1. Wetin mek bɔku pipul dɛn kɔnfyuz?

BƆKU rilijɔn dɛn de tide we se dɛn na Kristian ɛn dɛn de wɔship Gɔd di rayt we. No wɔnda we bɔku pipul dɛn kɔnfyuz. Dɛn kin aks se, “Fɔ se na wangren tru rilijɔn de, ɔ na ɔl di rilijɔn dɛn de du wetin Gɔd want?” Wi biliv tranga wan se wi as Jiova Witnɛs dɛn de tich di tru tin, ɛn di we aw wi de wɔship Jiova na di wangren we aw i want? I rili pɔsibul fɔ biliv dat? Lɛ wi tɔk bɔt sɔm tin dɛn we go ɛp wi fɔ biliv dat.

2. Akɔdin to 1 Tɛsalonians 1:​5, wetin mek apɔsul Pɔl bin biliv tranga wan se i de na di trut?

² Apɔsul Pɔl bin biliv tranga wan se i de na di trut. (Rid 1 Tɛsalonians 1:​5.) I nɔ bin jɔs biliv se i de na di trut bikɔs dat bin de mek i gladi. Bifo dat, i bin de stɔdi Gɔd in Wɔd gud gud wan. I bin biliv se “na Gɔd dayrɛkt di wan dɛn we rayt ɔl di Skripchɔ dɛn.” (2 Tim. 3:​16) Wetin i bin lan frɔm di tin dɛn we i stɔdi? I bin si tin dɛn na di Skripchɔ dɛn we pruv se Jizɔs na di Mɛsaya we Gɔd bin dɔn se go kam, pan ɔl we di bigman dɛn pan di Ju rilijɔn nɔ bin biliv dat. Dɛn bigman dɛn de bin ipokrit bikɔs dɛn bin de se dɛn de tich pipul dɛn di tru bɔt Gɔd, bɔt dɛn bin de du tin dɛn we Gɔd et. (Taytɔs 1:​16) Pɔl nɔ bin tan lɛk dɛn bikɔs i nɔ bin de pik-ɛn-chuz us pat pan Gɔd in Wɔd i go biliv. I bin rɛdi fɔ tich ɛn du ɔl wetin Gɔd se.—Akt 20:​27.

3. Fɔ se wi nid fɔ no di ansa to ɔl wi kwɛstyɔn dɛn bifo wi biliv tranga wan se wi de na di trut? (Rid bak di bɔks we nem, “ Di Tin dɛn we Jiova De Du ɛn Tink bɔt ‘Tu Bɔku fɔ Kɔnt.’”)

 ³ Sɔm pipul dɛn fil se di tru rilijɔn fɔ ebul ansa ɔl di kwɛstyɔn dɛn, ivin kwɛstyɔn dɛn we di Baybul nɔ ansa. Fɔ se dat pɔsibul? Tink bɔt Pɔl in ɛgzampul. I bin ɛnkɔrej in kɔmpin Kristian dɛn fɔ “mek shɔ ɔf ɔltin,” bɔt i bin tɔk bak se bɔku tin dɛn de we dɛn nɔ bin ɔndastand. (1 Tɛs. 5:​21) I bin rayt se: “Nɔto ɔltin wi no.” Dɔn bak, i se: “Wi de luk insay mɛtal glas ɛn wi nɔ de si klia wan.” (1 Kɔr. 13:​9, 12) Jɔs lɛk aw Pɔl nɔ bin ɔndastand ɔltin, na so wisɛf nɔ ɔndastand ɔltin. Bɔt Pɔl bin ɔndastand di men tin dɛn bɔt Jiova we na tru. I bin no ɔl wetin i nid fɔ no fɔ mek i biliv se i de na di trut.

