1, 2. Aw Toni in ɛkspiriɛns sho se i pɔsibul fɔ lɛ wi chenj?

TONI nɔ mɛn wit in papa. I bin de na sɛkɔndari skul, bɔt i nɔ bin rili lɛk skul biznɛs. Infakt, i bin de tink bɔt fɔ lɛf fɔ go skul ɛn nɔ gradyuet. Wikɛnd tɛm, Toni kin go wach fim ɛn spɛnd tɛm wit in padi dɛn. I nɔ bin de tek drɔgs ɔ lɛk fɛt-fɛt, bɔt in layf nɔ bin gɛt minin. I nɔ bin ivin shɔ se Gɔd de. Wan de, Toni bin mit tu Jiova Witnɛs dɛn ɛn i bin tɛl dɛn di dawt we i gɛt bɔt Gɔd. Dɛn bin gi am tu brosho dɛn fɔ rid; dat na​—Was Life Created? ɛn The Origin of Life—Five Questions Worth Asking.

² Di nɛks tɛm we di Witnɛs dɛn go fɛn Toni, di we aw i bin de tink bin dɔn rili chenj. I rid di brosho dɛn so te di brosho dɛn bin fol-fol ɛn rampul. Toni bin tɛl dɛn se: “Gɔd mɔs de.” I bin stat fɔ stɔdi di Baybul, ɛn smɔl smɔl, di we aw i bin de tink bɔt layf bin chenj. Bifo i stat fɔ stɔdi di Baybul, Toni nɔ bin de tray na skul, bɔt i bin ɛndɔp fɔ bi wan pan di bɛst studɛnt dɛn na in skul! Ivin di prinsipal na di skul bin sɔprayz. I bin tɛl Toni se: “Yu dɔn rili du wɛl  pan di we aw yu de biev ɛn wit yu mak dɛn. Na bikɔs yu de kip kɔmpin wit Jiova Witnɛs dɛn naw?” Toni bin tɛl am se na dat mek, ɛn i bin tɛl di prinsipal di tin dɛn we i bin de lan. I bin gradyuet frɔm sɛkɔndari skul ɛn naw in na rɛgyula payɔnia ɛn ministerial savant. Toni rili gladi naw bikɔs i gɛt Papa we rili lɛk am we na Jiova!—Sam 68:​5.

3. Us advays Jiova gi yɔŋ wan dɛn?

³ Toni in ɛkspiriɛns mɛmba wi se Jiova rili bisin bɔt yɔŋ wan dɛn. I want yu fɔ rili go bifo ɛn mek yu layf gɛt minin, so i de advays yu fɔ mek yu mɛmba “PAPA GƆD we mek yu, naw we yu yɔŋ.” (Ɛkliziastis 12:​1) Dis nɔ kin izi ɔltɛm, bɔt i pɔsibul. Gɔd go ɛp yu fɔ mek yu go bifo we yu yɔŋ ɛn ivin we yu dɔn big. Fɔ ɛp wi fɔ ɔndastand dis gud gud wan, wi go tɔk bɔt wetin bin ɛp di Izrɛlayt dɛn fɔ go na di land we Gɔd bin prɔmis dɛn, ɛn wetin bin mek Devid gɛt trɛnk fɔ kil di jayant we nem Golaya.

4, 5. Us fayn lɛsin wi lan frɔm di we aw di Izrɛlayt dɛn bin win di Kenanayt dɛn ɛn di we aw Devid bin win Golaya? (Luk di pikchɔ nia dis atikul in taytul.)

⁴ Wetin Jiova bin tɛl di Izrɛlayt dɛn fɔ du we dɛn bin want ɛnta di land we i bin dɔn prɔmis dɛn? Yu tink se i bin tɛl dɛn fɔ lɛ dɛn bi gud sojaman dɛn ɔ fɔ tren fɔ fɛt wɔ? Nɔ, nɔto dat i bin tɛl dɛn! (Ditarɔnɔmi 28:​1, 2) I bin tɛl dɛn fɔ obe am ɛn abop pan am. (Jɔshwa 1:​7-9) I go bi se dis advays nɔ bin mek sɛns to mɔtalman, bɔt na bin di bɛst advays fɔ di Izrɛlayt dɛn. Jiova bin ɛp in pipul dɛn fɔ win di Kenanayt dɛn bɔku bɔku tɛm. (Jɔshwa 24:​11-13) Pɔsin nid fɔ gɛt fet fɔ obe Gɔd, bɔt na da fet de kin mek i go bifo na layf ɔltɛm. Na dat bin apin trade, ɛn na dat de apin bak tide.

