1-3. (a) Wetin na wan pan di men tin dɛn we wi fɔ biliv? (b) Wetin mek di prɔmis fɔ se di wan dɛn we dɔn day go gɛt layf bak rili impɔtant? (Luk di pikchɔ nia dis atikul in taytul.)

IF SƆMBƆDI aks yu wetin na di men tin dɛn we yu biliv, wetin yu go se? Fɔ tru, yu go se yu biliv se Jiova na di Wan we mek ɔltin ɛn na in gi wi layf. Sɔntɛm yu go tɔk bak se yu biliv Jizɔs Krays we day fɔ fri wi frɔm sin ɛn day. I go mɔs bi se yu go tɔk bɔt aw di wɔl go bi Paradays tumara bambay usay Gɔd in pipul dɛn go de sote go. Bɔt yu go tɔk se di prɔmis we Gɔd dɔn mek fɔ gi layf bak to di wan dɛn we dɔn day na wan pan di tin dɛn we yu valyu pas ɔl?

² Wan pan di men tin dɛn we wi biliv na dat Gɔd go gi layf bak to di wan dɛn we dɔn day, ilɛksɛf wi gɛt di op fɔ sev di tɛm we da big trɔbul [gret tribyuleshɔn] go kam ɛn de na dis wɔl sote go. Di apɔsul Pɔl bin sho wetin mek i impɔtant fɔ biliv se di wan dɛn we dɔn day go gɛt layf bak. I bin se if di wan dɛn we dɔn day nɔ gɛt fɔ gɛt layf  bak, “dat min se Gɔd nɔ bin mek Krays rayz frɔm di grev.” If Jizɔs nɔ bin gɛt layf bak, i nɔ bin fɔ dɔn rul as Kiŋ na ɛvin, ɛn wi prichin wok bin fɔ dɔn bi fɔ natin. (Rid Fɔs Lɛta Fɔ Kɔrint 15:​12-19.) Bɔt wi no se Jizɔs bin gɛt layf bak. Bikɔs wi biliv se i bin gɛt layf bak, wi nɔ tan lɛk di Ju Lɔ ticha dɛn we nɔ biliv se di wan dɛn we dɔn day go gɛt layf bak. Pan ɔl we ɔda pipul dɛn de laf wi, wi stil biliv tranga wan se Gɔd go gi layf bak to di wan dɛn we dɔn day.—Mak 12:​18; Di Apɔsul Dɛn Wok [Akt] 4:​2, 3; 17:​32; 23:​6-8.

³ Pɔl bin se di tin we wi de tich fɔ se “Gɔd go mek dɛn pipul we bin dɔn day rayz frɔm dɛn grev,” na wan pan di men tin dɛn we wi de tich bɔt Krays. (Di Ibru Pipul Dɛn 6:​1, 2) Pɔl bin se i biliv tranga wan se di wan dɛn we dɔn day go gɛt layf bak. (Di Apɔsul Dɛn Wok [Akt] 24:​10, 15, 24, 25) Pan ɔl we dis na di men tin we wi biliv ɛn na wan pan di impɔtant tin dɛn we wi go lan frɔm Gɔd in Wɔd, wi stil nid fɔ tek tɛm stɔdi bɔt di wan dɛn we bin gɛt layf bak. (Di Ibru Pipul Dɛn 5:​12) Wetin mek?

