1. (a) Wetin Jɛftha ɛn Ana bin du we fiba? (Luk di pikchɔ nia dis atikul in taytul) (b) Us kwɛstyɔn dɛn wi go tɔk bɔt na dis atikul?

JƐFTHA na bin lida we gɛt kɔrej ɛn na bin fɛtman we gɛt maynd. Ana na bin ɔmbul uman we bin de kia fɔ in man ɛn in os. Jɛftha ɛn Ana bin de wɔship Jiova. Bɔt sɔntin bin de we dɛn ɔl tu du we fiba. Jɛftha ɛn Ana bin mek vaw to Jiova, ɛn dɛn ɔl tu kip dɛn vaw. Dɛn sɛt fayn ɛgzampul fɔ man ɛn uman dɛn tide we dɔn mek vaw to Jiova. Naw lɛ wi tɔk bɔt di ansa to dɛn 3 kwɛstyɔn ya: Wetin na vaw? Wetin mek na siriɔs tin fɔ mek vaw to Gɔd? Us lɛsin dɛn wi go lan frɔm Jɛftha ɛn Ana?

2, 3. (a) Wetin na vaw? (b) Wetin di Baybul se bɔt di vaw dɛn we wi de mek to Gɔd?

² Insay di Baybul, vaw na siriɔs prɔmis we pɔsin kin mek to Gɔd. Fɔ ɛgzampul, pɔsin kin prɔmis Jiova se i go du sɔntin, gi sɔntin, du sɔm wok dɛn na in ɔganayzeshɔn, ɔ nɔ put an pan sɔm tin dɛn. Vaw na sɔntin we pɔsin kin disayd fɔ mek, bay we i yuz in fridɔm  fɔ disayd wetin i want fɔ du. Dɛn nɔ de fos nɔbɔdi fɔ mek vaw. Bɔt we pɔsin disayd fɔ mek vaw, Jiova de si di vaw as prɔmis we rili siriɔs we pɔsin fɔ kip. Insay di Baybul, vaw impɔtant jɔs lɛk oth. Oth na we pɔsin swɛ se i go du sɔntin ɔ i nɔ go du am. (Jɛnɛsis 14:22, 23; Di Ibru Pipul Dɛn 6:16, 17) Aw di Baybul sho se wi fɔ tek di vaw we wi dɔn mek to Gɔd as sɔntin we siriɔs?

³ Insay di lɔ we Gɔd bin gi Mozis, wi rid se if ɛnibɔdi mek vaw to Jiova, “i fɔ kip in wɔd ɛn du ɔltin we i se i go du.” (Di Nɔmba Dɛm 30:2) Leta, Sɔlɔmɔn bin rayt se: “Wɛn yu prɔmis PAPA GƆD se yu go du sɔntin, nɔ westɛm fɔ du wetin yu se yu go du; i nɔ lɛk fulman. Du wetin yu se yu go du.” (Ɛkliziastis 5:4) Jizɔs bin sho se fɔ mek vaw to Gɔd na sɔntin we siriɔs, we i se: “Una bin dɔn yɛri wetin dɛn bin tɛl wi grampapa papa dɛn. Dɛn bin se, ‘Una nɔ fɔ swɛ se una go du sɔntin, ɛn una nɔ du am. Una fɔ du wetin una dɔn swɛ bifo’” Jiova se una go du.—Matyu 5:33.

4. (a) Wetin mek fɔ mek vaw to Gɔd na sɔntin we siriɔs? (b) Wetin wi want fɔ lan bɔt Jɛftha ɛn Ana?

⁴ Wi dɔn si klia wan se ɛni prɔmis we wi mek to Jiova, wi fɔ rili tek am siriɔs. Di we aw wi go tek wi vaw kin afɛkt wi padi biznɛs wit am. Devid bin sho dis klia wan we i aks se: “Udat ebul fɔ tinap bifo PAPA GƆD [“Jiova,” NW]?” Dɔn i bin ansa bay we i se Jiova go gladi fɔ ɛni pɔsin we “nɔ de mek ipokrit se i de swɛ, we i nɔ min am.” (Sam 24:3, 4) Us vaw we Jɛftha ɛn Ana bin mek? I bin izi fɔ mek dɛn kip dɛn vaw?

