ As wi dɔn lan, if wi du ɔl wetin wi ebul we tin chenj na wi layf ɛn abop pan Jiova wit ɔl wi at, dat go mek wi nɔ wɔri ilɛk wetin apin. (Rid Mayka 7:​7.) As tɛm de go, wi go kam fɔ no se di we aw wi de ajɔst we tin chenj na wi layf, go ɛp wi fɔ gɛt tayt padi biznɛs wit Jiova. Polayt bin ɛksplen se, di kɔmɔt we dɛn kɔmɔt na Bɛtɛl, dɔn ɛp am fɔ rili no wetin i min fɔ abop pan Jiova ilɛksɛf tin nɔ izi. I se:  “Mi padi biznɛs wit Jiova dɔn tayt mɔ ɛn mɔ.”

²⁰ Meri we wi bin dɔn tɔk bɔt, stil de kia fɔ in papa ɛn de payɔnia. I se: “A dɔn lan se we a wɔri bɔt sɔntin, a nid fɔ stɔp, pre, ɛn lɛf ɔltin to Jiova. Fɔ lɛf tin na Jiova in an na wan big lɛsin we a dɔn lan ɛn a go nid am mɔ fɔ tumara bambay.”

²¹ Lɔyd ɛn Alɛgzandra bin tɔk se di tin dɛn we bin chenj na dɛn layf bin tɛst dɛn fet di we aw dɛn nɔ bin de ɛkspɛkt. Bɔt dɛn dɔn si aw dɛn tɛst dɛn de dɔn ɛp dɛn. Naw dɛn no se dɛn gɛt strɔng fet we go ɛp dɛn fɔ gɛt kɔrej we dɛn gɛt prɔblɛm ɛn dɛn fil se dɛn dɔn bi gud pipul dɛn.

22. If yu du ɔl wetin yu ebul ilɛk aw tin chenj na yu layf, us kɔnfidɛns yu go gɛt?

²² Insay dis wɔl we wi de, tin kin chenj na wi layf kwik kwik wan. Wi go gɛt difrɛn wok dɛn fɔ du insay Jiova in ɔganayzeshɔn, wi go gɛt wɛlbɔdi prɔblɛm, ɔ wi go nid fɔ kia fɔ wi fambul dɛn we dɛn we wi nɔ bin de du trade. Bɔt ilɛk wetin apin, gɛt kɔnfidɛns fɔ se Jiova bisin bɔt yu ɛn i go ɛp yu di rayt tɛm. (Di Ibru Pipul Dɛn 4:​16; Pita in Fɔs Lɛta 5:​6, 7, NW) Bɔt fɔ naw, tray fɔ du ɔl wetin yu ebul fɔ du. Pre to yu Papa Jiova, ɛn abop pan am wit ɔl yu at. If yu du dat, Jiova in spirit go ɛp yu fɔ mek yu nɔ wɔri ilɛk aw tin dɛn chenj na yu layf.