⁵ Golaya na bin pawaful fɛtman. I bin tɔl lɛk tri mita (9.5 fit), ɛn i bin de ol bad bad wɛpɔn dɛn. (Fɔs Samiɛl 17:​4-7) Bɔt Devid nɔ bin gɛt bad bad wɛpɔn, na di fet we i bin gɛt pan Gɔd ɛn in sling nɔmɔ, i bin gɛt. Pɔsin we nɔ gɛt fet go de tink se Devid na fulman fɔ go fɛt Golaya! Bɔt na Golaya na bin di fulman.—Fɔs Samiɛl 17:​48-51.

6. Wetin wi go tɔk bɔt insay dis atikul?

⁶ Insay di atikul bifo dis, wi bin tɔk bɔt 4 tin dɛn we kin mek wi gɛt gladi-at ɛn go bifo na layf. Wi lan se wi nid fɔ bi pɔsin we bisin fɔ lan bɔt Gɔd, fɔ gɛt gud padi dɛn we lɛk Gɔd, fɔ gɛt fayn fayn gol dɛn, ɛn fɔ valyu di fridɔm we Gɔd dɔn gi wi. Insay dis atikul, wi go tɔk bɔt mɔ we dɛn we wi go bɛnifit if wi du dɛn tin ya. Fɔ du dis, lɛ wi tɔk bɔt sɔm prinsipul dɛn we de na Sam 16.

7. (a) Wetin yu go se bɔt pɔsin we de mɛmba Gɔd pan ɛnitin we i de du? (b) Wetin Jiova bin gi Devid? Aw dat bin afɛkt am?

⁷ Pɔsin we de mɛmba Gɔd pan ɛnitin we i de du gɛt fet, ɛn i de tray fɔ si tin lɛk aw Gɔd de si am. I de alaw Jiova fɔ gayd am ɛn i rɛdi fɔ obe am. (Fɔs Lɛta Fɔ Kɔrint 2:​12, 13) Devid na fayn ɛgzampul bɔt pɔsin we de mɛmba Gɔd pan ɛnitin we i de du. I bin siŋ se Jiova “dɔn gi mi wetin a want.” (Sam 16:​5)  Devid bin gladi fɔ wetin Jiova dɔn gi am, dat na di tayt padi biznɛs we i gɛt wit Gɔd, ɛn i abop pan Am fɔ protɛkt am. (Sam 16:​1) Dis bin mek i tɔk se: “A gladi bad, mi at layt lɛk fɛda pila.” Natin nɔ de we bin de mek Devid gladi pas di tayt padi biznɛs we i bin gɛt wit Jiova!—Rid Sam 16:​9, 11.

8. Wetin na sɔm pan di tin dɛn we go mek yu layf rili gɛt minin?

⁸ Pipul dɛn we de pe atɛnshɔn mɔ fɔ gɛt mɔni ɔ ɛnjɔymɛnt, nɔ go ɛva gɛt di kayn gladi-at we Devid bin gɛt. (Fɔs Lɛta To Timoti 6:​9, 10) Wan brɔda na Kanada bin tɔk se: “Pɔsin nɔ de gɛt tru tru gladi-at frɔm wetin i de gɛt na layf, bɔt na frɔm di Wan we de gi ɔl di gud tin dɛn, we na Jiova Gɔd.” (Jems 1:​17) If yu gɛt fet pan Jiova ɛn sav am, yu layf go rili gɛt minin ɛn yu go gɛt gladi-at. So wetin yu go du fɔ mek yu gɛt strɔng fet? Yu nid fɔ spɛnd tɛm wit Jiova bay we yu de rid in Wɔd di Baybul, luk di fayn tin dɛn we i mek, ɛn tink bɔt in kwaliti dɛn lɛk di lɔv we i gɛt fɔ yu.—Lɛta Fɔ Rom 1:​20; 5:​8.

9. Aw yu go alaw Gɔd in Wɔd fɔ shep yu layf?

⁹ Sɔntɛnde, Gɔd kin sho se i lɛk wi bay we i de kɔrɛkt wi if nid de, jɔs lɛk aw papa we lɛk in pikin kin du. Devid bin valyu dis ɛn i bin tɔk se: “A go prez PAPA GƆD [“Jiova,” NW] bikɔs na in de tɛl mi wetin fɔ du; ivin na nɛt, a de tink bɔt wetin i de tɛl mi fɔ du.” (Sam 16:​7) Devid bin tink gud wan bɔt di advays dɛn we Gɔd de gi am ɛn i bin fala dɛn. I bin alaw di we aw Gɔd de tink fɔ shep am, dat min se i alaw am fɔ chenj in layf so dat i go bi bɛtɛ pɔsin. If yusɛf du di sem tin, yu go lɛk Gɔd ɛn yu go want fɔ du di tin dɛn we de mek i gladi mɔ ɛn mɔ, ɛn yu go bi machɔ Kristian. Wan sista we nem Kristin bin tɔk se we i kin du risach ɛn tink gud wan bɔt wetin i de rid, i kin fil lɛk se Jiova mek dɛn rayt dɛn tin dɛn de jɔs fɔ am!

