1, 2. Wetin mek Jiova Witnɛs dɛn de pik wetin dɛn de wɛr? (Luk di pikchɔ nia dis atikul in taytul.)

WAN Dɔch nyuspepa bin ɛksplen aw sɔm bigman dɛn pan chɔch biznɛs bin drɛs pan wan dɛn mitin. I tɔk se: “Bɔku pan dɛn bin drɛs kialɛs wan, mɔ we di ples wam.” Bɔt di sem nyuspepa bin tɔk se nɔto so Jiova Witnɛs dɛn bin drɛs we dɛn gɛt dɛn kɔnvɛnshɔn. Di nyuspepa bin kɔntinyu fɔ tɔk se di bɔy pikin dɛn ɛn di man dɛn bin de wɛr kot ɛn tay ɛn di gyal pikin dɛn ɛn di uman dɛn bin de wɛr skat dɛn we de na stayl bɔt we nɔ shɔt. Bɔku tɛm, pipul dɛn kin tɔk fayn bɔt aw Jiova Witnɛs dɛn de drɛs. Di apɔsul Pɔl bin tɔk se Kristian dɛn fɔ “tek tɛm pik di klos we dɛn de wɛr,” ɛn dɛn fɔ drɛs di we we go sho se dɛn na Gɔd in savant dɛn. (Fɔs Lɛta To Timoti 2:​9, 10) Pan ɔl we na uman dɛn Pɔl bin de tɔk bɔt, dis advays de bak fɔ man dɛn.

² Fɔ drɛs di rayt we impɔtant to wi we na Jiova in pipul dɛn ɛn i impɔtant to di Gɔd we wi de wɔship. (Jɛnɛsis 3:​21) Di Baybul tɔk am klia wan se Jiova we na di Wan we gɛt di rayt fɔ rul gɛt di rayt we aw i want in savant dɛn fɔ drɛs. So di klos  we wi de wɛr nɔ fɔ jɔs bi wetin wi lɛk, bɔt i fɔ bi wan we go mek Jiova gladi.

3. Wetin wi lan bɔt aw fɔ drɛs frɔm di Lɔ we Jiova bin gi di Izrɛlayt dɛn?

³ Insay di Lɔ we Gɔd bin gi Mozis, lɔ dɛn bin de fɔ protɛkt di Izrɛlayt dɛn frɔm di we aw pipul dɛn we bin de rawnd dɛn bin de drɛs ɔ du mami ɛn dadi biznɛs di we aw Gɔd nɔ want. Di Lɔ bin sho se Jiova rili et di we aw pipul dɛn de drɛs we nɔ de sho difrɛns bitwin man ɛn uman. Tide, dɛn kɔl dis stayl yunisɛks fashɔn. (Rid Ditarɔnɔmi 22:​5.) Frɔm di Lɔ, wi lan se Jiova nɔ kin gladi fɔ si man de drɛs lɛk uman ɔ uman de drɛs lɛk man, ɔ dɛn drɛs di kayn we we go mek i at fɔ lɛ yu si di difrɛns bitwin man ɛn uman.

4. Wetin go ɛp Kristian dɛn fɔ disayd aw fɔ drɛs?

⁴ Di advays dɛn na di Baybul kin ɛp wi fɔ disayd aw fɔ drɛs fayn. Dɛn advays ya fayn fɔ wi ilɛk us kɔntri wi de, aw di wɛda tan, ɔ uskayn kɔlchɔ wi gɛt. Wi nɔ nid fɔ gɛt lɔng list we de sho wetin wi fɔ wɛr ɛn wetin wi nɔ fɔ wɛr. Wi jɔs nid fɔ fala di advays dɛn we de insay di Baybul we go stil alaw wi fɔ wɛr di tin dɛn we wi lɛk. Lɛ wi tɔk bɔt sɔm advays dɛn na di Baybul we go ɛp wi fɔ mekɔp wi maynd fɔ du “wetin gud, wetin Gɔd lɛk, ɛn wetin nɔbɔdi nɔ go ebul fɛn fɔlt pan” we wi de disayd wetin fɔ wɛr.—Lɛta Fɔ Rom 12:​1, 2.

