1. Wetin mek i impɔtant fɔ baptayz? (Luk di pikchɔ nia dis atikul in taytul.)

ƐVRI ia, bɔku bɔku Baybul studɛnt dɛn de baptayz. Bɔku pan dɛn na yɔŋ pipul dɛn, pikin dɛn we dɔn pas 12 ia ɔ ivin di wan dɛn we nɔ pas 12 ia yet. I go bi se na insay di trut dɛn mɛn dɛn. Yu na wan pan dɛn? If na so i bi, yu dɔn du sɔntin we rili gud. Ɔlman we na Kristian fɔ baptayz. Ɛn i nid fɔ baptayz so dat i go sev ɛn gɛt layf we go de so te go.—Matyu 28:​19, 20; Pita In Fɔs Lɛta 3:​21.

2. Wetin mek yu nɔ fɔ fred fɔ gi yu layf to Jiova?

² We yu bin baptayz, Jiova bigin fɔ blɛs yu bɔku we dɛn. Bɔt yu gɛt bak nyu wok dɛn fɔ du. Uskayn wok dɛn? Di de we yu bin de baptayz, di brɔda we bin gi di tɔk bin aks se: “Bikɔs Jizɔs Krays dɔn kam day fɔ fri wi, yu dɔn lɛf fɔ du di bad tin dɛn we yu bin de du ɛn dɔn gi yu layf  to Jiova fɔ du wetin i want?” Yu bin ansa yɛs. Yu bin prɔmis fɔ lɛk Jiova ɛn fɔ tek in wɔship as sɔntin we rili impɔtant na yu layf. Yu fɔ rigrɛt di prɔmis we yu bin mek? Nɔ, yu nɔ fɔ rigrɛt! Yu nɔ go ɛva rigrɛt fɔ we yu alaw Jiova fɔ gayd yu. Dɛn wan dɛn we nɔ no Jiova de na Setan in wɔl. Setan nɔ bisin bɔt dɛn ɔ bɔt yu atɔl. Infakt, i go gladi if yu kɔmɔt biɛn Jiova ɛn fala am ɛn lɔs di op we yu gɛt fɔ gɛt layf we go de sote go.

3. Aw Jiova dɔn blɛs yu bikɔs yu dɔn gi yu layf to am?

³ Tink bɔt aw Jiova dɔn blɛs yu fɔ we yu gi yu layf to am ɛn baptayz. Yu dɔn gi yu layf to Jiova, so yu fɔ tɔk wit kɔnfidɛns se: “PAPA GƆD [“Jiova,” NW] de wit mi, a nɔ gɛt natin fɔ fred. Wetin mɔtalman gɛt fɔ du mi?” (Sam 118:​6) Na big big ɔnɔ wi gɛt fɔ no se Gɔd de sɔpɔt wi, ɛn i gladi fɔ wi ɛn natin nɔ de we pas dis.

4, 5. (a) Wetin mek wi se fɔ gi yu layf to Jiova na sɔntin we na yusɛf sɛf fɔ du? (b) Us prɔblɛm dɛn de mit ɔlman we na Kristian?

⁴ Yu nɔ go tek yu padi biznɛs we yu gɛt wit Jiova lɛk chɔp mɔni we na yu mama ɛn papa de pul. Ivin if yu stil de wit yu mama ɛn papa, na yusɛf fɔ wok fɔ gɛt fayn padi biznɛs wit Jiova. Wetin mek i impɔtant fɔ mek yu mɛmba dis? Nɔn pan wi nɔ no aw dɛn go tɛst wi fet tumara bambay. Fɔ ɛgzampul, i go bi se yu baptayz bifo yu ol 12 ia. Bɔt naw we yu dɔn pas 12 ia, yu gɛt nyu we dɛn aw yu de fil ɛn nyu prɔblɛm dɛn. Wan titi we dɔn pas twɛlv ia bin tɔk se: “Pikin nɔ go fil bad fɔ we i bi Jiova Witnɛs jɔs bikɔs i nɔ gri fɔ tek batde kek na skul. Bɔt leta afta sɔm tɛm we i go bigin fɔ rili fil fɔ du mami ɛn dadi biznɛs, i go nid fɔ biliv tranga wan se fɔ obe Jiova in lɔ na di bɛst tin fɔ du.”

