1, 2. (a) Aw dis wikɛd wɔl tan lɛk wan kriminal we dɛn de go kil? (Luk di pikchɔ nia dis atikul in taytul.) (b) Aw ɔlman we de na ɛvin ɛn na di wɔl go fil we Gɔd go dɔn dɔnawe wit dis wikɛd wɔl?

IMAJIN se wan bad bad kriminal de waka na di kɔridɔ insay wan prizin, dɔn di gaydman dɛn ala se, “Dayman de waka!” Wetin mek dɛn tɔk so? Pan ɔl we di kriminal stil gɛt layf ɛn i luk lɛk natin nɔ du am, dɛn dɔn jɔj am se i fɔ day ɛn na kil dɛn de go kil am so. I jɔs tan lɛk se i dɔn day. *—Luk di futnot.

² Di wikɛd wɔl we wi de naw jɔs tan lɛk da kriminal we dɛn de go kil. Di Baybul se: “Di wɔl go dɔn jisnɔ.” (Jɔn In Fɔs Lɛta 2:17, NW.) Jiova dɔn disayd se dis wɔl go dɔn jisnɔ, so wi nɔ gɛt wan dawt fɔ se i go dɔn. Bɔt wan impɔtant tin de we difrɛn frɔm di wɔl we go dɔn ɛn di kriminal we dɛn de go kil. Sɔm pipul dɛn go fil se dɛn nɔ jɔj di kriminal di rayt we, ɛn dɛn kin kam togɛda fɔ sho se dɛn nɔ gri so  dat dɛn nɔ go kil di am. Bɔt Jiova na jɔj we pafɛkt, ɛn na di rayt tin i du we i dɔn disayd fɔ dɔnawe wit dis wɔl. (Ditarɔnɔmi 32:4) I nɔ go westɛm fɔ dɔnawe wit dis wɔl. We i go dɔn dɔnawe wit dis wɔl, ɔlman we de na ɛvin ɛn na di wɔl go gri se na Jiova de jɔj di rayt we. Kolat go rili de!

3. Us 4 prɔblɛm dɛn nɔ go de igen we Gɔd in Kiŋdɔm kam?

³ Wetin ɛn wetin de insay “di wɔl” we “go dɔn”? Na di bad tin dɛn we de apin ɛvride insay wi yon tɛm. Ɔl dɛn tin dɛn de go dɔn jisnɔ. Dis na wan pan di “gud nyus bɔt di Kiŋdɔm.” (Matyu 24:14, NW) Insay dis atikul, wi go tɔk bɔt 4 prɔblɛm dɛn we nɔ go de we Gɔd in Kiŋdɔm kam. Dɛn prɔblɛm ya na: wikɛd pipul dɛn, ɔganayzeshɔn dɛn we kɔrɔpt, di bad tin dɛn we pipul dɛn de du, ɛn di bad tin dɛn we de apin to pipul dɛn. Fɔ ɛniwan pan dɛn prɔblɛm ya, wi go lan (1) aw dɛn de afɛkt wi naw, (2) wetin Jiova go du bɔt dɛn, ɛn (3) wetin go apin we dɛn tin dɛn de nɔ de igen.

4. Wetin wikɛd pipul dɛn de du we de afɛkt wi naw?

⁴ Wetin wikɛd pipul dɛn de du we de afɛkt wi naw? Di apɔsul Pɔl bin se insay di las dez, “di tɛm go traŋa.” Dɔn i se: “wikɛd pipul ɛn dɛn wan we de mek pipul ful go de wɔs mɔ ɛn mɔ.” (Sɛkɛn Lɛta To Timoti 3:1-5, 13) Dat dɔn apin to yu? Wikɛd pipul dɛn dɔn du bad to bɔku pan wi, sɔm pipul dɛn we et wi fɔsɛka wi kɔlɔ dɔn tray fɔ du wi bad, ɛn dɛn wikɛd kriminal dɛn kin du bad tin dɛn to wi. Sɔm pan dɛn nɔ de ayd di bad tin dɛn we dɛn de du. Ɔda wan dɛn de mek lɛk se dɛn de ɛp pipul dɛn, bɔt dɛn wikɛd. Bɔt pan ɔl we wikɛd pipul dɛn nɔ du wi bad, dɛn stil de mek wi sɔfa. Wi kin fil am we wi yɛri bɔt di bad we aw dɛn de trit pikin dɛn, di wan dɛn we dɔn ol, ɛn ɔda pipul dɛn we nɔ ebul fɛt fɔ dɛnsɛf. Dɛn wikɛd pipul ya de du tin lɛk se dɛn na wayl animal dɛn ɔ ivin dɛbul dɛn. (Jems 3:15) Wi gladi bikɔs Jiova in Wɔd dɔn gi wi op.

