1. Gi ɛgzampul bɔt sɔm lɔ dɛn na di Baybul. Aw dɛn go bɛnifit wi if wi obe dɛn?

INSAY di Baybul, Jiova dɔn gi wi lɔ dɛn we tɛl wi klia wan wetin i want wi fɔ du. Fɔ ɛgzampul, i tɛl wi se wi nɔ fɔ wɔship aydɔl, wi nɔ fɔ tif, wi nɔ fɔ drink te wi chak, ɔ du ɛnitin we gɛt fɔ du wit mami ɛn dadi biznɛs di we aw Gɔd nɔ want. (Fɔs Lɛta Fɔ Kɔrint 6:​9, 10) Ɛn Jiova in Pikin, we na Jizɔs, bin gi lɔ to di wan dɛn we de fala am. I bin se: “Una go ɔlɔbɔt na di wɔl ɛn mek di pipul dɛn bi mi lanin bɔy dɛn; una baptayz dɛn wit di pawa we Papa Gɔd ɛn in Pikin ɛn in Spirit gi una. Una lan dɛn fɔ du ɔl wetin a dɔn tɛl una. A de wit una ɛn a go de wit una ɔltɛm sote di wɔl dɔn.” (Matyu 28:​19, 20) Ɔltin we Jiova ɛn Jizɔs de tɛl wi fɔ du na fɔ wi yon bɛtɛ wan. Jiova in lɔ dɛn de tich wi aw fɔ kia fɔ wisɛf ɛn wi famili ɛn dɛn de ɛp wi fɔ gɛt wɛlbɔdi ɛn gladi at. Di tin we impɔtant mɔ, na dat we wi obe Jiova in lɔ dɛn, lɛk di lɔ we se wi fɔ prich, i go gladi fɔ wi ɛn blɛs wi.

2, 3. (a) Wetin mek di Baybul nɔ gi wi lɔ dɛn fɔ ɔltin we pɔsin fɔ du na layf? (b) Us kwɛstyɔn dɛn wi go ansa na dis atikul? (Luk di pikchɔ nia dis atikul in taytul.)

² Bɔt di Baybul nɔ tɛl wi ɔl wetin fɔ du we sɔntin apin na wi  layf. Fɔ ɛgzampul, di Baybul nɔ tɛl wi di kayn klos we wi fɔ wɛr. Dis sho se Jiova gɛt sɛns. Pan ɔl we pipul dɛn na di wɔl de wɛr difrɛn klos dɛn ɛn stayl dɛn de chenj as tɛm de go, di Baybul nɔ de ɛva kɔmɔt na stayl. Apat frɔm dat, di Baybul nɔ tɛl wi bɔku tin bɔt uskayn wok ɔ ɛnjɔymɛnt wi fɔ pik ɔ wetin wi fɔ rili du fɔ gɛt wɛlbɔdi. Jiova alaw wi ɛn di wan dɛn we de bifo na di famili fɔ disayd wetin dɛn go du bɔt dɛn tin ya.

³ So we wi want fɔ disayd fɔ du sɔntin we impɔtant ɛn we go afɛkt wi layf, bɔt wi nɔ si ɛni lɔ bɔt dat na di Baybul, wi kin bigin wɔnda ɛn aks se: ‘Jiova bisin bɔt wetin a want disayd fɔ du? I go gladi if a disayd fɔ du ɛnitin wans a nɔ brok lɔ na di Baybul? Aw a go no se i gladi fɔ wetin a disayd fɔ du?’

4, 5. Aw di tin dɛn we wi kin disayd fɔ du kin afɛkt wi ɛn ɔda pipul dɛn?