10. Frɔm wetin de na Ayzaya 26:​3, we yu bi pɔsin we de mɛmba Gɔd pan ɛnitin we i de du, aw dat go ɛp yu?

¹⁰ If yu na pɔsin we de mɛmba Gɔd pan ɛnitin we yu de du, yu go si di wɔl ɛn ɔl di tin dɛn we de de lɛk aw Gɔd de si am. Na Jiova mek yu no dat ɛn na in gi yu di sɛns. Wetin mek? I want mek yu no di impɔtant tin na layf, fɔ disayd fɔ du di rayt tin, ɛn fɔ mek yu nɔ fred we yu de tink bɔt tumara bambay! (Rid Ayzaya 26:​3.) Wan brɔda we nem Jɔshwa we de na Amɛrika bin tɔk se we yu de nia Jiova, yu go no klia wan wetin impɔtant ɛn wetin nɔ impɔtant.

11. Aw Devid bin de pik in padi dɛn?

¹¹ Rid Sam 16:​3. Devid bin no aw fɔ gɛt gud padi dɛn. I bin pik di wan dɛn we lɛk Jiova as in padi dɛn, ɛn dat bin mek i rili gladi. I bin se in padi dɛn na “dɛn wan we de fala PAPA GƆD,” bikɔs dɛn de tray fɔ liv dɛn layf di we aw Jiova want. Wan ɔda man we bin rayt di Sam buk bin fil dis sem we bɔt aw fɔ pik padi dɛn ɛn i rayt se: “Ɔl udat gɛt fred fɔ yu, we de fala yu, na mi padi.” (Sam 119:​63) As wi bin dɔn tɔk na di atikul bifo dis, yusɛf kin ebul gɛt bɔku gud padi dɛn frɔm di wan dɛn we lɛk Jiova ɛn we de obe am. Ɛn i nɔ min se yu padi dɛn fɔ de di sem ej lɛk yu.

12. Wetin mek Devid ɛn Jonɛthan na bin tayt padi dɛn?

 ¹² Devid nɔ bin de pik jɔs di wan dɛn we dɛn ɔl de di sem ej as in padi dɛn. Yu sabi wan pan Devid in tayt padi in nem? Sɔntɛm yu go tink bɔt Jonɛthan. Di padi biznɛs we bin de bitwin Devid ɛn Jonɛthan na wan pan di fayn stori dɛn we wi go rid na di Baybul. Bɔt yu bin no se Jonɛthan bin big pas Devid fɔ lɛk 30 ia? So wetin mek dɛn bin bi tayt padi dɛn? Na bikɔs dɛn ɔl tu bin gɛt fet pan Gɔd. Dɛn bin rɛspɛkt dɛnsɛf bak ɛn valyu di gud kwaliti dɛn we dɛn bin gɛt, lɛk di maynd we dɛn bin gɛt fɔ fɛt Gɔd in ɛnimi dɛn.—Fɔs Samiɛl 13:​3; 14:​13; 17:​48-50; 18:​1.

13. Aw yu go gɛt mɔ padi dɛn? Gi wan ɛgzampul.

¹³ Jɔs lɛk Devid ɛn Jonɛthan, wi go rili gladi we wi gɛt padi dɛn we lɛk Jiova ɛn we gɛt fet pan am. Kiɛra, we bin dɔn sav Gɔd fɔ lɔng tɛm bin tɔk se, “A dɔn mek padi dɛn wit pipul dɛn ɔlsay na di wɔl, pipul dɛn we kɔmɔt difrɛn say ɛn we gɛt difrɛn kɔlchɔ.” If yusɛf du di sem tin, yu go si fɔ yusɛf aw di Baybul ɛn di oli spirit de mek wi ɔl gɛt wanwɔd as wi de wɔship Jiova.

14. (a) Aw yu go ebul sɛt fayn gol dɛn na layf? (b) Wetin sɔm yɔŋ wan dɛn tɔk bɔt dɛn gol dɛn?

