1, 2. (a) Us bad tin bin apin to Nebɔt ɛn in bɔy pikin dɛn? (b) Us tu kwaliti dɛn wi go tɔk bɔt insay dis atikul?

TU WIKƐD man dɛn se wan man dɔn du sɔntin we rili bad. Bɔt nɔto so i bi. Na lay dɛn lay pan am. Bɔt ɔda pipul dɛn se na so i bi. So dɛn disayd fɔ kil am. Jɔs tink bɔt aw pipul dɛn we lɛk wetin rayt go dɔn fil as dɛn de wach we dɛn de ston dis man ɛn in bɔy pikin dɛn we nɔ du natin te dɛn day! Dis nɔto jɔs stɔri. Na tin we bin rili apin to wan pan Jiova in fetful savant we nem Nebɔt, di tɛm we Kiŋ Eab bin de rul Izrɛl.—Fɔs Kiŋ 21:11-13; Sɛkɛn Kiŋ 9:26.

² Insay dis atikul, wi go tɔk bɔt wetin apin to Nebɔt. Wi go tɔk bak bɔt wan siriɔs mistek we wan fetful ɛlda bin mek insay di apɔsul dɛn tɛm. Dɛn tu ɛgzampul ya go  ɛp wi fɔ si se if we want fɔ falamakata Jiova fɔ du tin tret wi fɔ put wisɛf dɔŋ ɛn rɛdi fɔ fɔgiv.

3, 4. Uskayn pɔsin Nebɔt bin bi? Wetin mek i nɔ gri fɔ sɛl in vayn gadin to Kiŋ Eab?

³ Nebɔt bin de du wetin Jiova want di tɛm we bɔku Izrɛlayt dɛn bin de fala Kiŋ Eab ɛn in wikɛd uman, we na Kwin Jezibɛl fɔ du wetin bad. Dɛn bin de wɔship wan lay lay gɔd we dɛn kɔl Beal ɛn dɛn nɔ bin de rɛspɛkt Jiova ɔ in lɔ dɛn. Bɔt Nebɔt bin lɛk in padi biznɛs wit Jiova pas in yon layf.

⁴ Rid Fɔs Kings 21:1-3. We Eab tɛl Nebɔt se i go bay in vayn gadin ɔ gi am ɔda wan we fayn pas di wan we i gɛt, Nebɔt nɔ bin gri. Wetin mek? I tɔk wit rɛspɛkt ɛn ɛksplen gi Eab se, Jiova “sɛf nɔ go gri fɔ lɛ i gi am in fɔstɛmpapa dɛn prɔpati.” Nebɔt nɔ bin du wetin Kiŋ Eab se bikɔs Jiova in lɔ se di Izrɛlayt dɛn nɔ fɔ sɛl dɛn famili prɔpati to ɔda pɔsin, we i bi se dɛn nɔ go gɛt am igen. (Lɛvitikɔs 25:23; Di Nɔmba Dɛm 36:7) Wi si klia wan se Nebɔt obe Jiova.

5. Wetin Jezibɛl du so dat i go tek Nebɔt in vayn gadin?

⁵ We Nebɔt nɔ bin gri fɔ sɛl in vayn gadin, Kiŋ Eab ɛn in wɛf bin du sɔntin we rili bad. Fɔ mek Kwin Jezibɛl tek Nebɔt in vayn gadin, i tɛl tu man dɛn fɔ lay pan Nebɔt se i du bad tin, we nɔto so i bi. Fɔseka dat, dɛn bin kil Nebɔt ɛn in bɔy pikin dɛn. Wetin Jiova bin du we dis bad tin apin?

6, 7. Aw Jiova sho se i lɛk fɔ du tin tret? Aw dis go dɔn kɔrej Nebɔt in famili ɛn padi dɛn?

⁶ Wantɛm wantɛm Jiova sɛn Ilayja fɔ go mit Eab. Ilayja tɛl Eab se in na tif man ɛn pɔsin we de kil. Wetin Jiova bin disayd? Eab, in wɛf, ɛn in bɔy pikin dɛn go day jɔs lɛk we Nebɔt ɛn in bɔy pikin dɛn dɔn day.—Fɔs Kiŋ 21:17-25.

⁷ Nebɔt in famili ɛn padi dɛn bin fil bad fɔ di bad tin we Eab dɔn du. Bɔt Jiova bin si di bad tin we apin ɛn du sɔntin bɔt am wantɛm wantɛm. Dat go dɔn kɔrej Nebɔt in famili ɛn padi dɛn. Bɔt di tin we apin nɛks go dɔn tɛst dɛn if dɛn ɔmbul ɛn if dɛn abop pan Jiova.

