1, 2. (a) Us wok bin impɔtant pas ɔl na Jizɔs in layf? Wetin mek? (b) Wetin wi fɔ du fɔ lɛ “wi ɛn Gɔd de wok togɛda”?

JIZƆS KRAYS na bin kapɛnta ɛn leta i bi ticha. (Mak 6:​3; Jɔn 13:​13) I bin du ɔl tu dɛn wok dɛn de gud gud wan. We in na bin kapɛnta, i bin lan aw fɔ yuz in tul dɛn fɔ mek fayn fayn tin dɛn frɔm wud. Ɛn we i bi ticha, i bin yuz di tin dɛn we i sabi frɔm di skripchɔ dɛn fɔ ɛp di kɔmɔn pipul dɛn fɔ ɔndastand di tru tin dɛn we de na Gɔd in Wɔd. (Matyu 7:​28; Lyuk 24:​32, 45) We Jizɔs bin ol 30 ia, i bin stɔp fɔ bi kapɛnta ɛn bi ticha bikɔs i no se na da wok de impɔtant pas ɔl di wok dɛn we i go du. I bin tɔk se fɔ prich di gud nyuz bɔt Gɔd in Kiŋdɔm na wan rizin we mek Gɔd sɛn am na di wɔl. (Matyu 20:​28; Lyuk 3:​23; 4:​43) Jizɔs bin pe atɛnshɔn mɔ fɔ prich di gud nyuz, ɛn i want ɔda pipul dɛn fɔ du di sem tin.—Matyu 9:​35-38.

² Bɔku pan wi nɔto kapɛnta, bɔt wi ɔl na ticha dɛn we de tich ɔda pipul dɛn di gud nyuz. Dis wok rili impɔtant, na dat mek Gɔd de ɛp wi fɔ du am. Infakt, na “wi ɛn Gɔd de wok togɛda.” (Fɔs Lɛta fɔ Kɔrint 3:​9, NW; Sɛkɛn Lɛta Fɔ Kɔrint 6:​4) Wi gri wit wetin wan pan di man dɛn we  rayt di sam buk bin tɔk we i se: “Ɔl wetin yu se na tru.” (Sam 119:​159, 160) Jiova in wɔd na tru. Na dat mek wi want fɔ mek shɔ se wi de ‘lan pipul di tru wɔd bɔt Gɔd, aw wi fɔ lan dɛn’ we wi de prich. (Rid Sɛkɛn Lɛta To Timoti 2:​15.) Di Baybul na di men tul we wi de yuz fɔ tich ɔda pipul dɛn bɔt Jiova, Jizɔs, ɛn di Kiŋdɔm, so na dat mek wi de tray ɔltɛm fɔ sabi aw fɔ yuz di Baybul gud gud wan. Fɔ ɛp wi fɔ du mɔ na wi prichin wok, Jiova in ɔganayzeshɔn dɔn gi wi ɔda fayn fayn tin dɛn we wi go yuz fɔ prich ɛn wi nid fɔ no aw fɔ yuz dɛn. Dɛn tin dɛn ya de na wi Tichin Tulbɔks.

3. Wetin wi fɔ pe atɛnshɔn pan we wi de prich? Aw Di Apɔsul Dɛn Wok [Akt] 13:​48 de ɛp wi fɔ du dat?

³ Yu go de wɔnda wetin mek wi kɔl am Tichin Tulbɔks ɛn wi nɔ kɔl am Prichin Tulbɔks. Na bikɔs fɔ “prich” min fɔ tɛl pipul dɛn mɛsej, bɔt fɔ “tich” min fɔ ɛksplen di mɛsej so dat di pɔsin go ɔndastand wetin i de yɛri ɛn dat go mek i du di tin dɛn we i de lan. Na smɔl tɛm nɔmɔ dɔn lɛf fɔ lɛ dis wɔl dɔn, so wi fɔ pe atɛnshɔn mɔ fɔ stat Baybul stɔdi ɛn tich pipul dɛn di tru so dat dɛn go bi Krays in disaypul dɛn. Dis min se wi fɔ gɛt zil we wi de luk fɔ “ɔl di wan dɛn we rili sho se dɛn want fɔ gɛt layf we go de sote go” ɛn ɛp dɛn fɔ bigin sav Jiova.—Rid Di Apɔsul Dɛn Wok [Akt] 13:​44-48, NW.

