1, 2. (a) Wetin mek i nɔ izi fɔ lɛ mama ɛn papa dɛn tich dɛn pikin dɛn fɔ gɛt fet pan Jiova? Aw mama ɛn papa dɛn go du dis? (b) Us 4 pɔynt dɛn wi de kam tɔk bɔt?

WAN mama ɛn papa we de na Frans bin tɔk se: “Wi gɛt fet pan Jiova, bɔt dat nɔ rili min se wi pikin dɛn go gɛt fet pan am. Fet nɔto sɔntin we pɔsin de gɛt frɔm in mama ɛn papa. Wi pikin dɛn go gɛt am smɔl smɔl.” Wan brɔda na Ɔstrelia bin rayt se: “Sɔntɛnde fɔ ɛp yu pikin fɔ gɛt fet wit ɔl in at na tin we nɔ kin rili izi fɔ du.” I tɔk bak se: “Yu go fil se yu dɔn ansa di kwɛstyɔn fayn wan di we aw yu pikin want ɛn i satisfay. Bɔt leta, yu go kam fɔ no se i aks di sem kwɛstyɔn bak! Di ansa dɛn we yu go gi yu pikin we go mek i satisfay tide, nɔ go mek i satisfay tumara.” As di pikin dɛn de big, bɔku mama ɛn papa dɛn dɔn kam fɔ no se nid de fɔ lɛ dɛn de ɛksplen bak di sem tɔpik mɔ ɛn mɔ. Ɛn dɛn dɔn kam fɔ no se dɛn nid fɔ yuz difrɛn we dɛn fɔ tich dɛn pikin dɛn fɔ lɛk Jiova.

² If yu na pɔsin we gɛt pikin, sɔntɛnde yu go de wɔnda if yu go rili ebul fɔ tich yu pikin dɛn fɔ lɛk Jiova ɛn fɔ kɔntinyu fɔ sav am ivin we dɛn dɔn big. Na tru se wi wangren nɔ go ebul fɔ du dis. (Jɛrimaya 10:​23) Na dat mek wi nid fɔ abop pan  Jiova fɔ ɛp wi. Jiova dɔn gi bɔku advays to mama ɛn papa dɛn fɔ gayd dɛn. Aw yu go ɛp yu pikin dɛn? (1) Tray fɔ sabi dɛn gud gud wan. (2) Tich dɛn di tin dɛn we de na yu at bɔt Jiova. (3) Yuz ɛgzampul dɛn. (4) Pre fɔ oli spirit ɛn fɔ peshɛnt wit yu pikin dɛn.

3. Aw mama ɛn papa dɛn kin falamakata di we aw Jizɔs bin de tich in disaypul dɛn?

³ Bɔku tɛm, Jizɔs bin de aks in disaypul dɛn wetin dɛn biliv. (Matyu 16:​13-15) Yu kin falamakata in ɛgzampul. We yu de tɔk wit yu pikin dɛn ɔ una de du sɔntin togɛda, aks dɛn wetin dɛn tink ɛn mek dɛn tɛl yu aw dɛn de rili fil. Yu tink se dɛn gɛt ɛni dawt? Wan brɔda we ol 15 ia we de na Ɔstrelia bin tɔk se: “Bɔku tɛm, mi papa kin tɔk to mi bɔt mi fet, ɛn i kin ɛp mi fɔ tink fɔ misɛf. I kin aks mi se: ‘Wetin di Baybul se?’ ‘Yu biliv wetin di Baybul se?’ ‘Wetin mek yu biliv di Baybul?’ I want mek a ansa fɔ misɛf ɛn tɔk am di we aw a ɔndastand am ɛn a nɔ fɔ ripit wetin in ɔ mama dɔn tɔk. As a de big, a bin gɛt fɔ ɛksplen mi ansa dɛn fayn fayn wan.”