⁴ Sɔm pipul dɛn fil se dɛn kin du ɛnitin we dɛn want fɔ du. Bɔt wi want fɔ du wetin go mek Jiova gladi. So bifo wi disayd fɔ du sɔntin, wi nid fɔ tink bɔt wetin di Baybul se ɛn du am. Fɔ ɛgzampul, di Baybul tɛl wi aw Gɔd de fil bɔt di we aw wi yuz blɔd, so wi de fala wetin di Baybul se. (Jɛnɛsis 9:​4; Di Apɔsul Dɛn Wok [Akt] 15:​28, 29) Wi kin pre to Jiova lɛ i ɛp wi fɔ disayd fɔ du sɔntin we go mek i gladi.

⁵ Di tin dɛn we wi kin disayd fɔ du kin afɛkt wi. We wi disayd fɔ du di rayt tin, i kin briŋ wi kam nia Jiova mɔ ɛn mɔ. We wi disayd fɔ du sɔntin we nɔ rayt, i kin pwɛl wi padi biznɛs wit am. Di tin dɛn we wi kin disayd fɔ du kin afɛkt ɔda pipul dɛn bak. Wi nɔ want fɔ du ɛnitin we go mek wi brɔda dɛn vɛks ɔ we go mek dɛn nɔ gɛt bɛtɛ fet igen. Wi nɔ want bak fɔ mek prɔblɛm de bitwin di brɔda dɛn na di kɔngrigeshɔn. So i rili impɔtant fɔ lɛ wi disayd fɔ du di rayt tin.—Rid Lɛta Fɔ Rom 14:​19; Lɛta Fɔ Galeshya 6:​7.

6. We wi want disayd fɔ du sɔntin, wetin go ɛp wi?

⁶ Aw wi go disayd fɔ du di rayt tin we di Baybul nɔ tɛl wi us patikyula tin fɔ du? Bifo wi jɔs du wetin wi want, wi fɔ tek tɛm tink bɔt wetin de apin na wi layf ɛn disayd fɔ du sɔntin we go mek Jiova gladi. If wi du dis, Jiova go mɔs ɛp wi ɛn bɛtɛ go fala wi.—Rid Sam 37:​5.

7. We no lɔ nɔ de na di Baybul, aw wi go ebul fɔ no wetin Jiova want lɛ wi du?

⁷ Aw wi go ebul fɔ no wetin go mek Jiova gladi? Lɛta Fɔ Ɛfisɔs 5:​17 tɛl wi se: “Una tray fɔ no wetin [“Jiova,” NW] di Masta want una fɔ du.” We no patikyula lɔ nɔ de na di Baybul, wi nid fɔ no, ɔ ɔndastand, wetin Jiova want lɛ wi du. Aw wi go ebul fɔ du dat? Wi fɔ pre to am ɛn alaw in oli spirit fɔ sho wi wetin fɔ du.

8. Aw Jizɔs bin no wetin Jiova want lɛ i du? Gi wan ɛgzampul.

⁸ Jizɔs bin no wetin Jiova want lɛ i du ɔltɛm. Fɔ ɛgzampul, Jizɔs bin pre ɛn pafɔm mirekul tu tɛm we bɔku bɔku pipul dɛn bin angri so dat i go gi dɛn tin fɔ it. (Matyu 14:​17-20; 15:​34-37) Bɔt we in bin angri na wan say usay pɔsin nɔ go ebul fɔ liv ɛn Setan tɛl am fɔ tɔn ston to bred, Jizɔs nɔ bin du am. (Rid Matyu 4:​2-4.) Jizɔs sabi in Papa gud gud wan, so i bin no se Jiova nɔ want lɛ i yuz di oli spirit fɔ satisfay insɛf. I bin biliv se in Papa go gayd am ɛn gi am wetin fɔ it we i nid am.

9, 10. Wetin go ɛp wi fɔ disayd fɔ du di rayt tin? Gi ɛgzampul.