4. Aw wi go ebul fɛn “ɔl di wan dɛn we rili sho se dɛn want fɔ gɛt layf we go de sote go”?

⁴ Aw wi go ebul fɛn di wan dɛn we “rili sho se dɛn want fɔ gɛt layf we go de sote go”? Di wangren we we di fɔstɛm Kristian dɛn bin de fɛn dɛn pipul dɛn ya na we dɛn bin de prich. Jizɔs tɛl in disaypul dɛn se: “Wɛn una go na ɛni tɔŋ ɔ vilej, una fɔ fɛn pɔsin we go gri fɔ mek una tap nain os.” (Matyu 10:​11) Wisɛf nid fɔ du di sem tin tide. Na tru se if pipul dɛn nɔ rili want fɔ lisin, dɛn prawd, ɔ dɛn nɔ rili bisin bɔt Gɔd, wi nɔ fɔ fil se dɛn want fɔ lisin to di gud nyuz. Wi de luk fɔ pipul dɛn we rili want fɔ lisin, we ɔmbul, ɛn we rili want fɔ no di tru tin we de na di Baybul. Wi kin kɔmpia di we aw wi de fɛn pipul dɛn to wetin Jizɔs bin de du as kapɛnta. Fɔs, Jizɔs bin nid fɔ fɛn di rayt wud bifo i mek tin lɛk chia, tebul, domɔt, yok, ɔ ɔda tin. Dɔn i kin yuz in tulbɔks ɛn di tin dɛn we i sabi, fɔ mek wetin i want fɔ mek. Semweso, wi nid fɔ fɛn pipul dɛn we rili want fɔ lan bɔt Jiova, dɔn wi yuz wi tul dɛn ɛn wetin wi sabi fɔ ɛp dɛn fɔ bi disaypul.—Matyu 28:​19, 20.

5. Wetin wi nid fɔ no bɔt di tul dɛn we de na di Tichin Tulbɔks? Gi ɛgzampul. (Luk di pikchɔ nia dis atikul in taytul.)

⁵ Insay di tulbɔks, ɛni wan pan di tul dɛn, gɛt dɛn yon patikyula wok we dɛn de du. Fɔ ɛgzampul, tink bɔt di tul dɛn we Jizɔs bin de yuz we in na bin kapɛnta. * (Luk di futnot.) I bin nid tul dɛn fɔ mɛnzhɔ, fɔ mak, fɔ kɔt, fɔ mek ol, ɛn shep di bod, ɛn i bin gɛt tul dɛn bak fɔ lɛvul di bod ɛn jɔyn dɛn togɛda. Semweso, ɛni wan pan wi tul dɛn we de  na wi Tichin Tulbɔks gɛt patikyula wok we i kin du. So lɛ wi lan aw fɔ yuz dɛn impɔtant tul dɛn ya.

6, 7. (a) Aw yu dɔn yuz di jw.org kad? (b) Wetin mek wi de yuz di mitin inviteshɔn?

⁶ Jw.org Kad. Dis na smɔl tul dɛn we wi de yuz fɔ tɛl pipul dɛn udat wi bi ɛn fɔ sho dɛn wi jw.org wɛbsayt. We dɛn go na wi wɛbsayt, dɛn go lan mɔ tin dɛn bɔt wi ɛn dɛn kin ivin aks fɔ lɛ dɛn stɔdi dɛn di Baybul. I pas 400,000 pipul dɛn we dɔn aks fɔ Baybul stɔdi na jw.org, ɛn bɔku ɔda pipul dɛn de du dat ɛvride! I go fayn fɔ mek yu gɛt sɔm jw.org kad dɛn wit yu ɔltɛm ɛn yuz dɛn fɔ tɔk to pipul dɛn we yu de mit ɛvride.