5. Us vaw we Jɛftha bin mek? Wetin bin apin?

⁵ Jɛftha bin mek prɔmis to Jiova we i bin want fɔ go fɛt di Amonayt dɛn. Da neshɔn de na bin ɛnimi to Gɔd in pipul dɛn. (Di Jɔj Dɛm 10:7-9) Jɛftha bin beg Jiova fɔ mek i win di fɛt ɛn i bin prɔmis Jiova se: ‘If i mek i win da fɛt de, in go gi am di fɔs pɔsin we kɔmɔt insay in os fɔ tɛl am kabɔ we i kam om, as sakrifays we dɛn de bɔn na faya.’ Gɔd bin ansa Jɛftha in prea ɛn ɛp am fɔ win di wɔ. We Jɛftha go bak na os, na in wangren gyal pikin we i lɛk kɔmɔt na do fɔ go mit am. Na in i “go gi” Jiova. (Di Jɔj Dɛm 11:30-34) Wetin dat bin min fɔ Jɛftha in gyal pikin?

6. (a) Wetin mek in nɔ bin izi fɔ Jɛftha ɛn in gyal pikin fɔ kip di vaw we Jɛftha bin mek to Gɔd? (b) Wetin wi lan bɔt vaw frɔm Ditarɔnɔmi 23:21, 23 ɛn Sam 15:4?

⁶ Jɛftha in gyal pikin go gɛt fɔ yuz ɔl in tɛm fɔ sav Jiova na di tabanakul  so dat i go du wetin in papa bin dɔn prɔmis. Fɔ se Jɛftha nɔ bin tink gud wan bifo i mek in prɔmis? Nɔ-o. Sɔntɛm Jɛftha bin no se na in gyal pikin go bi di fɔs pɔsin we go kam mit am. Bɔt ilɛksɛf i bin no ɔ i nɔ no, i nɔ bin izi fɔ Jɛftha ɛn in gyal pikin fɔ kip di vaw. We Jɛftha si am, in at bin pwɛl bad bad wan. In gyal pikin ‘go kray fɔ we i go day as vajin.’ Wetin mek? Jɛftha nɔ bin gɛt bɔy pikin, ɛn naw, in wangren gyal pikin nɔ go ɛva mared ɛn bɔn pikin dɛn. Dat min se Jɛftha in famili nem nɔ go kɔntinyu. Bɔt Jɛftha ɛn in gyal pikin bin no se sɔntin de we impɔtant pas di we aw dɛn bin de fil. Jɛftha bin se “in bin dɔn swɛ” to Jiova ɛn “in nɔ go go biɛn in wɔd.” In gyal pikin bin se “lɛ i du am wetin i bin dɔn prɔmis PAPA GƆD [“Jiova,” NW] se i go du.” (Di Jɔj Dɛm 11:35-39) Jɛftha ɛn in gyal pikin nɔ bin ɛva tink bɔt fɔ pwɛl di vaw we dɛn bin dɔn mek to Gɔd, pan ɔl we i nɔ bin izi fɔ mek dɛn kip dɛn prɔmis.—Rid Ditarɔnɔmi 23:21, 23; Sam 15:4.

7. (a) Us vaw we Ana bin mek? Wetin bin apin? (b) Wetin Ana in vaw bin min fɔ Samiɛl? (Luk di futnot.)

⁷ Ana sɛf bin mek vaw to Jiova di tɛm we tin nɔ bin izi fɔ am. In at bin pwɛl bad bad wan bikɔs i nɔ bin ebul fɔ bɔn pikin, ɛn dɛn bin de provok am fɔ dat. (Fɔs Samiɛl 1:4-7, 10, 16) Ana bin tɛl Jiova aw i de fil, ɛn i bin prɔmis Jiova se: “If i kin sɔri fɔ am nɔmɔ ɛn gi am wan bɔypikin, i go gi am bak to” Jiova “fɔ wok fɔ am te i day ɛn i nɔ go kɔt in ia.” * (Luk di futnot.) (Fɔs Samiɛl 1:11) Jiova bin lisin to Ana in prea, ɛn di ɔda ia i bɔn bɔy pikin, we nem Samiɛl. Ana bin rili gladi! Bɔt i nɔ fɔgɛt in vaw we i bin dɔn mek to Jiova. We i bɔn in bɔy pikin, i bin se: ‘A aks Jiova fɔ am.’—Fɔs Samiɛl 1:20.