4. Us kwɛstyɔn dɛn wi kin aks bɔt di tɛm we Gɔd go gi layf bak to di wan dɛn we dɔn day?

⁴ We pipul dɛn bigin fɔ stɔdi di Baybul, dɛn kin rid di stori dɛn bɔt di wan dɛn we bin dɔn gɛt layf trade trade, lɛk we Lazarɔs bin gɛt layf bak. Dɛn kin lan bak se Ebraam, Job, ɛn Daniɛl bin biliv tranga wan se di wan dɛn we dɔn day go gɛt layf bak tumara bambay. Bɔt wetin yu go se if sɔmbɔdi aks yu fɔ pruv frɔm di Baybul wetin mek wi fɔ biliv se di wan dɛn we dɔn day go gɛt layf bak, pan ɔl we Gɔd dɔn mek dis prɔmis fɔ lɔng lɔng tɛm? Yu tink se ɛnisay de na di Baybul we sho ustɛm Gɔd go gi layf bak to di wan dɛn we dɔn day tumara bambay? Di ansa to dɛn kwɛstyɔn dɛn ya go mek yu gɛt fet mɔ ɛn mɔ.

5. Wetin na di fɔs tin we wi go tɔk bɔt?

⁵ I go izi fɔ wi fɔ imajin se sɔmbɔdi we jɔs day go gɛt layf bak. (Jɔn 11:​11; Di Apɔsul Dɛn Wok [Akt] 20:​9, 10) Bɔt wi go biliv if dɛn prɔmis wi se sɔmbɔdi we dɔn day lɔng lɔng tɛm go gɛt layf bak? Wi go biliv if na prɔmis we dɛn mek fɔ pɔsin we i dɔn te we i day ɔ fɔ pɔsin we jɔs day? Bɔt yu biliv se sɔmbɔdi bin gɛt layf bak pan ɔl we i bin dɔn te we Gɔd mek dis prɔmis. Udat na bin da pɔsin? Ɛn wetin dat gɛt fɔ du wit di op we yu gɛt fɔ se di wan dɛn we dɔn day go gɛt layf bak tumara bambay?

6. Aw Jizɔs bin mek di wɔd dɛn we dɛn rayt na Sam 118 kam tru?

⁶ Sɔntɛm i go bi se na Devid bin rayt Sam 118. Lɛ wi yuz am fɔ ɛksplen bɔt wetin di Baybul bin dɔn tɔk bɔt wan pɔsin we bin gɛt layf bak trade trade. Dis Sam tɔk se: “Duya Jiova, wi de beg fɔ mek yu sev wi!” ɛn “Blɛsin de fɔ di wan we kam fɔseka Jiova in nem.” Pipul dɛn bin kot dis skripchɔ bɔt di Mɛsaya di tɛm we Jizɔs bin de rayd go insay Jerusɛlɛm, Naysan 9, shɔt tɛm bifo i day. (Sam 118:​25, 26, NW; Matyu 21:​7-9) Bɔt aw Sam 118 bin tɔk bɔt  pɔsin we bin gɛt layf bak lɔng tɛm bifo i apin? Notis wetin Devid bin tɔk bak we i se: “Di ston we dɛn wan we de bil nɔ bin want, nain kam bi impɔtant pas ɔl pan di bildin.”—Sam 118:​22.

7. Aw di Ju pipul dɛn bin dinay Jizɔs?

⁷ “Di wan we de bil” na di Ju bigman dɛn we dinay di Mɛsaya. Dɛn nɔ bin jɔs dinay Jizɔs nɔmɔ ɔ nɔ biliv se na in na di Krays. Bɔku Ju pipul dɛn bin dinay am bay we dɛn bin tɛl Paylet fɔ kil am. (Lyuk 23:​18-23) Fɔ tru, na dɛn mek Jizɔs day.

