1, 2. (a) Uskayn prɔblɛm dɛn we bɔku pipul dɛn gɛt tide? Wetin dɔn apin? (b) Us op we de Ayzaya 41:​10, 13?

WAN sista we na rɛgyula payɔnia ɛn we mared to wan ɛlda bin tɔk se: “Pan ɔl we a bin de tray fɔ go bifo pan Gɔd biznɛs, a bin de wɔri tumɔs fɔ lɔng tɛm. Dat bin de mek a nɔ bin de slip, ɛn a bin de sik sik. Dis bin de afɛkt di we aw a bin de trit ɔda pipul dɛn, ɛn sɔntɛnde a kin want fɔ giv ɔp.”

² Yu go ebul fɔ ɔndastand aw dis sista bin de fil? I sɔri fɔ no se, bikɔs wi de na Setan in wikɛd wɔl, bɔku bad bad tin dɛn kin mit wi. Fɔ wɔri tan lɛk ankɔ we de mek bot nɔ muv, ɛn i kin mek wi fil bad ɔ i kin mek wi at pwɛl. (Prɔvabs 12:​25) Wetin kin mek wi wɔri? Sɔntɛm pɔsin we yu lɛk day ɔ yu gɛt siriɔs sik we yu de bia wit ɔ pipul dɛn de mek yu sɔfa bikɔs yu de du wetin rayt. Ɔ sɔntɛm i nɔ izi fɔ lɛ yu kia fɔ yu famili bikɔs tin tranga tide. As tɛm de go, di tin dɛn we de mɔna yu go mek yu nɔ gɛt bɛtɛ trɛnk ɛn ivin mek yu nɔ gladi igen. Bɔt yu fɔ biliv tranga wan se Gɔd rɛdi fɔ ɛp yu.—Rid Ayzaya 41:​10, 13.

3, 4. (a) Aw di Baybul ɛksplen di wɔd “an”? (b) Wetin kin mek wi at pwɛl?

³ Bɔku tɛm, di Baybul de yuz di pat dɛn na wi bɔdi fɔ ɛksplen di difrɛn kwaliti dɛn we pɔsin kin gɛt ɔ di tin dɛn we pɔsin kin du. Fɔ ɛgzampul, di Baybul tɔk bɔt di an bɔku bɔku  tɛm. We di Baybul se dɛn dɔn ɛp pɔsin, i kin min se dɛn dɔn ɛnkɔrej di pɔsin fɔ gɛt trɛnk bak ɛn rɛdi fɔ du sɔntin. (Fɔs Samiɛl 23:​16; Ɛzra 1:​6) I kin min bak se di pɔsin de tink di rayt we ɛn i gɛt op fɔ tumara bambay.

⁴ Sɔntɛnde, di Baybul kin tɔk bɔt pɔsin we put in an dɛn dɔŋ. Dis min pɔsin we in at pwɛl ɔ we nɔ gɛt op igen. (Sɛkɛn Kronikul 15:​7; Di Ibru Pipul Dɛn 12:​12) We sɔntin de mɔna yu ɔ yu taya pasmak ɔ yu fil se yu padi biznɛs wit Jiova nɔ tayt igen, yu kin want fɔ giv ɔp. Usay yu go gɛt kɔrej? Wetin go mek yu ebul fɔ gɛt kɔrej fɔ bia ɛn gɛt gladi at?

5. (a) Aw wi kin fil we wi gɛt prɔblɛm dɛn? Wetin wi fɔ mɛmba? (b) Wetin wi go tɔk bɔt insay dis atikul?

⁵ Rid Zɛfinaya 3:​16, 17, NW. We wi gɛt prɔblɛm dɛn, wi nɔ fɔ fred ɛn mek wi at pwɛl, ɔ nɔ gɛt op igen. Jiova wi Papa we lɛk wi dɔn tɛl wi fɔ lɛf ɔl wetin de wɔri wi to am. (Pita In Fɔs Lɛta 5:7) Jiova kia fɔ wi jɔs lɛk aw i bin kia fɔ di Izrɛlayt dɛn. I bin tɛl dɛn se in an “nɔ shɔt fɔ mek i nɔ ebul sev.” I rɛdi ɔltɛm fɔ sev di wan dɛn we nɔ de kɔmɔt biɛn am. (Ayzaya 59:​1) Insay dis atikul, wi go tɔk bɔt tri fayn ɛgzampul dɛn na di Baybul we go sho wi aw Jiova want fɔ ɛp in pipul dɛn fɔ du wetin i want pan ɔl we tin nɔ go rili izi fɔ dɛn. Lɛ wi si aw dɛn ɛgzampul dɛn ya go ɛp yu fɔ gɛt kɔrej.

