1, 2. Us af-af cham-mɔt dɛn de insay Jɛnɛsis? Wetin mek wi fɔ tray fɔ no mɔ bɔt dɛn?

YU DƆN ɛva tink bɔt ɛni af-af cham-mɔt we bin dɔn apin we dɛn rayt insay di Baybul? Insay di fɔs tu-tri chapta dɛn na Jɛnɛsis, wi lan se Ken bin kil Ebɛl (Jɛnɛsis 4:​3-8); Lamɛk bin kil wan yɔŋ man fɔ we i nak am (Jɛnɛsis 4:​23); Ebraam in shɛpad dɛn wit Lɔt in yon shɛpad dɛn bin agyu (Jɛnɛsis 13:​5-7); Ega bin de fil se i bɛtɛ pas Sera, ɛn Sera bin vɛks pan Ebraam (Jɛnɛsis 16:​3-6); Ishmɛl nɔ bin de gri wit ɔlman, ɛn ɔlman nɔ bin de gri wit am.—Jɛnɛsis 16:​12.

² Wetin mek dɛn rayt bɔt dɛn af-af cham-mɔt dɛn ya insay di Baybul? Na bikɔs wi gɛt lɛsin fɔ lan frɔm dɛn. Di pipul dɛn nɔ bin pafɛkt ɛn dɛn bin gɛt di sem prɔblɛm dɛn we de mit wi tide. Wisɛf nɔ pafɛkt, so ɛnitɛm we wi gɛt prɔblɛm dɛn na wi layf we tan lɛk dɛn yon, wi nɔ fɔ falamakata di bad ɛgzampul dɛn we de insay di Baybul, bɔt wi fɔ falamakata di gud ɛgzampul dɛn. (Lɛta Fɔ Rom 15:​4) Dis go ɛp wi fɔ no aw fɔ mek pis wit ɔda pipul dɛn.

3. Wetin wi go lan insay dis atikul?

³ Insay dis atikul, wi go no wetin mek i fayn fɔ sɛtul af-af  cham-mɔt ɔ smɔl smɔl plaba dɛn, ɛn wi go si aw wi go du dat. Wi go lan bak bɔt sɔm advays dɛn na di Baybul we go ɛp wi fɔ sɔlv wi prɔblɛm dɛn ɛn kɔntinyu fɔ gɛt tayt padi biznɛs wit Jiova ɛn ɔda pipul dɛn.

4. Aw pipul dɛn de biev ɔlsay na di wɔl? Wetin dɔn apin we dɛn de biev so?

⁴ Na Setan mek pipul dɛn nɔ gɛt wanwɔd ɛn na in de mek dɛn de gɛt af-af cham-mɔt. Wetin mek wi se so? Na bikɔs insay di gadin we bin de na Idɛn, Setan bin se ɔlman ebul fɔ disayd wetin gud ɛn wetin bad; wi nɔ nid Gɔd fɔ sho wi aw fɔ waka na layf, wi fɔ disayd fɔ wisɛf. (Jɛnɛsis 3:​1-5) Bɔt we wi luk na di wɔl tide, wi de si se dis abit we pipul dɛn gɛt de briŋ prɔblɛm. Bɔku pipul dɛn fil se dɛn gɛt rayt fɔ disayd fɔ dɛnsɛf wetin gud ɛn wetin bad. Dɛn prawd, dɛn jɔs bisin bɔt dɛnsɛf nɔmɔ, dɛn de pan kɔmpitishɔn, ɛn dɛn nɔ want fɔ no if wetin dɛn dɔn disayd fɔ du de ambɔg ɔda pipul dɛn. Dɛn abit dɛn de, de briŋ prɔblɛm. Di Baybul de mek wi no se if wi kwik fɔ vɛks, wi go gɛt bɔku cham-mɔt wit pipul dɛn ɛn wi go du bɔku bad bad tin dɛn.—Prɔvabs 29:​22.