 ⁹ Jɔs lɛk Jizɔs, wi go ebul disayd fɔ du di rayt tin if wi abop pan Jiova fɔ ɛp wi. Di Baybul se: “Trɔs PAPA GƆD wit ɔl yu at. Nɔ abop pan yu yon sɛns. Mek i put an pan ɔl wetin yu de du, ɛn yu go si yu we klia. Nɔ fil to se yu sabi ɔltin; jɛs fred PAPA GƆD nɔmɔ ɛn nɔ du bad.” (Prɔvabs 3:​5-7) We wi stɔdi di Baybul ɛn lan bɔt aw Jiova de tink, wi go ɔndastand wetin i want lɛ wi du pan ɛnitin. Ɛn di mɔ we wi lan bɔt aw Jiova de tink, na di mɔ i go izi fɔ lɛ wi disayd fɔ du sɔntin we go mek i gladi. If wi du dat, na di mɔ Gɔd in advays dɛn go de na wi at.—Jɛrimaya 31:​33.

¹⁰ Imajin se wan mareduman go bay bay, ɛn i si wan fayn shuz. Bɔt di shuz rili dia. Pan ɔl we in man nɔ de wit am, i no wetin in man go tink if i spɛn da kayn bɔku mɔni de. Aw i no? I dɔn te smɔl we in ɛn in man dɔn mared, so i no aw in man want lɛ dɛn yuz di mɔni we dɛn gɛt. Semweso, we wi lan aw Jiova de tink ɛn wetin i dɔn du trade, wi go no wetin i want lɛ wi du we difrɛn tin dɛn mit wi na layf.

11. Us kwɛstyɔn dɛn wi go aks wisɛf we wi de rid ɔ stɔdi di Baybul? (Luk di bɔks we se “We Yu De Stɔdi di Baybul, Aks Yusɛf Dɛn Kwɛstyɔn dɛn Ya.”)

¹¹ Aw wi go no aw Jiova de tink? Di bɛst we we wi go no na we wi de rid ɛn stɔdi di Baybul ɔltɛm. We wi de du dis, i go fayn fɔ mek wi aks wisɛf dɛn kwɛstyɔn dɛn ya:  ‘Wetin dis tɛl mi bɔt Jiova? Wetin mek i du tin dis we?’ Ɛn jɔs lɛk Devid, wi fɔ aks Jiova bak lɛ i ɛp wi fɔ no am gud wan. Devid bin rayt se: “PAPA GƆD, sho mi usay fɔ waka ɛn aw fɔ waka na layf; mek a du wetin nɔmɔ yu want mi fɔ du, bikɔs yu na mi PAPA GƆD ɛn mi Seviɔ ɛn na yu nɔmɔ a biliv pan.” (Sam 25:​4, 5) We wi lan sɔntin bɔt Jiova, wi fɔ tink bɔt usay-ɛn-usay wi go du wetin wi dɔn lan. Yu tink se wi go yuz wetin wi dɔn lan na wi famili, wi wokples, na skul, ɔ di prichin wok? We wi tink bɔt usay wi go yuz wetin wi dɔn lan, i go izi fɔ no aw Jiova want lɛ wi yuz wetin wi dɔn lan.

12. Aw wi buk, magazin dɛn, ɛn di mitin dɛn de ɛp wi fɔ no aw Jiova de tink bɔt difrɛn tin dɛn?

¹² Wan ɔda we we wi go no aw Jiova de tink na we wi pe atɛnshɔn to wetin in ɔganayzeshɔn de tich wi na di Baybul. Fɔ ɛgzampul, we wi want fɔ disayd fɔ du sɔntin, di Watch Tower Publications Index ɛn di Buk we De Sho Usay Jiova Witnɛs dɛn Go Fɛn Wetin Dɛn Want No Bɔt go ɛp wi fɔ no wetin Jiova tink. Wi go bɛnifit bak if wi de tek tɛm lisin, gi kɔmɛnt, ɛn tink gud wan bɔt wetin wi lan na di mitin dɛn. Dis go ɛp wi fɔ tink di we aw Jiova de tink ɛn disayd fɔ du tin we go mek i gladi ɛn we i go blɛs.

