1, 2. Wetin mek sɔm mama ɛn papa dɛn kin wɔri we dɛn pikin dɛn want fɔ gi dɛn layf to Jiova ɛn baptayz?

BƆKU bɔku Baybul studɛnt dɛn dɔn gi dɛn layf to Jiova ɛn baptayz. Bɔku pan dɛn na yɔŋ wan dɛn we dɛn mɛn insay di trut ɛn we dɔn disayd fɔ liv dɛn layf di bɛst we. (Sam 1:​1-3) If yu na Kristian we gɛt pikin, sɔntɛm yu go de wet fɔ di tɛm we yu bɔy pikin ɔ yu gyal pikin go baptayz.—Luk Jɔn in Tɔd Lɛta 4.

² Stil yu go de wɔri. Yu go dɔn si sɔm yɔŋ wan dɛn we dɔn baptayz bɔt leta dɛn bigin fɔ dawt if i rili impɔtant fɔ lɛ dɛn liv dɛn layf di we aw Gɔd want. Sɔm dɔn ivin lɛf di trut. So yu go de wɔri se yu pikin go stat fɔ sav Jiova bɔt leta i nɔ go lɛk di trut igen lɛk aw i bin lɛk am. Sɔntɛm yu go de tink se yu pikin go tan lɛk sɔm Kristian dɛn we bin de na Ɛfisɔs insay di fɔstɛm Kristian dɛn tɛm. Jizɔs bin  tɛl dɛn se: “Una nɔ lɛk mi lɛkɛ aw una bin lɛk mi fɔstɛm.” (Rɛvɛleshɔn 2:​4) Aw yu go ɛp yu pikin fɔ kɔntinyu fɔ lɛk di trut ɛn fɔ machɔ mɔ ɛn mɔ? (Pita in Fɔs Lɛta 2:​2, NW) Wi kin lan frɔm Timoti in ɛgzampul.

3. (a) Aw Timoti bin bi Kristian? Wetin i bin de du wit di tin dɛn we i bin de lan? (b) Us tri tin dɛn we Pɔl bin tɛl Timoti bɔt?

³ Na insay di ia 47 fɔs di apɔsul Pɔl bin go insay Listra. I go bi se na bin di fɔstɛm dis we Timoti bin lan bɔt wetin Jizɔs bin de tich. Timoti bin de du di tin dɛn we i bin de lan, ɛn afta tu ia, i bin bigin fɔ travul wit Pɔl. Afta lɛk 16 ia, Pɔl bin rayt to Timoti se: “Kɔntinyu fɔ du di tin dɛn we yu dɔn lan ɛn di tin dɛn we yu biliv gud gud wan. Mɛmba udat bin lan yu dɛn tin ya ɛn mɛmba se na frɔm we yu smɔl, yu dɔn sabi di oli tin dɛn we dɛn rayt [di Ibru Skripchɔ dɛn]. Dɛn tin ya go mek yu gɛt sɛns ɛn ɛp yu fɔ sev if yu gɛt fet pan Krays Jizɔs.” (Sɛkɔn Lɛta to Timoti 3:​14, 15, NW) Notis se Pɔl bin tɔk se Timoti (1) dɔn sabi di oli tin dɛn we dɛn rayt, (2) biliv gud gud wan, di tin dɛn we i dɔn lan, ɛn (3) gɛt sɛns we go ɛp am fɔ sev bikɔs i gɛt fet pan Krays Jizɔs.

4. Wetin yu dɔn yuz fɔ tich yu smɔl pikin dɛn? (Luk di pikchɔ nia dis atikul in taytul.)

⁴ Kristian dɛn we gɛt pikin want fɔ mek dɛn pikin dɛn sabi di oli tin dɛn we dɛn rayt; tide dɛn oli tin dɛn ya na di Ibru Skripchɔ ɛn di Kristian Grik Skripchɔ dɛn. Ivin smɔl pikin dɛn kin lan bɔt pipul dɛn ɛn di tin dɛn we bin apin we dɛn rayt insay di Baybul. Jiova in ɔganayzeshɔn dɔn mek bɔku buk, brosho, ɛn fim dɛn we mama ɛn papa dɛn kin yuz fɔ ɛp dɛn pikin dɛn. Us wan pan dɛn wan ya de insay yu langwej? Fɔ lɛ yu pikin dɛn go gɛt tayt padi biznɛs wit Jiova, dɛn nid fɔ no wetin de na di Baybul.