8. (a) Yu tink se i bin izi fɔ Ana fɔ du wetin i prɔmis? (b) Aw Sam 61 mɛmba yu bɔt Ana in gud ɛgzampul?

⁸ We Samiɛl bin ol lɛk tri ia so, Ana bin du wetin i bin dɔn prɔmis Jiova. I kɛr Samiɛl go to Ilay we na di Ay Prist na di tabanakul na Shilɔ ɛn tɔk se: “Na di pikin we i pre fɔ de wit am so” bikɔs Jiova gi am “wetin i bin aks fɔ. I se so insɛf dɔn briŋ di pikin fɔ gi am bak fɔ de” wit Jiova “te i day.” (Fɔs Samiɛl 1:24-28) Frɔm da tɛm de, Samiɛl bin de na di tabanakul. Di Baybul se Samiɛl bin lɛf na Jiova “in os usay i gro ɔp.” (Fɔs Samiɛl 2:21) Fɔ mek Ana kip in vaw na tin we  nɔ bin izi fɔ am. I min se i nɔ go ebul fɔ spɛn tɛm wit in pikin we i rili lɛk. I nɔ bin ebul fɔ si we in pikin de gro ɔp. Bɔt Ana bin tek in vaw to Jiova rili siriɔs. I bin rɛdi fɔ sakrifays tin dɛn we impɔtant to am fɔ mek i go kip in prɔmis to Gɔd.—Fɔs Samiɛl 2:1, 2; rid Sam 61:1, 5, 8.

9. Wetin wi de kam tɔk bɔt?

⁹ Naw we wi dɔn ɔndastand se fɔ mek vaw to Jiova na sɔntin we rili siriɔs, lɛ wi tɔk bɔt dɛn kwɛstyɔn dɛn ya: Uskayn vaw dɛn wi kin mek tide? Wetin mek wi fɔ mekɔp wi maynd fɔ kip dɛn vaw ya?

10. Us vaw we impɔtant pas ɔl we Kristian go mek? Wetin dis vaw min?

¹⁰ Di vaw we impɔtant pas ɔl we Kristian go mek na we i dɛdiket in layf to Jiova. Aw pɔsin kin mek dis vaw? Di pɔsin kin pre to Jiova usay in wangren de, ɛn prɔmis am se i go yuz in layf fɔ sav am sote go ilɛk wetin apin. Jizɔs bin se “di pɔsin nɔ fɔ du wetin i want fɔ du nɔmɔ,” dat min se  wi fɔ prɔmis fɔ put Jiova fɔs na wi layf nɔto wetin wi want. (Matyu 16:24) Frɔm da de de “wi na Jiova in yon.” (Lɛta Fɔ Rom 14:8, NW) Wi fɔ rili tek dis vaw siriɔs. Wi fɔ fil lɛk wan pan di man dɛn we bin rayt di Sam buk we se: “Wetin a go gi” Jiova “bak fɔ ɔl di gud we i de du fɔ mi? Usay in pipul gɛda na de a go du wetin a prɔmis se a go du.”—Sam 116:12, 14.

11. Wetin bin apin di de we yu baptayz?

¹¹ Yu dɔn dɛdiket yu layf to Jiova, ɛn sho dat bay we yu baptayz? If yu dɔn du am, dat na wɔndaful tin! Yu mɛmba we di brɔda we bin gi di baptizim tɔk aks if yu dɔn dɛdiket yu layf to Jiova? Ɛn if yu ɔndastand se “di dɛdiket we yu dɔn dɛdiket yu layf to Jiova ɛn de kam baptayz, de sho se yu na Jiova Witnɛs”? We yu ansa yɛs, ɔl di wan dɛn we bin de da de de no se yu dɔn dɛdiket gi yu layf to Jiova, ɛn dat mek yu fit fɔ baptayz as pɔsin we de sav Jiova Gɔd. Yu bin mek Jiova rili gladi!