⁷ Inviteshɔn. Di inviteshɔn we dɛn print fɔ wi mitin dɛn tɔk se: “Wi de invayt yu fɔ stɔdi di Baybul wit Jiova Witnɛs dɛn.” Dɔn i tɔk se yu kin du dis “na wi mitin dɛn” “ɔ wit pɔsin we go stɔdi wit yu.” So di inviteshɔn de tɛl pipul dɛn bɔt udat wi bi ɛn i de invayt ɔl di wan dɛn we “no se dɛn nid fɔ lan bɔt Gɔd” fɔ stɔdi di Baybul wit wi. (Matyu 5:​3, NW) Wi de wɛlkɔm ɔlman na wi mitin dɛn ilɛksɛf dɛn gri fɔ stɔdi di Baybul ɔ dɛn nɔ gri. We dɛn kam na wi mitin dɛn, dɛn go si se bɔku tin de we dɛn go lan frɔm di Baybul.

8. Wetin mek i rili impɔtant fɔ lɛ pipul dɛn atɛnd wan pan wi mitin dɛn? Gi wan ɛgzampul.

⁸ I rili impɔtant fɔ lɛ wi kɔntinyu fɔ de invayt pipul dɛn fɔ atɛnd wi mitin dɛn ilɛk na wan tɛm. Wetin mek? Na bikɔs we dɛn kam, dɛn go si se Jiova Witnɛs dɛn de tich di tru tin dɛn we de na di Baybul ɛn dɛn de ɛp pipul dɛn fɔ no bɔt Gɔd. Lay lay rilijɔn dɛn nɔ de du dat. (Ayzaya 65:​13) Fɔ ɛgzampul, wan man we nem Re ɛn in wɛf we nem Linda we de na Amɛrika bin notis dis trade. Dɛn bin biliv se Gɔd de ɛn dɛn bin want fɔ no mɔ bɔt am. So dɛn bin disayd fɔ go na ɔl di chɔch dɛn we de na dɛn siti ɛn dɛn bin de luk fɔ tu tin dɛn bifo dɛn jɔyn ɛni wan pan dɛn. Fɔs, dɛn fɔ lan sɔntin na di chɔch, ɛn sɛkɔn, di chɔch mɛmba dɛn fɔ drɛs lɛk pipul dɛn we de sav Gɔd. Dɛn bin te pan dis bikɔs dɛn bin gɛt bɔku chɔch dɛn na di siti. Bɔt wetin dɛn si bin rili mek dɛn at pwɛl. Dɛn nɔ bin lan natin, ɛn di chɔch mɛmba dɛn nɔ bin de drɛs lɛk pipul dɛn we de sav Gɔd. Afta we dɛn go na di las chɔch we bin de na dɛn list, Linda bin go wok ɛn Re bin go na os. Bɔt we Re bin de drayv go na os, i bin pas wan Kiŋdɔm Ɔl. I bin tɛl insɛf se, ‘Lɛ a go insay ɛn si wetin de apin de.’ Fɔ tru, dis na bin di bɛst tin we i ɛva si! Ɔlman na di Kiŋdɔm Ɔl bin nays ɛn dɛn bin rili drɛs fayn. Re bin sidɔm bifo ɛn i bin lɛk wetin i lan. Dis de mek wi mɛmba wetin di apɔsul Pɔl bin tɔk bɔt pɔsin we de go na mitin fɔ di fɔstɛm ɛn tɔk se: “Gɔd rili de wit una.” (Fɔs Lɛta fɔ Kɔrint 14:​23-25, NW) Afta dat, Re bin bigin fɔ atɛnd mitin ɛvri Sɔnde. Dɔn i bin stat fɔ atɛnd di mitin dɛn we wi kin gɛt insay di wik. Linda insɛf bin stat fɔ atɛnd di mitin dɛn, ɛn pan ɔl we dɛn  bin dɔn pas 70 ia, dɛn bin stɔdi di Baybul ɛn baptayz.

9, 10. (a) Wetin mek di trakt dɛn izi fɔ yuz? (b) Ɛksplen aw fɔ yuz di trakt we nem Wetin Na Gɔd in Kiŋdɔm?

⁹ Trakt dɛn. Wi gɛt et trakt dɛn na wi tulbɔks. Dɛn izi fɔ yuz, ɛn wi kin ebul fɔ yuz dɛn fɔ stat fɔ tɔk to pipul dɛn. Frɔm we dɛn bin pul di fɔs trakt insay 2013, na lɛk fayv bilyɔn trakt dɛn so dɛn dɔn print. Ɔl dɛn trakt dɛn ya gɛt di sem we aw fɔ yuz dɛn. So we yu lan aw fɔ yuz wan pan dɛn, yu kin ebul fɔ yuz dɛn ɔl. Aw yu go yuz di trakt fɔ stat fɔ tɔk to pɔsin?