8. Aw Jizɔs bi di men ston pan di bildin?

⁸ If dɛn bin dinay ɛn kil Jizɔs, aw i bin bi di ston we “impɔtant pas ɔl pan di bildin”? Dat go apin nɔmɔ if i gɛt layf bak. Jizɔs bin mek dis klia we i bin tɛl dɛn wan stori bɔt wan man we bin gɛt wan land. Di man bin sɛn mɛsenja dɛn to in wokman dɛn na in fam. Di wokman dɛn na di fam nɔ bin trit dɛn mɛsenja dɛn ya fayn. Leta di man we gɛt di fam sɛn in yon bɔy pikin bikɔs i bin tink se di wokman dɛn go lisin to am. Bɔt dɛn bin kil in pikin. Afta we Jizɔs tɛl dɛn di stori, i bin kot di wɔd dɛn we de na Sam 118:​22. (Lyuk 20:​9-17) Di apɔsul Pita bin yuz dis sem vas we i bin de tɔk to di Ju bigman dɛn, di ɛlda dɛn, ɛn di Ju lɔ ticha dɛn we bin gɛda na Jerusɛlɛm. I tɔk bɔt “Jizɔs Krays we kɔmɔt Nazarɛt, we una bin kil pan stik, bɔt we Gɔd gi layf bak.” Dɔn i tɔk bak se, dis na ‘di ston we una we de bil nɔ bin valyu bɔt i dɔn bi di men ston pan di bildin.’”—Di Apɔsul Dɛn Wok [Akt] 3:​15; 4:​5-11, NW; Pita In Fɔs Lɛta 2:​5-7.

9. Us impɔtant tin we Sam 118:​22 se go apin?

⁹ Di wɔd dɛn we dɛn rayt na Sam 118:​22 tɔk bɔt pɔsin we go gɛt layf bak lɔng tɛm bifo i apin. Dɛn go dinay di Mɛsaya ɛn kil am. Bɔt i go gɛt layf bak ɛn i go bi di men ston pan di bildin. We Jizɔs bin gɛt layf bak, na in “nɔmɔ ebul sev pɔsin.”—Di Apɔsul Dɛn Wok [Akt] 4:​12; Lɛta Fɔ Ɛfisɔs 1:​20.

10. (a) Wetin Sam 16:​10 bin dɔn tɔk? (b) Wetin mek wi shɔ se Sam 16:​10 nɔ bin de tɔk bɔt Devid?

¹⁰ Lɛ wi tɔk bɔt wan ɔda vas we tɔk bɔt aw pɔsin we dɔn day go gɛt layf bak. Dɛn wɔd ya bin apin lɛk wan tawzin ia so afta dɛn tɔk am. Dis fɔ mek wi biliv se pɔsin we dɔn day kin gɛt layf bak lɔng tɛm afta we dɛn tɔk bɔt  am se i go apin. Insay Sam 16, wi dɔn rid wetin Devid bin tɔk we i se: “Yu nɔ go lɛf mi na di Grev. Yu nɔ go alaw yu fetful savant fɔ rɔtin.” (Sam 16:​10, NW) Devid nɔ bin de tray fɔ tɔk se i nɔ go ɛva day ɛn go insay di Grev. Gɔd in Wɔd tɔk klia wan se Devid bin ol ɛn day ɛn “dɛn bɛr am na Devid in siti.” (Fɔs Kiŋ 2:​1, 10) So udat dis vas bin de tɔk bɔt?

11. Ustɛm Pita ɛksplen wetin de na Sam 16:​10?

¹¹ Afta lɛk wan tawzin ia we Devid rayt dɛn wɔd dɛn de, Pita bin ɛksplen udat Sam 16:​10 bin de tɔk bɔt. Sɔm wik afta Jizɔs day ɛn gɛt layf bak, Pita tɔk to Ju pipul dɛn ɛn ɔda pipul dɛn we bin kam jɔyn di Ju pipul dɛn fɔ wɔship Jiova. (Rid Di Apɔsul Dɛn Wok [Akt] 2:​29-32.) I mɛmba dɛn se Devid bin dɔn day ɛn dɛn bin dɔn bɛr am. Bɔt di Baybul nɔ tɔk se ɛni wan pan dɛn bin dinay we Pita tɔk se, “Devid bin dɔn no bifo di tin bi, na dat mek i tɔk bɔt aw di Mɛsaya go rayz frɔm di grev.”

