1, 2. Us difrɛn we we pipul dɛn de tink bɔt paradays?

BƆKU brɔda ɛn sista dɛn frɔm difrɛn kɔntri dɛn bin kam na Sol insay Koria, fɔ wan kɔnvɛnshɔn. We dɛn bin de lɛf di stediɔm, di lokal brɔda ɛn sista dɛn bin gɛda arawnd dɛn. Dɛn bin de kray, ɔg dɛnsɛf, ɛn dɛn bin de wev de tɛl dɛnsɛf se: “Wi go si na Paradays!” Us Paradays yu tink se dɛn bin de tɔk bɔt?

² Pipul dɛn tide gɛt difrɛn we aw dɛn de tink bɔt paradays. Sɔm se paradays na sɔntin we pɔsin jɔs de imajin. Ɔda pipul dɛn se paradays na ɛnisay we dɛn de we dɛn gladi. Pɔsin we angri bad bad wan go de tink se i de na paradays we i sidɔm bifo tebul we gɛt bɔku bɔku it. Trade trade, wan uman bin si wan fayn vali we gɛt bɔku bɔku flawa dɛn ɛn i ala se, “E-ye, dis na paradays!” Dɛn stil de kɔl da ples de tide Paradays, pan ɔl we ɛni ia sno we ay lɛk 15 mita (50 fit) kin kɔba de. Wetin yu tink se na Paradays? Yu tink se i go kam?

3. Ustɛm dɛn fɔs tɔk bɔt Paradays na di Baybul?

³ Di Baybul tɔk bɔt Paradays we bin de trade ɛn Paradays  we gɛt fɔ de tumara bambay. Na insay di fɔs buk na di Baybul wi rid bɔt Paradays fɔ di fɔstɛm. Jɛnɛsis 2:​8 tɔk se: “PAPA GƆD [“Jiova,” NW] mek wan fam na Idɛn [ɔ “paradays fɔ ɛnjɔy,” di Katolik Douay Version] we de na di ist ɛn put di man we i bin dɔn mek de.” (Na wi mek am bold.) Di Ibru langwej se ‘di gadin we bin de na Idɛn.’ Di wɔd “Idɛn” min fɔ “Ɛnjɔy,” ɛn da gadin de na bin rili fayn ples fɔ ɛnjɔy. Di gadin bin rili fayn, plɛnti it bin de de ɛn pis bin de bitwin mɔtalman ɛn animal dɛn.—Jɛnɛsis 1:​29-31.

4. Wetin mek wi go se di gadin we bin de na Idɛn na bin Paradays?

⁴ Dɛn translet di Ibru wɔd fɔ “gadin” as pa·raʹdei·sos insay Grik langwej. Di Cyclopaedia we Ɛmklintɔk ɛn Strɔng rayt tɔk se we Grik pɔsin yɛri di wɔd pa·raʹdei·sos, i go bigin fɔ imajin fayn pak we gɛt big spes, ɛn dɛn protɛkt am frɔm ɛnitin we bad. Na ples bak we gɛt fayn tik dɛn we de bia difrɛn frut dɛn, ɛn we gɛt klin riva wit land we gɛt frɛsh gras we antilop ɛn ship dɛn go it.—Luk Jɛnɛsis 2:​15, 16.

5, 6. Wetin mek Adam ɛn Iv bin lɔs di chans fɔ de na Paradays? Wetin mek sɔm pipul dɛn de wɔnda if wi go ɛva gɛt Paradays na dis wɔl igen?

⁵ Jiova bin put Adam ɛn Iv na da kayn gadin de. Bɔt bikɔs dɛn nɔ bin obe Jiova, dɛn bin lɔs di chans fɔ lɛ dɛn ɛn dɛn pikin dɛn de na Paradays. (Jɛnɛsis 3:​23, 24) Pan ɔl we no mɔtalman nɔ bin de na da Paradays de igen, i tan lɛk se i bin de te di Ebi Ebi Ren kam insay Noa in tɛm.

⁶ Sɔm pipul dɛn go de wɔnda, ‘Wi go ɛva gɛt Paradays na dis wɔl igen?’ Us pruf wi gɛt fɔ se Paradays go de? If yu gɛt di op fɔ de na Paradays wit di wan dɛn we yu lɛk, us gud rizin yu gɛt fɔ dat? Yu go ebul ɛksplen wetin mek yu biliv tranga wan se Paradays gɛt fɔ de na dis wɔl tumara bambay?