¹⁰ Sɔntɛm yu go want fɔ yuz di trakt we se Wetin na Gɔd in Kiŋdɔm? Sho di pɔsin di kwɛstyɔn we de na di frɔnt pej ɛn aks am se: “Yu dɔn ɛva tink bɔt wetin na Gɔd in Kiŋdɔm? Yu go se Gɔd in Kiŋdɔm na. . . ?” Dɔn aks am fɔ pik wan pan di tri ansa dɛn. Bifo yu tɛl di pɔsin if di ansa we i gi rayt ɔ rɔŋ, i go fayn fɔ mek yu jɔs opin di trakt na di say we se “Di Baybul Se” we de insay di trakt ɛn rid Daniɛl 2:​44 ɛn Ayzaya 9:​6. We yu dɔn fɔ tɔk, aks di kwɛstyɔn we de biɛn di trakt ɔnda di say we se “Tin fɔ Tink Bɔt”: “Uskayn tin dɛn wi go ɛnjɔy ɔnda Gɔd in Kiŋdɔm?” Yu go ansa da kwɛstyɔn de di nɛks tɛm we una mit. We una mit bak, yu kin yuz lɛsin 7 we de na di brosho we nem Gɔd Gɛt Gud Nyuz fɔ Wi! we na wan pan di tul dɛn we wi de yuz fɔ stat Baybul stɔdi dɛn.

11. Wetin dɛn mek wi magazin dɛn fɔ? Wetin wi fɔ no bɔt dɛn?

¹¹ Magazin dɛn. Di magazin dɛn we dɛn de translet ɛn print pas ɔl ɔda magazin dɛn na di wɔl, na di Awake! ɛn Wachtawa. Bikɔs pipul dɛn na difrɛn kɔntri dɛn de rid dɛn magazin dɛn ya, dɛn kin mek di tɔpik we de na di kɔva di kayn we we pipul dɛn we de ɔlsay na di wɔl go want fɔ rid am. Wi fɔ yuz dɛn magazin dɛn ya fɔ ɛp pipul dɛn fɔ pe atɛnshɔn pan di tin we impɔtant pas ɔl na layf. Bɔt fɔs, wi nid fɔ no uskayn pɔsin dɛn mek di magazin fɔ.

12. (a) Na fɔ udat dɛn mek di Awake! magazin? Wetin na di men tin we dɛn mek am fɔ? (b) Us fayn ɛkspiriɛns yu bin gɛt we yu de yuz dis tul?

¹² Dɛn mek di Awake! fɔ pipul dɛn we nɔ no natin bɔt di Baybul ɔ fɔ di wan dɛn we no smɔl tin bɔt di Baybul. Dɛn nɔ kin no natin bɔt di tin dɛn we di Baybul de tich, dɛn nɔ kin rili biliv rilijɔn ɔ dɛn nɔ kin no se di Baybul de ɛp dɛn na dɛn layf. Wan men tin we di Awake! magazin de du na fɔ ɛp pipul dɛn fɔ biliv se Gɔd de. (Lɛta Fɔ Rom 1:​20; Di Ibru Pipul Dɛn 11:​6) I de ɛp bak di wan dɛn we de rid am fɔ biliv se di Baybul “na Gɔd in wɔd fɔ tru.” (Fɔs Lɛta Fɔ Tɛsalonayka 2:​13) Di taytul fɔ di tri Awake! magazin dɛn fɔ 2018 na: “The Way of Happiness,” “12 Secrets of Successful Families,” ɛn “Help for Those Who Grieve.”

13. (a) Na fɔ udat dɛn mek Di Wachtawa fɔ di pɔblik? (b) Us fayn ɛkspiriɛns yu bin gɛt we yu de yuz dis tul?