13. Gi wan ɛgzampul we de sho aw wi kin disayd fɔ du di rayt tin we wi tink bɔt aw Jiova de tink.

¹³ Lɛ wi si wan ɛgzampul bɔt aw wi go disayd fɔ du di rayt tin we wi tink di we aw Jiova de tink. Sɔntɛm yu go lɛk fɔ payɔnia. Yu dɔn ajɔst bɔku tin dɛn na yu layf so dat yu go spɛn mɔ tɛm na di ministri. Bɔt yu stil nɔ shɔ se yu go rili gladi if yu gɛt smɔl mɔni ɛn smɔl tin dɛn. Na tru se di Baybul nɔ tɛl wi se pas wi bi payɔnia bifo wi ebul sav Jiova. Wi go stil kɔntinyu fɔ sav am fetful wan we wi bi pɔblisha. Bɔt Jizɔs bin se Jiova go blɛs di wan dɛn we de mek sakrifays fɔ di Kiŋdɔm. (Rid Lyuk 18:​29, 30.) Di Baybul tɔk bak se Jiova gladi we wi de du ɔl wetin wi ebul fɔ du fɔ sav am, ɛn i want fɔ lɛ wi gladi we wi de sav am. (Sam 119:​108; Sɛkɛn Lɛta Fɔ Kɔrint 9:​7) We wi de pre ɛn tink gud wan bɔt dɛn tin ya, wi go ebul fɔ disayd fɔ du di rayt tin na wi layf ɛn Jiova go blɛs wetin wi disayd fɔ du.

14. Aw yu go no if Jiova lɛk di kayn we we yu de drɛs?

¹⁴ Luk wan ɔda ɛgzampul: Lɛ wi se yu gɛt wan patikyula we we yu rili lɛk fɔ drɛs, bɔt yu no se sɔm pipul dɛn na di kɔngrigeshɔn go vɛks if yu de drɛs da kayn we de. Bɔt di Baybul nɔ tɔk natin bɔt da patikyula we de we yu lɛk fɔ drɛs. So aw yu go no aw Jiova de tink? Di Baybul tɛl wi se: “A nɔ want mek di uman dɛn de kɔl atɛnshɔn bay di we we dɛn drɛs, dɛn fɔ tek tɛm pik di klos we dɛn de wɛr, ɛn dɛn fɔ drɛs gud, dɛn nɔ fɔ de wɛr dɛn dia klos; dɛn nɔ fɔ de plant dɛn ia fayn tumɔs; dɛn nɔ fɔ wɛr gold ɔ pal. Bɔt dɛn fɔ de du dɛn gud wok we uman we kɔl insɛf Gɔd uman fɔ du.” (Fɔs Lɛta To Timoti 2:​9, 10) Ɔl Jiova in savant dɛn, ivin di man dɛn, kin lan frɔm wetin di Baybul se na ya. We wi tek tɛm wit di we aw wi de drɛs, wi de sho se wi de tink bɔt aw ɔda pipul dɛn de tink bɔt di klos dɛn we wi de wɛr. Ɛn bikɔs wi lɛk wi brɔda ɛn sista dɛn, wi fɔ avɔyd fɔ du ɛnitin we go mek dɛn nɔ gladi ɔ vɛks. (Fɔs Lɛta Fɔ Kɔrint 10:​23, 24; Lɛta Fɔ Filipay 3:​17) If wi mɛmba wetin di Baybul se ɛn aw Jiova de tink, wi go disayd fɔ du tin dɛn we go mek Jiova gladi.

15, 16. (a) Aw Jiova de fil if wi kɔntinyu fɔ tink bɔt mami ɛn dadi biznɛs di we we i nɔ want? (b) We wi de pik di kayn ɛnjɔymɛnt we wi want, aw wi go no wetin Jiova lɛk? (c) We wi want disayd fɔ du impɔtant tin dɛn, aw wi go du am?