5. (a) Us chans wikɛd pipul dɛn stil gɛt? (b) Wetin go apin to di wan dɛn we nɔ gri fɔ chenj?

⁵ Wetin Jiova go du? Rayt naw Jiova de gi wikɛd pipul dɛn di chans fɔ lɛ dɛn chenj. (Ayzaya 55:7) Dɛn nɔ jɔj di wikɛd pipul dɛn yet pan ɔl we i nɔ go te igen fɔ lɛ dis wɔl dɔn. Wetin go apin to di wan dɛn we nɔ gri fɔ chenj ɛn we go sɔpɔt dis wɔl te to di tɛm we da big trɔbul go bigin? Jiova dɔn prɔmis se i go pul ɔl di wikɛd pipul dɛn kɔmɔt na dis wɔl. (Rid Sam 37:10.) Tide, bɔku pipul dɛn kin ayd di bad tin dɛn we dɛn de du, ɛn sɔntɛnde dɛn nɔ kin pɔnish dɛn. (Job 21:7, 9) Bɔt di Baybul mɛmba wi se: “PAPA GƆD in yay de pan ɔl wetin mɔtalman de du, ɛn de si ɔl usay mɔtalman de go. Nɔn kayn dak ples nɔ de we bad bad pipul dɛn go ayd dɛnsɛf.” (Job 34:21, 22) So no we nɔ de fɔ ayd pan Jiova. I de si ɔl wetin di wikɛd wan dɛn de du. Afta Amagɛdɔn, wi go luk usay dɛn kin de, bɔt wi nɔ go si dɛn. Dɛn nɔ go de igen!—Sam 37:12-15.

6. Udat dɛn go de na di wɔl we wikɛd pipul dɛn nɔ de igen? Wetin mek dat na gud nyus?

⁶ Udat dɛn go lɛf we di wikɛd pipul dɛn nɔ go de igen? Jiova prɔmis se:  “dɛn wan we nɔ tek dɛnsɛf mek natin go gɛt wetin PAPA GƆD prɔmis dɛn ɛn ɛnjɔy pis.” Insay da sem skripchɔ de, i tɔk se: “Udat dɛn de du wetin rayt go gɛt di land, ɛn dɛn go de de sote go.” (Sam 37:11, 29) Udat na di “wan dɛn we nɔ tek dɛnsɛf mek natin” ɛn udat na di wan dɛn we de du “wetin rayt”? Di wan dɛn we nɔ tek dɛnsɛf mek natin na di wan dɛn we put dɛnsɛf dɔŋ fɔ lan bɔt Jiova ɛn obe in Wɔd. Di wan dɛn we de du wetin rayt na di wan dɛn we lɛk fɔ du wetin Gɔd want. Na di wɔl tide, wikɛd pipul dɛn bɔku pas di wan dɛn we de du wetin rayt. Na di wan dɛn we nɔ tek dɛnsɛf mek natin ɛn di wan dɛn we de du wetin rayt nɔmɔ go de insay di nyu wɔl ɛn dɛn go mek di wɔl bi Paradays!