7, 8. (a) Us prɔmis Gɔd bin mek to Ebraam? (b) Wetin Ebraam go dɔn tink bɔt we Gɔd bin mek da prɔmis de to am?

⁷ Di bɛst say fɔ luk fɔ di ansa to dɛn kwɛstyɔn dɛn de bɔt Paradays na di Baybul, bikɔs dis buk kɔmɔt frɔm Jiova, we na in na di wan we bin mek di Paradays we bin de trade trade na wan gadin we nem Idɛn. Tink bɔt wetin Gɔd bin tɛl in padi Ebraam. Gɔd bin tɔk se i go mek Ebraam in pikin dɛn bɔku “lɛkɛ sansan na bich.” Dɔn Jiova bin mek dis prɔmis to Ebraam bay we i bin se: “Ɔl ɔda neshɔn dɛn go gɛt blɛsin tru yu jɛnareshɔn bikɔs yu obe [mi].” (Jɛnɛsis 22:​17, 18) Leta, Gɔd bin ripit dis sem prɔmis to Ebraam in pikin ɛn in granpikin.—Rid Jɛnɛsis 26:​4; 28:​14.

⁸ No say nɔ de na di Baybul we tɔk se Ebraam bin tink se mɔtalman dɛn go gɛt dɛn blɛsin bay we dɛn go de na Paradays na ɛvin. So we Gɔd bin prɔmis se “ɔl ɔda neshɔn dɛn” go gɛt blɛsin, i go mɔs bi se Ebraam bin no se dɛn blɛsin ya go bi na dis wɔl. Bɔt fɔ se dis na di wangren pruf we de na di Baybul we sho se Paradays gɛt fɔ de na dis wɔl?

9, 10. Us prɔmis dɛn gi wi gud rizin fɔ fil se Paradays gɛt fɔ de tumara bambay?

 ⁹ Gɔd bin mek wan pan Ebraam in gret gret granpikin, we nem Devid fɔ tɔk bɔt di tɛm we “yu nɔ go si di bad man igen.” (Sam 37:​1, 2, 10) Bifo dat, na “dɛn wan we nɔ tek dɛnsɛf mek natin go gɛt wetin PAPA GƆD prɔmis dɛn ɛn ɛnjɔy pis.” Devid bin tɔk bak se: “Udat dɛn de du wetin rayt go gɛt di land, ɛn dɛn go de de sote go.” (Sam 37:​11, 29; Sɛkɛn Samiɛl 23:​2) Aw yu tink se dis prɔmis go afɛkt di pipul dɛn we want fɔ du wetin Gɔd want? Dɛn gɛt gud rizin fɔ biliv se wande wande, na di wan dɛn we de du wetin rayt go de na di wɔl, ɛn di wɔl go bi Paradays bak jɔs lɛk di gadin we bin de na Idɛn.

¹⁰ Leta, bɔku Izrɛlayt dɛn we bin se dɛn de wɔship Jiova bin stɔp fɔ de biɛn am ɛn fɔ wɔship am di rayt we. So Gɔd bin alaw di Babilonian dɛn fɔ win in pipul dɛn pan fɛt, pwɛl dɛn land, ɛn kapchɔ bɔku pan dɛn. (Sɛkɛn Kronikul 36:​15-21; Jɛrimaya 4:​22-27) Bɔt Gɔd in prɔfɛt dɛn bin tɔk se di pipul dɛn go kam bak na dɛn om-tɔŋ afta 70 ia. Ɛn wetin dɛn prɔfɛt dɛn ya bin tɔk bin apin. Bɔt wetin dɛn bin tɔk gɛt minin fɔ wi bak tide. As wi de tɔk bɔt sɔm pan dɛn, notis aw dɛn gi wi gud rizin dɛn fɔ biliv se Paradays gɛt fɔ de na dis wɔl tumara bambay.

