1, 2. Us prɔblɛm Jɛftha ɛn in gyal pikin bin gɛt?

WAN yɔŋ uman rɔn fɔ go mit in papa. I bin rili gladi we i si in papa de kam bak afta i kɔmɔt fɛt wɔ ɛn natin nɔ bin du am. Bikɔs in papa bin win di wɔ, dat mek i gladi ɛn bigin fɔ siŋ ɛn dans. Bɔt wetin in papa bin du ɛn se bin mek i sɔprayz. In papa chɛr in klos ɛn bigin fɔ kray se “in gyal pikin dɔn brok in zil; i dɔn gi am bad bad brok at.” I tɛl in gyal pikin se i bin dɔn mek prɔmis to Jiova we go chenj in gyal pikin in layf sote go. Dis prɔmis bin min se in gyal pikin nɔ go ɛva mared ɔ bɔn pikin. Bɔt wantɛm wantɛm in gyal pikin bin ansa am fayn, i ivin ɛnkɔrej in papa se lɛ i du wetin i bin dɔn prɔmis Jiova. Dis ansa we i gi in papa sho se i biliv se ɛnitin we Jiova tɛl am fɔ du na fɔ in yon gud. (Di Jɔj Dɛm 11:​34-37) We in papa si di kayn fet we in pikin gɛt, i bin rili gladi fɔ am bikɔs i no se we in pikin dɔn rɛdi fɔ du wetin Jiova want, dat go mek Jiova gladi.

 ² Jɛftha ɛn in gyal pikin bin rili abop pan Jiova ɛn di we aw Jiova de du tin. Dɛn bin fetful, pan ɔl we i nɔ bin izi fɔ dɛn. Dɛn bin want fɔ mek Jiova gladi fɔ dɛn ɛn dis bin pas ɛni sakrifays we pɔsin kin mek.

3. Wetin mek di ɛgzampul we Jɛftha ɛn in gyal pikin sɛt go ɛp wi tide?

³ I nɔ kin izi fɔ du wetin Jiova want ɔltɛm. Bɔt wi nid fɔ “fɛt fɔ stil biliv” pan Jiova. (Jud In Lɛta 3) Fɔ ɛp wi fɔ du dat, lɛ wi lan mɔ bɔt aw Jɛftha ɛn in gyal pikin bin ebul fɔ bia di prɔblɛm dɛn we bin mit dɛn na layf. Aw dɛn bin ebul fɔ du wetin Jiova want ɔltɛm?

4, 5. (a) Wetin Jiova bin tɛl di Izrɛlayt dɛn fɔ du we dɛn go na di land we i bin dɔn prɔmis dɛn? (b) As Sam 106 tɔk, wetin bin apin to di Izrɛlayt dɛn we dɛn tɔn dɛn bak pan Gɔd?

⁴ Ɛvride, Jɛftha ɛn in gyal pikin go mɔs dɔn de mɛmba bɔt wetin bin de apin we di Izrɛlayt dɛn nɔ bin du wetin Jiova want. Na bin lɛk 300 ia so bin dɔn pas frɔm we Jiova bin tɛl di Izrɛlayt dɛn fɔ kil ɔl di pipul dɛn we de wɔship lay lay gɔd dɛn na di land we i bin dɔn prɔmis dɛn, bɔt dɛn nɔ bin du wetin Jiova se. (Ditarɔnɔmi 7:​1-4) Plɛnti Izrɛlayt dɛn bigin fɔ fala di Kenanayt dɛn, we de wɔship lay lay gɔd dɛn ɛn liv fri layf.—Rid Sam 106:​34-39.

⁵ Bikɔs di Izrɛlayt dɛn nɔ bin du wetin Jiova se, Jiova nɔ bin protɛkt dɛn di tɛm we dɛn ɛnimi dɛn bin de fɛt dɛn. (Di Jɔj Dɛm 2:​1-3, 11-15; Sam 106:​40-43) I go mɔs bi se i nɔ bin izi fɔ mek di famili dɛn we bin lɛk Jiova du wetin Jiova want insay dɛn tɛm dɛn de. Pan ɔl dat, di Baybul tɔk bɔt pipul dɛn we bin fetful, pipul dɛn lɛk Jɛftha ɛn in gyal pikin, Ɛlkena, Ana, ɛn Samiɛl. Dɛn bin rɛdi fɔ mek Jiova gladi.—Fɔs Samiɛl 1:​20-28; 2:​26.