5. (a) Wetin i min fɔ “biliv gud gud wan”? (b) Aw wi no se Timoti bin biliv di gud nyuz bɔt Jizɔs gud gud wan?

⁵ Nɔto fɔ jɔs tich pikin dɛn bɔt di pipul dɛn we di Baybul tɔk bɔt ɛn di tin dɛn we bin apin trade trade. Mɛmba se Timoti bin “biliv gud gud wan.” Di Grik wɔd we Pɔl bin yuz min “fɔ shɔ bɔt sɔntin” ɔ “fɔ biliv tranga wan di tru tin bɔt sɔntin.” Timoti bin sabi di Ibru Skripchɔ dɛn frɔm we i “smɔl,” dat min se na frɔm di tɛm we i bin rili yɔŋ. Leta, i bin biliv tranga wan se Jizɔs na di Mɛsaya. Timoti in fet bin rili strɔng ɛn dat bin mek i baptayz ɛn wok wit Pɔl as mishɔnari.

6. Aw yu go ɛp yu pikin dɛn fɔ kɔntinyu fɔ gɛt fet pan Gɔd in Wɔd?

 ⁶ Aw yu go ɛp yu pikin dɛn fɔ gɛt strɔng fet lɛk Timoti, so dat dɛnsɛf go “biliv gud gud wan”? Fɔs, na fɔ peshɛnt. I kin tek tɛm fɔ lɛ pɔsin gɛt strɔng fet. I nɔ min se bikɔs yu biliv sɔntin so yu pikin dɛn bak fɔ biliv am wantɛm wantɛm. Ɛni pikin nid “fɔ tink gud wan” fɔ insɛf so dat i go gɛt strɔng fet pan di Baybul. (Rid Lɛta fɔ Rom 12:​1, NW.) As mama ɔ papa, yu go ebul du bɔku tin fɔ ɛp yu pikin dɛn fɔ kɔntinyu fɔ gɛt fet mɔ we dɛn aks kwɛstyɔn dɛn. Lɛ wi si wetin wi go lan frɔm wan papa in ɛgzampul.

7, 8. (a) Aw wan papa we na Kristian sho se i peshɛnt we i de tich in gyal pikin? (b) Ustɛm yu bin nid fɔ peshɛnt wit yu pikin?

⁷ Tɔmɔs we gɛt gyal pikin we ol 11 ia tɔk se, sɔntɛnde, in pikin kin aks am kwɛstyɔn dɛn lɛk: “Yu nɔ tink se sɔntɛm Jiova bin yuz ɛvolushɔn fɔ mek layf na di wɔl?” ɔ “Wetin mek, fɔ ɛgzampul, wi nɔ de put an pan sɔm tin dɛn na wi eria ɔ pan ilɛkshɔn so dat wi go mek tin bɛtɛ?” Tɔmɔs se sɔntɛnde i kin tray tranga wan nɔ fɔ jɔs tɛl in pikin wetin i fɔ biliv. Tɔmɔs no se nɔto big big tin kin mek pɔsin rili biliv sɔntin, bɔt na smɔl smɔl pruf dɛn i nid.