5. Wetin Jizɔs bin tich pipul dɛn se dɛn fɔ du we dɛn gɛt af-af cham-mɔt?

⁵ We Jizɔs bin de tɔk to sɔm pipul dɛn ɔp wan mawnten, i bin tich dɛn se dɛn fɔ mek pis ɛn dɛn nɔ fɔ mek plaba, ivin if i tan lɛk se dɛn nɔ go bɛnifit we dɛn du dis. Fɔ ɛgzampul, i bin tɛl dɛn se dɛn fɔ de du gud, dɛn fɔ de mek pis wit pipul dɛn, dɛn nɔ fɔ de vɛks, dɛn fɔ sɛtul af-af cham-mɔt kwik kwik wan, ɛn dɛn fɔ lɛk di wan dɛn we et dɛn.—Matyu 5:​5, 9, 22, 25, 44, NW.

6, 7. (a) Wetin mek i impɔtant fɔ sɛtul prɔblɛm dɛn kwik kwik wan? (b) Us kwɛstyɔn dɛn Jiova in pipul dɛn ɔl fɔ aks dɛnsɛf?

⁶ Tide, wi de wɔship Jiova bay we wi de pre to am, prich bɔt am, ɛn go di mitin dɛn. If wi nɔ mek pis wit wi brɔda dɛn, Jiova nɔ go tek di wɔship we wi de wɔship am. (Mak 11:​25) Fɔ lɛ wi bi Jiova in padi, wi fɔ fɔgiv ɔda pipul dɛn we dɛn mek mistek.—Rid Lyuk 11:​4; Lɛta Fɔ Ɛfisɔs 4:​32.

⁷ Jiova want mek ɔl in pipul dɛn de fɔgiv ɛn gɛt pis wit ɔda pipul dɛn. Wi kin aks wisɛf dɛn kwɛstyɔn dɛn ya: ‘We mi brɔda dɛn du mi bad, a de fɔgiv dɛn kwik kwik wan? A kin gladi fɔ de wit dɛn?’ If yu kam fɔ no se yu nid fɔ de fɔgiv yu brɔda dɛn, pre to Jiova ɛn aks am fɔ ɛp yu fɔ tray fɔ du so. We yu put yusɛf dɔŋ ɛn pre to wi Papa we de na ɛvin, i go yɛri ɛn ansa yu.—Jɔn In Fɔs Lɛta 5:​14, 15.

8, 9. Wetin wi fɔ du if sɔmbɔdi du wi sɔntin we mɔna wi?

⁸ Wi ɔl nɔ pafɛkt, so pipul dɛn go mɔs se ɔ du sɔntin we go mɔna wi. (Ɛkliziastis 7:​20; Matyu 18:​7) Wetin yu go du we dɛn kayn tin ya apin? Lɛ wi si wan impɔtant lɛsin we wi kin lan frɔm dis tin we bin dɔn apin: Wan tɛm, wan sista bin grit tu brɔda dɛn. Bɔt wan pan di brɔda dɛn bin vɛks fɔ di we aw di sista bin grit am. We di tu brɔda dɛn nɔmɔ de, di wan we vɛks bin stat fɔ grɔmbul bɔt di sista. Bɔt di ɔda brɔda bin mɛmba am se di sista dɔn de sav Jiova fɔ 40 ia pan ɔl we i gɛt bɔku bɔku prɔblɛm dɛn. Dis brɔda bin shɔ se di sista nɔ bin min fɔ mek dis ɔda brɔda vɛks. Wetin di brɔda we bin vɛks, du? I bin tɔk se, “Na tru yu tɔk.” So i disayd fɔ fɔgɛt bɔt wetin apin.

⁹ Wetin dis tich wi? We pɔsin du wi sɔntin we mɔna wi, wi kin disayd wetin fɔ  du. Pɔsin we lɛk in kɔmpin, kin rɛdi fɔ fɔgiv. (Rid Prɔvabs 10:​12; Pita In Fɔs Lɛta 4:​8.) We yu “nɔ tek natin mek natin,” ɛn nɔ vɛks we pɔsin du yu sɔntin, dis kin fayn na Jiova in yay. (Prɔvabs 19:​11; Ɛkliziastis 7:​9) So di nɛks tɛm we sɔmbɔdi tɔk ɔ du sɔntin we mɔna yu, aks yusɛf dɛn kwɛstyɔn dɛn ya: ‘A go ebul fɔgɛt bɔt wetin apin? A rili nid fɔ de tink bɔt dis?’

