1, 2. Us prɔblɛm dɛn we Jiova in savant dɛn gɛt?

GƆD in fetful savant dɛn ɔl dɔn sɔfa bad, frɔm Ebɛl we bin de du wetin rayt te to in savant dɛn tide we nɔ de kɔmɔt biɛn am. Di apɔsul Pɔl bin tɛl di Ibru Kristian dɛn se, “pan ɔl we una bin de sɔfa bad, una bin bia ɛn tinap tranga,” fɔ gɛt Jiova in blɛsin. (Di Ibru Pipul Dɛn 10:​32-34) Pɔl bin kɔmpia di sɔfa we di Kristian dɛn bin de sɔfa to di kɔmpitishɔn dɛn we di Grik pipul dɛn bin de gɛt lɛk bɔksin, fɔ rɔn, ɛn fɔ fɛt. (Di Ibru Pipul Dɛn 12:​1, 4) Tide, wi de rɔn na di res we go mek wi gɛt layf we go de sote go, ɛn wi gɛt ɛnimi dɛn we want fɔ pul wi maynd kɔmɔt pan di res ɛn mek wi nɔ gɛt gladi at naw ɛn di blɛsin dɛn we wi fɔ gɛt tumara bambay.

² Di “fɛt” we wi de fɛt we tranga pas ɔl na agens Setan ɛn in wɔl. (Lɛta Fɔ Ɛfisɔs 6:​12) I rili impɔtant fɔ mek wi nɔ du di tin dɛn we di wɔl de tich, di lay lay sɛns we de na dis wɔl,  ɛn di bad bad tin dɛn we pipul dɛn de du, lɛk fɔ du mami ɛn dadi biznɛs di we aw Gɔd nɔ want, fɔ smok, ɛn drink rɔm te yu chak ɔ fɔ tek drɔgs. Wi fɔ tray tranga wan bak lɛ wi at nɔ pwɛl ɔ du tin we nɔ rayt.—Sɛkɛn Lɛta Fɔ Kɔrint 10:​3-6; Lɛta Fɔ Kɔlɔse 3:​5-9.

3. Aw Gɔd de tren wi fɔ fɛt wi ɛnimi dɛn?

³ Yu tink se i rili pɔsibul fɔ win di fɛt agens ɛnimi dɛn we gɛt pawa pas wi? Yɛs, bɔt i nɔ go izi! Pɔl bin kɔmpia insɛf to pɔsin we de fɛt bɔksin. I se i nɔ jɔs de sɛn sɛn in an dɛn fɔ natin. (Fɔs Lɛta Fɔ Kɔrint 9:​26) Jɔs lɛk aw pɔsin we de du bɔksin de fɛt in kɔmpin, na so wisɛf nid fɔ fɛt wi ɛnimi dɛn. Jiova de ɛp wi ɛn i de tren wi fɔ du dat. I de du dis bay we i de yuz di Baybul. I de ɛp wi bak wit di buk ɛn magazin dɛn we wi kin gɛt, Kristian mitin dɛn, asɛmbli ɛn kɔnvɛnshɔn dɛn. Yu de yuz ɔl dɛn advays ya we yu de gɛt? If yu nɔ de du so, yu nɔ go ebul fɔ rili fɛt yu ɛnimi, yu go jɔs tan lɛk we pɔsin we de du bɔksin de sɛn sɛn in an dɛn fɔ natin.

4. Wetin wi go du fɔ mek wi nɔ alaw bad tin dɛn fɔ pwɛl wi at?

⁴ Wi nid fɔ rɛdi ɔltɛm. Wetin mek? Bikɔs wi ɛnimi dɛn go atak wi di tɛm we wi nɔ tink se dɛn go atak wi ɔ di tɛm we wi wik. Di Baybul wɔn wi ɛn ɛnkɔrej wi we i se: “Una nɔ mek ɛni bad tin mek una at pwɛl, bɔt una fɔ du gud to ɛni bɔdi we du una bad, da we de ɛni bɔdi we du una bad ɔ mɛmba bad fɔ una, nɔ go ebul una.” (Lɛta Fɔ Rom 12:​21) If wi kɔntinyu fɔ fɛt agens bad tin dɛn, wi go win! Bɔt if wi nɔ tek tɛm, Setan, in wɔl, ɛn wi mistek dɛn go gɛt pawa pas wi. So nɔ ɛva giv ɔp. Nɔ mek yu at pwɛl ɛn tink se yu nɔ gɛt op igen!—Pita In Fɔs Lɛta 5:​9.