6, 7. Wetin wi lan frɔm di we aw di Izrɛlayt dɛn bin win di fɛt wit di Amalɛkayt dɛn?

⁶ Jɔs afta dɛn bin fri di Izrɛlayt dɛn na Ijipt usay dɛn bin de as slev, di Amalɛkayt dɛn bin kam atak dɛn. Mozis bin tɛl Jɔshwa we na bin man we gɛt maynd fɔ de bifo di Izrɛlayt dɛn pan di fɛt. Dɔn Mozis bin tek Erɔn ɛn Ɔ go na wan il we nɔ de fa frɔm usay dɛn bin de. Na de dɛn go de, we dɛn go si di say we dɛn de fɛt. Fɔ se dɛn tri man ya bin de rɔnawe pan di fɛt bikɔs dɛn de fred? Nɔ-o, nɔto so i bi!

⁷ Na wan plan Mozis bin fala we bin ɛp di Izrɛlayt dɛn fɔ win di fɛt wit di Amalɛkayt dɛn. Mozis bin ol Gɔd in stik na in an ɛn es in an dɛn ɔp na ɛvin. We Mozis bin du dat, Jiova bin gi di Izrɛlayt dɛn pawa fɔ fɛt di Amalɛkayt dɛn. Bɔt we Mozis in an dɛn bin taya ɛn i bigin fɔ put dɛn dɔŋ, di Amalɛkayt dɛn bigin fɔ win. Erɔn ɛn Ɔ bin du sɔntin kwik kwik wan fɔ ɛp Mozis. Di Baybul se: “Erɔn ɛn Ɔ fɛn wan ston ɛn mek i sidɔm pan am, dɔn wan tinap nain lɛft ɛn wan tinap nain rayt ɛn ol in an dɛn tret ɔp sote di san go dɔŋ.” So, bikɔs Gɔd bin yuz in pawaful an fɔ ɛp di Izrɛlayt dɛn, dɛn bin win di fɛt.—Ɛksodɔs 17:​8-13.

8. (a) Wetin Esa bin du we di Itiopian dɛn bin trɛtin Juda? (b) Aw wi go falamakata Esa?

⁸ Insay Kin Esa in tɛm, Jiova bin rɛdi bak fɔ yuz in pawaful an fɔ ɛp in pipul dɛn. Di Baybul tɔk bɔt bɔku ami dɛn, bɔt Zera we kɔmɔt Itiopia in yon ami bin big pas dɛn ɔl; i bin gɛt 1,000,000 sojaman dɛn we bin rili sabi fɛt. Di Itiopian sojaman dɛn bin bɔku pas Esa in sojaman dɛn tu tɛm. Yu tink se Esa bin wɔri, fred, ɔ in at bin pwɛl? Yu tink se i nɔ bin gɛt op igen? Nɔ-o! Wantɛm wantɛm Esa bin aks Jiova fɔ ɛp am. Frɔm di we aw dɛn wan we sabi bɔt fɛt de tink, dɛn go se i nɔ pɔsibul fɔ lɛ di Izrɛlayt dɛn win di Itiopian dɛn pan di fɛt. “Bɔt Gɔd ebul du ɔltin.” (Matyu 19:​26) Gɔd bin yuz in pawa fɔ “bit di Itiopian dɛn bifo Esa” we  “ɔl in at de wit PAPA GƆD te i day.”—Sɛkɛn Kronikul 14:​8-13; Fɔs Kiŋ 15:​14.

9. (a) Wetin nɔ bin stɔp Nɛimaya fɔ bil di wɔl dɛn na Jerusɛlɛm? (b) Aw Gɔd bin ansa Nɛimaya in prea?