12. Aw wetin de na Sam 16:​10 bin apin? Wetin dat pruv bɔt di tɛm we di pipul dɛn we dɔn day go gɛt layf bak?

¹² Pita sɔpɔt di pɔynt we i mek bay we i kot wetin Devid tɔk na Sam 110:​1. (Rid Di Apɔsul Dɛn Wok [Akt] 2:​33-36, NW.) Di we aw Pita yuz di skripchɔ dɛn bin ɛp di krawd fɔ biliv tranga wan se na Jizɔs na di “Masta ɛn Krays.” Di pipul dɛn bin kam fɔ no se wetin de na Sam 16:​10 bin apin di tɛm we Jizɔs gɛt layf bak. Leta, di apɔsul Pɔl yuz da sem pruf de we i bin de tɔk to di Ju pipul dɛn na wan siti we dɛn kɔl Antiɔk we de na Pisidia. Di pipul dɛn bin kɔle pan di pruf we Pɔl gi dɛn ɛn dis mek dɛn bin want fɔ no mɔ. (Rid Di Apɔsul Dɛn Wok [Akt] 13:​32-37, 42.) Dis fɔ mek wi bak biliv tranga wan se wetin di Baybul bin dɔn tɔk bɔt di tɛm we pipul dɛn we dɔn day go gɛt layf bak na tru tin we gɛt fɔ apin pan ɔl we na tumara bambay i gɛt fɔ apin.

13. Us kwɛstyɔn dɛn wi kin aks bɔt di wan dɛn we go gɛt layf bak?

¹³ I fayn fɔ no se pɔsin we dɔn day go gɛt layf bak lɔng lɔng tɛm afta we dɛn bin dɔn tɔk se i go apin. Bɔt sɔm pipul dɛn kin aks se: ‘Fɔ se a gɛt fɔ wet fɔ lɔng tɛm bifo a si mi pɔsin we a lɛk we dɔn day? Ustɛm di wan dɛn we dɔn day go gɛt layf bak?’ Wɛl, Jizɔs bin tɛl in apɔsul dɛn se sɔm tin dɛn de we dɛn nɔ no, ɛn dɛn nɔ gɛt fɔ no dɛn. Ɛn na in “Papa nɔmɔ gɛt rayt fɔ tɔk ustɛm ɔl dɛn tin de go bi.” (Di Apɔsul Dɛn Wok [Akt] 1:​6, 7; Jɔn 16:​12) Bɔt wi no tin dɛn we go ɛp wi fɔ no di tɛm we di wan dɛn we dɔn day go gɛt layf bak.

14. Aw di layf we Jizɔs bin gɛt bak difrɛn frɔm di wan dɛn we bin gɛt layf bifo am?

¹⁴ Pan ɔl di wan dɛn we di Baybul tɔk se bin day ɛn gɛt layf bak, Jizɔs in yon bin pas ɔl. If Jizɔs nɔ bin day ɛn gɛt layf bak, nɔn pan wi nɔ fɔ gɛt di op se in pɔsin we i lɛk we dɔn day go gɛt layf bak. Di pipul dɛn we bin day ɛn gɛt layf bak bifo Jizɔs, lɛk di wan dɛn we Ilayja ɛn Ilaysha bin gi layf bak nɔ bin de sote go. Dɛn bin day bak ɛn tɔn dɔti na di Grev. Bɔt Jizɔs in bin “rayz  frɔm di grev.” I “nɔ go day igen; day nɔ gɛt pawa oba am igen.” Na ɛvin i go de “sote go.”—Lɛta Fɔ Rom 6:​9; Rɛvɛleshɔn 1:​5, 18; Lɛta Fɔ Kɔlɔse 1:​18; Pita In Fɔs Lɛta 3:​18.