6. Wetin pipul dɛn na di wɔl de pe atɛnshɔn pan tide? Wetin wi fɔ du?

⁶ Insay wi yon tɛm, pipul dɛn kin tink ɛn du tin lɛk di Kenanayt dɛn. Ɔl wetin dɛn de pe atɛnshɔn pan na mami ɛn dadi biznɛs, fɛt-fɛt, ɛn mɔni biznɛs. Bɔt Jiova de wɔn wi klia wan. I want fɔ protɛkt wi jɔs lɛk aw i bin want fɔ protɛkt di Izrɛlayt dɛn fɔ lɛ dɛn nɔ fala di bad tin dɛn we di ɔda pipul dɛn bin de du. Yu tink se wi gɛt ɛni lɛsin we wi go lan frɔm dɛn mistek dɛn? (Fɔs Lɛta Fɔ Kɔrint 10:​6-11) Wi fɔ du ɔl wetin wi ebul fɔ du fɔ avɔyd di we aw di pipul dɛn na di wɔl de tink. (Lɛta Fɔ Rom 12:​2) Yu nɔ tink se i go fayn fɔ lɛ wi tray tranga wan fɔ du dat?

7. (a) Wetin Jɛftha in yon pipul dɛn bin du to am? (b) Wetin Jɛftha bin du?

⁷ Insay Jɛftha in tɛm, di Filistin ɛn di Amonayt dɛn bin de mɔna di Izrɛlayt dɛn bikɔs di Izrɛlayt dɛn nɔ bin de obe Jiova. (Di Jɔj Dɛm 10:​7, 8) Apat frɔm di neshɔn dɛn we nɔ bin lɛk di Izrɛlayt dɛn, Jɛftha bin gɛt prɔblɛm dɛn wit in yon brɔda dɛn ɛn di lida dɛn na Izrɛl. Bikɔs in brɔda dɛn bin de jɛlɔs ɛn et am, dɛn bin fos am fɔ lɛf di land usay i bin kɔmɔt. (Di Jɔj Dɛm 11:​1-3) Jɛftha nɔ  bin gri fɔ mek di wikɛd we aw dɛn bin de biev, chenj di we aw in de biev. Aw wi no dat? Na bikɔs we di bigman dɛn na Izrɛl bin beg am fɔ ɛp dɛn, i bin gri wantɛm wantɛm. (Di Jɔj Dɛm 11:​4-11) Wetin bin mek Jɛftha du dɛn tin ya?

8, 9. (a) Us advays dɛn we de na di Lɔ we Jiova bin gi Mozis bin ɛp Jɛftha? (b) Wetin bin mɔ impɔtant to Jɛftha?

⁸ Jɛftha na bin big big fɛtman, ɛn i bin sabi Izrɛl in istri ɛn di lɔ we Gɔd bin gi Mozis gud gud wan. Di we aw Jiova bin trit di Izrɛlayt dɛn bin mek Jɛftha no wetin rayt ɛn rɔng na Jiova in yay. (Di Jɔj Dɛm 11:​12-27) Jɛftha bin yuz dis tin we i dɔn no fɔ disayd wetin fɔ du na layf. I bin no aw Jiova de fil bɔt pɔsin we gɛt wamat ɛn pɔsin we de tɔn-am-gi ɛn aw Gɔd want In pipul dɛn fɔ lɛk dɛn kɔmpin. Pantap dat, di Lɔ bin ɛp Jɛftha fɔ no aw fɔ trit ɔda pipul dɛn, ivin di wan dɛn we et am.—Rid Ɛksodɔs 23:​4, 5; Lɛvitikɔs 19:​17, 18.