5, 6. Aw di we we wi de drɛs kin afɛkt ɔda pipul dɛn?

⁵ Gɔd bin yuz in oli spirit fɔ lɛ di apɔsul Pɔl rayt wan impɔtant advays we de na Sɛkɛn Lɛta Fɔ Kɔrint 6:​4. (Rid.) Di we aw wi de drɛs de sɛn mɛsej to pipul dɛn ɛn bɔku pipul dɛn go tink gud ɔ bad bɔt wi bay di we aw wi de drɛs. (Fɔs Samiɛl 16:​7) Bikɔs wi na Gɔd in savant dɛn, wi nɔ fɔ jɔs drɛs di we we go mek wi fil fayn ɔ di we aw wi lɛk. We wi fala di advays dɛn na di Baybul, dat go ɛp wi fɔ avɔyd fɔ wɛr klos dɛn we tayt, we de sho di pat dɛn na wi bɔdi ɔ we go mek as pɔsin si wi so, i go want fɔ du mami ɛn dadi biznɛs. Dis min se wi fɔ avɔyd klos dɛn we de sho di prayvet pat dɛn na wi bɔdi. Nɔbɔdi nɔ fɔ fil bad ɔ fos fɔ luk ɔda say we dɛn si di we aw wi drɛs.

⁶ We wi nit, klin, drɛs fayn, ɛn tek tɛm pik di klos we wi de wɛr, pipul dɛn go rɛspɛkt wi mɔ, bikɔs wi na Jiova in savant dɛn. Ɛn dɛn go want fɔ no mɔ bɔt di Gɔd we wi de wɔship, gɛt mɔ rɛspɛkt fɔ wi ɔganayzeshɔn, ɛn dɛn go want fɔ lisin to di mɛsej we wi de prich we go sev dɛn layf.

7, 8. Ustɛm mɔ wi nid fɔ tek tɛm wit wetin wi de wɛr?

⁷ We wi tink bɔt di oli Gɔd we wi de sav, wi brɔda ɛn sista dɛn, ɛn di pipul dɛn we wi de prich to, dis fɔ mek wi drɛs fayn, so dat pipul dɛn go rɛspɛkt Jiova ɛn di mɛsej we wi de prich. (Lɛta Fɔ Rom 13:​8-10) I rili impɔtant fɔ pik wetin wi de wɛr, mɔ we wi de go mitin ɔ fil savis. Wi fɔ drɛs di kayn we we de sho se wi de wɔship Gɔd. (Fɔs Lɛta To Timoti 2:​10) Na tru se sɔm klos dɛn de we fayn fɔ wɛr na wan ples bɔt we nɔ go fayn fɔ wɛr na ɔda ples. So as Jiova Witnɛs dɛn, ilɛk usay wi de, wi fɔ avɔyd fɔ ambɔg ɔda pipul dɛn bay di we aw wi de drɛs.

⁸ Rid Fɔs Lɛta Fɔ Kɔrint 10:​31. Wi nid fɔ tek tɛm drɛs di rayt we we wi de go asɛmbli ɛn kɔnvɛnshɔn dɛn. Wi nɔ fɔ falamakata di bad we aw pipul dɛn na di wɔl de drɛs. Wi nɔ fɔ drɛs kialɛs wan ilɛk na bifo ɔ afta di kɔnvɛnshɔn ɔ we wi de na di say we wi lɔj. Dat go mek wi nɔ shem fɔ  tɛl pipul dɛn se wi na Jiova Witnɛs, ɛn wi go rɛdi fɔ prich to pipul dɛn ɔltɛm.

9, 10. Wetin mek di wɔd dɛn we de na Lɛta Fɔ Filipay 2:​4 fɔ afɛkt di we aw wi de drɛs?