⁸ Tɔmɔs no bak se i nid fɔ peshɛnt wit in pikin so dat i go ebul fɔ tich am. Rili, ɔl Kristian dɛn nid fɔ peshɛnt. (Lɛta Fɔ Kɔlɔse 3:​12) Tɔmɔs kam si se i go nid bɔku tɛm ɛn i nid fɔ tɔk to in pikin plɛnti tɛm so dat i go ɛp am fɔ biliv Gɔd in Wɔd mɔ ɛn mɔ. I nid fɔ tek tɛm tɔk wit am bɔt wetin i de lan frɔm di Baybul. Tɔmɔs tɔk se: “We i kam pan impɔtant tin dɛn, mi ɛn mi wɛf kin rili want fɔ no if wi gyal pikin rili biliv wetin i de lan ɛn if i mek sɛns to am. If i gɛt kwɛstyɔn dɛn, dat fayn. Fɔ tru, if i jɔs gri wit ɛnitin we wi tɛl am ɛn i nɔ aks kwɛstyɔn dɛn, a fɔ dɔn wɔri.”

9. Aw yu go ɛp yu pikin dɛn fɔ biliv Gɔd in Wɔd?

⁹ We mama ɛn papa dɛn peshɛnt fɔ tich dɛn pikin dɛn, leta di pikin dɛn go bigin fɔ ɔndastand aw dɛn fet “wayd, aw i lɔŋ, aw i ay, ɛn aw i dip.” (Lɛta Fɔ Ɛfisɔs 3:​18) Wi kin wach dɛn ej ɛn tich dɛn di kayn we we dɛn go ɔndastand. We di tin dɛn we dɛn de lan de mek dɛn gɛt strɔng fet, i go izi fɔ mek dɛn tɔk bɔt wetin dɛn biliv to ɔda pipul dɛn, ivin dɛn skulmet dɛn. (Pita In Fɔs Lɛta 3:​15) Fɔ ɛgzampul, yu tink se yu pikin dɛn ebul fɔ yuz di Baybul fɔ ɛksplen wetin kin apin to pɔsin we dɔn day? Yu tink se wetin di Baybul ɛksplen bɔt day mek sɛns to dɛn? * (Luk di futnot.) Mɛmba se yu nid fɔ  peshɛnt fɔ ɛp yu pikin fɔ gɛt mɔ fet ɛn biliv Gɔd in Wɔd, bikɔs i nɔ go go fɔ natin.—Ditarɔnɔmi 6:​6, 7.

10. Wetin fɔ bi di impɔtant tin we wi de tich?

¹⁰ Fɔ tru, yu ɛgzampul bak rili impɔtant fɔ ɛp yu pikin dɛn fɔ gɛt mɔ fet. Wan mama we nem Stɛfani gɛt tri gyal pikin dɛn ɛn i tɔk se: “Frɔm we mi pikin dɛn smɔl smɔl, a bin dɔn de aks misɛf se, ‘A de tɔk to mi pikin dɛn bɔt wetin mek a biliv tranga wan se Jiova de, i lɛk mi, ɛn i de du di rayt tin ɔltɛm? Mi pikin dɛn de si klia wan se a rili lɛk Jiova?’ A nɔ fɔ fil se mi pikin dɛn go biliv gud gud wan we mi nɔ biliv.”

11, 12. Wetin i min fɔ gɛt sɛns? Aw wi no se fɔ machɔ na Gɔd in yay nɔ jɔs min se pɔsin dɔn big?

¹¹ Wi dɔn lan se Timoti bin (1) no di Skripchɔ dɛn ɛn (2) i biliv gud gud wan di tin dɛn we i de lan. Bɔt wetin Pɔl bin min we i bin se di oli tin dɛn we dɛn rayt go ɛp Timoti fɔ sev?

¹² Di Insight on the Scriptures, Vɔlyum 2, ɛksplen se fɔ gɛt sɛns “na we pɔsin ɔndastand ɛn ebul fɔ yuz wetin i dɔn lan frɔm di Baybul fɔ sɔlv prɔblɛm, avɔyd trɔbul, du sɔntin we i dɔn plan fɔ du, ɛn i ebul advays ɔda pipul dɛn fɔ du di sem. Fɔ gɛt sɛns na we pɔsin nɔ ful.” Di Baybul se, “pikin dɛn gɛt wan kaynaba abit fɔ de mek traŋayes.” (Prɔvabs 22:​15) Fɔ gɛt sɛns na we pɔsin nɔ ful ɛn na wan sayn we de sho se pɔsin dɔn machɔ na Gɔd in yay. Fɔ lɛ pɔsin machɔ, i nɔ jɔs min se i dɔn big, bɔt i fɔ fred Jiova ɛn du wetin i want.—Rid Sam 111:​10.