7. Tide, aw di ɔganayzeshɔn dɛn we kɔrɔpt de afɛkt mɔtalman?

⁷ Aw di ɔganayzeshɔn dɛn we kɔrɔpt de afɛkt wi tide? Bɔku pan di bad tin dɛn we de apin na di wɔl tide nɔto wan pɔsin kin du am, bɔt na ɔganayzeshɔn dɛn kin du dɛn. Lay lay rilijɔn dɛn de ful bɔku bɔku pipul dɛn. Fɔ ɛgzampul, dɛn kin lay bɔt udat Gɔd bi, dɛn kin se wi nɔ fɔ biliv di Baybul, ɛn dɛn kin lay pan pipul dɛn bak bɔt wetin go apin to mɔtalman ɛn aw di wɔl go tan lɛk tumara bambay. Gɔvmɛnt dɛn we kɔrɔpt kin sɔpɔt wɔ, du bad tin dɛn to pipul dɛn we nɔ de na dɛn kɔntri ɔ we gɛt difrɛn kɔlɔ, ɛn mɔna di po wan dɛn ɛn di wan dɛn we nɔ gɛt pipul dɛn fɔ ɛp dɛn. Dɛn kayn gɔvmɛnt dɛn ya kin jɛntri mɔ ɛn gɛt mɔ pawa bay we dɛn tek wan pɔsin bɛtɛ pas ɔda pɔsin ɔ tek brayb. Biznɛs pipul dɛn we want ɔltin fɔ dɛnsɛf de dɔti di wɔl, pwɛl di tin dɛn we Gɔd mek, ɛn tek advantej pan pipul dɛn so dat sɔm pan dɛn go jɛntri. Wi dɔn si klia wan se ɔganayzeshɔn dɛn we kɔrɔpt na dɛn de mek bɔku pipul dɛn de sɔfa na di wɔl tide.

8. Wetin di Baybul se go apin to ɔganayzeshɔn dɛn we bɔku pipul dɛn tink se strɔng?

⁸ Wetin Jiova go du? Di big trɔbul go bigin we di gɔvmɛnt dɛn we de rul go atak ɔl dɛn lay lay rilijɔn dɛn, we di Baybul se tan lɛk raregyal ɛn we i kɔl bak Bibilɔn di gret. (Rɛvɛleshɔn 17:1, 2, 16; 18:1-4, NW) Gɔd go dɔnawe wit dɛn lay lay rilijɔn dɛn de. Bɔt wetin go apin to ɔl di ɔda ɔganayzeshɔn dɛn we kɔrɔpt? Di Baybul kɔmpia dɛn to mawten ɛn ayland dɛn bikɔs i tan lɛk se dɛn strɔng. (Rid Rɛvɛleshɔn 6:14.) Bɔt i tɔk bak se, Gɔd go donawe wit ɔl dɛn gɔvmɛnt ɛn ɔl ɔda ɔganayzeshɔn dɛn we nɔ de sɔpɔt Gɔd in Kiŋdɔm. Dis go bi di las tin we go apin we da big trɔbul go kam. (Jɛrimaya 25:31-33) Afta dat, no kɔkɔpt ɔganayzeshɔn nɔ go de igen!

9. Wetin mek wi shɔ se di nyu wɔl go rili ɔganayz?

⁹ Wetin go apin we kɔrɔpt ɔganayzeshɔn dɛn nɔ de igen? Afta Amagɛdɔn, ɛni ɔganayzeshɔn go de na di wɔl? Di Baybul se: “Wi de wet fɔ di nyu ɛvin ɛn di nyu wɔl we Gɔd dɔn tɔk se wi go gɛt; ɔlman go de du wetin rayt insay da wɔl de.” (Pita In Sɛkɛn Lɛta 3:13) Di ol ɛvin ɛn di ol wɔl na di kɔrɔpt gɔvmɛnt dɛn ɛn di pipul dɛn we dɛn de kɔntrol. We dɛn nɔ de igen, wetin go tek dɛn ples? Na di “nyu ɛvin ɛn di nyu wɔl.” Di nyu ɛvin na di nyu gɔvmɛnt; dat na di  Kiŋdɔm we Jizɔs Krays ɛn di 144,000 go rul. Di nyu wɔl na di pipul dɛn we Gɔd in Kiŋdɔm go de rul. Jizɔs ɛn di wan dɛn we go rul wit am, go falamakata Jiova Gɔd we want mek ɔltin kɔmɔt fayn. (Fɔs Lɛta Fɔ Kɔrint 14:33) So di “nyu wɔl” go rili ɔganayz. Gud pipul dɛn go de fɔ kia fɔ ɔltin.(Sam 45:16) Na Jizɔs ɛn di 144,000 pipul dɛn go de gayd dɛn. Imajin aw ɔltin go tan lɛk we ɔl di ɔganayzeshɔn dɛn we kɔrɔpt nɔ go de igen, bɔt na wan ɔganayzeshɔn we gɛt wanwɔd ɛn we nɔ go ɛva kɔrɔpt go de!