¹³ Di men tin we mek dɛn mek  Di Wachtawa fɔ di pɔblik, na fɔ ɛksplen di tin dɛn we di Baybul de tich to pipul dɛn we nɔto Jiova Witnɛs bɔt we gɛt rɛspɛkt fɔ Gɔd ɛn fɔ di Baybul. I go bi se dɛn no sɔm tin dɛn bɔt di Baybul bɔt dɛn nɔ rili ɔndastand di tin dɛn we di Baybul de tich. (Lɛta Fɔ Rom 10:​2; Fɔs Lɛta To Timoti 2:​3, 4) Di tri Wachtawa magazin dɛn fɔ 2018 go ansa dɛn kwɛstyɔn dɛn ya: “Is the Bible Still Relevant Today?,” “What Does the Future Hold?,” ɛn “Does God Care About You?”

14. (a) Wetin mek dɛn mek di 4 fim dɛn we de na wi Tichin Tulbɔks? (b) Us fayn ɛkspiriɛns yu gɛt we yu de sho dɛn fim dɛn ya?

¹⁴ Fim dɛn. Insay Jizɔs in tɛm, di tul dɛn we kapɛnta dɛn bin de yuz nɔ bin de wok wit kɔrɛnt. Bɔt tide, kapɛnta dɛn de yuz tul dɛn we de yuz kɔrɛnt, lɛk sɔ, dril we dɛn de yuz fɔ mek ol, ɛn sandas we dɛn de yuz fɔ mek di bod smut. We wi de prich naw, apat frɔm wi buk ɛn magazin dɛn we wi de print, wi gɛt fayn fim dɛn fɔ sho pipul dɛn. Wi gɛt 4 pan dɛn insay wi tulbɔks: Wetin Mek I Fayn fɔ Stɔdi di Baybul?, Wetin Kin Apin pan Ɛni Baybul Stɔdi?, Wetin Kin Apin na Kiŋdɔm Ɔl?, ɛn Udat na Jiova Witnɛs Dɛn? Di shɔt fim dɛn nɔ kin rich tu minit ɛn i kin fayn fɔ yuz dɛn di fɔstɛm we wi de prich to pɔsin. Wi kin yuz di lɔng fim dɛn we wi de du ritɔn visit ɛn wit di wan dɛn we gɛt mɔ tɛm. Dɛn fim dɛn ya rili fayn bikɔs dɛn de ɛp pipul dɛn fɔ stɔdi di Baybul ɛn mek dɛn kam wi mitin dɛn.

15. Wetin kin apin we pipul dɛn wach wan pan wi fim dɛn insay dɛn langwej? Gi ɛgzampul dɛn.

¹⁵ Fɔ ɛgzampul, wan sista bin mit wan uman we dɔn muf kɔmɔt na Maykronishia ɛn di men langwej we i de tɔk na Yapiz. Di sista bin sho am di fim we gɛt di taytul, Wetin Mek I Fayn fɔ Stɔdi di Baybul? insay Yapiz langwej. We di fim bin bigin fɔ ple, di uman bin tɔk se: “Dis na mi langwej. A nɔ biliv! Frɔm di we aw dis pɔsin de tɔk a ebul fɔ no se na mi ayland i kɔmɔt. I de tɔk mi langwej!” Afta dat, di uman bin tɔk se i de go rid ɛn wach ɔltin we de na in langwej na jw.org. (Luk Di Apɔsul Dɛn Wok [Akt] 2:​8, 11.) Wan ɔda ɛgzampul na bɔt wan sista we de na Amɛrika we in nɛfyu de na ɔda kɔntri. Dis sista bin sɛn to am di link fɔ di fim we nem Wetin Mek I Fayn fɔ Stɔdi di Baybul? insay in langwej. In nɛfyu bin wach di fim ɛn i bin sɛn imel to am se: “Di pat we a want fɔ no mɔ bɔt na di say we se na wikɛd pɔsin de kɔntrol di wɔl. So a dɔn aks fɔ stɔdi di Baybul.” Dis rili wɔndaful bikɔs dis sista in nɛfyu de na kɔntri usay dɛn nɔ de alaw wi fɔ prich.

16. Ɛksplen di men rizin we mek dɛn mek: (a) Lisin to Gɔd ɛn De Sote Go. (b) Gɔd Gɛt Gud Nyuz fɔ Wi! (c) Udat Dɛn De Du Wetin Jiova Want?