15. Wetin mek dɛn kɔl Jizɔs di “fɔs avɛst”?

¹⁵ Di layf we Jizɔs bin gɛt bak fɔ go de na ɛvin as spirit pɔsin na bin di fɔs ɛn impɔtant wan we ɛva apin. (Di Apɔsul Dɛn Wok [Akt] 26:​23) Bɔt nɔto in wan gɛt fɔ gɛt layf bak fɔ go de na ɛvin. Jizɔs prɔmis in fetful disaypul dɛn fɔ se dɛn go go rul wit am na ɛvin. (Lyuk 22:​28-30) Bɔt na afta we dɛn day dɛn go gɛt dis blɛsin. Dɔn lɛk Jizɔs, dɛn go gɛt layf bak wit spirit bɔdi. Pɔl rayt se: “Krays dɔn gɛt layf bak, na in na di fɔs avɛst pan ɔl di wan dɛn we dɔn day.” Pɔl bin tɔk bak se ɔda pipul dɛn de we go gɛt layf bak ɛn go de na ɛvin. I se: “Na bay tɔn ɔlman go gɛt layf bak: na Krays fɔs, afta am, ɔl di wan dɛn we na Krays in yon go gɛt layf bak di tɛm we i go de wit wi.”—Fɔs Lɛta Fɔ Kɔrint 15:​20, 23, NW.

16. Wetin wi no bɔt di tɛm we sɔm pipul dɛn go gɛt layf bak fɔ go de na ɛvin?

¹⁶ Di tin dɛn we Pɔl bin tɔk bɔt ɛp wi fɔ no ustɛm sɔm pipul dɛn go gɛt layf bak fɔ go na ɛvin. I go apin di tɛm we Krays go de wit wi. Fɔ lɔng tɛm, Jiova Witnɛs dɛn dɔn pruv frɔm di Baybul se na frɔm 1914 Krays bigin fɔ rul. Wi stil de insay di tɛm we Krays go de wit wi, ɛn di tɛm fɔ lɛ dis wikɛd wɔl dɔn nɔ de fa igen.

17, 18. Wetin go apin to sɔm anɔyntɛd dɛn di tɛm we Krays go de wit wi?

¹⁷ Di Baybul ɛksplen klia wan bɔt di wan dɛn we go gɛt layf bak fɔ go na ɛvin. I se: “Wi wan mek una no di tru tin bɔt dɛn pipul we dɔn day . . . Wi biliv se Jizɔs day, bɔt i rayz frɔm di grev, so wi biliv se, semweso Gɔd go tek dɛn pipul we bin biliv pan Jizɔs sote dɛn day go na di say we Jizɔs de . . . Wi we nɔ go day yet wɛn i kam bak, nɔ go rich na ɛvin bifo dɛn pipul we bin dɔn day. Pipul go yɛri lawd vɔys de tɛl dɛn wetin dɛn fɔ du . . . ɛn di Masta insɛf go kɔmɔt na ɛvin kam dɔŋ. Na dɛn pipul we bin biliv pan Krays so te dɛn day fɔs go rayz frɔm dɛn grev; afta dat, Gɔd go mek wi we nɔ go dɔn day yet ɛn dɛn wan we bin dɔn day, go ɔp na di klawd, ɛn wi ɔl go gɛda rawnd di Masta. So wi go de wit di Masta ɔltɛm.”—Fɔs Lɛta Fɔ Tɛsalonayka 4:​13-17.

¹⁸ Di fɔs wan dɛn we go gɛt layf bak go rayz jɔs afta di tɛm we Krays go de wit wi. Di anɔyntɛd wan dɛn we go de alayf di tɛm we da big trɔbul go bigin, go “go ɔp na di klawd.” (Matyu 24:​31) Wetin dat min? Di wan dɛn we go “go ɔp na di klawd” nɔ go “day” fɔ lɔng tɛm. Bifo dat, dɛn “go chenj, kwik kwik wan, lɛkɛ wɛn pɔsin wink in yay, di tɛm we dɛn go blo di las trɔmpɛt.”—Fɔs Lɛta Fɔ Kɔrint 15:​51, 52.