10. Us bad tin dɛn kɔmɔn na di say usay yu de? Aw dat de afɛkt yu ɛn yu famili?

¹⁰ Aw di bad tin dɛn we pipul dɛn de du de afɛkt wi naw? Insay di wɔl we wi de tide, i kɔmɔn fɔ si pipul dɛn we lɛk fɛt-fɛt, pipul dɛn we de du mami ɛn dadi biznɛs di we aw Gɔd nɔ want, ɛn pipul dɛn we nɔ ɔnɛs. Di tin dɛn we pipul dɛn kin yus fɔ ɛnjɔy dɛnsɛf kin mek i tan lɛk se dɛn tin dɛn ya fayn ɛn Jiova in lɔ dɛn bɔt wetin rayt ɛn wetin rɔng nɔ min natin. (Ayzaya 5:20) Mama ɛn papa dɛn fɔ tray tranga wan fɔ protɛkt dɛn pikin dɛn frɔm di bad tin dɛn we de apin na di wɔl. Infakt, ɔlman we na Kristian nid fɔ wok tranga wan fɔ protɛkt in padi biznɛs wit Jiova insay dis wɔl we pipul dɛn nɔ rɛspɛkt Gɔd in lɔ dɛn.

11. Wetin wi lan frɔm di jɔj we Jiova bin jɔj Sɔdɔm ɛn Gomɔra?

¹¹ Wetin Jiova go du bɔt di bad tin dɛn we pipul dɛn de du? Tink bɔt wetin Jiova bin du bɔt di bad bad tin dɛn we bin de apin na wan siti we dɛn kɔl Sɔdɔm ɛn Gomɔra. (Rid Pita In Sɛkɛn Lɛta 2:6-8.) Lɔt na bin man we de du wetin rayt. In ɛn in famili bin rili sɔfa fɔ di bad bad tin dɛn we di pipul dɛn bin de du arawnd dɛn. Jiova bin dɔnawe wit di siti ɛn di wikɛd tin dɛn we bin de apin de. Bɔt “i bin du dat fɔ mek pipul si wetin go bi” to wikɛd pipul dɛn tide. Jɔs lɛk we Jiova bin dɔnawe wit di bad bad tin dɛn we bin de apin trade, na so bak i go donawe dis wikɛd wɔl.

12. Wetin na sɔm pan di tin dɛn we yu go want fɔ du we dis wɔl go dɔn?

¹² Wetin go apin we bad bad tin dɛn nɔ de igen? Insay di nyu wɔl, wi go bizi de du bɔku tin dɛn we go mek wi gladi. Fɔ ɛgzampul, wi go mek di wɔl tɔn to Paradays ɛn wi go bil os dɛn fɔ wisɛf ɛn wi fambul dɛn we wi lɛk. Wi go gladi bak fɔ wɛlkɔm bɔku bɔku pipul dɛn we bin dɔn day we go gɛt layf bak ɛn tich dɛn bɔt Jiova ɛn ɔl wetin i dɔn du fɔ mɔtalman. (Ayzaya 65:21, 22; Di Apɔsul Dɛn Wok [Akt] 24:15) Da tɛm de, wi go bizi de du tin dɛn we go mek wi gladi ɛn we go briŋ prez to Jiova!