8. Aw Eab bin fil we Ilayja tɛl am wetin Jiova se? Wetin apin afta dat?

⁸ We Eab yɛri wetin Jiova dɔn disayd fɔ du to am, “i chɛr in klos, wɛr saklɔth ɛn fast. Na di saklɔth in bin de slip wit. Wɛn i kin de waka na so i kin luk ɔmbul.” Eab put insɛf dɔŋ! Wetin bin apin we i du dat? Jiova tɛl Ilayja se, “Bikɔs i dɔn ɔmbul insɛf so, ɔl  wetin a dɔn tɔk se a go du, a nɔ go du am we i de alayv; nain pikin dɛn naw a go mek sɔfa ɛn na wɛn in bɔypikin de rul a go du dat.” (Fɔs Kiŋ 21:27-29; Sɛkɛn Kiŋ 10:10, 11, 17) Jiova we “de tɛst pɔsin in at,” ɛn si udat i rili bi, bin fɔgiv Eab.—Prɔvabs 17:3.

9. Wetin mek wi go se if Nebɔt in famili ɛn padi dɛn bin put dɛnsɛf dɔŋ, dat go dɔn protɛkt dɛn?

⁹ We Nebɔt in famili ɛn padi dɛn yɛri se Jiova nɔ go pɔnish Eab in famili pas te Eab day, dat go dɔn tɛst dɛn if dɛn gɛt fet pan Gɔd. Bɔt if dɛn put dɛnsɛf dɔŋ, dat go dɔn ɛp dɛn fɔ protɛkt di fet we dɛn gɛt. Wetin mek? If dɛn bin ɔmbul, dɛn go kɔntinyu fɔ wɔship Jiova ɛn biliv se i nɔ pɔsibul fɔ lɛ Gɔd du wetin nɔ rayt. (Rid Ditarɔnɔmi 32:3, 4.) Tumara bambay, Jiova go blɛs Nebɔt in famili bay we i go mek dɛn si Nebɔt ɛn in bɔy pikin dɛn we i gi dɛn layf bak. Da tɛm de, Jiova go dɔn du tin tret ɛn pafɛkt wan fɔ Nebɔt ɛn in bɔy pikin dɛn. (Job 14:14, 15; Jɔn 5:28, 29) Pɔsin we ɔmbul no se “PAPA GƆD go jɔj ɔltin we pipul du,  we insay de yu gɛt di sikrit tin dɛn we pipul ayd du; di gud wan dɛn ɛn di bad wan dɛn.” (Ɛkliziastis 12:14) Jiova kin si sɔm tin dɛn we na tru we wi nɔ no bɔt. So we wi put wisɛf dɔŋ, dat kin ɛp fɔ mek wi kɔntinyu fɔ gɛt fet pan am.

10, 11. (a) Wetin kin apin we kin mek wi fil se dɛn dɔn du wi sɔntin we nɔ rayt? (b) We wi put wisɛf dɔŋ, aw dat go protɛkt wi?

¹⁰ Wetin yu go du if di ɛlda dɛn disayd fɔ du sɔntin we yu nɔ ɔndastand ɔ we yu nɔ gri wit? Fɔ ɛgzampul, wetin yu go du if yu ɔ sɔmbɔdi we yu lɛk lɔs di wok we i de du na Jiova in ɔganayzeshɔn? Wetin yu go du if yu man ɔ wɛf, yu pikin, ɔ yu tayt padi disfɛloship ɛn yu nɔ gri wit wetin di ɛlda dɛn du? Wetin yu go du if yu biliv se na mistek di ɛlda dɛn mek we dɛn fɔgiv sɔmbɔdi we dɔn sin? Dɛn kayn tin dɛn ya kin tɛst wi fet pan Jiova ɛn di we aw i dɔn ɔganayz di kɔngrigeshɔn dɛn tide. We yu ɔmbul, aw dat go ɛp yu if ɛni wan pan dɛn tin dɛn ya tɛst yu fet? Lɛ wi tɔk bɔt tu we dɛn.

¹¹ Fɔs, if wi ɔmbul wi go gri se wi nɔ no bɔt ɔl wetin apin. Ivin if wi tink se wi no ɔltin we apin, na Jiova nɔmɔ no wetin de na pɔsin in at. (Fɔs Samiɛl 16:7) We wi mɛmba dis, wi go put wisɛf dɔŋ ɛn gri se nɔto ɔltin wi no ɛn wi nid fɔ chenj di we aw wi de tink. Sɛkɔn, if dɛn dɔn du wi ɔ sɔmbɔdi sɔntin we nɔ rayt, we wi put wisɛf dɔŋ i go ɛp wi fɔ obe ɛn peshɛnt wet fɔ lɛ Jiova kɔrɛkt wetin dɔn apin. Di Baybul se: “Ɔltin go go fayn fɔ di wan dɛn we de fred PAPA GƆD.” Di Baybul tɔk bak se: “Bɔt i nɔ go bi fɔ di bad man. In layf go tan lɛk shado ɛn i mɔs day kwik.”(Ɛkliziastis 8:12, 13) If wi kɔntinyu fɔ put wisɛf dɔŋ, wi ɛn ɔlman go bɛnifit.—Rid Pita In Fɔs Lɛta 5:5.