¹⁴ Rid Sam 16:​8. To Devid, fɔ sav Gɔd na bin di tin we impɔtant pas ɔl na in layf. If yu falamakata Devid fɔ sɛt gol dɛn ɛn tink ɔltɛm bɔt wetin Jiova want fɔ yu, yu layf go gɛt minin. Wan brɔda we nem Stivin bin tɔk se: “We a de du sɔntin bɔt mi gol we a dɔn sɛt, dɔn a mitɔp fɔ du am, ɛn a si aw a de du wɛl, dat kin mek a rili gladi.” Wan brɔda na Jamani we de sav naw na ɔda kɔntri bin tɔk se: “We a ol, a nɔ go want fɔ tink bɔt mi layf ɛn si se ɔl di tin dɛn we a du na fɔ misɛf nɔmɔ.” Na da sem we de yusɛf de fil? If na da we yu de fil, yuz wetin yu sabi du fɔ ɔnɔ Gɔd ɛn fɔ ɛp ɔda pipul dɛn. (Lɛta Fɔ  Galeshya 6:​10) Sɛt gol dɛn fɔ du mɔ na Jiova in savis ɛn aks am fɔ ɛp yu fɔ mitɔp dɛn gol dɛn ya. Yu go shɔ se i go ansa yu prea!—Jɔn In Fɔs Lɛta 3:​22; 5:​14, 15.

15. Us gol dɛn yu kin sɛt fɔ yusɛf? (Luk di bɔks we gɛt di taytul “Sɔm Gol dɛn fɔ Tink Bɔt.”)

¹⁵ Wetin na sɔm gol dɛn we yu kin sɛt? Yu nɔ tink se yu kin tray fɔ yuz yu yon wɔd dɛn fɔ gi kɔmɛnt na mitin? Ɔ sɔntɛm yu kin sɛt gol fɔ bi payɔnia ɔ fɔ wok na Bɛtɛl? Yu kin tray bak fɔ lan nyu langwej so dat yu go yuz am fɔ tɛl ɔda pipul dɛn di gud nyuz? Wan yɔŋ brɔda we nem Barak we de yuz bɔku pan in tɛm fɔ sav Jiova, bin tɔk se: “No ɔda wok nɔ de we go mek a fil di we aw a kin fil we a de wek ɛni mɔnin ɛn no se a de yuz ɔl mi trɛnk fɔ sav Jiova.”

16. Aw Devid bin fil bɔt Jiova in lɔ ɛn prinsipul dɛn? Wetin mek i bin fil da kayn we de?

¹⁶ Rid Sam 16:​2, 4. As wi lan na di atikul bifo dis, if wi de yuz Gɔd in lɔ ɛn prinsipul dɛn fɔ gayd di we aw wi de liv wi layf, wi go gɛt tru tru fridɔm. Wi go lan fɔ lɛk wetin gud ɛn et wetin bad. (Emɔs 5:​15) Devid bin tɔk se na Jiova de gi am “ɛnitin we gud.” Fɔ du gud na fayn kwaliti. Jiova gud pan ɛnitin we i de du, ɛn na frɔm am ɔl gud tin de kɔmɔt. Devid bin tray tranga wan fɔ falamakata Gɔd ɛn fɔ lɛk di tin dɛn we Jiova lɛk. Bɔt Devid bin lan bak fɔ et di tin dɛn we Gɔd tɔk se bad. Wan pan dɛn tin ya na fɔ wɔship aydɔl, we min fɔ wɔship ɛnitin ɔ ɛnibɔdi apat frɔm Jiova. Fɔ wɔship aydɔl de mek mɔtalman nɔ gɛt rɛspɛkt, ɛn i de tek di glori we Jiova fɔ gɛt ɛn gi am to sɔmbɔdi ɔ ɔda tin.—Ayzaya 2:​8, 9; Rɛvɛleshɔn 4:​11, NW.

17, 18. (a) Wetin Devid bin tɔk bɔt di bad tin dɛn we go apin to pɔsin we de wɔship lay lay gɔd? (b) Wetin mek pipul dɛn tide “go de gɛt trɔbul mɔ ɛn mɔ”?

¹⁷ Insay di tɛm we dɛn bin de rayt di Baybul, bɔku tɛm, lay lay wɔship bin gɛt fɔ du wit mami ɛn dadi biznɛs di we aw Gɔd nɔ want. (Ozie 4:​13, 14) Bɔku pipul dɛn bin lɛk lay lay wɔship bikɔs dɛn gladi fɔ du mami ɛn dadi biznɛs di we aw Gɔd nɔ want. Bɔt yu tink se da kayn wɔship de bin de mek dɛn gladi? Nɔ, i nɔ bin de mek dɛn gladi! Devid bin tɔk se di wan dɛn we bin de wɔship lay lay gɔd dɛn “go de gɛt trɔbul mɔ ɛn mɔ.” Dɛn pipul dɛn de bin de ivin sakrifays dɛn pikin dɛn to lay lay gɔd dɛn! (Ayzaya 57:​5) Jiova bin et da kayn wikɛd tin de we dɛn bin de du. (Jɛrimaya 7:​31) If yu bin de dɛn tɛm dɛn de, yu fɔ dɔn gladi fɔ we yu mama ɛn papa de wɔship Jiova!