⁹ Di ɛgzampul we Josɛf bin sɛt go mɔs dɔn ɛp Jɛftha. I go dɔn lan bɔt aw Josɛf bin sɔri fɔ in brɔda dɛn pan ɔl we dɛn bin et am. (Jɛnɛsis 37:​4; 45:​4, 5) We Jɛftha tink bɔt dis ɛgzampul, dis go mɔs dɔn ɛp am fɔ du tin dɛn we go mek Jiova gladi. Wetin Jɛftha in brɔda dɛn bin du bin rili mek i vɛks. Bɔt wetin bin mɔ impɔtant to Jɛftha na fɔ fɛt fɔ Jiova in nem ɛn in pipul dɛn, nɔto di we aw i bin de fil. (Di Jɔj Dɛm 11:​9) Jɛftha bin rɛdi fɔ kɔntinyu fɔ du wetin Gɔd want. Dis we we Jɛftha bin biev bin mek Jiova blɛs in ɛn di Izrɛlayt dɛn.—Di Ibru Pipul Dɛn 11:​32, 33.

10. Aw di advays dɛn we Gɔd de gi go ɛp wi fɔ biev lɛk Kristian dɛn?

¹⁰ Ɛnitin de we wi go lan frɔm Jɛftha in ɛgzampul? Wetin wi go du if wi Kristian brɔda dɛn mek wi at pwɛl ɔ wi fil se dɛn nɔ trit wi fayn? Wi nɔ fɔ alaw di wamat we wi gɛt fɔ mek wi nɔ wɔship Jiova. Nɔ ɛva lɛf fɔ go mitin ɔ lɛf fɔ spɛn tɛm wit wi brɔda ɛn sista dɛn na di kɔngrigeshɔn. Lɛ wi falamakata Jɛftha ɛn obe Jiova. Dis go ɛp wi fɔ bia we wi gɛt prɔblɛm dɛn we de mɔna wi so dat wisɛf go bi gud ɛgzampul.—Lɛta Fɔ Rom 12:​20, 21; Lɛta Fɔ Kɔlɔse 3:​13.

11, 12. Us prɔmis we Jɛftha bin mek? Wetin dis bin min?

¹¹ Jɛftha bin no se i nid Gɔd fɔ ɛp am fɔ fri di Izrɛlayt dɛn frɔm di Amonayt dɛn. So i prɔmis Jiova se if Jiova mek i win di fɛt, i go gi am di fɔs pɔsin we go kɔmɔt na in os kam mit am afta we i go dɔn kɔmɔt fɛt. Dis pɔsin go bi lɛk “sakrifays we dɛn de bɔn na faya.” (Di Jɔj Dɛm 11:​30, 31) Wetin dis min?

¹² Jiova nɔ lɛk we dɛn de sakrifays mɔtalman, so wi no se nɔto mɔtalman sakrifays Jɛftha go mek. (Ditarɔnɔmi 18:​9, 10) Insay di lɔ we Gɔd bin gi Mozis,  sakrifays we dɛn de bɔn na faya na bin spɛshal gift we pɔsin kin gi ɔl wetin i de sakrifays to Jiova. So Jɛftha bin min se di pɔsin we i go gi to Jiova go sav Jiova na di tabanakul sote go. Jiova bin lisin to Jɛftha ɛn i ɛp Jɛftha fɔ win di fɛt. (Di Jɔj Dɛm 11:​32, 33) Bɔt udat Jɛftha go gi to Jiova?

13, 14. Aw di wɔd dɛn we Jɛftha bin se na Di Jɔj Dɛm 11:​35 sho di kayn fet we i bin gɛt?

¹³ Tink bɔt di tin we wi bin tɔk bɔt na dis atikul in biginin. We Jɛftha bin kam bak afta we i kɔmɔt fɛt, di fɔs pɔsin we kɔmɔt na in os fɔ kam mit am na in gyal pikin we i lɛk, we na in wangren pikin! Yu tink se Jɛftha go du wetin i bin dɔn prɔmis Jiova? Yu tink se i go gi in wangren gyal pikin to Jiova fɔ mek i go sav am na di tabanakul sote go?