12. Wetin wi de kam tɔk bɔt? Wetin mek?

¹² Sɔntin bin apin to di fɔstɛm Kristian dɛn na Antiɔk we bin de na Siria we bin tɛst dɛn if dɛn ɔmbul ɛn if dɛn rɛdi fɔ fɔgiv. Lɛ wi tɔk bɔt wetin bin apin ɛn yuz am fɔ chɛk wisɛf fɔ no if wi rɛdi fɔ fɔgiv ɔda pipul dɛn. Dis go ɛp wi fɔ ɔndastand wetin mek Jiova nɔ de chenj wetin i dɔn se rayt ɔ rɔng pan ɔl we i de yuz pipul dɛn we nɔ pafɛkt.

13, 14. Us wok dɛn Pita bin gɛt? Aw i bin sho se i nɔ de fred?

¹³ Apɔsul Pita na bin ɛlda we bɔku pan di fɔstɛm Kristian dɛn bin sabi. Na bin Jizɔs in tayt padi ɛn Jizɔs bin dɔn gi am impɔtant wok dɛn fɔ du. (Matyu 16:19) Fɔ ɛgzampul, insay di ia 36, dɛn bin gi Pita di wok fɔ prich to Kɔnilyɔs ɛn ɔlman we de na  in os. Wetin mek dis bin spɛshal? Na bikɔs Kɔnilyɔs nɔto bin Ju ɛn i nɔ bin sakɔmsayz. We Kɔnilyɔs ɛn ɔl di wan dɛn we de na in os bin gɛt Gɔd in oli spirit, Pita bin kam fɔ no se dɛn fɔ baptayz. I bin tɔk se: “Gɔd dɔn gi dɛn pipul ya in Spirit lɛkɛ aw i bin dɔn gi wisɛf. Ɛnibɔdi go se dɛn nɔ fɔ baptayz?”—Di Apɔsul Dɛn Wok [Akt] 10:47.

¹⁴ Insay di ia 49, di apɔsul dɛn ɛn di ɛlda dɛn na Jerusɛlɛm bin gɛda fɔ disayd if Kristian dɛn we nɔto Ju fɔ sakɔmsayz. Na da mitin de, Pita nɔ bin fred fɔ mɛmba di brɔda dɛn se insɛf sɛf dɔn si we Gɔd dɔn put in oli spirit pan pipul dɛn we nɔto Ju. Na wetin Pita bin no ɛn dɔn si na in bin ɛp di gɔvnin bɔdi fɔ disayd. (Di Apɔsul Dɛn Wok [Akt] 15:6-11, 13, 14, 28, 29) Di Ju Kristian dɛn ɛn di Kristian dɛn we nɔto Ju go dɔn gladi we Pita nɔ bin fred fɔ tɔk di tru tin dɛn. I go dɔn izi fɔ mek di Kristian dɛn we bin de trade biliv Pita we bin fetful ɛn machɔ!—Di Ibru Pipul Dɛn 13:7.

15. Us mistek Pita mek we i bin de na Antiɔk we bin de na Siria? (Luk di pikchɔ nia dis atikul in taytul.)

¹⁵ Afta di mitin na Jerusɛlɛm, i nɔ tu te, Pita bin go na Antiɔk we bin de na Siria. We i bin de de, i bin de spɛn tɛm wit in Kristian brɔda dɛn we nɔto Ju. Jɔs tink bɔt aw dɛn go dɔn lɛk fɔ lan frɔm Pita we bin no sɔntin bɔt Jiova ɛn gɛt ɛkspiriɛns. Bɔt, dɛn go dɔn sɔprayz ɛn fil bad we Pita lɛf fɔ it wit dɛn. Pita bin mek Banabas ɛn ɔda Kristian dɛn we na Ju, du di sem tin. Wetin mek dis machɔ ɛlda bin mek dis siriɔs mistek we fɔ dɔn sheb di kɔngrigeshɔn? Us impɔtant tin wi kin lan frɔm Pita in mistek we go ɛp wi if wan ɛlda se ɔ du sɔntin we mek wi fil bad?