11. Aw di wɔd dɛn we de na Ayzaya 11:​6-9 bin apin fɔ di fɔstɛm? Us kwɛstyɔn wi go stil aks?

¹¹ Rid Ayzaya 11:​6-9. Gɔd bin tɛl di prɔfɛt Ayzaya se we di Izrɛlayt dɛn kam bak na dɛn om-tɔŋ, dɛn go ɛnjɔy pis. Nɔbɔdi nɔ go fred se mɔtalman ɔ animal go atak am. Ɔlman go sef ilɛksɛf na yɔŋ ɔ ol pɔsin. Fɔ se dis mek yu mɛmba di pis we bin de na di gadin we bin de na Idɛn? (Ayzaya 51:​3) Ayzaya bin tɔk bak se nɔto jɔs di Izrɛlayt dɛn bɔt na di wan ol wɔl go “no PAPA GƆD bɛtɛ bɛtɛ wan, lɛk we si ful.” Ustɛm dat go apin? Dis sho klia wan se na tumara bambay dis gɛt fɔ apin.

12. (a) Us blɛsin we di Izrɛlayt dɛn we bin kɔmɔt Babilɔn go gɛt? (b) Wetin sho se wetin de na Ayzaya 35:​5-10 go apin tumara bambay?

¹² Rid Ayzaya 35:​5-10. Notis se Ayzaya bin tɔk bak se we di Izrɛlayt dɛn de kɔmɔt na Babilɔn no mɔtalman ɔ animal nɔ go atak dɛn. I se dɛn land go bia bɔku bɔku it bikɔs wata go bɔku jɔs lɛk aw i bin de na di gadin we bin de na Idɛn. (Jɛnɛsis 2:​10-14; Jɛrimaya 31:​12) Fɔ se na insay di Izrɛlayt dɛn tɛm nɔmɔ dis go apin? Notis se Ayzaya bin tɔk bak se di wan dɛn we blaynd, di wan dɛn we nɔ ebul waka, ɛn di wan dɛn we dɛf dɛn ɔl go wɛl. Bɔt dɛn tin ya nɔ bin apin to di Izrɛlayt dɛn we bin kɔmɔt na Babilɔn. Bifo dat, Gɔd bin de sho se i go mɛn ɔlkayn sik dɛn tumara bambay.

13, 14. Aw wetin de na Ayzaya 65:​21-23 bin apin we di Izrɛlayt dɛn bin kɔmɔt Babilɔn? Us pat pan wetin Ayzaya tɔk we stil gɛt fɔ apin? (Luk di pikchɔ nia dis atikul in taytul.)

 ¹³ Rid Ayzaya 65:​21-23. We di Ju pipul dɛn go bak na dɛn om-tɔŋ, dɛn nɔ bin mit fayn os dɛn, ɔ gadin ɛn fam we gɛt bɔku it dɛn. Bɔt bikɔs Gɔd bin blɛs dɛn, as tɛm de go tin bin chenj. Imajin aw di pipul dɛn bin gladi we dɛn bil dɛn os dɛn ɛn de insay de, ɛn we dɛn de ɛnjɔy di gud it we dɛn dɔn plant!

¹⁴ Notis se Gɔd bin tɛl Ayzaya se jɔs “lɛk aw tik de te na [di] wɔl, na so mi pipul dɛn go liv lɔŋ.” Sɔm tik dɛn kin de fɔ lɔŋ lɔŋ tɛm. Bɔt fɔ mek mɔtalman liv lɛk dat, wi nid fɔ gɛt wɛlbɔdi. Ɛn if dɛn fɔ liv na say we fayn ɛn we gɛt pis jɔs lɛk wetin Ayzaya bin tɔk, i go rili tan lɛk paradays! Ɛn wetin Ayzaya bin tɔk go mɔs bi!

15. Wetin na sɔm pan di blɛsin dɛn we di Baybul buk we nem Ayzaya bin tɔk bɔt?

¹⁵ Tink bɔt aw di prɔmis dɛn we wi jɔs tɔk bɔt sho se Paradays gɛt fɔ de tumara bambay. Di wan ol wɔl go fulɔp wit pipul dɛn we Gɔd dɔn blɛs. Nɔbɔdi nɔ go wɔri se animal ɔ pipul dɛn we lɛk fɛt fɛt go atak am. Di wan dɛn we blaynd, di wan dɛn we dɛf, ɛn di wan dɛn we nɔ de waka go wɛl. Pipul dɛn go bil dɛn yon os dɛn ɛn dɛn go gladi fɔ plant dɛn yon it. Dɛn go gɛt lɔng layf pas di tik dɛn. Fɔ tru, di Baybul gi wi pruf dɛn we de sho se da kayn Paradays de kam. Bɔt sɔm pipul dɛn we wi kin tɔk to kin se dɛn tin ya we di Baybul tɔk nɔ rili min se Paradays gɛt fɔ de na dis wɔl. Wetin yu go tɛl dɛn? Us gud rizin yu gɛt fɔ wet fɔ di tɛm we Paradays go de na dis wɔl? Jizɔs we na di pɔsin we pas ɔl mɔtalman, bin gi wi gud rizin.