13. Wetin dɔn de apin bikɔs Setan, Adam, ɛn Iv bin tɔn agens Jiova na di gadin we bin de na Idɛn?

¹³ Aw di bad bad tin dɛn we de apin to pipul dɛn naw de afɛkt wi? Di wɔl ful-ɔp wit wikɛd pipul dɛn, ɔganayzeshɔn dɛn we kɔrɔpt, ɛn di bad bad tin dɛn we pipul dɛn de du dɔn mek tin tranga na di wɔl. Wi ɔl de sɔfa fɔseka di bad tin dɛn we de apin naw lɛk wɔ, po, sik, day, ɛn we dɛn kin tek wan kɔntri bɛtɛ pas ɔda kɔntri. Di bad tin dɛn we de  apin to pipul dɛn, bin bigin di tɛm we Setan, Adam, ɛn Iv bin tɔn agens Jiova. Ɛn dat dɔn mek wi de sɔfa.

14. Wetin Jiova go du bɔt di bad tin dɛn we de apin to pipul dɛn?

¹⁴ Wetin Jiova go du bɔt di bad tin dɛn we de apin to pipul dɛn? Mek wi si sɔm ɛgzampul dɛn. Jiova prɔmis se i go mek wɔ nɔ de igen. (Rid Sam 46:8, 9.) I go mek wi lɛf fɔ sik. (Ayzaya 33:24) I go sɛwla day ɛn i nɔ go de igen. (Ayzaya 25:8) I go mek po dɔn. (Sam 72:12-16) Dɔn Jiova go pul ɔl di ɔda bad tin dɛn we de mek pipul dɛn nɔ gladi tide. I go ivin pul Setan ɛn in dɛbul dɛn we de mek pipul dɛn de du bad!—Lɛta Fɔ Ɛfisɔs 2:2.

15. Wetin na sɔm tin dɛn we nɔ go de igen afta Amagɛdɔn?

¹⁵ Jɔs imagin aw layf go tan lɛk we day ɔ sik nɔ go de na di wɔl igen! Da tɛm de, sojaman dɛn, tin dɛn we dɛn de tek fɛt, ɔ statyu dɛn we dɛn de bil fɔ mɛmba di wan dɛn we day pan wɔ, nɔ go de igen. Wi nɔ go nid ɔspitul dɛn, dɔktɔ dɛn, nɔs dɛn, mɔtuari ɔ bɛringrɔn. Da tɛm de pipul dɛn we de du bad nɔ de igen, so wi nɔ go nid polisman, alam fɔ prɔtɛkt wi, ɔ sɔntɛm wi nɔ go ivin nid domɔt ɔ ki dɛn! Ɔl dɛn bad tin dɛn we kin mek pipul dɛn wɔri nɔ go de igen.

16, 17. (a) Afta Amagɛdɔn, aw di wan dɛn we go sev go fil? Gi wan ɛgzampul. (b) Wetin wi go du we go mek wi biliv se wi go sev we dis wɔl dɔn?

¹⁶ Aw layf go tan lɛk we di bad tin dɛn we de apin to pipul dɛn nɔ de igen? I nɔ izi fɔ mek wi imajin dat. I dɔn te we bad tin dɛn de apin so wi nɔ kin ivin notis aw dat de afɛkt wi. Fɔ ɛgzampul, pipul dɛn we de nia makit nɔ kin ivin notis di nɔys. Ɛn pipul dɛn we de nia dɔtibɔks nɔ kin ivin notis di smɛl igen. Bɔt we Jiova pul ɔl di bad tin dɛn we de apin, i go mek wi fil fayn!

¹⁷ Wetin go mek wi nɔ fil bad igen? Sam 37:11 se dɛn go “ɛnjɔy pis.” We wi no se na dat Jiova want fɔ wi dat kin rili kɔrej wi! Insay dis tɛm we tin nɔ izi, na fɔ du ɔl wetin yu ebul fɔ du so dat yu go kɔntinyu fɔ de nia Jiova ɛn in ɔganayzeshɔn. Valyu di op we yu gɛt fɔ tumara bambay, tink gud wan bɔt am, mek shɔ se i rial to yu, ɛn tɛl ɔda pipul dɛn bɔt am. (Fɔs Lɛta To Timoti 4:15, 16; Pita In Fɔs Lɛta 3:15) Na dat go mek yu biliv se we dis wɔl dɔn, yu go sev ɛn gɛt gladi-at sote go!