Fɔ lɛ di Baybul Studɛnt dɛn go du di prichin wok, dɛn bin nid fɔ gɛt maynd. Dɛn go nid fɔ tɔk bɔt “gud yus” to di wan dɛn we de sɔfa, ɛn fɔ tɛl di wikɛd wan dɛn bɔt “di de we . . . Gɔd go rivɛnj.”

Brɔda Jɔn Ɔskin we bin de na Kanada, bin gɛt maynd fɔ prich insay 1921, pan ɔl we dɛn bin de agens am. Wan tɛm, i bin mit wan Mɛtodist pricha. Brɔda Ɔskin bin stat fɔ tɔk wit di man bay we i tɛl am se: “Wi fɔ tɔk fayn bɔt di Baybul. Ɛn ilɛksɛf wi nɔ gri pan sɔm tin dɛn, wi kin stil dɔn di tɔk pisful wan ɛn kɔntinyu fɔ bi padi.” Bɔt dat nɔ bin apin. Brɔda Ɔskin se: “Wi bin jɔs dɔn bigin tɔk we di man wap di domɔt at at wan, ɛn a bin fil se di glas na di domɔt go brok.”

Nain di man ala se: “Na fɔ go to pipul dɛn we nɔto Kristian fɔ go tɔk to dɛn.” Brɔda Ɔskin nɔ tɔk natin, bɔt we i de go, i tink to insɛf se, ‘A bin fil se na wan pan dɛn a bin de tɔk to so.’

We di man bin de prich na in chɔch di nɛks de, i kɔntinyu fɔ tɔk bad tin dɛn bɔt Brɔda Ɔskin. Brɔda Ɔskin se: “I bin tɛl di pipul dɛn se na mi de lay pas ɔlman we dɔn ɛva kam na da tɔŋ de, ɛn dɛn fɔ kil mi.” Bɔt dis nɔ bin stɔp Brɔda Ɔskin, ɛn i kɔntinyu fɔ prich ɛn tɔk to bɔku pipul dɛn. I bin se: “A bin rili ɛnjɔy fɔ prich de. Sɔm pipul dɛn bin de ivin tɔk se, ‘A no se na Gɔd in wok yu de du,’ ɛn dɛn bin aks mi if dɛn kin gi mi di tin dɛn we a nid.”

Fɔ mek di Baybul Studɛnt dɛn go ɛp pipul dɛn fɔ ɔndastand di Baybul fayn fayn wan, dɛn bin de put Baybul kwɛstyɔn ɛn ansa dɛn na The Golden Age. * Kwɛstyɔn dɛn bin de fɔ yɔŋ wan dɛn, we mama ɛn papa dɛn bin de yuz fɔ tɔk to dɛn pikin dɛn. Mama ɛn papa dɛn bin fɔ “aks dɛn pikin dɛn, dɛn kwɛstyɔn dɛn de ɛn ɛp dɛn fɔ fɛn di ansa na di Baybul.” Sɔm kwɛstyɔn dɛn lɛk, “Ɔmɔs buk dɛn de na di Baybul?,” bin de ɛp dɛn fɔ no sɔm simpul tin dɛn bɔt di Baybul. Ɔda wan dɛn lɛk, “Fɔ se ɔlman  we na tru Kristian fɔ ɛkspɛkt se pipul dɛn go mek dɛn sɔfa?,” bin de ɛp yɔŋ dɛn fɔ gɛt maynd fɔ prich.

Baybul kwɛstyɔn ɛn ansa dɛn bin de bak fɔ di wan dɛn we bin ɔlrɛdi no mɔ tin dɛn bɔt di Baybul. Di ansa dɛn bin de na di fɔs vɔlyum pan di buk we nem Studies in the Scriptures. Bɔku pipul dɛn we bin de rid am, bin lan bɔku tin frɔm dɛn kwɛstyɔn dɛn de. Bɔt The Golden Age fɔ Disɛmba 21, 1921, bin anawns se dɛn nɔ go de mek dɛn kwɛstyɔn dɛn de igen. Wetin mek dɛn chenj so kwik kwik wan?

Di brɔda dɛn we bin de bifo bin kam fɔ ɔndastand se dɛn fɔ ɔganayz di we aw nyu Baybul Studɛnt dɛn de lan bɔt di men tin dɛn na di Baybul. So insay Novɛmba 1921, dɛn bin mek wan buk we nem, The Harp of God. Ivin di wan dɛn we bin want fɔ no bɔt di Baybul bin jɔyn wan stɔdi program we dɛn go ebul du fɔ dɛnsɛf. Dis program bin de ɛp pipul dɛn fɔ lan bɔt “aw Gɔd want fɔ gi mɔtalman layf we go de sote go.” Aw dɛn bin de du am?

We dɛn gi pɔsin di buk, dɛn de gi am wan smɔl kad we de sho am us pej i fɔ rid. Di nɛks wik, dɛn de gi am ɔda kad we gɛt kwɛstyɔn dɛn bɔt wetin i dɔn rid. Di kad de sho am bak usay i fɔ rid fɔ di ɔda wik.

Fɔ 12 wiks, di lokal klas ɔ kɔngrigeshɔn we de nia di studɛnt de sɛn nyu kad fɔ am ɛni wik. Bɔku tɛm, na di pɔblisha dɛn we dɔn ol ɔ we nɔ ebul prich frɔm os to os bin de sɛn di kad dɛn. Fɔ ɛgzampul, Ana K. Gadna, we bin de na Amɛrika bin se: “We The Harp of God buk bin kɔmɔt, dat bin mek mi sista, Tel, we nɔ ebul waka, bin gɛt mɔ wok fɔ du. Ɛvri wik, i bin de sɛn di kad dɛn we gɛt kwɛstyɔn dɛn.” We di pɔsin dɔn di kɔz, wan pɔblisha na di kɔngrigeshɔn kin go fɛn am fɔ ɛp am fɔ lan mɔ bɔt di Baybul.

We di ia dɔn, Brɔda J. F. Rutafɔd bin sɛn lɛta to ɔl di kɔngrigeshɔn dɛn. I bin se “di gud nyuz bɔt di Kiŋdɔm we dɛn bin prich bɔt da ia de bin dɔn rich ɛn ɛp bɔku pipul dɛn pas di ɔda ia dɛn.” Dɔn i tɔk bak se: “Wi stil gɛt bɔku wok fɔ du. Una ɛnkɔrej ɔda pipul dɛn fɔ du dis wɔndaful wok.” I klia se di Baybul Studɛnt dɛn bin fala dis advays. Insay 1922, dɛn bin gɛt maynd fɔ prich bɔt di Kiŋdɔm pas aw dɛn bin dɔn ɛva du am.