⁵ Nɔto yɔŋ wan dɛn nɔmɔ kin gɛt nyu prɔblɛm dɛn. Ivin di wan dɛn we baptayz we dɛn dɔn big, kin gɛt prɔblɛm dɛn we de tɛst dɛn fet di we aw dɛn nɔ bin de tink se i go apin. Dis prɔblɛm kin bi dɛn mared, dɛn wɛlbɔdi biznɛs, ɔ dɛn wok biznɛs. Ilɛk ɔmɔs ia wi ol, wi ɔl nid fɔ fetful to Jiova difrɛn difrɛn we dɛn.—Jems 1:​12-14.

6. (a) Aw di prɔmis we yu dɔn mek to Jiova nɔ go ɛva chenj? (b) Wetin yu lan frɔm Lɛta fɔ Filipay 4:​11-13 (NW)?

⁶ Fɔ mek yu go de fetful wan, mɛmba ɔltɛm se di prɔmis we yu dɔn mek to Jiova nɔ go ɛva chenj ilɛk wetin apin. Dis min se yu dɔn prɔmis di Wan we de pantap ɔlman fɔ se yu go wɔship am ilɛk wetin apin, ɛn ivin if yu padi dɛn ɔ yu mama ɛn papa tray fɔ stɔp yu. (Sam 27:​10) Ilɛk uskayn prɔblɛm yu gɛt, mek shɔ se yu aks Jiova fɔ ɛp yu fɔ lɛ yu kɔntinyu fɔ kip di prɔmis we yu dɔn mek to am.—Rid Lɛta fɔ Filipay 4:​11-13, NW.

7. Wetin i min fɔ “tray tranga wan fɔ du wetin go mek una sev”?

⁷ Jiova want mek yu bi in padi. Bɔt i nɔ izi fɔ mek yu kɔntinyu fɔ bi padi to am ɛn fɔ tray tranga wan fɔ du wetin i want we go mek yu sev. Lɛta fɔ  Filipay 2:​12 (NW) tɔk se: “Una fɔ fred as una de tray tranga wan fɔ du wetin go mek una sev.” Dis min se wi nid fɔ tek tɛm tink bɔt aw wi go gɛt tayt padi biznɛs wit Jiova ɛn kɔntinyu fɔ de fetful to am ilɛk wetin apin. Wi nɔ go jɔs tink se wi go du am. Mɛmba se ivin sɔm pan di wan dɛn we bin dɔn wɔship Jiova fɔ lɔng lɔng tɛm nɔ kɔntinyu fɔ de fetful wan. Wetin-ɛn-wetin go ɛp wi fɔ tray tranga wan fɔ du wetin Jiova want so dat wi go sev?

8. Wetin i min fɔ stɔdi Gɔd in wɔd? Wetin mek i rili impɔtant?

⁸ Fɔ bi Jiova in padi, wi nid fɔ lisin to am ɛn tɔk to am. Wan fayn we fɔ lisin to Jiova na bay we wi de stɔdi di Baybul. Dis min se wi fɔ rid ɛn tink gud wan bɔt wetin de na Gɔd in Wɔd ɛn di buk ɛn magazin dɛn. Bɔt fɔ stɔdi di Baybul nɔ jɔs min se yu fɔ kram di tin dɛn we yu de rid lɛk we yu go kram fɔ ɛgzam na skul. Bɔt fɔ rid di Baybul tan lɛk we yu de go sɔnsay usay yu go si ɛn lan nyu tin dɛn bɔt Jiova. Yu go kam nia Jiova ɛn insɛf go kam nia yu.—Jems 4:​8.