⁹ Rid Lɛta Fɔ Filipay 2:​4. Wetin mek wi fɔ tink bɔt aw di we we wi drɛs de afɛkt wi brɔda ɛn sista dɛn? Wan rizin na dat Gɔd in pipul dɛn de tray tranga wan fɔ fala di advays we se: “Una fɔ kil di tin we de insay una at we de mek una want fɔ du dɛn bad tin we dɛn ɔda mɔtalman de du, dat na fɔ liv fri ɔ dɔti layf.” (Lɛta Fɔ Kɔlɔse 3:​2, 5) Sɔm pan wi brɔda ɛn sista dɛn dɔn lɛf fɔ du mami ɛn dadi biznɛs di we aw Gɔd nɔ want, bɔt i nɔ stil izi fɔ dɛn fɔ kɔntrol di we aw dɛn de tink. If wi nɔ tek tɛm, di we aw wi de drɛs go mek i nɔ izi fɔ lɛ dɛn fala di advays dɛn we di Baybul de gi ɛn fɔ mek dɛn ebul kɔntrol di we aw dɛn de tink. (Fɔs Lɛta Fɔ Kɔrint 6:​9, 10) I nɔ go fayn fɔ lɛ wi mek i nɔ izi fɔ dɛn fɔ ebul kɔntrol di we aw dɛn de tink, nɔto so?

¹⁰ We wi de wit wi brɔda ɛn sista dɛn, dat de protɛkt wi frɔm pipul dɛn we de liv fri layf. Di we aw wi de drɛs fɔ mek wi ɔganayzeshɔn nɔ gɛt badnem, ilɛk wi de na mitin ɔ wi de pan wi yon biznɛs. Pan ɔl we wi fri fɔ pik wetin wi want fɔ wɛr, wi fɔ  pik klos dɛn we go mek i izi fɔ mek ɔda pipul dɛn tink ɔ tɔk bɔt gud tin dɛn, ɛn biev di we we fayn na Gɔd in yay. (Pita In Fɔs Lɛta 1:​15, 16) If wi rili lɛk wi kɔmpin dɛn, wi nɔ go du ɛnitin we go mek “pipul nɔ rɛspɛkt” wi ɛn wi nɔ go want lɛ wi “yon biznɛs nɔmɔ go bifo.”—Fɔs Lɛta Fɔ Kɔrint 13:​4, 5.

11, 12. Aw wetin de na Ɛkliziastis 3:​1, 17 go ɛp wi we wi de pik klos fɔ wɛr?

¹¹ We Gɔd in pipul dɛn de pik wetin dɛn want fɔ wɛr, dɛn kin mɛmba se “ɔltin gɛt in tɛm na dis wɔl.” (Ɛkliziastis 3:​1, 17) Difrɛn wɛda, sizin dɛn, di we aw pipul dɛn de liv, ɛn wetin de apin to dɛn kin afɛkt wetin dɛn de wɛr. Bɔt Jiova nɔ de chenj di we aw i want wi fɔ liv.—Malakay 3:​6.

¹² I nɔ kin izi fɔ mek wi drɛs fayn mɔ we ples wam. Wi brɔda ɛn sista dɛn kin gladi we wi nɔ wɛr klos dɛn we tayt ɔ we de mek dɛn si wi bɔdi. (Job 31:​1) Dɔn, we wi de na bich ɔ swimin pul, di klos we wi wɛr nɔ fɔ mek pipul dɛn fil bad. (Prɔvabs 11:​2, 20) Pan ɔl we bɔku pipul dɛn na di wɔl de wɛr klos dɛn we de sho ɔl dɛn bɔdi we dɛn de na bich, di klos we wi fɔ wɛr fɔ briŋ prez to wi oli Gɔd, Jiova.