5. (a) Wetin wi nid fɔ mɛmba so dat Gɔd go gladi fɔ wi ɛn blɛs wi? (b) Us ɛgzampul dɛn na di Baybul wi go tɔk bɔt?

⁵ Fɔ mek wi go win, wi nid fɔ mɛmba wetin mek wi de sɔfa. Na bikɔs wi want fɔ mek Gɔd gladi fɔ wi ɛn gɛt in blɛsin. Di Ibru Pipul Dɛn 11:​6 se: “Pɔsin lɛkɛ dat nɔ go kam klos Gɔd pas i biliv se Gɔd de ɛn i de du gud to dɛn pipul we de pre to am ɔltɛm.” Fɔ tray tranga wan fɔ no Jiova min se wi fɔ wok tranga wan if wi want fɔ gɛt Jiova in blɛsin. (Di Apɔsul Dɛn Wok [Akt] 15:​17) Insay di Baybul, bɔku fayn ɛgzampul dɛn de bɔt man ɛn uman dɛn we bin du tin lɛk dat. Jekɔb, Rechɛl, Josɛf, ɛn Pɔl dɛn ɔl bin gɛt prɔblɛm dɛn we nɔ bin rili izi, dɛn prɔblɛm ya bin de pwɛl dɛn at ɛn mek dɛn sik. Bɔt dɛn bin ebul fɔ go bifo. Dɛn ɛgzampul dɛn sho se if wi wok tranga wan, wisɛf go gɛt Jiova in blɛsin. Lɛ wi si aw dis bin apin.

6. Wetin bin ɛp Jekɔb nɔ fɔ taya? Wetin Jiova bin du fɔ am? (Luk di pikchɔ nia dis atikul in taytul.)

⁶ Jekɔb we na man we bin fetful, bin tray tranga wan ɛn bia bikɔs i bin lɛk Jiova ɛn i bin valyu in padi biznɛs wit am. I bin rili gɛt fet pan di blɛsin we Jiova bin prɔmis se i go gi in pikin dɛn. (Jɛnɛsis 28:​3, 4) We Jekɔb bin dɔn de ol 100 ia, i bin ivin grip wan enjɛl ɛn tɛl am se i nɔ go lɛf am fɔ go pas te i blɛs am. (Rid Jɛnɛsis 32:​24-28.) Yu tink se Jekɔb bin rili strɔng fɔ fɛt dis pawaful enjɛl? Nɔ-o, nɔto so i bi! Bɔt i bin rili rɛdi, ɛn i bin pruv se i go wok tranga wan fɔ gɛt di blɛsin! Jiova bin blɛs Jekɔb  bikɔs i nɔ bin taya ɛn dat bin mek Gɔd bin chenj in nem to Izrɛl, we min se in na pɔsin we de “chalenj ɔ pɔsin we nɔ de taya, wit Gɔd.” Jekɔb bin gɛt di tin we wisɛf de fɛn, dat na fɔ mek Jiova gladi fɔ wi ɛn gi wi in blɛsin.

7. (a) Wetin bin mek Rechɛl in at pwɛl? (b) Wetin Rechɛl bin du? Aw Gɔd bin blɛs am?