4. Wetin wi go du fɔ mek wi biliv tranga wan se wi de na di trut, ɛn wetin wi de kam tɔk bɔt tru Kristian dɛn?

⁴ Wan tin we go ɛp wi fɔ biliv tranga wan se wi de na di trut, na we wi kɔmpia di we aw Jizɔs bin de wɔship Gɔd wit wetin Jiova Witnɛs dɛn de du tide. Insay dis atikul, wi go si se tru Kristian dɛn (1) nɔ de wɔship aydɔl, (2) rɛspɛkt Jiova in nem, (3) lɛk di trut, ɛn (4) rili lɛk dɛn kɔmpin dɛn.

5. Wetin wi lan frɔm Jizɔs bɔt di rayt we fɔ wɔship Gɔd, ɛn aw wi go du wetin i bin tich?

⁵ Bikɔs Jizɔs bin rili lɛk Gɔd, na Jiova in wangren i bin de wɔship we i bin de na ɛvin ɛn dis wɔl. (Lyuk 4:​8) I bin tich in disaypul dɛn fɔ du di sem tin. Jizɔs ɛn in fetful disaypul dɛn nɔ bin ɛva yuz imej we dɛn de wɔship Jiova. Bikɔs Gɔd na Spirit, mɔtalman nɔ go ɛva ebul mek sɔntin we go fiba Am. (Ayz. 46:​5) Bɔt  wetin wi go se bɔt fɔ mek imej we dɛn kin kɔl sent, ɛn fɔ pre to dɛn? Insay di Tɛn Kɔmandmɛnt we Jiova bin gi, di sɛkɔn wan se: “Una nɔ fɔ mek nɔn aydɔl, ɔ ɛnitin we fiba sɔntin ɔp na ɛvin, ɔ dɔŋ na di wɔl . . . Una nɔ fɔ butu to [dɛn].” (Ɛks. 20:​4, 5) Di pipul dɛn we want fɔ du wetin Gɔd want ɔndastand dɛn wɔd dɛn de klia wan.

6. Us ɛgzampul fɔ wɔship Gɔd we Jiova Witnɛs dɛn de fala tide?

⁶ Pipul dɛn we stɔdi bɔt istri se na Gɔd nɔmɔ di fɔstɛm Kristian dɛn bin de wɔship. Fɔ ɛgzampul, wan buk we nem History of the Christian Church tɔk se di fɔstɛm Kristian dɛn “go dɔn et” di aydia fɔ yuz imej na di say dɛn we dɛn de wɔship Gɔd. Tide, Jiova Witnɛs dɛn de fala di ɛgzampul we di fɔstɛm Kristian dɛn dɔn sɛt. Wi nɔ de pre to “sent dɛn” imej ɔ enjɛl dɛn; wi nɔ de ivin pre to Jizɔs. Ɛn wi nɔ de salut di flag ɔ du ɛnitin we go mek wi wɔship wi kɔntri. Ilɛk wetin dɛn go tray fɔ mek wi du, wi dɔn mekɔp wi maynd fɔ obe Jizɔs in wɔd dɛn we se: “Na Jiova yu Gɔd yu fɔ wɔship.”—Mat. 4:​10.

7. Us big difrɛns dɛn de bitwin Jiova Witnɛs dɛn ɛn ɔda rilijɔn dɛn?

⁷ Tide, bɔku pipul dɛn lɛk fɔ lisin to chɔch lida dɛn we pipul dɛn sabi. Dɛn kin so kɔle dɛn man dɛn ya dat i kin lɛf smɔl fɔ mek dɛn wɔship dɛn. Bɔku pipul dɛn kin go na dɛn chɔch dɛn, bay dɛn buk dɛn, ɛn gi bɔku mɔni to dɛn ɔ di ɔganayzeshɔn dɛn we dɛn de sɔpɔt. Sɔm pipul dɛn kin biliv ɔl wetin dɛn man dɛn ya kin tɔk. Di we aw dɛn kin gladi fɔ si dɛn man dɛn ya tan lɛk di we aw dɛn go gladi fɔ si Jizɔs. Bɔt di wan dɛn we de wɔship Gɔd di rayt we nɔ de fala mɔtalman. Pan ɔl we wi rɛspɛkt di wan dɛn we de bifo wi, wi de fala di klia tichin we Jizɔs bin gi, we i se: “Una ɔl na brɔda dɛn.” (Mat. 23:​8-10) Wi nɔ de wɔship mɔtalman, ilɛk in na bigman pan rilijɔn ɔ pɔlitiks. Ɛn wi nɔ de sɔpɔt dɛn rilijɔn ɔ pɔlitiks tin dɛn we dɛn kin du. Bifo dat, wi de kɔntinyu fɔ sɛpret wisɛf frɔm di wɔl. So we i kam to ɔl dɛn tin dɛn ya, wi rili difrɛn frɔm ɔda rilijɔn dɛn we se dɛn na Kristian.—Jɔn 18:​36.