⁹ Wetin Nɛimaya bin si we i bin go na Jerusɛlɛm? I bin si se ɛnimi dɛn we de na ɔda kɔntri dɛn dɔn trɛtin di Ju pipul dɛn, so dat bin mek di Ju pipul dɛn stɔp fɔ bil di wɔl dɛn na Jerusɛlɛm. Di siti nɔ bin sef, ɛn di Ju pipul dɛn at bin pwɛl. Aw Nɛimaya bin fil? Yu tink se in at bin pwɛl ɛn nɔ gɛt op igen? Nɔ-o! Jɔs lɛk Mozis, Esa, ɛn ɔda fetful wan dɛn we bin sav Jiova, Nɛimaya bin abop pan Jiova ɔltɛm. We dis bin apin, Nɛimaya bin pre to Jiova fɔ ɛp am, ɛn Jiova bin ansa am. Gɔd bin yuz “in pawa” ɛn in “pawaful an” fɔ gi trɛnk to di Ju pipul dɛn. (Rid Nɛimaya 1:​10; 2:​17-20; 6:​9.) Yu biliv se Jiova de yuz “in pawa” ɛn in “pawaful an” fɔ ɛp in savant dɛn tide?

10, 11. (a) Aw Setan de tray fɔ mek wi at pwɛl? (b) Wetin Jiova de yuz fɔ ɛp wi ɛn fɔ kɔrej wi? (c) Aw yu dɔn de bɛnifit frɔm di advays dɛn we Jiova de gi wi?

¹⁰ Wi shɔ se Setan nɔ go ɛva giv ɔp. Setan go kɔntinyu fɔ de atak wi, ɛn tray fɔ stɔp wi nɔ fɔ sav Jiova. I de yuz gɔvmɛnt dɛn, bigman dɛn pan Gɔd biznɛs, ɛn dɛn wan we de tich lay lay tin dɛn bɔt Gɔd fɔ lay pan wi ɛn trɛtin wi. Wetin na Setan in plan? I want fɔ stɔp wi lɛ wi nɔ prich di gud nyus bɔt Gɔd in Kiŋdɔm. Bɔt Jiova ebul ɛn i want fɔ ɛp wi, ɛn i de gi wi in oli spirit fɔ mek wi gɛt kɔrej. (Fɔs Kronikul 29:​12) So i rili impɔtant fɔ lɛ wi de aks fɔ Gɔd in spirit so dat wi go ebul fɛt Setan ɛn in wikɛd wɔl. (Sam 18:​39; Fɔs Lɛta Fɔ Kɔrint 10:​13) Wi gladi bak fɔ we Gɔd in Wɔd de ɛp wi. Tink, bak, bɔt wetin wi kin lan frɔm wi buk ɛn magazin dɛn we wi kin gɛt ɛni mɔnt. Dɛn bin tɔk di wɔd dɛn we de insay Zɛkaraya 8:​9, 13 (rid) di tɛm we dɛn bin de bil di tɛmpul bak na Jɛrusɛlɛm, ɛn dɛn wɔd ya de ɛp wi tide.

¹¹ Jiova de ɛp wi bak wit di advays dɛn we wi kin gɛt na wi mitin dɛn, asɛmbli dɛn, kɔnvɛnshɔn dɛn, ɛn di skul dɛn we di ɔganayzeshɔn dɔn mek. Dɛn advays dɛn ya we wi kin gɛt de ɛp wi fɔ sav Gɔd di rayt we, i de ɛp wi bak fɔ plan wetin fɔ du, ɛn fɔ kia fɔ di bɔku wok dɛn we wi, Kristian dɛn gɛt. (Sam 119:​32) Yu rɛdi fɔ alaw di advays dɛn we Jiova de gi wi, fɔ ɛp yu?