⁷ Jekɔb in wɛf we i bin rili lɛk, we nem Rechɛl, bin rɛdi fɔ si aw Jiova go du wetin i bin dɔn prɔmis to in man. Bɔt prɔblɛm bin de. Rechɛl nɔ bin ebul fɔ bɔn pikin dɛn. Insay di tɛm we dɛn bin de rayt di Baybul, dis na tin we bin de rili pwɛl uman dɛn at. Aw Rechɛl bin kɔntinyu fɔ du ɔl wetin i ebul pan ɔl we in at bin pwɛl? I nɔ bin ɛva giv ɔp. Bifo dat, i bin kɔntinyu fɔ du ɔl wetin i ebul bay we i bin de pre to Jiova mɔ ɛn mɔ. Jiova bin yɛri Rechɛl in prea, ɛn Rechɛl bin si am se na blɛsin we i bin kam gɛt pikin. Na dat mek Rechɛl bin se: “Mi ɛn mi sista dɔn fɛt traŋa traŋa wan, ɛn a dɔn win am!”—Jɛnɛsis 30:​8, 20-24.

8. Us prɔblɛm dɛn Josɛf bin gɛt? Aw Josɛf bin sɛt fayn ɛgzampul fɔ wi?

⁸ Jekɔb ɛn Rechɛl dɛn fayn ɛgzampul go mɔs dɔn ɛp dɛn pikin Josɛf di tɛm we i bin gɛt prɔblɛm. Josɛf in layf bin chenj we i bin ol 17 ia. In brɔda dɛn we bin de jɛlɔs am bin sɛl am as slev. Leta, Josɛf bin spɛn bɔku bɔku tɛm na prizin pan ɔl  we i nɔ bin du bad. (Jɛnɛsis 37:​23-28; 39:​7-9, 20, 21) Bɔt Josɛf in at nɔ bin pwɛl ɔ i nɔ bin fil bad, ɛn i nɔ bin de fɛn we fɔ tɔn dɛt. Wetin mek? Bikɔs Josɛf bin valyu in padi biznɛs wit Jiova ɛn i bin pe atɛnshɔn to dat wit ɔl in at. (Lɛvitikɔs 19:​18; Lɛta Fɔ Rom 12:​17-21) Josɛf in ɛgzampul kin ɛp wi. Ilɛksɛf bad tin dɛn bin de apin to wi we wi bin smɔl ɔ i tan lɛk wi layf rayt naw nɔ gɛt wan op, wi nid fɔ kɔntinyu fɔ du ɔl wetin wi ebul du ɛn nɔ taya. Wi shɔ se Jiova go blɛs wi if wi du dat.—Rid Jɛnɛsis 39:​21-23.

9. Aw wi go falamakata Jekɔb, Rechɛl, ɛn Josɛf?

⁹ Tide, wisɛf gɛt fɔ bia prɔblɛm dɛn we nɔ rili izi. Sɔntɛm yu de sɔfa bikɔs pipul dɛn nɔ de trit dɛn kɔmpin fayn, pipul dɛn de tink se dɛn bɛtɛ pas ɔda pipul dɛn, dɛn de provok yu ɔ sɔmbɔdi de jɛlɔs yu. Bifo yu at pwɛl, mɛmba wetin bin ɛp Jekɔb, Rechɛl, ɛn Josɛf fɔ kɔntinyu fɔ sav Jiova wit gladi at. Gɔd bin ɛp ɛn blɛs dɛn bikɔs dɛn bin rili valyu di tayt padi biznɛs we dɛn bin gɛt wit am. Dɛn bin kɔntinyu fɔ du ɔl wetin dɛn ebul fɔ sav Gɔd, ɛn dɛn bin de du wetin dɛn de pre fɔ. Bikɔs wi de insay di las dez, i rili impɔtant fɔ lɛ wi kɔntinyu fɔ gɛt fet mɔ ɛn mɔ fɔ tumara bambay! Yu rɛdi fɔ wok tranga wan fɔ Jiova in blɛsin?

10, 11. (a) Wetin mek wi fɔ wok tranga wan fɔ gɛt Gɔd in blɛsin? (b) Wetin go ɛp wi fɔ disayd fɔ du di rayt tin?