9. Wetin-ɛn-wetin dɔn ɛp yu we yu de stɔdi?

⁹ Jiova in ɔganayzeshɔn dɔn gi wi bɔku tin dɛn we go ɛp yu we yu de stɔdi. Fɔ ɛgzampul, sɔm atikul dɛn de na jw.org we dɛn kɔl “Bible Study Activities” ɔnda di say we se  “Teenagers,” we go ɛp yu fɔ du wetin yu de lan frɔm di stori dɛn na di Baybul. Dɔn bak na jw.org, yu go fɛn stɔdi gayd dɛn fɔ di buk we nem “Wetin Rili di Baybul De Tich?” Dɛn tin dɛn ya go ɛp yu fɔ gɛt mɔ fet ɛn fɔ ɛksplɛn to ɔda pipul dɛn wetin yu biliv. Yu go fɛn ɔda pɔynt dɛn we yu de stɔdi insay di atikul we nem, “Young People Ask . . . How Can I Make Bible Reading Enjoyable?” we de na di Epril 2009 Awake! Fɔ stɔdi ɛn fɔ tink gud wan bɔt wetin yu de stɔdi na impɔtant tin we go mek yu sev.—Rid Sam 119:​105.

10. Wetin mek Kristian we dɔn baptayz nid fɔ pre?

¹⁰ We wi de stɔdi di Baybul, wi de lisin to Jiova, ɛn we wi de pre, wi de tɔk to am. Wi nɔ fɔ tink se prea na jɔs abit we wi fɔ gɛt ɔ na ‘gudlɔk’ fɔ lɛ gud tin apin to wi. Prea na we we wi de tɔk to di Wan we mek wi. Jɔs tink bɔt dis: Jiova want fɔ yɛri wetin wi de se! (Rid Lɛta Fɔ Filipay 4:​6.) So ɛnitɛm we yu wɔri bɔt ɛnitin, mɛmba wetin di Baybul tɛl wi we i se: “Lɛf ɔltin gi PAPA GƆD [“Jiova,” NW].” (Sam 55:​22) Bɔku pan wi brɔda ɛn sista dɛn go tɛl yu se dis advays dɔn ɛp dɛn ɛn i go ɛp yu bak.

11. Wetin mek yu fɔ tɛl Jiova tɛnki ɔltɛm?

¹¹ Bɔt wi nɔ fɔ jɔs pre we wi want lɛ Jiova ɛp wi. Di Baybul mɛmba wi se: “Una fɔ sho se una gɛt tɛnki.” (Lɛta fɔ Kɔlɔse 3:​15, NW) Sɔntɛnde, wi kin wɔri tumɔs bɔt wi prɔblɛm dɛn ɛn dat kin mek wi nɔ de si ɔl di gud tin dɛn we wi gɛt. So tray dis: Ɛvride, tink bɔt lɛk tri gud tin dɛn we yu gladi fɔ ɛn tɛl Jiova tɛnki fɔ dat. Wan yɔŋ titi we nem Abigɛl we bin baptayz we i ol 12 ia bin tɔk se: “A tink se na Jiova nɔmɔ fit fɔ lɛ wi tɛl tɛnki pas ɛnibɔdi na dis wan ol wɔl. Ɛni chans we wi gɛt, wi fɔ tɛl am tɛnki fɔ di gift dɛn we i dɔn gi.” Sɔntɛnde, Abigɛl kin aks insɛf wan kwɛstyɔn we i bin dɔn yɛri. Di kwɛstyɔn se: “If a wek tumara wit ɔl di tin dɛn we a dɔn tɛl Jiova tɛnki fɔ tide, wetin rili a go gɛt?” * (Luk di futnot.)

12, 13. Aw yu dɔn si fɔ yusɛf se Jiova gud? Wetin mek i impɔtant fɔ tink bɔt aw Jiova dɔn ɛp yu?