12. (a) Us kwɛstyɔn dɛn wi fɔ aks wisɛf? (b) Us kwaliti dɛn Pita bin ɛnkɔrej wi fɔ gɛt?

¹² We yu baptayz, yu prɔmis Jiova se yu go yuz yu layf fɔ sav am ɛn du ɔl wetin in want. Bɔt fɔ baptayz na jɔs di biginin. As tɛm de go, wi ɔl nid fɔ kɔntinyu fɔ chɛk wisɛf. Wi kin aks wisɛf dɛn kwɛstyɔn dɛn ya: ‘Mi padi biznɛs wit Jiova dɔn tayt mɔ frɔm di tɛm we a baptayz? A stil de sav am wit ɔl mi at? (Lɛta Fɔ Kɔlɔse 3:23, NW) A kin pre ɔltɛm? A kin rid di Baybul ɛvride? A kin go di mitin dɛn ɔltɛm? A kin tek pat pan di prichin wok ɔltɛm? Ɔ fɔ se a nɔ gɛt bɛtɛ zil igen fɔ du dɛn tin dɛn ya?’ Di apɔsul Pita bin wɔn wi se prɔblɛm go de if wi nɔ de du bɛtɛ igen fɔ Jiova. Wi go avɔyd dis if wi wok tranga wan fɔ mek wi gɛt mɔ fet, mɔ sɛns, wi kɔntinyu fɔ bia, ɛn wɔship Gɔd wit rɛspɛkt ɛn nɔ kɔmɔt biɛn am.—Rid Pita In Sɛkɛn Lɛta 1:5-8.

13. Wetin Kristian we dɔn dɛdiket in layf to Jiova ɛn baptayz nid fɔ no?

¹³ Wans wi dɔn mek vaw fɔ sav Jiova, i nɔ pɔsibul fɔ mek wi chenj wetin wi dɔn se wi go du. Pɔsin we dɔn taya fɔ sav Jiova ɔ fɔ liv lɛk Kristian nɔ go tɔk leta se i nɔ ɛva dɛdiket in layf to Gɔd ɔ di baptayz we i bin baptayz nɔ ol wata. * (Luk di futnot.) If pɔsin we dɔn dɛdiket in layf to Jiova sin siriɔs wan, i go ansa to Jiova ɛn di kɔngrigeshɔn. (Lɛta Fɔ Rom 14:12) Wi nɔ ɛva want fɔ bi lɛk di wan dɛn we Jizɔs bin tɛl se: “Una nɔ lɛk mi lɛkɛ aw una bin lɛk mi fɔstɛm.” Bɔt wi want lɛ i tɛl wi se: “A no di tin dɛn we una de du, a no se una lɛk pipul ɛn una nɔ lɛf fɔ biliv pan mi, una de wok wit ɔl una at ɛn una de bia insay di waala we de mit una. Ɛn a no se dɛn tin we una de du naw bɛtɛ pas di tin dɛn we una bin de du fɔstɛm.” (Rɛvɛleshɔn 2:4, 19) Wi want mek Jiova gladi bay we wi du wetin wi dɔn prɔmis wit zil.

14. Wetin na di sɛkɔn impɔtant vaw we pɔsin go mek? Wetin mek?

¹⁴ Di sɛkɔn vaw we pɔsin kin mek we rili impɔtant na di vaw we i go mek di de we i de mared. Mared na sɔntin we oli. Jiova de si mared vaw as tin we rili siriɔs. We di yawo ɛn ɔkɔ mek dɛn vaw, dɛn de mek prɔmis bifo Jiova ɛn ɔl di wan dɛn we de de. Dɛn kin prɔmis fɔ lɛk dɛnsɛf, ol dɛnsɛf fayn, ɛn rɛspɛkt dɛnsɛf te dɛn day, lɛk aw Gɔd want mared fɔ de. Ɔda pipul dɛn nɔ kin yuz dɛn sem wɔd dɛn ya, bɔt stil dɛn kin mek vaw bifo Gɔd. We dɛn mek dɛn vaw ya, dɛn go bi maredman ɛn mareduman. Mared na agrimɛnt we fɔ de sote di man ɔ uman day. (Jɛnɛsis 2:24; Fɔs Lɛta Fɔ Kɔrint 7:39) Jizɔs bin se: “Mek pɔsin nɔ pat man ɛn uman we Gɔd dɔn jɔyn lɛkɛ wan pɔsin.” Di man ɛn uman we de mared nɔ fɔ tink se if dɛn mared gɛt prɔblɛm dɛn fɔ dayvɔs.—Mak 10:9.