16, 17. Ustɛm Jizɔs bin tɔk bɔt Paradays?

¹⁶ Pan ɔl we Jizɔs nɔ bin du bad, dɛn bin sɛntɛns am ɛn ɛŋ am na tik fɔ day wit tu Ju kriminal dɛn, wan na in lɛftan say ɛn di ɔda wan na in raytan say. Wan pan dɛn bin kam fɔ no se Jizɔs na kiŋ ɛn i tɔk se: “Jizɔs, mɛmba mi we yu go na yu Kiŋdɔm.” (Lyuk 23:​39-42, NW) Di prɔmis we Jizɔs bin mek to da kriminal de gɛt sɔntin fɔ du wit wi tumara bambay. Di tin dɛn we Jizɔs bin tɔk de na Lyuk 23:​43 (NW). Sɔm masta sabi bukman dɛn de put kɔma bifo di wɔd “tide” ɛn translet dɛn wɔd dɛn ya: “A de tɛl yu fɔ tru se, tide yu go de wit mi na Paradays.” Pipul dɛn kin tink difrɛn we bɔt usay di kɔma fɔ de na di sɛntɛns. Bɔt wetin Jizɔs bin min we i se “tide”?

¹⁷ Insay bɔku langwej dɛn tide, dɛn de yuz kɔma fɔ ɛp fɔ mek di minin we de na di sɛntɛns klia. Bɔt insay di fɔs fɔstɛm pepa dɛn we dɛn rayt insay Grik langwej, dɛn nɔ bin de yuz pɔntueshɔn mak dɛn lɛk kɔma, fulstɔp ɛn bɔku ɔda wan dɛn ɔltɛm. So wi go de wɔnda: Fɔ se Jizɔs bin de tɔk se, “A de tɛl yu, tide yu go de wit mi na Paradays”? Ɔ fɔ se i bin de tɔk se, “A de tɛl yu tide, yu go de wit mi na Paradays”? Transletɔ dɛn de put kɔma bifo ɔ afta di wɔd “tide” frɔm wetin  dɛn bin tink se Jizɔs bin min, ɛn yu kin si ɔl tu insay bɔku Baybul dɛn tide.

18, 19. Wetin ɛp wi fɔ ɔndastand wetin Jizɔs bin min?

¹⁸ Bɔt mɛmba wetin Jizɔs bin tɛl in disaypul dɛn bɔt in day wan. I bin tɔk se: “Dɛn go bɛr Mɔtalman Pikin, ɛn i go de tri de ɛn nɛt ɔnda di grɔn.” I tɔk bak se: “I dɔn de rich tɛm we dɛn go an ova Mɔtalman Pikin gi pipul. Di pipul dɛn go kil am, dɔn i go rayz frɔm di grev di de we mek tri.” (Matyu 12:​40; 16:​21; 17:​22, 23; Mak 10:​34) Di apɔsul Pita bin rayt se dis bin apin. (Di Apɔsul Dɛn Wok [Akt] 10:​39, 40, NW) So Jizɔs nɔ bin go na Paradays di de we in ɛn da kriminal we de day. Di Baybul se Jizɔs bin de insay “di grev” fɔ tri dez, te Gɔd gi am layf bak.—Di Apɔsul Dɛn Wok [Akt] 2:​31, 32. * (Luk di futnot.)

¹⁹ Jizɔs bin yuz di wɔd dɛn “Fɔ tru, a de tɛl yu tide” we i bin de prɔmis di kriminal. Dis na bin kɔmɔn we aw pipul dɛn bin de tɔk ivin insay Mozis in tɛm. Wan tɛm Mozis bin tɔk se: “Dɛn wɔd ya we a de tɛl una tide fɔ de na una at.”—Dyutɔrɔnɔmi 6:​6, NW; 7:​11, NW; 8:​1, 19, NW; 30:​15, NW.