10. (a) We sɔm brɔda ɛn sista dɛn tɔk bad tin bɔt wan sista, aw i bin fil fɔs? (b) Us advays na di Baybul bin ɛp am?

¹⁰ We pipul dɛn se bad tin bɔt wi, i nɔ kin izi fɔ lɛ wi fɔgɛt bɔt wetin dɛn se. Lɛ wi tɔk bɔt wetin bin apin to wan payɔnia sista we wi go kɔl Lusi. Sɔm pipul dɛn na di kɔngrigeshɔn bin stat fɔ tɔk bad tin bɔt aw i de prich ɛn yuz in tɛm. In at bin pwɛl bad ɛn i bin aks sɔm machɔ brɔda dɛn fɔ advays am. Wetin bin apin we i du dis? I se dɛn yuz di Baybul fɔ ɛp am fɔ lɛ i nɔ de tink tumɔs bɔt di bad tin we ɔda pipul dɛn de tɔk, bɔt bifo dat, i fɔ bigin tink mɔ bɔt Jiova. I bin rili fil fayn we i rid Matyu 6:​1-4. (Rid.) Dɛn vas dɛn ya bin mɛmba am se di tin we impɔtant pas ɔl na fɔ mek Jiova gladi. So i disayd fɔ fɔgɛt bɔt di bad tin dɛn we pipul dɛn bin de tɔk bɔt am. Naw, ilɛk ɔda pipul dɛn tɔk bad tin bɔt di we aw i de prich, in at nɔ de pwɛl, i gladi bikɔs i no se i de du in bɛst fɔ du wetin Jiova want.

11, 12. (a) Wetin pɔsin we na Kristian fɔ du if i mɛmba se in brɔda “vɛks” pan am? (b) Wetin wi go lan frɔm di we aw Ebraam bin sɛtul wan plaba we dɛn bin gɛt? (Luk di pikchɔ nia dis atikul in taytul.)

¹¹ “Wi ɔl de du tin we nɔ rayt.” (Jems 3:​2) Lɛ wi se yu kam no se yu dɔn tɔk ɔ du bad tin to wan brɔda. Wetin yu fɔ du? Jizɔs bin se “if yu de mek yu sakrifays na Gɔd in Os, ɛn yu mɛmba se yu brɔda vɛks pan yu, yu fɔ lɛf yu sakrifays na Gɔd in Os ɛn go to yu brɔda wantɛm, mek una go tɔk di plaba fayn fayn. Wɛn yu dɔn du dat, kam bak na Gɔd in Os ɛn mek yu sakrifays.” (Matyu 5:​23, 24) So go tɔk wit yu brɔda. We yu de du dat, di tin we yu fɔ tray fɔ du na fɔ mek pis wit am. Yu fɔ gri se yu dɔn du bad ɛn nɔ tray fɔ blem yu brɔda. Di tin we impɔtant pas ɔl na fɔ mek pis wit wi brɔda dɛn.

¹² Di Baybul sho wi aw Gɔd in savant dɛn bin de mek pis we dɛn gɛt af-af cham-mɔt dɛn. Fɔ ɛgzampul, Ebraam ɛn in brɔda in pikin, Lɔt, bin gɛt bɔku bɔku animal dɛn, ɛn dɛn shɛpad dɛn bin bigin fɔ agyu bikɔs di land bin smɔl fɔ dɛn ɔl. Bikɔs Ebraam bin want pis, i bin alaw Lɔt fɔ pik di bɛst land. (Jɛnɛsis 13:​1, 2, 5-9) Dis na fayn ɛgzampul fɔ wi! Bɔt yu tink se Ebraam bin sɔfa ɔ lɔsis sote go bikɔs i bin du gud? Nɔ-o! Afta we dis bin apin, wantɛm wantɛm Jiova bin prɔmis fɔ blɛs Ebraam wit bɔku tin dɛn, we go pas wetin i bin dɔn lɔs. (Jɛnɛsis 13:​14-17) Wetin wi lan? Ivin if wi sakrifays sɔntin, Jiova go blɛs wi if wi sho lɔv we wi de sɛtul af-af cham-mɔt dɛn. ^[1]—Rid di ɛndnot ɔnda di las paregraf.