8. Aw wi no se Jiova want fɔ mek in nem gɛt glori ɛn fɔ mek ɔlman no am?

⁸ Wan tɛm, Jizɔs bin pre se: “Papa, mek lɛ yu nem gɛt glori.” Jiova insɛf sɛf bin ansa da prea de wit lawd vɔys frɔm ɛvin, ɛn i prɔmis se i go mek in nem gɛt glori. (Jɔn 12:​28) We Jizɔs bin de du in prichin wok na dis wɔl, i bin mek in Papa in nem gɛt glori. (Jɔn 17:​26) So tru Kristian dɛn de si am as big big ɔnɔ fɔ yuz Gɔd in nem ɛn fɔ mek ɔda pipul dɛn no am.

9. Aw di fɔstɛm Kristian dɛn bin sho se dɛn rɛspɛkt Gɔd in nem?

⁹ Shɔt tɛm afta di fɔstɛm Kristian kɔngrigeshɔn bin stat, Jiova bin “tɔn in atɛnshɔn to di neshɔn dɛn . . . fɔ tek pipul dɛn we go gɛt in nem.” (Akt 15:​14) Dɛn Kristian dɛn de bin si am as big big ɔnɔ fɔ yuz Gɔd in nem ɛn fɔ mek ɔda pipul dɛn no am. Di apɔsul ɛn disaypul dɛn bin de yuz Gɔd in nem we dɛn bin de prich, ɛn we dɛn bin de rayt Baybul buk dɛn. * Dɛn bin sho se na dɛn nɔmɔ na di pipul dɛn we bin gɛt Gɔd in nem.—Akt 2:​14, 21.

10. Aw wi no se na Jiova Witnɛs dɛn nɔmɔ gɛt Jiova in nem?

 ¹⁰ Fɔ se na Jiova Witnɛs dɛn nɔmɔ gɛt Gɔd in nem? Lɛ wi tɔk bɔt di tin dɛn we mek wi no dat. Tide, bɔku bigman dɛn pan Gɔd biznɛs dɔn du ɔl wetin dɛn ebul fɔ mek pipul dɛn nɔ no se Gɔd gɛt nem. Dɛn dɔn pul am kɔmɔt na dɛn Baybul transleshɔn dɛn, ɛn sɔm dɔn ban pipul dɛn fɔ yuz da nem de na dɛn chɔch dɛn. * Ɛnibɔdi go dinay se na Jiova Witnɛs dɛn nɔmɔ de gi Jiova in nem di rɛspɛkt ɛn ɔnɔ we i fit fɔ gɛt? Wi de ɛp pipul dɛn fɔ no Gɔd in nem pas ɛni ɔda rilijɔn. Wi de du wi bɛst fɔ bi di pipul dɛn we wi se wi bi, dat na Jiova in Witnɛs dɛn. (Ayz. 43:​10-12) Wi dɔn print pas 240 milyɔn kɔpi ɔf di New World Translation of the Holy Scriptures, we yuz Jiova in nem na di say dɛn we dɛn dɔn pul am na ɔda Baybul transleshɔn dɛn. Ɛn wi de mek wi pɔblikeshɔn dɛn we de yuz Jiova in nem insay pas 1,000 langwej dɛn.