¹⁶ Brosho dɛn. Aw wi go tich di tru to sɔmbɔdi we nɔ de rid fayn ɛn we nɔ gɛt ɛni wan pan wi buk ɛn magazin insay in langwej? Wi kin yuz di brosho we nem, Lisin to Gɔd ɛn De Sote Go. * (Luk di futnot.) Wan fayn tul fɔ yuz fɔ  stat fɔ stɔdi di Baybul na di brosho we nem Gɔd Gɛt Gud Nyuz fɔ Wi! Yu kin sho di pɔsin di 14 tɔpik dɛn we de biɛn di brosho ɛn aks am us wan pan dɛn i go rili lɛk fɔ no mɔ bɔt. Dɔn yu kin yuz da lɛsin de fɔ stat fɔ stɔdi di pɔsin. Yu dɔn tray fɔ du dis we yu de du ritɔn visit? Di tɔd brosho we de na wi tulbɔks na Udat Dɛn De Du Wetin Jiova Want? Dɛn mek am fɔ tich wi Baybul studɛnt dɛn bɔt wi ɔganayzeshɔn. Fɔ lan aw fɔ yuz dis brosho ɛnitɛm we yu de kɔndɔkt Baybul stɔdi, rid di Mach 2017 Wi Kristian Layf ɛn Prichin Wok—Mitin Buk.

17. (a) Wetin na di men rizin we mek dɛn mek ɛniwan pan di buk dɛn we wi de yuz fɔ stɔdi? (b) Wetin ɔl di wan dɛn we de baptayz nid fɔ du? Wetin mek?

¹⁷ Buk dɛn. Afta we yu dɔn stat fɔ stɔdi pɔsin wit brosho, yu kin bigin fɔ stɔdi am wit di buk we nem Wetin Wi Go Lan Frɔm di Baybul? ɛnitɛm. Dis tul kin ɛp pipul dɛn fɔ lan mɔ bɔt di men tin dɛn we di Baybul de tich. If di Baybul studɛnt de du wɛl ɛn i dɔn dɔn fɔ stɔdi di buk, yu kin kɔntinyu fɔ stɔdi di buk we nem How to Remain in God’s Love. Dis tul go tich di studɛnt aw fɔ fala di advays [prinsipul] dɛn we de na di Baybul ɛvride na in layf. Mɛmba se ivin afta we i dɔn baptayz, i stil nid fɔ kɔntinyu fɔ stɔdi te i dɔn di tu buk dɛn. Dis go ɛp am fɔ gɛt strɔng fet pan Jiova ɛn kɔntinyu fɔ de biɛn am.—Rid Lɛta Fɔ Kɔlɔse 2:​6, 7.

18. (a) Wetin Fɔs Lɛta To Timoti 4:​16 ɛnkɔrej wi fɔ du we wi de tich di tru? Wetin go bi di bɛnifit? (b) Wetin na di men rizin we mek wi de yuz wi Tichin Tulbɔks?

¹⁸ As Jiova Witnɛs dɛn, wi gɛt di wok fɔ tich pipul dɛn “di Gud Nyuz we na tru” we go mek dɛn gɛt layf we go de sote go. (Lɛta Fɔ Kɔlɔse 1:​5; rid Fɔs Lɛta To Timoti 4:​16.) Fɔ ɛp wi fɔ du dis, wi gɛt di Tichin Tulbɔks we gɛt di tul dɛn we wi nid. (Luk di bɔks “ Tichin Tulbɔks.”) Lɛ wi yuz dɛn tul dɛn ya fayn fayn wan. Wi ɔl kin disayd us tul we de na di tulbɔks fɔ yuz ɛn ustɛm fɔ yuz am. Bɔt mɛmba se, wi nɔ jɔs de sheb wi buk ɛn magazin dɛn nɔmɔ, ɛn wi nɔ de gi wi buk ɛn magazin dɛn to pipul dɛn we nɔ want fɔ lisin to wi mɛsej. Wi gol na fɔ mek disaypul dɛn we rili want fɔ lisin, we ɔmbul, ɛn we rili want fɔ no bɔt Gɔd. Dat na pipul dɛn “we rili sho se dɛn want fɔ gɛt layf we go de sote go.”—Di Apɔsul Dɛn Wok [Akt] 13:​48, NW; Matyu 28:​19, 20.