13. Wetin mek di advays we de na Fɔs Lɛta Fɔ Kɔrint 10:​32, 33 fɔ afɛkt di kayn klos we wi fɔ wɛr?

¹³ Wan ɔda impɔtant advays de we fɔ afɛkt wetin wi de disayd fɔ wɛr. Wi nid fɔ tek tɛm lɛ wi nɔ ambɔg ɔda pipul dɛn kɔnshɛns. (Rid Fɔs Lɛta Fɔ Kɔrint 10:​32, 33.) Wi fɔ avɔyd klos dɛn we go ambɔg wi brɔda ɛn sista dɛn ɛn ivin di wan dɛn we nɔ de sav Jiova. Di apɔsul Pɔl bin rayt se: “Wi ɔl fɔ de du wetin gud fɔ wi kɔmpin Kristiɛn dɛn we go mek dɛn gladi, so dat dɛn go biliv pan Krays gud.” Pɔl bin sho di rizin we i se: “Krays nɔ bin du ɔl wetin i du fɔ pliz insɛf.” (Lɛta Fɔ Rom 15:​2, 3) Fɔ du wetin Jiova want ɛn fɔ ɛp ɔda pipul dɛn, fɔ impɔtant to wi pas wetin wi want, lɛk aw Jizɔs bin de du. So wi nɔ want fɔ wɛr klos dɛn we wi lɛk bɔt we go mek pipul dɛn nɔ lisin to wi mɛsej.

14. Aw mama ɛn papa dɛn go tren dɛn pikin dɛn fɔ briŋ prez to Jiova bay di we aw dɛn de drɛs?

¹⁴ Mama ɛn papa dɛn we na Jiova Witnɛs dɛn fɔ tich dɛn pikin dɛn fɔ fala di advays dɛn we de insay di Baybul. Dɛn fɔ mek shɔ se dɛn ɛn dɛn pikin dɛn de mek Gɔd gladi bay di fayn we aw dɛn de drɛs. (Prɔvabs 22:​6; 27:​11) Aw mama ɛn papa dɛn go tren dɛn pikin dɛn fɔ rɛspɛkt Gɔd ɛn du wetin i want dɛn fɔ du? Mama ɛn papa dɛn fɔ sɛt fayn ɛgzampul fɔ dɛn pikin dɛn. Ɛn dɛn fɔ sho dɛn pikin dɛn usay dɛn go gɛt fayn klos ɛn aw dɛn go pik fayn klos. Pikin dɛn nɔ fɔ jɔs pik klos dɛn we dɛn lɛk, bɔt dɛn fɔ pik klos dɛn we de briŋ prez to Jiova, we na di Gɔd we dɛn de wɔship.

15. Wetin go ɛp wi fɔ disayd fɔ du di rayt tin?

¹⁵ Di Baybul gɛt fayn fayn advays dɛn we go ɛp wi fɔ disayd fɔ du di rayt tin we go briŋ prez to Gɔd. Pan ɔl dat, wetin wi de wɛr de sho wetin wi rili lɛk. Di stayl dɛn we wi lɛk ɛn di klos dɛn we wi ebul fɔ bay kin difrɛn frɔm di wan we ɔda pipul dɛn lɛk ɔ ebul fɔ bay. Bɔt ɔltɛm, wi klos fɔ nit, klin, wi fɔ tek tɛm pik am, i fɔ fit usay wi de wɛr am go, ɛn i nɔ fɔ mek pipul dɛn fil bad na di eria we wi de.

16. Wetin mek i impɔtant fɔ lɛ wi du ɔl wetin wi ebul du fɔ drɛs fayn?

¹⁶ Nɔto ɔltɛm i kin izi fɔ gɛt di rayt klos dɛn we fayn fɔ wɛr. Bɔku tɛm, na klos dɛn  we bɔku pipul dɛn lɛk na in dɛn kin sɛl. So wi nid fɔ yuz bɔku tɛm fɔ fɛn di rayt klos ɛn wi fɔ tray tranga wan fɔ fɛn fayn skat, midi, blawz, ɔ kot ɛn trɔsis we nɔ tu tayt. Bɔt wi brɔda ɛn sista dɛn go notis ɛn gladi fɔ di we aw wi de tray tranga wan fɔ wɛr klos dɛn we fayn ɛn we fit fɔ usay wi wɛr am. Wi go gladi fɔ no se wi de briŋ prez to wi Papa na ɛvin we lɛk wi. Ɛn dat bɛtɛ pas ɛnitin we wi go dɔn du fɔ mek wi wɛr fayn klos.