13. Aw yɔŋ wan dɛn go sho se dɛn gɛt di kayn sɛns we go mek dɛn sev?

¹³ Yɔŋ wan dɛn we rili dɔn machɔ na Gɔd in yay nɔ go alaw wetin dɛn want fɔ du, ɔ wetin dɛn kɔmpin dɛn want dɛn fɔ du fɔ “chenj wetin dɛn biliv wɛn dɛn yɛri nyu tin, ɔ wɛn pɔsin mek dɛn ful.” (Lɛta Fɔ Ɛfisɔs 4:​14) Bifo dat, dɛn dɔn “lan aw fɔ no wetin gud ɛn wetin bad bay dɛn tin we [dɛn] de du we rayt na Gɔd in yay.” (Di Ibru Pipul Dɛn 5:​14) So dɛn ebul fɔ disayd fɔ du di rayt tin ilɛksɛf dɛn mama ɛn papa ɔ big pɔsin nɔ de si dɛn. (Lɛta Fɔ Filipay 2:​12) Na dis kayn sɛns de mek pɔsin sev. (Rid Prɔvabs 24:​14.) Aw yu go ɛp yu pikin dɛn fɔ gɛt dis kayn sɛns? Yu nid fɔ mek shɔ se dɛn no wetin impɔtant to yu. Dɛn fɔ si se yu de tray fɔ du wetin di Baybul se bay di tin dɛn we yu de du ɛn se.—Lɛta Fɔ Rom 2:​21-23.

14, 15. (a) Wetin yɔŋ pɔsin we want fɔ baptayz fɔ tink bɔt? (b) Aw yu go ɛp yu pikin dɛn fɔ tink bɔt di blɛsin dɛn we pɔsin go gɛt if i obe Gɔd in lɔ dɛn?

¹⁴ Bɔt fɔ mek yu ebul ɛp yu pikin dɛn fɔ gɛt fet mɔ ɛn mɔ, i nɔ jɔs  du fɔ de tɛl dɛn wetin rayt ɛn wetin rɔng. Yu go nid bak fɔ ɛp dɛn fɔ ebul ɛksplen kwɛstyɔn dɛn lɛk: ‘Wetin mek di Baybul se i bad fɔ du sɔm tin dɛn pan ɔl we i tan lɛk se natin nɔ rɔng wit dɛn? Aw a go mek shɔ se fɔ du wetin di Baybul se gud fɔ mi ɔltɛm?’—Ayzaya 48:​17, 18.

¹⁵ If yu pikin want fɔ baptayz, ɛp am fɔ tink siriɔs wan bɔt wetin-ɛn-wetin i fɔ du we i baptayz. Aw i fil bɔt dɛn? Aw dɛn go bɛnifit am? Us prɔblɛm dɛn i go gɛt? Wetin mek di bɛnifit we i go gɛt go pas di prɔblɛm dɛn fa fawe? (Mak 10:​29, 30) I impɔtant fɔ tink bɔt dɛn tin dɛn ya bifo di pikin baptayz. Ɛp yu pikin fɔ tink bɔt di blɛsin dɛn we i go gɛt if i baptayz ɛn di bad tin we go apin if i nɔ obe. Dɔn, i go biliv tranga wan se fɔ du wetin di Baybul se gud fɔ am ɔltɛm.—Ditarɔnɔmi 30:​19, 20.