 ¹⁵ Frɔm wetin de na di Baybul, wi dɔn lan se Jiova kin rili vɛks ɔ fil bad we pipul dɛn du bad tin dɛn ɛn we dɛn de tink bɔt bad tin dɛn. (Rid Jɛnɛsis 6:​5, 6.) So dis dɔn sho klia wan se Jiova nɔ want mek wi de tink bɔt mami ɛn dadi biznɛs di we we i nɔ want. Pantap dat, if wi de tink bɔt dɛn tin dɛn ya, dat go mek wi du dɛn. Bɔt Jiova want lɛ wi tink bɔt tin dɛn we klin ɛn gud. Na dat mek di disaypul Jems bin rayt bɔt di sɛns we Jiova gɛt, we i se “di sɛns we Gɔd de gi, na pɔsin wit klin at i de gi, na di fɔs tin dat. Pɔsin we gɛt da kayn sɛns de nɔ de mek plaba, i nɔ de ambɔg, i de du tin saful saful, ɛn i lɛk fɔ ɛp pipul; i gɛt sɔri at ɛn i de du plɛnti plɛnti gud; ɔl in at de fɔ Gɔd, i nɔ ipokrit.” (Jems 3:​17) So di Baybul de tich wi se wi fɔ avɔyd ɛni ɛnjɔymɛnt we go mek wi bigin fɔ tink ɔ fil fɔ du dɛn dɔti ɛn bad bad tin dɛn. Ɛn we wi ɔndastand wetin Jiova lɛk ɛn wetin i et, i go mek am izi fɔ mek wi no uskayn buk, fim, ɔ gem dɛn we wi fɔ pik. Wi nɔ nid fɔ aks ɔda pipul dɛn wetin wi fɔ du.

¹⁶ We wi gɛt fɔ disayd fɔ du sɔntin, wi gɛt plɛnti tin dɛn we wi go disayd fɔ du we go mek Jiova gladi. Bɔt we wi want fɔ disayd fɔ du sɔntin we rili impɔtant, i go fayn fɔ lɛ wi aks wan ɛlda ɔ ɔda machɔ brɔda ɔ sista fɔ gi wi advays. (Taytɔs 2:​3-5; Jems 5:​13-15) Bɔt wi nɔ fɔ aks di pɔsin fɔ disayd fɔ wi. Bifo dat, wi fɔ tink gud wan bɔt wetin wi bin dɔn lan na di Baybul ɛn disayd fɔ wisɛf. (Di Ibru Pipul Dɛn 5:​14) Di apɔsul Pɔl bin se: “Ɔlman gɛt fɔ ansa to Gɔd fɔ wetin i du.”—Lɛta Fɔ Galeshya 6:​5.

17. Us bɛnifit wi go gɛt we wi disayd fɔ du tin dɛn we de mek Jiova gladi?

¹⁷ We wi disayd fɔ du wetin go mek Jiova gladi, wi go kam nia am mɔ ɛn mɔ ɛn i go gladi fɔ wi ɛn blɛs wi. (Jems 4:​8) Dɔn wi go gɛt mɔ fet pan Jiova. So lɛ wi tink gud wan bɔt di tin dɛn we wi de rid insay di Baybul so dat wi go ɔndastand aw i de tink. Na tru se wi go de lan nyu tin dɛn ɔltɛm bɔt Jiova. (Job 26:​14) Bɔt if wi tray tranga wan fɔ lan bɔt am naw, wi go gɛt sɛns ɛn wi go ebul fɔ disayd fɔ du di rayt tin. (Prɔvabs 2:​1-5) Di we we mɔtalman de tink ɛn di tin dɛn we dɛn kin plan fɔ du kin chenj, bɔt Jiova in nɔ de ɛva chenj. Wan pan di man dɛn we rayt di Sam buk bin se wetin Jiova “se go bi, go mɔs bi.” Ɛn “wetin i mekɔp fɔ in pipul fɔ du, go de sote go.” (Sam 33:​11) So wi dɔn si klia wan se wi go ebul fɔ disayd fɔ du di rayt tin we wi lan fɔ tink di we aw Jiova de tink ɛn du wetin go mek i gladi.