¹⁴ Di advays dɛn we de na Gɔd in Lɔ go mɔs dɔn ɛp Jɛftha bak fɔ disayd wetin na di rayt tin fɔ du. Sɔntɛm i bin mɛmba di wɔd dɛn we de na Ɛksodɔs 23:​19, we tɛl Gɔd in pipul dɛn se dɛn fɔ gi dɛn bɛst to Jiova. Di Lɔ bin tɔk bak se we pɔsin mek prɔmis to Jiova, “i fɔ kip in wɔd ɛn du ɔltin we i se i go du.” (Di Nɔmba Dɛm 30:​2) Wan pɔsin we bin fetful ɛn kip in prɔmis na Ana ɛn sɔntɛm Ana bin de di sem tɛm we Jɛftha insɛf bin de. Jɔs lɛk Ana, Jɛftha fɔ kip in prɔmis, pan ɔl we i no wetin i go min fɔ in gyal pikin ɛn insɛf. Bikɔs in gyal pikin go sav Jiova na di tabanakul, i nɔ go ɛva mared ɔ bɔn pikin. Dis min se nɔbɔdi nɔ go de we go lɛf wit Jɛftha in nem ɛn in prɔpati dɛn. (Di Jɔj Dɛm 11:​34) Bikɔs Jɛftha bin fetful to Jiova, i bin se: “In bin dɔn swɛ to PAPA GƆD ɛn in nɔ go go biɛn in wɔd.” (Di Jɔj Dɛm 11:​35) Jiova bin gladi fɔ di big sakrifays we Jɛftha bin mek ɛn i bin blɛs am. If yu na bin Jɛftha, yu bin fɔ fetful to Jiova lɛk aw Jɛftha bin fetful?

15. Us prɔmis plɛnti pan wi dɔn mek? Aw wi go sho se wi rɛdi fɔ du wetin Gɔd want?

 ¹⁵ We wi bin gi wi layf to Jiova, wi bin prɔmis am se wi rɛdi fɔ du ɔl wetin i want ilɛk wetin apin. Wi bin no se i nɔ go izi ɔltɛm fɔ du wetin wi bin dɔn prɔmis. Bɔt wetin wi go du we dɛn tɛl wi fɔ du sɔntin we wi nɔ lɛk fɔ du? If wi fɔgɛt bɔt aw wi de fil ɛn obe wi Gɔd, wi go sho se wi de kip wi prɔmis. I nɔ kin izi fɔ lɛ wi mek sɔm sakrifays dɛn, bɔt Jiova in blɛsin dɛn pas ɛni sakrifays we wi kin mek. (Malakay 3:​10) Bɔt wetin wi go se bɔt Jɛftha in gyal pikin? Wetin i bin du we in papa tɛl am bɔt di prɔmis we i dɔn mek?

16. Wetin Jɛftha in gyal pikin bin du we i yɛri di prɔmis we in papa bin dɔn mek? (Luk di pikchɔ nia dis atikul in taytul.)

¹⁶ Di prɔmis we Jɛftha bin mek difrɛn frɔm Ana in yon. Ana bin prɔmis fɔ gi in bɔy pikin Samiɛl fɔ mek i go sav na di tabanakul ɛn bi Nazarayt. (Fɔs Samiɛl 1:​11) We pɔsin bi Nazarayt, i kin mared ɛn gɛt in yon famili. Bɔt Jɛftha in yon gyal pikin na bin lɛk “sakrifays we dɛn de bɔn na faya,” we pɔsin kin gi ɔl wetin i de sakrifays to Jiova. So i nɔ go ɛva gɛt da kayn jɔy we mareduman kin gɛt ɛn we mama kin gɛt. (Di Jɔj Dɛm 11:​37-40) Mɛmba se sɔntɛm i bin fɔ dɔn mared wan pan di bɛst man dɛn na Izrɛl bikɔs in papa na bin lida na Izrɛl. Bɔt naw i go gɛt fɔ put insɛf dɔŋ ɛn bi savant na di tabanakul. Wetin dis yɔŋ uman bin du? I bin sho se Jiova in wok na in kam fɔs na in layf. Aw i bin sho dis? Na bay we i bin tɛl in papa se “lɛ i du . . . wetin i bin dɔn prɔmis PAPA GƆD se i go du.” (Di Jɔj Dɛm 11:​36) I bin sakrifays wetin ɔl uman kin want, dat na fɔ mared ɛn bɔn pikin. I bin du ɔl dis fɔ sav Jiova. Aw wi go falamakata am fɔ put wetin wi want na kɔna ɛn du wetin Jiova want?