13. Wetin wan brɔda bin du we wan ɔda brɔda nɔ bin tɔk to am fayn? Wetin wi lan frɔm dis brɔda?

¹³ Lɛ wi tɔk bɔt wan ɛgzampul we apin insay wi yon tɛm. Di nyu brɔda we de oba wan kɔnvɛnshɔn dipatmɛnt bin kɔl wan brɔda ɛn aks am if i go ebul wok na di dipatmɛnt. Di brɔda we i kɔl bin tɔk bɔku bɔku tin dɛn we nɔ fayn ɛn bang di fon pan am bikɔs i bin stil vɛks pan di brɔda we bin de oba di dipatmɛnt trade. Di nyu brɔda we de oba di dipatmɛnt nɔ bin vɛks, bɔt i nɔ bin ebul fɔgɛt bɔt wetin bin dɔn apin. So afta wan awa, i kɔl di brɔda bak ɛn aks if dɛn ɔl tu go mit. Di ɔda wik, di tu brɔda dɛn mit na Kiŋdɔm Ɔl, ɛn afta we dɛn pre to Jiova, dɛn bin tɔk fɔ lɛk wan awa so.  Di brɔda bin ɛksplen wetin bin dɔn apin bitwin in ɛn di ɔda brɔda we bin de oba di dipatmɛnt. Di nyu brɔda we de oba di dipatmɛnt bin tek tɛm lisin fayn ɛn dɛn bin tɔk bɔt skripchɔ dɛn we bin ɛp dɛn. Dis bin mek di brɔda dɛn mek pis ɛn dɛn bin wok togɛda na di kɔnvɛnshɔn. Di brɔda gladi we di nyu brɔda we de oba di dipatmɛnt bin tɔk to am fayn.

14, 15. (a) Ustɛm wi fɔ fala di advays we de na Matyu 18:​15-17? (b) Wetin na di tri tin dɛn we Jizɔs bin tɔk bɔt? Wetin mek wi fɔ tray fɔ fala dɛn tin ya?

¹⁴ Bɔku pan di prɔblɛm dɛn we de apin bitwin tu Kristian dɛn, na prɔblɛm dɛn we dɛn kin ebul fɔ sɛtul saful wan ɛn sɔlv am to dɛnsɛf. Bɔt sɔntɛnde, dis nɔ kin pɔsibul. Sɔm prɔblɛm dɛn de we wi kin nid ɔda pipul dɛn fɔ ɛp wi fɔ sɔlv am, jɔs lɛk aw Matyu 18:​15-17 se. (Rid.) Di “bad” we Jizɔs bin de tɔk bɔt na dis skripchɔ nɔto dɛn smɔl smɔl cham-mɔt dɛn we kin de bitwin Kristian dɛn. Aw wi no dis? Jizɔs bin se if di pɔsin we dɔn du bad nɔ gri fɔ chenj afta we in brɔda dɔn tɔk to am, afta we witnɛs dɛn bak kam tɔk to am, ɛn machɔ brɔda dɛn bak tɔk to am, dɛn fɔ trit am “lɛkɛ pɔsin we nɔ biliv pan Gɔd ɛn pɔsin we nɔ gri fɔ lɛf di bad we i de du.” Tide, dis min se dɛn fɔ disfɛloship di pɔsin. Di “bad” kin bi tin dɛn lɛk we di pɔsin du kruk tin ɔ we di pɔsin de tɔk bad tin we nɔ tru bɔt ɔda pɔsin fɔ pwɛl in nem, bɔt i nɔ min sin dɛn lɛk we mared pɔsin go du mami ɛn dadi biznɛs wit ɔda pɔsin, ɔ we man de ledɔm wit in kɔmpin man, ɔ we uman de ledɔm wit in kɔmpin uman, ɔ we pipul dɛn we dɔn tɔn dɛn bak pan Jiova de tich lay lay tin dɛn, ɔ we pipul dɛn de yuz aydɔl fɔ wɔship. We dɛn kayn bad tin ya apin, di ɛlda dɛn nid fɔ no.