12. Wetin wi go du fɔ mek wi go kɔntinyu fɔ gɛt kɔrej?

¹² Jiova bin ɛp in pipul dɛn fɔ fɛt ɛn win di Amalɛkayt dɛn ɛn di Itiopian dɛn, ɛn Jiova bin gi Nɛimaya ɛn di Ju pipul dɛn pawa fɔ dɔn fɔ bil di wɔl dɛn na Jɛrusɛlɛm. Semweso, Gɔd go gi wi di kɔrej fɔ kɔntinyu fɔ du di prichin wok ilɛksɛf sɔntin de we de mek wi wɔri, pipul dɛn want fɔ stɔp wi fɔ sav Jiova, ɛn ɔda pipul dɛn nɔ bisin bɔt wi. (Pita In Fɔs Lɛta 5:​10) Jiova nɔ go pafɔm mirekul fɔ pul wi prɔblɛm dɛn kɔmɔt. Bifo dat, wisɛf fɔ tray. Aw wi go du dat? Wi nid fɔ de rid Gɔd in Wɔd ɛvride, pripia fɔ di mitin dɛn, go ɔl di mitin dɛn ɛni wik, kɔntinyu fɔ stɔdi fɔ wisɛf, du wi famili wɔship, ɛn abop pan Jiova bay we wi de pre. Lɛ wi nɔ ɛva alaw ɛnitin fɔ pul wi maynd pan di tin dɛn we Jiova dɔn gi wi fɔ ɛp wi ɛn kɔrej wi. If yu fil se yu dɔn lɛf fɔ du ɛni wan pan dɛn tin ya, na fɔ aks Gɔd fɔ ɛp yu. Dɔn, si aw Gɔd in spirit “de wok insay una at so dat una go want du wetin i want una fɔ du.” (Lɛta Fɔ Filipay 2:​13) Yu tink se yu go ebul fɔ ɛnkɔrej ɔda pipul dɛn?

13, 14. (a) Aw wan brɔda bin gɛt kɔrej we in wɛf bin day? (b) Aw wi go ɛnkɔrej ɔda pipul dɛn?

¹³ Jiova dɔn gi wi brɔda ɛn sista dɛn we de ɔlsay na di wɔl we de ɛnkɔrej ɛn kia fɔ wi. Di apɔsul Pɔl bin tɔk se: “Una mek una an we wik ɛn una fut we nɔ gɛt trɛnk, traŋa. Una waka na di tret rod, so dat di wan we in fut nɔ traŋa nɔ go fɔdɔm ɛn ambɔg in fut.” (Di Ibru Pipul Dɛn 12:​12, 13) Bɔku brɔda ɛn sista dɛn bin ɛp dɛn kɔmpin Kristian dɛn we bin de trade dis sem kayn we. Na di sem tin de apin tide. Lɛ wi tɔk bɔt wan ɛgzampul. Afta we wan brɔda in wɛf day, ɛn i bin gɛt fɔ bia bɔku ɔda prɔblɛm dɛn we nɔ bin rili izi fɔ am, i bin tɔk se: “A lan se nɔto wi de pik uskayn prɔblɛm dɛn wi go gɛt, di tɛm we dɛn fɔ apin to wi ɛn ɔmɔs tɛm dɛn fɔ apin to wi. Prea ɛn we a de stɔdi di Baybul fɔ misɛf tan lɛk layf jakɛt we dɔn mek a nɔ lɛf na wata. Ɛn di sɔpɔt we mi Kristian brɔda ɛn sista dɛn de gi mi dɔn rili ɛnkɔrej mi. A dɔn kam fɔ no se i impɔtant fɔ mek wi gɛt tayt padi biznɛs wit Jiova bifo prɔblɛm dɛn mit wi.”

¹⁴ Erɔn ɛn Ɔ bin sɔpɔt Mozis in an dɛn we dɛn bin de fɛt di Amalɛkayt dɛn. Tide, wisɛf fɔ fɛn we dɛn fɔ sɔpɔt ɛn ɛp ɔda pipul dɛn. Sɔm pan wi brɔda dɛn de sɔfa bikɔs dɛn dɔn ol, dɛn gɛt wɛlbɔdi prɔblɛm, dɛn fambul dɛn de mek dɛn de sɔfa bikɔs dɛn want fɔ du wetin Jiova want, dɛn kin fil lɛk se na dɛn wangren de, ɔ we pɔsin we dɛn lɛk day. Wi kin ɛp  bak di yɔŋ wan dɛn, we pipul dɛn kin mɔna fɔ lɛ dɛn du tin we nɔ fayn ɔ fɔ mek dɛn go bifo na dis wɔl. (Fɔs Lɛta Fɔ Tɛsalonayka 3:​1-3; 5:​11, 14) Luk fɔ we dɛn we wi go sho se wi lɛk wi brɔda ɛn sista dɛn na Kiŋdɔm Ɔl, we wi de fil savis, we wi de it togɛda, ɔ we wi de tɔk to pɔsin na fon.