17. Wetin na sɔm tin dɛn we go ɛp brɔda fɔ no if i fɔ kip bia-bia ɔ if i nɔ fɔ kip am?

¹⁷ Yu tink se i fayn fɔ mek brɔda dɛn kip bia-bia? Di Lɔ we Gɔd bin gi Mozis bin se man dɛn fɔ kip bia-bia. Bɔt Kristian dɛn nɔ de ɔnda da Lɔ de ɛn dɛn nɔ fɔ fala am pawpa. (Lɛvitikɔs 19:​27; 21:​5; Lɛta Fɔ Galeshya 3:​24, 25) Na sɔm ples dɛn, if pɔsin shep in bia-bia ɛn kia fɔ am fayn, pipul dɛn nɔ kin fil bad ɛn dɛn kin ivin rɛspɛkt am, ɛn dat nɔ go mek dɛn nɔ lisin to wi mɛsej. Infakt, sɔm brɔda dɛn we de bifo na di kɔngrigeshɔn na dɛn kayn ples dɛn ya dɔn kip dɛn bia-bia. Bɔt pan ɔl dat, sɔm brɔda dɛn kin disayd nɔ fɔ kip bia-bia. (Fɔs Lɛta Fɔ Kɔrint 8:​9, 13; 10:​32) Na ɔda say dɛn, i bad fɔ kip bia-bia, so Jiova Witnɛs dɛn we de de nɔ fɔ kip dɛn bia-bia. Infakt, if brɔda kip in bia-bia i nɔ go briŋ prez to Jiova ɛn i go “gɛt bɔt nain layf.”—Fɔs Lɛta To Timoti 3:​2, 7; Lɛta Fɔ Rom 15:​1-3.

18, 19. Aw Mayka 6:​8 go ɛp wi?

¹⁸ Wi rili gladi we Jiova nɔ gi wi lɔng lɔng list we de sho uskayn klos wi fɔ wɛr ɛn uswan wi nɔ fɔ wɛr. Bifo dat, i dɔn gi wi fridɔm fɔ pik wetin wi want fɔ wɛr wans wi fala di advays dɛn we de insay di Baybul. So pan ɔl we na wi de disayd aw fɔ drɛs, wi stil want fɔ sho se wi de tek tɛm du tin we wi de sav Gɔd.—Mayka 6:​8.

¹⁹ Wi no se Jiova na klin ɛn oli Gɔd, ɛn aw i want wi fɔ liv na di bɛst we we go ɛp wi. If wi want fɔ ɔmbul ɛn tek tɛm du tin, wi fɔ fala di we aw Gɔd want wi fɔ liv wi layf. We wi tek tɛm du tin, i go ɛp wi bak fɔ rɛspɛkt di we aw ɔda pipul dɛn de fil ɛn tink.

20. Aw di we we wi de drɛs kin afɛkt ɔda pipul dɛn?

²⁰ Di klos we wi de wɛr fɔ sho klia wan se na Jiova wi de wɔship. Jiova gɛt di we aw i want wi fɔ liv, ɛn wi gladi fɔ du wetin i se. Wi nid fɔ tɛl wi brɔda ɛn sista dɛn tɛnki fɔ we dɛn de tek tɛm wit di we aw dɛn de drɛs ɛn di we aw dɛn de biev. Dat de mek bɔku pipul dɛn de kam fɔ lan di trut na di Baybul, dɛn de mek Jiova gladi, ɛn dɛn de briŋ prez to am. We wi disayd fɔ du di rayt tin we i kam pan wetin fɔ wɛr, wi de kɔntinyu fɔ briŋ prez to di Wan we “ɔlman rɛspɛkt” ɛn we rili wɔndaful.—Sam 104:​1, 2.