¹² Jiova bin ɛp Kiŋ Devid fɔ bia bɔku prɔblɛm dɛn we bin mit am. Di tin dɛn we bin apin to Devid bin mek i tɔk se: “Kam si fɔ yusɛf se PAPA GƆD [“Jiova,” NW] na gud PAPA GƆD; i fayn fɔ di man, we de aks am fɔ kɔba am.” (Sam 34:​8) Dis vas de sho se na  wisɛf sɛf nid fɔ si se Jiova na gud Gɔd. We yu rid di Baybul ɛn wi buk ɛn magazin dɛn ɛn we yu go di mitin dɛn, yu de lan aw Gɔd dɔn ɛp ɔda pipul dɛn fɔ kɔntinyu fɔ fetful to am. Bɔt as yu de kɔntinyu fɔ gɛt tayt padi biznɛs wit Jiova, i go fayn fɔ mek yu si aw Jiova de ɛp yu. Aw yu dɔn si fɔ yusɛf se Jiova rili gud?

¹³ Ɔlman we na Kristian go mɔs dɔn si wan spɛshal we aw Jiova sho se i gud. I dɔn kɔl wi wan bay wan fɔ kam nia in ɛn in Pikin. Jizɔs bin se: “Nɔbɔdi nɔ go kam to mi pas mi Papa we sɛn mi briŋ di pɔsin kam to mi.” (Jɔn 6:​44) Yu fil se na Jiova kɔl yu fɔ kam to am? Ɔ yu de tink se, ‘Fɔ se Jiova kɔl mi mama ɛn papa to am ɛn a jɔs de fala dɛn’? Mɛmba se we yu bin gi yu layf to Jiova ɛn baptayz, yu bin gɛt spɛshal padi biznɛs wit am. Di Baybul tɛl wi se: “If pɔsin lɛk Gɔd, Gɔd no se da pɔsin de na in yon.” (Fɔs Lɛta Fɔ Kɔrint 8:​3) Ɔltɛm, valyu di wok we Jiova dɔn gi yu na in ɔganayzeshɔn.

14, 15. Aw di prichin wok go ɛp yu fɔ gɛt fet mɔ ɛn mɔ?

¹⁴ Yu dɔn si bak aw Jiova gud we i gi yu maynd fɔ tɔk bɔt wetin yu biliv to ɔda pipul dɛn we yu de fil savis ɔ we yu de na skul. I nɔ kin izi fɔ prich to yu skulmet dɛn. Sɔntɛm yu go de wɔri bɔt wetin dɛn go du. Ɔ i kin bi se yu kin fred mɔ fɔ ɛksplen wetin yu biliv to bɔku pipul dɛn. Wetin go ɛp yu?

¹⁵ Tink bɔt wetin mek yu biliv di tin dɛn we yu biliv. If di stɔdi gayd dɛn we de na jw.org de na yu langwej, mek shɔ se yu yuz dɛn. Dɛn go ɛp yu fɔ tink bɔt wetin yu biliv, wetin mek yu biliv dɛn, ɛn aw fɔ ɛksplen wetin yu biliv to ɔda pipul dɛn. We yu pripia gud gud wan ɛn rili biliv di tin dɛn we yu dɔn lan, yu go want fɔ tɔk to ɔda pipul dɛn bɔt Jiova.—Jɛrimaya 20:​8, 9.

16. Wetin go ɛp yu fɔ gɛt maynd fɔ tɔk bɔt wetin yu biliv?

¹⁶ Pan ɔl we yu go dɔn pripia gud gud wan, yu go stil fred fɔ tɔk bɔt wetin yu biliv to ɔda pipul dɛn. Wan sista we ol 18 ia we bin baptayz di tɛm we i ol 13 ia bin tɔk se: “A sabi wetin a biliv, bɔt sɔntɛnde, i nɔ kin izi fɔ mi fɔ ɛksplen di tin dɛn we a biliv.” So i bin tray fɔ tɔk bɔt di tru tin dɛn we i biliv di kayn we we i nɔ de wɔri. Di sista bin kɔntinyu fɔ tɔk se: “Mi klasmet dɛn nɔ kin fred fɔ tɔk bɔt di tin dɛn we dɛn de du. Misɛf nɔ fɔ fred fɔ tɔk bɔt wetin a biliv. So a kin bigin fɔ tɔk tin lɛk, ‘A bin de tich sɔmbɔdi di Baybul wan de, ɛn . . . ’ Dɔn a kin kɔntinyu mi stori wit wetin a want fɔ tɛl dɛn. Pan ɔl we wetin a want tɔk nɔ kɔmɔt frɔm di Baybul, bɔku tɛm ɔda wan dɛn kin want fɔ no bɔt wetin dɛn de tich frɔm di Baybul. Sɔntɛnde dɛn kin aks kwɛstyɔn dɛn bɔt wetin a dɔn tɛl dɛn. Di mɔ we a kin yuz dis we fɔ tɔk, na di  mɔ i kin izi fɔ mi fɔ prich. Ɛn afta ɔltin, a kin fil gud!”