11. Aw di fɔstɛm Kristian dɛn bin sho se dɛn lɛk di trut?

¹¹ Jizɔs bin lɛk di trut, dat na, di tru bɔt Gɔd ɛn ɔl di tin dɛn we Gɔd want. Di we aw Jizɔs bin de liv in layf bin sho se i biliv di trut, ɛn i bin mek ɔda pipul dɛn no da trut de. (Jɔn 18:​37) Jizɔs in tru tru  disaypul dɛn bak bin rili lɛk di trut. (Jɔn 4:​23, 24) Infakt, apɔsul Pita bin kɔl di Kristian rilijɔn, “di trut.” (2 Pit. 2:​2) Bikɔs di fɔstɛm Kristian dɛn bin rili lɛk di trut, dɛn nɔ bin de fala ɛnitin we ɔda rilijɔn dɛn bin de tich, tradishɔn dɛn, ɛn tin dɛn we pipul dɛn bin de tɔk we nɔ de in layn wit di trut. (Kol. 2:​8) Semweso, tru Kristian dɛn tide de tray tranga wan fɔ “kɔntinyu fɔ de na di trut” bay we dɛn de mek shɔ se dɛn fala Jiova in Wɔd we i kam to ɔl di tin dɛn we dɛn biliv ɛn di we aw dɛn de liv dɛn layf.—3 Jɔn 3, 4.

12. Wetin kin apin we di Gɔvnin Bɔdi kam fɔ no se wi nid fɔ chenj di we aw wi ɔndastand sɔntin, ɛn wetin mek dɛn kin du dat?

¹² Gɔd in pipul dɛn tide nɔ de se dɛn no ɔltin bɔt di trut ɔ dɛn sabi am pafɛkt wan. Tɛm dɛn bin de we dɛn dɔn mek mistek pan di we aw dɛn ɛksplen tin dɛn we di Baybul de tich, ɔ di we aw dɛn ɔganayz di kɔngrigeshɔn. Dat nɔ fɔ sɔprayz wi. Di Baybul tɔk klia wan se as tɛm de go, na so Gɔd in pipul dɛn go de ɔndastand di trut. (Kol. 1:​9, 10) Na smɔl smɔl Jiova de mek wi ɔndastand di trut, ɛn wi fɔ rɛdi fɔ peshɛnt wet te wi ɔndastand am fayn fayn wan. (Prɔv. 4:​18) We di Gɔvnin Bɔdi kam fɔ no se wi nid fɔ chenj di we aw wi ɔndastand ɔ de du sɔntin, dɛn kin mek da chenj de wantɛm wantɛm. Bɔku chɔch dɛn tide kin chenj dɛn tichin dɛn bikɔs dɛn want fɔ mek dɛn mɛmba dɛn gladi ɔ fɔ mek dɛn go nia pipul dɛn na di wɔl mɔ ɛn mɔ. Bɔt Jiova Witnɛs dɛn de mek chenj dɛn bikɔs wi want fɔ kam nia Gɔd mɔ ɛn mɔ ɛn fɔ falamakata di we aw Jizɔs bin wɔship Am. (Jems 4:​4) Wi nɔ de mek chenj bikɔs di we aw pipul dɛn na di wɔl de tink dɔn chenj, bɔt na bikɔs wi dɔn ɔndastand di Baybul fayn fayn wan. Wi lɛk di trut!—1 Tɛs. 2:​3, 4.

13. Wetin na di kwaliti we impɔtant pas ɔl we tru Kristian dɛn de sho, ɛn aw Jiova Witnɛs dɛn de sho am tide?

¹³ Pipul dɛn bin sabi di fɔstɛm Kristian dɛn fɔ di bɔku fayn kwaliti dɛn we dɛn bin gɛt. Bɔt di wan mɔ we dɛn bin sabi dɛn fɔ, na lɔv. Jizɔs bin se: “If una lɛk una kɔmpin dɛn, ɔlman go no se una na mi disaypul dɛn.” (Jɔn 13:​34, 35) Tide, Jiova Witnɛs dɛn ɔlsay na di wɔl de ɛnjɔy tru tru lɔv ɛn wanwɔd. Wi difrɛn frɔm ɔl di ɔda rilijɔn dɛn bikɔs wi tan lɛk wan famili, pan ɔl we wi de na difrɛn kɔntri dɛn, ɛn wi gɛt difrɛn kɔlchɔ dɛn. Wi kin si dis lɔv na wi mitin dɛn, wi asɛmbli dɛn, ɛn kɔnvɛnshɔn dɛn. Dis de ɛp wi fɔ biliv mɔ ɛn mɔ se wi de wɔship Jiova di we aw i want.