17. (a) Aw wi go falamakata di kayn fet we Jɛftha ɛn in gyal pikin bin gɛt? (b) Aw di wɔd dɛn we de insay Di Ibru Pipul Dɛn 6:​10-12 go ɛp wi fɔ put wetin wi want na kɔna?

¹⁷ Bɔku Kristian man ɛn uman dɛn we yɔŋ rɛdi fɔ put mared ɛn bɔn pikin biznɛs fɔs na kɔna. Wetin mek dɛn rɛdi  fɔ du dis? Na bikɔs dɛn nɔ want natin fɔ pul dɛn maynd pan di wok we dɛn de du fɔ Jiova. Dɔn bɔku pan wi brɔda ɛn sista dɛn we dɔn ol dɔn sakrifays di tɛm we dɛn go spɛn wit dɛn pikin dɛn ɔ granpikin dɛn. Dɛn de yuz dɛn tɛm ɛn trɛnk fɔ sav Jiova. Sɔm pan dɛn de ɛp fɔ bil ples dɛn we wi de yuz fɔ wɔship Jiova ɔ dɛn de go na di Skul fɔ Pipul dɛn We De Prich bɔt Gɔd in Kiŋdɔm ɛn muf go na ɔda kɔngrigeshɔn we nid mɔ pipul dɛn fɔ prich. Ɔda wan dɛn de plan fɔ spɛn mɔ tɛm fɔ prich bɔt Jiova insay di Mɛmorial tɛm. Jiova nɔ go ɛva fɔgɛt dɛn kayn sakrifays ya we dɛn fetful brɔda ɛn sista ya de mek. (Rid Di Ibru Pipul Dɛn 6:​10-12.) We yu? Yu go ebul mek sakrifays fɔ sav Jiova mɔ ɛn mɔ?

18, 19. Wetin wi dɔn lan frɔm di Baybul bɔt Jɛftha ɛn in gyal pikin? Aw wi go falamakata dɛn?

¹⁸ Wetin bin ɛp Jɛftha fɔ bia ɔl di bɔku prɔblɛm dɛn we i bin gɛt? I bin alaw Jiova fɔ gayd am pan ɛnitin we i want fɔ du na layf. I nɔ bin gri fɔ lɛ di we aw di pipul dɛn bin de biev arawnd am chenj di we aw in de biev. Ɛn i bin fetful pan ɔl we pipul dɛn bin de du tin dɛn fɔ pwɛl in at. Jiova bin blɛs Jɛftha ɛn in gyal pikin fɔ di sakrifays we dɛn bin mek wit ɔl dɛn at ɛn I bin yuz dɛn ɔl tu fɔ ɛp di Izrɛlayt dɛn fɔ kɔntinyu fɔ wɔship am di rayt we. Ivin we ɔda pipul dɛn bin lɛf fɔ du di rayt tin, Jɛftha ɛn in gyal pikin bin kɔntinyu fɔ du wetin Jiova want.

¹⁹ Di Baybul tɔk se: “Una fɔ bi lɛkɛ dɛn pipul we biliv pan Gɔd, we de bia, bikɔs dɛn na di wan dɛn, we go gɛt ɔl wetin Gɔd bin dɔn prɔmis fɔ gi in pipul dɛn.” (Di Ibru Pipul Dɛn 6:​12) Lɛ wi ɔl falamakata Jɛftha ɛn in gyal pikin, bikɔs if wi kɔntinyu fɔ du wetin Jiova want, i go blɛs wi.