17. Wetin bak go ɛp wi fɔ prich to ɔda pipul dɛn?

¹⁷ We ɔda pipul dɛn fil se yu rili bisin bɔt dɛn ɛn yu de rɛspɛkt dɛn, dat kin mek am izi fɔ dɛn fɔ rɛspɛkt yu ɛn di tin dɛn we yu biliv. Ɔlivia we ol 17 ia ɛn we dɔn baptayz fɔ sɔm tɛm naw bin tɔk se: “A bin dɔn de fred ɔltɛm se if a bigin fɔ tɔk bɔt di Baybul to pipul dɛn, dɛn go fil se a tu strikt wit mi rilijɔn.” Dɔn i bigin fɔ si tin ɔda kayn we. Bifo i tink bɔt di tin dɛn we kin mek i fred, i bigin tink se: “Bɔku yɔŋ pipul dɛn nɔ no natin bɔt Jiova Witnɛs dɛn. Na wi nɔmɔ dɛn sabi. So di we aw wi de biev go mek dɛn lisin to wi ɔ dɛn nɔ lisin to wi. Wetin go apin if wi de shem ɔ if wi de tink se i nɔ izi fɔ tɔk bɔt wetin wi biliv, ɔ if wi de fred? Dat go mek dɛn fil se wi nɔ gladi fɔ udat wi bi. Dɛn nɔ go ivin trit wi fayn bikɔs wi nɔ gɛt kɔnfidɛns. Bɔt if wi de prich wit kɔnfidɛns bɔt wetin wi biliv ɛn wi de tɔk bɔt am ɔltɛm, dat go mek dɛn rɛspɛkt wi.”

18. Wetin yu nid fɔ du fɔ tray tranga wan fɔ mek yu sev?

¹⁸ Wi dɔn si se na siriɔs wok wi gɛt fɔ tray tranga wan fɔ mek wi sev. Fɔ du dis, yu nid fɔ rid ɛn tink gud wan bɔt Gɔd in Wɔd, pre to Jiova, ɛn tink gud wan bɔt ɔl di tin dɛn we i dɔn du fɔ ɛp yu. We yu du dis, dat go ɛp yu fɔ biliv tranga wan se Jiova na yu Padi. Dis go mek yu want fɔ tɔk to ɔda pipul dɛn bɔt wetin yu biliv.—Rid Sam 73:​28.

19. Wetin mek i impɔtant fɔ tray tranga wan fɔ mek yu sev?

¹⁹ Jizɔs bin se: “If ɛnibɔdi want bi mi lanin bɔy, di pɔsin nɔ fɔ du wetin i want fɔ du nɔmɔ, i fɔ rɛdi fɔ sɔfa ɛn day fɔseka mi, ɛn du wetin a de du.” (Matyu 16:​24) Fɔ tru, fɔ fala Jizɔs, ɛnibɔdi we na Kristian fɔ gi in layf to Jiova ɛn baptayz. Bɔt dis na jɔs wan we fɔ bigin fɔ liv wɔndaful layf naw ɛn we go mek yu gɛt layf we go de sote go insay Gɔd in nyu wɔl. So na fɔ du ɔl wetin yu ebul fɔ kɔntinyu fɔ wok tranga wan fɔ mek yu sev!