16. Aw Pɔl bin kɔrɛkt Pita? Us kwɛstyɔn dɛn dis mek wi aks?

¹⁶ Rid Lɛta Fɔ Galeshya 2:11-14. Pita fred mɔtalman. (Prɔvabs 29:25) Pita no aw Jiova de si di Kristian dɛn we nɔto Ju. Bɔt stil, i bin de fred se di Ju dɛn we sakɔmsayz we kɔmɔt Jerusɛlɛm kam go tink bad bɔt am bikɔs i de spɛn tɛm wit Kristian dɛn we nɔto Ju. Apɔsul Pɔl bin tɛl Pita se in na ipokrit. Wetin mek? Bikɔs Pɔl bin dɔn yɛri we Pita de tɔk fɔ di Kristian dɛn we nɔto Ju na di mitin na Jerusɛlɛm insay di ia 49. (Di Apɔsul Dɛn Wok [Akt] 15:12; Lɛta Fɔ Galeshya 2:13, futnot) Wetin di Kristian dɛn we nɔto Ju bin du we Pita mek dis mistek? Dɛn go alaw dis fɔ ambɔg dɛn padi biznɛs wit Jiova? Fɔ se Pita go lɔs in wok fɔseka dis mistek?

17. Aw Pita bin bɛnifit frɔm di fɔgiv we Jiova bin fɔgiv am?

¹⁷ Pita bin put insɛf dɔŋ ɛn tek di advays we Pɔl bin gi am. Di Baybul nɔ se Pita lɔs ɛni wan pan in wok dɛn. Infakt, leta, Jiova bin yuz am fɔ rayt tu leta dɛn we de na di Baybul. Insay in sɛkɔn lɛta, Pita bin kɔl Pɔl “wi brɔda” we wi lɛk. (Pita In Sɛkɛn Lɛta 3:15) Di mistek we Pita bin du go dɔn at di Kristian dɛn we nɔto Ju. Bɔt pan ɔl dat, Jizɔs we de bifo di kɔngrigeshɔn bin kɔntinyu fɔ yuz am. (Lɛta Fɔ Ɛfisɔs 1:22) Brɔda ɛn sista dɛn we bin de na di kɔngrigeshɔn bin gɛt di chans fɔ falamakata Jizɔs ɛn in Papa fɔ fɔgiv. Wi op se dɛn nɔn nɔ bin alaw di mistek we Pita bin mek fɔ ambɔg dɛn padi biznɛs wit Jiova.

18. Ustɛm wi fɔ falamakata Jiova fɔ du tin tret wan?

¹⁸ Insay di apɔsul dɛn tɛm, no pafɛkt ɛlda nɔ bin de na di Kristian kɔngrigeshɔn, ɛn no pafɛkt ɛlda nɔ de tide na di Kristian kɔngrigeshɔn. Di Baybul se: “Wi ɔl de du tin we nɔ rayt.” (Jems 3:2, futnot) I izi fɔ lɛ wi gri se dis na tru, bɔt wetin wi go du we wan brɔda we nɔ pafɛkt du wi sɔntin we i bi se na mistek? Wi go falamakata Jiova fɔ du wetin rayt? Fɔ ɛgzampul, wetin yu go du if wan ɛlda tɔk sɔntin we tan lɛk se i de tek wan pɔsin bɛtɛ pas di ɔda pɔsin? If wan ɛlda nɔ tink bifo i tɔk sɔntin we mek yu fil bad, yu go alaw dat fɔ pwɛl yu padi biznɛs wit Jiova? Bifo yu bigin fɔ tink se da brɔda de nɔ fit fɔ bi ɛlda, yu nɔ tink se i go fayn fɔ wet fɔ Jizɔs we na di ɛdman na di kɔngrigeshɔn? Yu go lɛf fɔ tink bɔt in mistek ɛn mɛmba aw lɔng di brɔda dɔn de sav Jiova fetful wan? If wan brɔda we dɔn du yu bad kɔntinyu fɔ bi ɛlda ɔ gɛt mɔ wok dɛn, yu go gladi fɔ am? If yu rɛdi fɔ fɔgiv, yu de sho se yu de falamakata Jiova fɔ du tin tret.—Rid Matyu 6:14, 15.

19. Wetin wi fɔ mekɔp wi maynd fɔ du?

¹⁹ Bikɔs wi lɛk fɔ du wetin rayt, wi de wet fɔ di tɛm we Jiova go dɔnawe wit ɔl di bad tin dɛn we Setan ɛn dɛn wikɛd pipul dɛn de du na di wɔl. (Ayzaya 65:17) Te da tɛm de rich, if dɛn du wi sɔntin we wi tink se nɔ rayt, mek wi put wisɛf dɔŋ ɛn mɛmba se nɔto ɔltin wi no ɛn fɔgiv di wan dɛn we dɔn du wi bad. If wi du dat, wi de falamakata Jiova fɔ du tin tret.