4. Wetin mek i impɔtant fɔ peshɛnt ɛn ansa yu pikin dɛn kwɛstyɔn? Gi wan ɛgzampul.

⁴ Na fɔ peshɛnt wit yu pikin dɛn if dɛn nɔ biliv wantɛm wantɛm sɔm pan di tin dɛn we di Baybul de tich. Ɛp dɛn lɛ dɛnsɛf fɛn di ansa to di kwɛstyɔn dɛn we dɛn de aks. Wan papa bin tɔk se: “Tek yu pikin in kwɛstyɔn dɛn as sɔntin we siriɔs. Nɔ jɔs tek dɛn se dɛn nɔ impɔtant, ɛn nɔ jɔs avɔyd di tɔpik bikɔs yu nɔ de fil gud fɔ tɔk bɔt am.” Infakt, i fayn we yu pikin dɛn de aks yu kwɛstyɔn dɛn, bikɔs i de sho se dɛn want fɔ no mɔ. Ivin Jizɔs bin de aks kwɛstyɔn dɛn we i bin smɔl. (Rid Lyuk 2:​46.) Wan yɔŋ pɔsin na Dɛnmak bin tɔk se: “We a bin se a de dawt if na wi gɛt di tru rilijɔn, mi mama ɛn papa nɔ bin vɛks, pan ɔl we dɛn bin de wɔri bɔt mi. Dɛn bin yuz di Baybul fɔ ansa ɔl mi kwɛstyɔn dɛn.”

5. Wetin mama ɛn papa dɛn fɔ stil du, ilɛksɛf i tan lɛk se dɛn pikin dɛn gɛt fet pan Jiova?

⁵ Tray fɔ sabi yu pikin dɛn gud gud wan. Nɔ tink se yu pikin dɛn go gɛt fet pan Jiova jɔs bikɔs dɛn de go fil savis ɛn dɛn de atɛnd di mitin dɛn. Aw dɛn kin rili fil bɔt Jiova, ɛn wetin dɛn de tink bɔt di Baybul? Na fɔ du yu bɛst fɔ no if ɛnitin de we de mek i nɔ izi fɔ lɛ dɛn kɔntinyu fɔ fetful to Jiova. Tɔk bɔt Jiova ɛvride we yu de du tin dɛn wit yu pikin dɛn. Pre fɔ yu pikin dɛn we yu de wit dɛn ɛn we yu wangren de.

6. We mama ɛn papa dɛn kɔntinyu fɔ lan bɔt Jiova ɛn di Baybul, aw dis de ɛp dɛn fɔ tich dɛn pikin dɛn?

⁶ Pipul dɛn bin de gladi fɔ lisin to Jizɔs bikɔs i bin lɛk Jiova ɛn i bin sabi di Skripchɔ dɛn gud gud wan. Dɛn bin no bak se Jizɔs lɛk dɛn. So dɛn bin de tek tɛm lisin to am. (Lyuk 24:​32; Jɔn 7:​46) Semweso, we yu pikin dɛn si se yu lɛk Jiova, dis go ɛp dɛnsɛf fɔ lɛk am. (Rid Ditarɔnɔmi 6:​5-8; Lyuk 6:​45.) So kɔntinyu fɔ de tek tɛm stɔdi di Baybul, ɛn rid wi buk ɛn magazin dɛn ɔltɛm. Tray fɔ no mɔ bɔt di tin dɛn we Jiova dɔn mek. (Matyu 6:​26, 28) Di mɔ yu no bɔt Jiova, na di mɔ yu go ebul fɔ tich yu pikin dɛn bɔt am.—Lyuk 6:​40.

7, 8. Ɛnitɛm we yu lan sɔntin bɔt Jiova, wetin yu fɔ du? Aw sɔm mama ɛn papa dɛn dɔn du dis?