15. Wetin mek Kristian dɛn nɔ fɔ si mared lɛk aw pipul dɛn na di wɔl de si am?

¹⁵ Fɔ tru, jɔs lɛk we no mɔtalman nɔ de we pafɛkt, na so sɛf nɔ mared nɔ de we pafɛkt. Na dat mek di Baybul tɛl wi se sɔntɛnde, di wan dɛn we mared go gɛt “trɔbul.” (Fɔs Lɛta Fɔ Kɔrint 7:28) Insay di wɔl tide, bɔku pipul dɛn nɔ rili gɛt rɛspɛkt fɔ mared. Dɛn kin fil se if tin nɔ kɔmɔt fayn, dɛn fɔ skata. Bɔt nɔto so Kristian man ɛn uman dɛn de si mared. Dɛn no se na bifo Jiova dɛn mek dɛn mared vaw. If dɛn brɔk da vaw de, i go tan lɛk se na lay dɛn lay to am, ɛn Gɔd nɔ lɛk pɔsin we de lay. (Lɛvitikɔs 19:12; Prɔvabs 6:16-19) Kristian dɛn we dɔn mared fɔ mɛmba wetin di apɔsul Pɔl bin tɔk we i se: “If una gɛt wɛf, una nɔ fɔ tray fɔ mek i lɛf una go.” (Fɔs Lɛta Fɔ Kɔrint 7:27) Pɔl bin tɔk dat bikɔs i no se Jiova nɔ lɛk we pɔsin de dayvɔs in man ɔ in wɛf we in nɔ gɛt rayt fɔ du dat.—Malakay 2:13-16.

16. Wetin di Baybul tɔk bɔt fɔ dayvɔs ɛn fɔ pat wit yu man ɔ wɛf?

¹⁶ Jizɔs bin tich se di wangren rizin we di Baybul gi fɔ dayvɔs na we di man ɔ in wɛf du mami ɛn dadi biznɛs wit pɔsin we i nɔ mared to ɛn di ɔda pɔsin disayd nɔ fɔ fɔgiv di wan we du dat. (Matyu 19:9; Di Ibru Pipul Dɛn 13:4) Yu tink se man ɛn uman we dɔn mared fɔ pat? Di Baybul ɛp wi fɔ ɔndastand dis bak. (Rid Fɔs Lɛta Fɔ Kɔrint 7:10, 11.) No rizin nɔ de na di Baybul fɔ mek maredman ɛn mareduman pat. Sɔntɛnde, tin kin apin we kin mek pɔsin we na Kristian fil se i go bɛtɛ mek i pat wit in man ɔ in wɛf. Fɔ ɛgzampul, sɔm biliv se dɛn layf ɔ padi biznɛs wit Jiova go de pan siriɔs denja if dɛn kɔntinyu fɔ de wit man ɔ uman we de bit dɛn ɔ we dɔn tɔn lay lay Kristian. * (Luk di futnot.)