14. Akɔdin to Koloshians 3:​12-14, wetin na wan impɔtant we aw wi go sho se wi rili lɛk wi kɔmpin dɛn?

¹⁴ Di Baybul ɛnkɔrej wi fɔ “rili lɛk [wi] kɔmpin dɛn.” (1 Pit. 4:​8) Wan we aw wi de sho dis lɔv na we wi de fɔgiv dɛn ɛn bia dɛn we dɛn mek mistek. Dɔn bak, wi kin luk fɔ we dɛn fɔ sho fri-an ɛn du gud to ɔlman na di kɔngrigeshɔn, ivin di wan dɛn we go dɔn mek wi vɛks. (Rid Koloshians 3:​12-14.) We wi sho dis kayn lɔv, wi de pruv se wi na tru Kristian dɛn.

15. Us ɔda we dɛn wi de falamakata di we aw di fɔstɛm Kristian dɛn bin de wɔship Gɔd?

¹⁵ Ɔda we dɛn de we wi de fala di we aw di fɔstɛm Kristian dɛn bin de wɔship Gɔd. Fɔ ɛgzampul, wi ɔganayz di sem we  aw dɛn Kristian dɛn de bin ɔganayz. Wi gɛt travlin ovasia dɛn, ɛlda dɛn, ɛn ministerial savant dɛn jɔs lɛk aw dɛnsɛf bin gɛt. (Fil. 1:​1; Taytɔs 1:​5) Ɛn jɔs lɛk dɛn, wi rɛspɛkt Jiova in lɔ dɛn bɔt mami ɛn dadi biznɛs ɛn mared. Wi rɛspɛkt bak wetin Gɔd se bɔt aw fɔ yuz blɔd, ɛn wi de protɛkt di kɔngrigeshɔn frɔm di wan dɛn we nɔ gri fɔ ripɛnt we dɛn du bad.—Akt 15:​28, 29; 1 Kɔr. 5:​11-13; 6:​9, 10; Ibru. 13:​4.

16. Wetin wi lan frɔm Ɛfishians 4:​4-6?

¹⁶ Jizɔs bin se bɔku pipul dɛn go se dɛn na in disaypul dɛn, bɔt nɔto dɛn ɔl go bi in tru tru disaypul. (Mat. 7:​21-23) Di Baybul bin dɔn tɛl wi bak se insay di las dez, bɔku pipul dɛn go jɔs “de mek lɛk se dɛn de sav Gɔd.” (2 Tim. 3:​1, 5) Bɔt di Baybul tɛl wi klia wan se na “wan tichin wi ɔl biliv,” ɛn we Gɔd gri wit.—Rid Ɛfishians 4:​4-6.

17. Udat dɛn de tide we de fala Jizɔs ɛn di wan tru tichin we wi ɔl biliv?

¹⁷ Udat dɛn gɛt dis wan tichin we wi ɔl biliv tide? Wi dɔn tɔk bɔt di pruf dɛn. Wi dɔn si ɛgzampul dɛn bɔt di we aw Jizɔs se wi fɔ wɔship Gɔd ɛn di we aw di fɔstɛm Kristian dɛn bin de wɔship Am. Na wangren ansa de to dis kwɛstyɔn, dat na, Jiova Witnɛs dɛn. Na big big ɔnɔ wi gɛt fɔ bi wan pan Jiova in pipul dɛn ɛn fɔ no di trut bɔt Jiova ɛn ɔl wetin i want. So wi want fɔ du ɔl wetin wi ebul fɔ biliv tranga wan se wi de na di trut.