⁷ We yu lan sɔntin bɔt Jiova, tɛl yu pikin dɛn bɔt am. Nɔto jɔs we una de pripia fɔ mitin ɔ we una de du famili wɔship nɔmɔ yu fɔ tich yu pikin dɛn, na fɔ de du am ɛnitɛm we yu de wit dɛn. Na dis wan mama ɛn papa we de na Amɛrika kin du.  Dɛn kin tɔk bɔt Jiova to dɛn pikin dɛn we dɛn si sɔntin we fayn we Jiova mek ɔ we dɛn de ɛnjɔy fayn it. Dɛn bin se: “Wi kin mɛmba wi pikin dɛn bɔt di lɛk we Jiova lɛk wi ɛn di sɛns we Jiova gɛt fɔ mek ɔl dɛn tin ya fɔ wi.” Wan man ɛn in wɛf we de na Sawt Afrika lɛk fɔ tɔk bɔt di tin dɛn we Jiova dɔn mek we dɛn de wok na dɛn gadin wit dɛn tu gyal pikin dɛn. Fɔ ɛgzampul, dɛn kin tɔk bɔt aw i wɔndaful fɔ no se na sid de tɔn to plant. Dis mama ɛn papa bin se: “Wi kin tray fɔ ɛp wi gyal pikin dɛn fɔ rɛspɛkt layf mɔ ɛn rɛspɛkt di wɔndaful we aw Gɔd mek layf.”

⁸ Wan man we de na Ɔstrelia bin kɛr in bɔy pikin, we bin ol lɛk tɛn ia so, na wan myuziɔm. Di papa bin disayd fɔ yuz dis tɛm fɔ ɛp in pikin fɔ gɛt mɔ fet ɛn pruv se na Jiova mek ɔltin. Di papa bin se: “Wi si animal dɛn we bin de trade na si we dɛn de kɔl ammonoids ɛn trilobites. Wi bin rili sɔprayz fɔ no se dɛn animal dɛn de we nɔ de igen bin rili fayn, dɛn at fɔ ɔndastand, ɛn dɛn ebul fɔ liv fɔ dɛnsɛf, jɔs lɛk ɔda animal dɛn we wi de si tide. So if layf bigin frɔm simpul tin to tin we at fɔ ɔndastand, wetin mek dɛn animal dɛn ya we bin de trade at fɔ ɔndastand? Dat na tin we bin rili tɔch mi at ɛn a bin tɔk bɔt am to mi bɔy pikin.”

9. Wetin mek i fayn fɔ yuz ɛgzampul dɛn? Us ɛgzampul wan mama bin yuz?

⁹ Bɔku tɛm, Jizɔs bin de yuz ɛgzampul dɛn. I bin de tich impɔtant lɛsin dɛn bay we i bin de pul stori ɔ gi ɛgzampul. (Matyu 13:​34, 35) We yu yuz ɛgzampul dɛn, yu go mek yu pikin dɛn imajin fɔ dɛnsɛf. Dis go ɛp dɛn fɔ tink bɔt di lɛsin we yu de tich dɛn, dɛn go ɔndastand am fayn fayn wan, ɛn dɛn go mɛmba am. Dɛn go gladi bak fɔ de lan. Fɔ ɛgzampul, wan mama we de na Jepan bin want in tu bɔy pikin dɛn fɔ lan bɔt di we aw Jiova miks ɔda kayn briz dɛn na di wɔl we dɛn kɔl gas so dat dɛn go no se Jiova rili kia fɔ wi. Wan pan di bɔbɔ dɛn bin ol et ia ɛn di ɔda wan bin ol tɛn ia. So i bin yuz wan ɛgzampul we go mek am izi fɔ lɛ dɛn ɔndastand. I gi in bɔy pikin dɛn milk, shuga, ɛn kɔfi. Dɔn i tɛl dɛn ɔl tu fɔ mek wan wan kɔp kɔfi fɔ am. Di mama bin ɛksplen se: “Dɛn bin rili tek dɛn tɛm fɔ mek di kɔfi. We a aks dɛn wetin mek dɛn tek dɛn tɛm, dɛn bin se dɛn want di kɔfi fɔ de di we aw a lɛk am. A ɛksplen se Gɔd bin tek tɛm miks di gas dɛn na di wɔl di bɛst we fɔ wi, jɔs lɛk aw dɛnsɛf tek tɛm fɔ mek di kɔfi.” Di bɔbɔ dɛn bin gladi fɔ lan dis lɛsin ɛn dɛn nɔ ɛva fɔgɛt am!