20. Wetin sɔpɔt di we aw wi ɔndastand wetin Jizɔs bin tɔk?

 ²⁰ Wan Baybul transletɔ we kɔmɔt na di say usay Jizɔs bin de tɔk se: “Di men wɔd insay da vas de na ‘tide’ ɛn wi fɔ rid am as ‘Fɔ tru, a de tɛl yu tide se yu go de wit mi na Paradays.’ Na da de de Jizɔs bin mek di prɔmis bɔt na leta i go apin.” Dis transletɔ bin tɔk bak se na so pipul dɛn bin de tɔk na da eria de ɛn i sho se “na wan patikyula de dɛn mek da prɔmis de ɛn i go rili apin.” Wan Siriak vashɔn we dɛn bin rayt trade trade bin translet dis vas se: “Emɛn, A de tɛl yu tide se yu go de wit mi na di Gadin we bin de na Idɛn.” Dis prɔmis fɔ rili ɛnkɔrej wi ɔl.

21. Wetin nɔ bin apin to di kriminal? Wetin mek?

²¹ We Jizɔs bin de tɔk bɔt Paradays to di kriminal, i nɔ bin min se na ɛvin Paradays go de. Aw wi no dat? Wan rizin na bikɔs di kriminal nɔ bin ivin no se Jizɔs bin dɔn mek agrimɛnt wit in fetful apɔsul dɛn fɔ rul wit am na ɛvin. (Lyuk 22:​29) Dɔn bak, di kriminal nɔ bin ivin baptayz. (Jɔn 3:​3-6, 12) So we Jizɔs bin de mek dis prɔmis to di kriminal, i go mɔs bi se i bin de tɔk bɔt di Paradays we gɛt fɔ de na dis wɔl. Leta, di apɔsul Pɔl bin tɔk bɔt wan vishɔn we i si wan man “fɛn insɛf na di say we dɛn kɔl Paradays kwik kwik wan.” (Sɛkɛn Lɛta Fɔ Kɔrint 12:​1-4) Pan ɔl we dɛn bin pik Pɔl ɛn ɔda apɔsul dɛn fɔ go na ɛvin ɛn rul Jizɔs, Pɔl bin de tɔk bɔt di Paradays we gɛt fɔ de tumara bambay. * (Luk di futnot.) Yu tink se da Paradays de go de na dis wɔl? Yu tink se yu go de de?

22, 23. Wetin yu de op fɔ?

²² Mɛmba se Devid bin tɔk se tɛm go kam we di wan dɛn we de “du wetin rayt go gɛt di land.” (Sam 37:​29; Pita In Sɛkɛn Lɛta 3:​13) Devid bin de tɔk bɔt di tɛm we ɔlman na dis wɔl go fala Gɔd in prinsipul dɛn. Di wɔd dɛn na Ayzaya 65:​22 se: “Na lɛk aw tik de te na [di] wɔl, na so mi pipul dɛn go liv lɔŋ.” Dis sho se di pipul dɛn we go sav Jiova insay di nyu wɔl go de fɔ lɔŋ lɔŋ tɛm. Yu go want dat? Yɛs, bikɔs Rɛvɛleshɔn 21:​1-4, tɔk se Gɔd go blɛs mɔtalman, ɛn wan pan dɛn blɛsin dɛn de na dat “dɛn nɔ go day igen.”

²³ Di tin dɛn we di Baybul tich wi bɔt Paradays rili klia. Adam ɛn Iv bin lɔs di chans fɔ de sote go na Paradays, bɔt dis wɔl go bi paradays bak. Jɔs lɛk aw Gɔd bin dɔn prɔmis, i go blɛs di pipul dɛn we go de na dis wɔl. Devid bin tɔk se di wan dɛn we nɔ tek dɛnsɛf mek natin ɛn di wan dɛn we de du wetin rayt go de na dis wɔl sote go. Ɛn di wɔd dɛn we de na di Baybul buk we nem Ayzaya dɔn ɛp wi fɔ wet fɔ di tɛm we wi go ɛnjɔy layf insay Paradays na dis wɔl we ɔlsay go fayn. Ustɛm dat go apin? I go apin di tɛm we di prɔmis we Jizɔs bin prɔmis da kriminal go bi. Yu go de na da Paradays. Da tɛm de, di wɔd dɛn we di brɔda ɛn sista dɛn bin tɔk na da kɔnvɛnshɔn na Koria go kam tru we dɛn bin se “Wi go si na Paradays!”