17. Wetin Kristian dɛn wemared go du fɔ mek dɛn mared-os go bifo?

¹⁷ If maredman ɛn in wɛf go to di ɛlda dɛn na di kɔngrigeshɔn fɔ gi dɛn  advays fɔ mek dɛn mared-os go bifo, di ɛlda dɛn fɔ aks di man ɛn in wɛf if dɛn dɔn wach di fim we gɛt di taytul Wetin Na Tru Lɔv? ɛn if dɛn dɔn stɔdi di buk we gɛt di taytul Aw Yu Famili Go Gɛt Gladi At? Dis fim ɛn dis buk tɔk mɔ bɔt advays dɛn na di Baybul we go ɛp mared-os fɔ go bifo. Wan maredman ɛn in wɛf bin se: “Frɔm we wi bigin fɔ stɔdi dis buk, wi dɔn gɛt gladi at na wi mared-os pas trade.” Wan sista we dɔn mared fɔ 22 ia bin fil se in mared-os go skata. Dɔn i wach di fim. I bin se: “Mi ɛn mi man bin baptayz, bɔt wi tu nɔ de fil di sem we. Dis fim kam di rayt tɛm! Naw wi de du fayn as maredman ɛn mareduman pas trade.” Dis sho klia wan se, if maredman ɛn in wɛf du wetin Jiova de advays dɛn na dɛn mared-os, dɛn go gɛt gladi at ɛn dɛn mared-os go go bifo.

18, 19. (a) Wetin bɔku mama ɛn papa dɛn we na Kristian dɔn du? (b) Wetin wi go se bɔt di wan dɛn we de yuz ɔl dɛn tɛm fɔ sav Jiova?

¹⁸ We wi bin bigin di atikul, wi tɔk bɔt di vaw we Jɛftha ɛn Ana bin mek. Jɛftha in gyal pikin ɛn Ana in bɔy pikin bin sav Jiova spɛshal we bikɔs Jɛftha ɛn Ana bin mek vaw to Jiova. Tide, bɔku mama ɛn papa dɛn we na Kristian dɔn ɛnkɔrej dɛn pikin dɛn fɔ yuz ɔl dɛn tɛm fɔ sav Jiova ɛn put ɔl dɛn atɛnshɔn pan in wok. Wi ɔl kin ɛp fɔ ɛnkɔrej dɛn yɔŋ wan dɛn ya fɔ kɔntinyu fɔ sav Jiova.—Di Jɔj Dɛn 11:40; Sam 110:3.

¹⁹ Tide, na lɛk 67,000 Spɛshal Ful-Taym Savant dɛn de; dat na brɔda ɛn sista dɛn we de yuz ɔl dɛn tɛm fɔ sav Jiova. Sɔm pan dɛn de sav na Bɛtɛl, na di kɔnstrɔkshɔn wok, ɛn na di sakit wok. Ɔda wan dɛn de wok tranga wan fɔ tich na di Skul fɔ Ɛlda dɛn, sɔm na spɛshal payɔnia dɛn, mishɔnari dɛn, Asɛmbli Ɔl Savant dɛn, ɛn sɔm dɛn de wok na di say dɛn we dɛn de ol Baybul skul dɛn. Dɛn ɔl bin mek “Vow of Obedience and Poverty.” Insay dis vaw, dɛn prɔmis se dɛn go wok tranga wan we dɛn gi dɛn ɛni wok na Jiova in savis, dɛn go liv simpul layf, ɛn dɛn nɔ go du ɛni ɔda wok pas if di ɔganayzeshɔn alaw dat. Nɔto di pipul dɛn spɛshal, na di wok we dɛn de du. Dɛn ɔmbul ɛn dɛn dɔn mekɔp dɛn maynd fɔ kip dɛn vaw te dɛn lɛf di spɛshal ful-taym savis.

20. Aw wi fɔ tek di vaw dɛn we wi de mek to Gɔd? Wetin mek?

²⁰ Insay dis atikul, wi dɔn tɔk bɔt tri vaw dɛn we wi kin mek to Gɔd. Sɔntɛm yu dɔn mek sɔm pan dɛn vaw ya. Wi no se wi fɔ rili tek wi vaw dɛn siriɔs ɛn wi fɔ du ɔl wetin wi ebul fɔ kip dɛn. (Prɔvabs 20:25) I go bad fɔ wi if wi nɔ kip di vaw dɛn we wi mek to Jiova. (Ɛkliziastis 5:6) So lɛ wi tan lɛk wan pan di man dɛn we rayt di Sam buk, we se to Jiova: “A go siŋ ɛn prez yu sote go ɛn mek shɔ se a du wetin a dɔn prɔmis ɛvride.”—Sam 61:8.