10, 11. (a) Us ɛgzampul we yu go yuz fɔ sho yu pikin dɛn se Pɔsin de we mek ɔltin? (Luk di pikchɔ nia dis atikul in taytul.) (b) Us ɛgzampul dɛn yu dɔn yuz?

¹⁰ Us ɛgzampul yu go yuz fɔ sho yu pikin se Pɔsin de we mek ɔltin? Kuk plasas wit yu pikin ɛn sho am ɔl wetin fɔ put insay di  plasas ɛn aw fɔ kuk am. Ɛksplen to am wetin mek i rili impɔtant fɔ fala di stɛp dɛn we yu de sho am fɔ kuk di plasas. Dɔn, gi yu pikin apul ɔ ɛni ɔda frut we gɛt sid ɛn aks am se: “Yu no se dis apul gɛt stɛp dɛn we de sho aw i fɔ de?” Dɔn, kɔt di apul ɛn gi am wan sid. Ɛksplen to am se di sid tan lɛk di stɛp dɛn we pɔsin de yuz fɔ kuk. Na insay dis sid ɔl di stɛp dɛn de fɔ mek apul gro. Bɔt di stɛp dɛn fɔ mek apul gro at fɔ ɔndastand pas di stɛp dɛn fɔ kuk plasas. Yu kin se: “Na pɔsin sho wi aw fɔ kuk plasas. So udat sho aw fɔ mek apul?” If di pikin dɔn big, yu kin ɛksplen to am se ɔl wetin di apul tik nid fɔ gro ɛn fɔ gɛt mɔ apul de insay wan tin we dɛn kɔl DNA we de insay di sid. Sɔntɛm yu go sho dɛn sɔm pikchɔ dɛn ɛn ɛgzampul dɛn we de na pej 10 to pej 20 insay di buk we nem The Origin of Life—Five Questions Worth Asking.

¹¹ Bɔku mama ɛn papa dɛn dɔn rid di atikul dɛn we de insay Awake! we gɛt di taytul “Was It Designed?” wit dɛn pikin dɛn. If dɛn pikin dɛn tu smɔl, dɛn kin ɛksplen wetin dɛn rid simpul wan fɔ mek dɛn pikin dɛn ɔndastand. Fɔ ɛgzampul, wan man ɛn in wɛf we de na Dɛnmak, bin kɔmpia plen to bɔd. Dɛn bin tɔk se: “Plen fiba bɔd. Bɔt yu tink se i pɔsibul fɔ lɛ plen le eg ɛn ach smɔl plen dɛn? Yu tink se bɔd dɛn nid spɛshal say fɔ land? Ɛn aw yu go kɔmpia di sawnd we plen de pul to di siŋ we bɔd kin siŋ? So udat gɛt sɛns pas in kɔmpin, di wan we mek plen ɔ di wan we mek bɔd?” We yu ɛp yu pikin dɛn fɔ tink ɛn yu aks dɛn kwɛstyɔn dɛn, yu de ɛp dɛn fɔ “ɔndastand” ɛn fɔ gɛt mɔ fet pan Jiova.—Prɔvabs 2:​10-12.