¹⁸ Tide, bɔku lay lay rilijɔn dɛn de gri fɔ lɛ pipul dɛn du mami ɛn dadi biznɛs di we aw Gɔd nɔ want lɛk we man ɔ uman de ledɔm wit in kɔmpin. Dis kayn layf kin mek pipul dɛn fil se dɛn gɛt fridɔm, bɔt rili dɛn “de gɛt trɔbul mɔ ɛn mɔ.” (Fɔs Lɛta Fɔ Kɔrint 6:​18, 19) Yu dɔn notis dis? So yɔŋ dɛn, una lisin to una Papa we de na ɛvin. Pruv to yusɛf se i fayn fɔ obe Gɔd. Tek tɛm tink bɔt di bad tin dɛn we go apin if yu du mami ɛn dadi biznɛs di we aw Gɔd nɔ want. Yu go si se no ɛnjɔymɛnt  nɔ de we pas di bad tin dɛn we go apin to yu. (Lɛta Fɔ Galeshya 6:​8) Jɔshwa we wi bin dɔn tɔk bɔt bin se: “Wi kin yuz wi fridɔm we wi gɛt ɛni aw wi want, bɔt if wi nɔ yuz am di rayt we dat kin mek wi nɔ gɛt gladi-at.”

19, 20. Us blɛsin yɔŋ wan dɛn go gɛt if dɛn de obe Jiova ɛn gɛt fet?

¹⁹ Jizɔs bin tɔk se: “If una de du ɔl wetin a tɛl una fɔ du, una na mi lanin bɔy dɛn fɔ tru; una go no wetin tru bɔt Gɔd, ɛn dat go mek una fri.” (Jɔn 8:​31, 32) Wi tɛl Jiova tɛnki fɔ we i mek wi fri frɔm lay lay rilijɔn, frɔm lay lay tin dɛn we pipul dɛn biliv, ɛn we i mek wi lan di tru bɔt am. Wi de wet fɔ tumara bambay we wi “go fri, lɛkɛ aw Gɔd in pikin dɛn dɔn fri.” (Lɛta Fɔ Rom 8:​21) Yu kin ɛnjɔy da kayn fridɔm de ivin naw if yu de fala di tin dɛn we Krays de tich wi. We yu du dis, yu nɔ go jɔs kam fɔ “no wetin tru bɔt Gɔd” bay we yu lan bɔt am nɔmɔ bɔt bay we yu de alaw am fɔ gayd yu pan ɛnitin we yu de du na layf.

²⁰ Yɔŋ wan dɛn, una valyu di fridɔm we Gɔd dɔn gi una. Una yuz am di rayt we. I go ɛp yu fɔ disayd fɔ du di rayt tin naw we go mek yu liv yu layf fayn tumara bambay. Wan yɔŋ brɔda bin se: “Fɔ yuz yu fridɔm di rayt we as yɔŋ pɔsin de rili ɛp yu if leta yu gɛt fɔ disayd fɔ du big tin dɛn, lɛk fɔ fɛn wok we nɔ go ambɔg yu, ɔ fɔ disayd if yu go mared ɔ yu go wet smɔl bifo yu mared.”

21. Aw yu go gɛt “di tru layf”?

²¹ Insay dis wɔl we wi de tide, di layf we pipul dɛn de kɔl gud layf rili shɔt. No mɔtalman nɔ no wetin go apin tumara bambay. (Jems 4:​13, 14) So di bɛst tin we yu kin du na fɔ disayd fɔ du sɔntin we go ɛp yu fɔ gɛt “di tru layf,” we min layf we go de sote go na Gɔd in nyu wɔl. (Fɔs Lɛta To Timoti 6:​19) Jiova nɔ de fos ɛnibɔdi fɔ sav am. I lɛf to wi fɔ disayd wetin wi want fɔ du. So mek Jiova bi di wan we de gi yu wetin yu want bay we yu de tray tranga wan ɛvride fɔ kam nia am, ɛn valyu ɔl di gud tin dɛn we i gi yu. (Sam 103:​5) Biliv tranga wan se Jiova go gi yu gladi-at we go de sote go!—Sam 16:​11.