19. Wetin di Baybul min we i tɔk bɔt “layf we bɛtɛ pas di wan we dɛn bin gɛt”?

¹⁹ Tide, bɔku fetful Kristian dɛn nɔto anɔyntɛd ɛn dɛn nɔ pik dɛn fɔ go rul wit Krays na ɛvin. Bifo dat, dɛn de wet fɔ Jiova in de, we i go dɔnawe wit dis wikɛd wɔl. Nɔbɔdi nɔ no di rayt tɛm we  di wɔl go dɔn, bɔt tin dɛn de we de sho se di tɛm nɔ de fa igen. (Fɔs Lɛta Fɔ Tɛsalonayka 5:​1-3) We Gɔd in nyu wɔl go kam, difrɛn we dɛn go de we pipul dɛn go gɛt layf bak. Da tɛm de, pipul dɛn go gɛt layf bak fɔ de na dis wɔl ɛn dɛn go gɛt di op fɔ de pafɛkt wan ɛn nɔ day igen. “Dɛn go gɛt layf we bɛtɛ pas di wan we dɛn bin gɛt.” Wetin dat min? Dat min se dɛn nɔ go day igen lɛk di wan dɛn we bin gɛt layf bak bɔt we bin day leta.—Di Ibru Pipul Dɛn 11:​35.

20. Wetin mek wi fɔ biliv se Gɔd go ɔganayz di we aw i go gi layf bak to di wan dɛn we dɔn day?

²⁰ Di Baybul se di wan dɛn we go gɛt layf bak fɔ go de na ɛvin go gɛt dɛn “yon tɛm.” (Fɔs Lɛta Fɔ Kɔrint 15:​23) So wi fɔ biliv se Gɔd go ɔganayz di we aw i go gi layf bak to di wan dɛn we dɔn day. Dis go mek wi aks se: Fɔ se di wan dɛn we dɔn day dis biɛn tɛm go gɛt layf bak nia di tɛm we Krays go stat fɔ rul fɔ Wan Tawzin Ia, ɛn na di wan dɛn we lɛk dɛn go de de fɔ wɛlkɔm dɛn bak? Fɔ se dɛn fetful man dɛn we bin de trade trade we bin sabi lid go bi di fɔs wan dɛn fɔ gɛt layf bak, ɛn ɛp fɔ ɔganayz Gɔd in pipul dɛn na di nyu wɔl? Wetin go apin to dɛn pipul dɛn we nɔ ɛva sav Jiova? Ustɛm ɛn usay dɛn go gɛt layf bak? Bɔku kwɛstyɔn dɛn de we wi go want fɔ aks. Bɔt wi nɔ nid fɔ wɔri bɔt dɛn tin dɛn de rayt naw. I bɛtɛ fɔ lɛ wi wet ɛn si. Wi biliv se i go fayn fɔ si wetin Jiova go du.

21. Us op yu gɛt?

²¹ Te da tɛm de rich, wi fɔ kɔntinyu fɔ gɛt fet pan Jiova mɔ ɛn mɔ. I yuz Jizɔs fɔ prɔmis se I de mɛmba di wan dɛn we dɔn day ɛn dɛn go gɛt layf bak. (Jɔn 5:​28, 29; 11:​23) Fɔ pruv se Jiova go gi layf bak to di wan dɛn we dɔn day, Jizɔs bin tɔk se, to Jiova, fetful pipul dɛn lɛk Ebraam, Ayzak, ɛn Jekɔb ɛn “ɔl di wan dɛn we dɔn day de alayf.” (Lyuk 20:​37, 38, NW) Wi dɔn si klia wan se, wi gɛt bɔku gud rizin dɛn fɔ tɔk wetin di apɔsul Pɔl bin tɔk we i se: “A biliv lɛkɛ aw dɛnsɛf biliv se Gɔd go mek ɔlman . . . rayz frɔm dɛn grev.”—Di Apɔsul Dɛn Wok [Akt] 24:​15.