12. Aw yu go yuz ɛgzampul dɛn fɔ tich yu pikin dɛn se ɛnitin we di Baybul se na tru?

¹² Yu go yuz ɛgzampul dɛn fɔ tich yu pikin dɛn se ɛnitin we di Baybul se na tru. Fɔ ɛgzampul, una kin rid Job 26:​7. (Rid.) Nɔ jɔs tɛl yu pikin dɛn se wetin dɛn rid insay dis vas na frɔm Jiova i kɔmɔt. Bifo dat, ɛp dɛn fɔ imajin fɔ dɛnsɛf. Yu go se, sɔntɛm di pipul dɛn we bin de na Job in tɛm nɔ bin biliv se di wɔl nɔ ɛng pan natin. Dɛn bin no se sɔntin lɛk bɔl ɔ ston, go mɔs de pantap sɔntin. Da tɛm de, nɔbɔdi nɔ bin dɔn pruv se di wɔl nɔ ɛng pan natin, bikɔs dɛn nɔ bin gɛt mashin dɛn we dɛn kin yuz fɔ luk tin dɛn we de fa, we pɔsin nɔ kin si wit in ɔdinari yay ɔ di tin dɛn we dɛn kin yuz fɔ go na spes, we dɛn kɔl spes-ship. Di lɛsin na dat pan ɔl we i dɔn te we dɛn rayt di Baybul, i de tɔk tru ɔltɛm bikɔs na frɔm Jiova i kɔmɔt.—Nɛimaya 9:​6.

13, 14. Aw mama ɛn papa dɛn go tich dɛn pikin dɛn fɔ du wetin di Baybul se?

¹³ I impɔtant bak fɔ tich yu pikin dɛn se dɛn go gladi pasmak if dɛn du wetin di Baybul se. (Rid Sam 1:​1-3.) Fɔ ɛgzampul, yu kin tɛl yu pikin dɛn fɔ imajin se dɛn de go de na wan ayland. Dɛn gɛt fɔ pik sɔm pipul dɛn fɔ go de de wit dɛn. Yu kin aks dɛn se, “Uskayn pipul dɛn una go go wit if una want fɔ lɛ una ɔl de togɛda wit pis?” Dɔn, rid Lɛta Fɔ Galeshya 5:​19-23 fɔ no uskayn pipul dɛn Jiova want fɔ de na di nyu wɔl.

¹⁴ If yu du dis, yu go ebul fɔ tich yu pikin dɛn tu impɔtant lɛsin dɛn. Fɔs, Jiova de tich wi aw wi go gɛt gladi at ɛn pis wit ɔda pipul dɛn naw. Sɛkɔn, i de tich wi aw fɔ liv na di nyu wɔl. (Ayzaya 54:​13; Jɔn 17:​3) Yu kin sho yu pikin dɛn bak aw di Baybul dɔn ɛp wi brɔda dɛn. Fɔ ɛgzampul, fɛn wan tru tru stori insay wan pan wi buk ɔ magazin  dɛn, sɔntɛm frɔm “The Bible Changes Lives” atikul dɛn insay Di Wachtawa. Ɔ aks pɔsin we de na yu kɔngrigeshɔn fɔ tɛl yu ɛn yu pikin dɛn aw di Baybul dɔn ɛp am fɔ chenj in layf so dat Jiova go gladi fɔ am.—Di Ibru Pipul Dɛn 4:​12.

15. Wetin go ɛp yu fɔ tich yu pikin dɛn?

¹⁵ Tink bɔt tin dɛn we yu go du fɔ mek yu pikin dɛn gladi fɔ lan wetin yu de tich dɛn. Tink bak bɔt difrɛn we dɛn fɔ ɛp yu pikin dɛn fɔ ɛnjɔy we dɛn de lan bɔt Jiova ɛn ɛp dɛn fɔ kam nia am mɔ. Go de du dis as dɛn de big. Wan papa bin se: “Nɔ ɛva taya fɔ de fɛn nyu we dɛn fɔ ɛksplen tin dɛn we yu bin dɔn tich dɛn.”