¹⁰ Wetin mek wi fɔ wok tranga wan fɔ gɛt Gɔd in blɛsin? Bikɔs wi nɔ pafɛkt, i nɔ kin izi fɔ lɛ wi avɔyd wetin wi want fɔ du we bad. I nɔ kin izi fɔ sɔm pipul dɛn fɔ ɛnjɔy di prichin wok, ɛn sɔm dɛn gɛt wɛlbɔdi prɔblɛm ɔ dɛn kin fil se na dɛn wangren de. Fɔ sɔm pipul dɛn, i nɔ stil izi fɔ lɛ dɛn fɔgiv pɔsin we dɔn du dɛn bad. I nɔ mata ɔmɔs ia we yu dɔn de sav Jiova, wi ɔl nid fɔ tray tranga wan fɔ avɔyd ɛnitin we go mek i nɔ izi fɔ lɛ wi sav Jiova, we de blɛs ɔl di wan dɛn we fetful.

¹¹ I nɔ kin rili izi fɔ bi Kristian ɛn fɔ disayd fɔ du di rayt tin, mɔ we wi de tray nɔ fɔ du di bad tin dɛn we wi kin want fɔ du. (Jɛrimaya 17:​9) If na da we de yu de fil, pre to Jiova ɛn aks am fɔ gi yu in oli spirit. Prea ɛn oli spirit go ɛp yu fɔ gɛt kɔrej fɔ du di rayt tin, ɛn yu go gɛt Gɔd in blɛsin. Mekɔp yu maynd fɔ du wetin yu de pre fɔ. Tray fɔ de rid di Baybul ɔltɛm, ɛn mek tɛm fɔ de stɔdi yu wangren ɛn fɔ de du famili wɔship.—Rid Sam 119:​32.

12, 13. Wetin bin ɛp tu pipul dɛn we na Kristian fɔ kɔntrol di bad tin dɛn we dɛn want fɔ du?

¹² Bɔku ɛgzampul dɛn de we dɔn sho aw Gɔd in Wɔd, in spirit, ɛn wi buk ɛn magazin dɛn dɔn ɛp wi brɔda ɛn sista dɛn fɔ lɛf dɛn bad abit dɛn. Wan yɔŋ man bin rid wan atikul we gɛt di taytul “How Can You Resist Wrong Desires?” insay di Disɛmba 8, 2003 Awake! Wetin dat bin ɛp am fɔ du? I bin tɔk se: “A bin de tray tranga wan fɔ kɔntrol di bad we aw a bin de tink. We a bin rid insay di atikul fɔ se ‘i nɔ izi fɔ bɔku pipul dɛn we de tray tranga wan fɔ lɛf dɛn bad abit dɛn,’ dat bin mek a fil se a rili de insay di ɔganayzeshɔn. I bin mek a kam fɔ no se nɔto mi wangren de.” Dis yɔŋ man bin bɛnifit bak frɔm dis ɔda atikul we gɛt di taytul “Alternative Life-Styles—Does  God Approve?” we de insay di Ɔktoba 8, 2003 Awake! Insay da atikul de, i bin kam si se fɔ sɔm pipul dɛn i nɔ izi fɔ lɛ dɛn lɛf dɛn bad abit dɛn we tan lɛk “sik we Setan sɛn” pan pɔsin fɔ “ambɔg” am. (Sɛkɛn Lɛta Fɔ Kɔrint 12:​7) Bɔt pan ɔl we dɛn de kɔntinyu fɔ tray tranga wan fɔ liv klin layf, dɛn gɛt fayn op fɔ tumara bambay. Dis yɔŋ man bin kɔntinyu fɔ tɔk se: “Fɔ da rizin de, a tink se ɛnide a ebul fɔ kɔntinyu fɔ de fetful. A rili gladi fɔ we Jiova de yuz in ɔganayzeshɔn fɔ ɛp wi ɛnide fɔ fetful insay dis wikɛd wɔl.”