16. Wetin mama ɛn papa dɛn fɔ du if dɛn pikin we dɔn baptayz nɔ gɛt bɛtɛ fet igen?

¹⁶ Wetin yu fɔ du if yu pikin bigin fɔ dawt sɔm pan di tin dɛn we i dɔn lan frɔm di Baybul afta i dɔn baptayz? Fɔ ɛgzampul, yu bɔy pikin ɔ gyal pikin go  bigin fɔ lɛk di tin dɛn we de na di wɔl. Ɔ i go bigin dawt if i rili fayn fɔ am fɔ du wetin di Baybul se. (Sam 73:​1-3, 12, 13) Di we aw wi go biev go mek i kɔntinyu fɔ sav Jiova ɔ fɔ stɔp. Nɔ agyu wit yu pikin bɔt dat, ilɛksɛf i tu yɔŋ ɔ i dɔn pas twɛlv ia. Bifo dat, mek lɛ i no se yu lɛk am ɛn yu want fɔ ɛp am.

17, 18. If yɔŋ pɔsin gɛt dawt bɔt wetin i dɔn lan na di Baybul, aw in mama ɛn papa go ɛp am?

¹⁷ Yɔŋ pɔsin we dɔn baptayz dɔn gi in layf to Jiova. I dɔn prɔmis Jiova se i go kɔntinyu fɔ wɔship am ɛn lɛk am pas ɛni ɔda tin. (Rid Mak 12:​30.) Jiova de si dis prɔmis as siriɔs tin, so na so wisɛf fɔ si am. (Ɛkliziastis 5:​4, 5) Mɛmba yu pikin bɔt dis. Bɔt fɔs, rid ɛn stɔdi di tin dɛn we Jiova in ɔganayzeshɔn dɔn mek fɔ ɛp mama ɛn papa dɛn. Dɔn, fɛn fayn tɛm fɔ tɔk to yu pikin. Ɛp am fɔ si se we i disayd fɔ gi in layf to Jiova ɛn baptayz na siriɔs tin, bɔt na tin we go mek i gɛt bɔku bɔku blɛsin dɛn.

¹⁸ Fɔ ɛgzampul, yu go gɛt fayn advays dɛn na di say we se “Questions Parents Ask,” insay di buk we gɛt di taytul, Questions Young People Ask—Answers That Work, Vɔlyum 1. I de na pej 289. I advays mama ɛn papa dɛn nɔ fɔ tink se dɛn pikin dɛn nɔ lɛk di trut igen, bɔt dɛn fɔ tray fɔ no wetin rili na di prɔblɛm. Sɔntɛm na dɛn padi dɛn de ambɔg dɛn ɔ na bikɔs dɛn fil se na dɛn wangren de. Ɔ di pikin go fil se ɔda yɔŋ wan dɛn de du mɔ fɔ Jiova pas am. Di buk ɛksplen se we tin lɛk dis apin, i nɔ min se di pikin nɔ gri wit wetin yu biliv. I go mɔs bi se dat de apin bikɔs ɔda tin dɛn de apin to di pikin. Di buk gi advays dɛn bɔt aw mama ɛn papa dɛn go ɛp dɛn pikin dɛn we de dawt wetin dɛn dɔn lan bɔt di trut.

19. Aw mama ɛn papa dɛn go ɛp dɛn pikin dɛn fɔ ‘gɛt sɛns we go ɛp dɛn fɔ sev’?

¹⁹ As mama ɛn papa, yu gɛt siriɔs ɛn impɔtant wok fɔ kɔrɛkt ɛn tich yu pikin dɛn di we aw Jiova want. (Lɛta Fɔ Ɛfisɔs 6:​4) As wi bin dɔn lan, dis min se yu fɔ tich yu pikin dɛn wetin di Baybul se ɛn ɛp dɛn fɔ rili biliv wetin dɛn de lan. We dɛn rili gɛt strɔng fet, dat go ɛp dɛn fɔ gi dɛn layf to Jiova ɛn gi am dɛn bɛst. Lɛ Jiova in Wɔd, in spirit, ɛn wetin yu de du ɛp yu pikin dɛn fɔ ‘gɛt sɛns we go ɛp dɛn fɔ sev.’