16. We yu de tich yu pikin dɛn, wetin mek i impɔtant fɔ peshɛnt wit dɛn? Aw sɔm mama ɛn papa dɛn dɔn sho se dɛn peshɛnt?

¹⁶ Jiova in spirit go ɛp yu fɔ mek yu pikin dɛn gɛt mɔ fet. (Lɛta Fɔ Galeshya 5:​22, 23) Bɔt i go tek tɛm fɔ lɛ dɛn gɛt strɔng fet. So peshɛnt wit yu pikin dɛn ɛn kɔntinyu fɔ tich dɛn. Wan papa we de na Jepan, we gɛt wan bɔy pikin ɛn wan gyal pikin, bin tɔk se: “Mi ɛn mi wɛf bin de spɛn bɔku tɛm wit wi pikin dɛn. Frɔm di tɛm we dɛn smɔl, a bin de stɔdi wit dɛn fɔ 15 minit ɛvride, pas nɔmɔ di de we wi gɛt mitin na in wi nɔ de stɔdi. Fɔ stɔdi wit dɛn fɔ 15 minit nɔ bin tu at fɔ wi ɔ fɔ dɛn.” Wan sakit ovasia bin rayt se: “We a bin yɔŋ, a bin gɛt bɔku bɔku kwɛstyɔn dɛn ɔ tin dɛn we a bin de dawt bɔt, we a nɔ bin ɛva aks. As tɛm de go, a bin de gɛt ansa dɛn to bɔku pan mi kwɛstyɔn ɔ dawt dɛn we a bin gɛt, we a de na mitin, we wi bin de du famili stɔdi, ɔ we a bin de stɔdi mi wangren. Na dat mek i impɔtant fɔ lɛ mama ɛn papa dɛn kɔntinyu fɔ tich dɛn pikin dɛn.”

17. Wetin mek i impɔtant fɔ lɛ mama ɛn papa dɛn gɛt mɔ fet? Aw wan mama ɛn papa na Bamuda de ɛp dɛn gyal pikin dɛn fɔ gɛt fet pan Jiova?

¹⁷ Yu pikin dɛn go lan bɔku tin dɛn we dɛn si se yu gɛt strɔng fet pan Jiova. Dɛn go de luk wetin yu de du. So kɔntinyu fɔ gɛt mɔ fet. Mek yu pikin dɛn si se Jiova na rial pɔsin to yu. Fɔ ɛgzampul, we wan mama ɛn papa we de na Bamuda de wɔri bɔt sɔntin, dɛn kin pre wit dɛn gyal pikin dɛn ɛn aks Jiova fɔ gayd dɛn. Dɛn kin ɛnkɔrej dɛn pikin dɛn bak fɔ pre fɔ dɛnsɛf. Dɛn se: “Wi kin tɛl wi big gyal pikin se, ‘Abop pan Jiova wit ɔl yu at, kɔntinyu fɔ prich bɔt Gɔd in Kiŋdɔm wit zil, ɛn nɔ wɔri pasmak.’ We i si wetin kin apin, i kin no se Jiova de ɛp wi. Dis dɔn mek i dɔn rili gɛt fet pan Gɔd ɛn di Baybul.”

18. Wetin mama ɛn papa dɛn nɔ fɔ fɔgɛt?

¹⁸ Mama ɛn papa dɛn, una nɔ ɛva fɔgɛt se una nɔ fɔ fos una pikin dɛn fɔ gɛt fet. Na una de plant ɛn wata, bɔt na Jiova nɔmɔ de mek i gro. (Fɔs Lɛta Fɔ Kɔrint 3:​6) So una tray tranga wan fɔ tich una pikin dɛn bɔt am, ɛn una pre fɔ lɛ in spirit ɛp dɛn fɔ gɛt fet. If una du dis, Jiova go mɔs blɛs ɔl wetin una de du.—Lɛta Fɔ Ɛfisɔs 6:​4.