¹³ Lɛ wi tɔk bak bɔt wan sista we de na Amɛrika. I bin rayt se: “A want fɔ tɛl una tɛnki fɔ we una de fid wi wit wetin wi nid ɛn we una de du so di rayt tɛm. Bɔku tɛm, a kin fil se dɛn rayt di atikul dɛn jɔs fɔ mi. Fɔ lɔng tɛm, a kin tray tranga wan fɔ lɛf di tin we a rili want fɔ du, we Jiova nɔ lɛk. Sɔntɛnde, a kin want fɔ giv ɔp ɛn lɛf fɔ fɛt. A no se Jiova na Gɔd we gɛt sɔri-at ɛn i rɛdi fɔ fɔgiv, bɔt bikɔs a rili lɛk dɛn tin dɛn ya we nɔ fayn ɛn we a kin want fɔ du, a de fil se Jiova nɔ go ebul fɔ ɛp mi. Dɛn tin dɛn ya we a fɔ tray tranga wan fɔ lɛf dɔn afɛkt ɔltin we a de du. . . . Afta we a rid di atikul we gɛt di taytul, ‘Do You Have “a Heart to Know” Jehovah?’ we de insay di Mach 15, 2013, Wachtawa, a rili fil se Jiova want fɔ ɛp mi.”

14. (a) Aw Pɔl bin fil we i bin gɛt fɔ tray tranga wan fɔ lɛf fɔ du bad? (b) Aw wi go ebul fɔ lɛf bad abit dɛn we nɔ kin izi fɔ lɛf bikɔs wi nɔ pafɛkt?

¹⁴ Rid Lɛta Fɔ Rom 7:​21-25. Pɔl bin no se i nɔ izi fɔ lɛf di bad tin dɛn we i kin want fɔ du ɛn di tin we i kin du, bikɔs i nɔ pafɛkt. Bɔt i bin shɔ se i go lɛf dɛn bad abit dɛn ya if i pre to Jiova, abop pan am fɔ ɛp am, ɛn gɛt fet pan Jizɔs in day wan. Wetin wisɛf fɔ du? Yu tink se wi go ebul fɔ lɛf di bad abit dɛn we wi gɛt we nɔ izi fɔ lɛf bikɔs wi nɔ pafɛkt? Yɛs, wi go ebul, if wi falamakata Pɔl ɛn abop pan Jiova ɔltɛm ɛn gɛt fet pan Jizɔs in day wan.

15. Aw Jiova kin ɛp wi fɔ kɔntinyu fɔ fetful ɛn fɔ bia wit wi prɔblɛm dɛn?

¹⁵ Sɔntɛnde, Gɔd kin alaw wi fɔ sho aw wi kin rili fil bɔt sɔntin. Fɔ ɛgzampul, if wi, ɔ pɔsin na wi famili sik bad bad wan, ɔ wi de sɔfa bikɔs pɔsin nɔ de trit wi fayn, wetin wi go du? If wi rili abop pan Jiova, wi go beg am fɔ lɛ i gi wi di kɔrej we wi nid fɔ kɔntinyu fɔ fetful, fɔ gɛt gladi at, ɛn fɔ lɛ wi padi biznɛs wit am go tayt mɔ ɛn mɔ. (Lɛta Fɔ Filipay 4:​13) Di ɛgzampul dɛn we bɔku Kristian dɛn dɔn sɛt trade ɛn tide, dɔn sho se prea kin ɛp wi ɛn gi wi di kɔrej we wi nid fɔ kɔntinyu fɔ bia wit wi prɔblɛm dɛn.

16, 17. Wetin yu dɔn mekɔp yu maynd fɔ du?

¹⁶ Setan go lɛk fɔ si we yu at pwɛl, we yu giv ɔp ɛn nɔ want fɔ du ɛnitin igen. So na fɔ rɛdi fɔ kɔntinyu fɔ du wetin “gud.” (Fɔs Lɛta Fɔ Tɛsalonayka 5:​21) Yu go win di fɛt agens Setan, in wikɛd wɔl, ɛn ɛni ɔda bad tin we yu go want fɔ du! Yu go win if yu abop se Gɔd go gi yu trɛnk ɛn ɛp yu.—Sɛkɛn Lɛta Fɔ Kɔrint 4:​7-9; Lɛta Fɔ Galeshya 6:​9.

¹⁷ So kɔntinyu fɔ de fɛt. Kɔntinyu fɔ de tray tranga wan. Kɔntinyu fɔ du ɔl wetin yu ebul. Kɔntinyu fɔ de bia. Yu go shɔ se Jiova “go opin di winda dɛn na ɛvin ɛn sɛn blɛsin kam dɔŋ” te i pasmak.—Malakay 3:​10.