15. Aw wi brɔda ɛn sista dɛn de fil we wi tɔk fayn to dɛn?

¹⁵ Afta we Esa bin dɔn win di fɛt wit di bɔku bɔku Itiopian sojaman dɛn, di prɔfɛt Azaraya bin ɛnkɔrej Esa ɛn in pipul dɛn bay we i tɛl dɛn se: “Una tek kɔrej! Una nɔ pwɛl at bikɔs yu go gɛt di pe fɔ yu wok.” (Sɛkɛn Kronikul 15:​7) Dis bin ɛp fɔ mek Esa du bɔku tin dɛn fɔ mek tru wɔship go de bak. Semweso, di fayn wɔd dɛn we wi de tɔk kin ɛnkɔrej ɔda pipul dɛn ɛn ɛp dɛn fɔ kɔntinyu fɔ sav Jiova. (Prɔvabs 15:​23, NW) Ɛn yu nɔ fɔ ɛva fɔgɛt aw yu fayn kɔmɛnt na mitin kin ɛnkɔrej yu brɔda ɛn sista dɛn.

16. Aw ɛlda dɛn kin falamakata Nɛimaya? Gi ɛgzampul bɔt aw brɔda ɛn sista dɛn dɔn ɛp yu.

¹⁶ Nɛimaya ɛn di Ju pipul dɛn bin gɛt kɔrej we Jiova bin ɛp dɛn. Insay 52 dez, dɛn bin dɔn fɔ bil di wɔl dɛn na Jerusɛlɛm! (Nɛimaya 2:​18; 6:​15, 16) Nɛimaya nɔ bin jɔs de luk we ɔda pipul dɛn bin de du di wok. Insɛf bin ɛp fɔ bil di wɔl dɛn bak na Jerusɛlɛm. (Nɛimaya 5:​16) Semweso, bɔku ɛlda dɛn de falamakata Nɛimaya bay we dɛn de ɛp fɔ bil nyu Kiŋdɔm Ɔl dɛn ɔ ɛp fɔ klin ɛn kia fɔ di Kiŋdɔm Ɔl. Di ɛlda dɛn lɛk di brɔda ɛn sista dɛn ɛn dɛn kin ɛnkɔrej “dɛn wan we de fred” bay we dɛn kin go fɛn dɛn ɛn wok wit dɛn na fil savis.—Rid Ayzaya 35:​3, 4.

17, 18. Wetin wi fɔ biliv se go apin we wi gɛt prɔblɛm ɔ we wi de wɔri?

¹⁷ We wi de wok togɛda wit wi brɔda ɛn sista dɛn, i de mek wi gɛt wanwɔd mɔ ɛn mɔ. I de ɛp wi bak fɔ gɛt padi biznɛs we go de sote go ɛn mek wi biliv tranga wan pan di blɛsin dɛn we Gɔd in Kiŋdɔm go kam wit jisnɔ. We wi ɛnkɔrej ɔda pipul dɛn, wi de ɛp dɛn fɔ bia di prɔblɛm dɛn we dɛn de gɛt ɛn fɔ kɔntinyu fɔ abop pan di gud tin dɛn we gɛt fɔ apin tumara bambay. Dɔn, we wi ɛp ɔda pipul dɛn, i de ɛnkɔrej wi ɛn ɛp wi fɔ put wi maynd pan di tin dɛn we go apin tumara bambay.

¹⁸ We wi tink bɔt aw Jiova dɔn ɛp ɛn protɛkt in fetful savant dɛn trade, i go ɛp wi fɔ gɛt mɔ fet ɛn wi go abop pan am. So we yu gɛt prɔblɛm ɛn yu de wɔri, “nɔ put yu an dɛn dɔŋ”! Yu fɔ biliv tranga wan se we yu pre to Jiova fɔ ɛp yu, i go yuz in pawa fɔ ɛp yu ɛn mek yu gɛt di blɛsin dɛn we in Kiŋdɔm go briŋ tumara bambay.—Sam 73:​23, 24.