¹⁵ Di tin we bin mek Jizɔs gi wi dis  advays na fɔ sho wi aw fɔ ɛp wi brɔda bikɔs wi lɛk am. (Matyu 18:​12-14) Aw wi go fala dis advays? (1) Wi fɔ tray fɔ mek pis wit wi brɔda fɔs, ɛn nɔ mek ɛnibɔdi no bɔt di prɔblɛm we de bitwin wi ɛn wi brɔda. I kin fayn fɔ lɛ yu tɔk to am bɔku bɔku tɛm. Bɔt wetin wi go du if pis nɔ de stil? (2) Wi fɔ tɔk to wi brɔda wit sɔmbɔdi we no wetin apin ɔ pɔsin we go si if ɛnitin bad dɔn apin. If di cham-mɔt dɔn sɛtul, “da tɛm de una tu dɔn bi brɔda bak.” Bɔt if di plaba nɔ sɛtul, na fɔ du di ɔda tin we Jizɔs bin se. (3) Tɛl di ɛlda dɛn bɔt wetin apin. Di tɛm nɔmɔ we yu go du dis na we yu dɔn tɔk to yu brɔda bɔku bɔku tɛm ɛn yu nɔ ebul mek pis wit am.

16. Wetin sho se wi go bɛnifit ɛn sho lɔv to wi brɔda dɛn we wi fala di advays we Jizɔs bin gi?

¹⁶ Bɔku tɛm, wi nɔ nid fɔ du ɔl di tri tin dɛn we de na Matyu 18:​15-17. Dis de mek wi fil fayn. Wetin mek wi se so? Na bikɔs bɔku tɛm, di pɔsin we du di bad kin kam fɔ no se i dɔn mek mistek ɛn i kin tray fɔ sɛtul di prɔblɛm, so nid nɔ go de fɔ lɛ dɛn disfɛloship am. Di pɔsin we dɛn du bad fɔ fɔgiv in brɔda so dat pis go de. So di advays we Jizɔs gi dɔn sho wi klia wan se wi nɔ nid fɔ go to di ɛlda dɛn wantɛm wantɛm. Di tɛm nɔmɔ we wi fɔ tɛl di ɛlda dɛn na afta we wi dɔn du di fɔs tu tin dɛn we Jizɔs se ɛn if wi gɛt pruf se di pɔsin dɔn du bad tin.

17. Us blɛsin dɛn wi go gɛt if wi “du ɔl wetin [wi] ebul fɔ mek ɔlman gɛt kolat”?

¹⁷ Bikɔs wi nɔ pafɛkt, wi go kɔntinyu fɔ du ɔ se sɔntin we go mɔna pipul dɛn. Di disaypul Jems bin rayt se: “Ɛnibɔdi we nɔba tɔk tin we nɔ rayt na pɔsin we nɔba du tin we nɔ rayt. I ebul kɔntrol ɔl pat pan in bɔdi.” (Jems 3:​2) Fɔ sɛtul wi smɔl smɔl cham-mɔt dɛn, wi fɔ tray tranga wan fɔ “du ɔl wetin [wi] ebul fɔ mek ɔlman gɛt kolat.” (Sam 34:​14) We wi kɔntinyu fɔ mek pis wit ɔlman, wi go gɛt tayt padi biznɛs wit wi brɔda ɛn sista dɛn, ɛn dis go mek wi kɔntinyu fɔ gɛt wanwɔd. (Sam 133:​1-3) Di tin we impɔtant pas ɔl na dat wi go gɛt tayt padi biznɛs wit Jiova, “we de gi kol at.” (Lɛta Fɔ Rom 15:​33) Wi go ɛnjɔy ɔl dɛn blɛsin ya if wi sho lɔv we wi de tray fɔ sɛtul dɛn af-af cham-mɔt dɛn.