1. Aw Jiova bin ɛnkɔrej ɛn gi op to mɔtalman di tɛm we Adam ɛn Iv bin tɔn dɛn bak pan am?

JIOVA na Gɔd we de ɛnkɔrej wi. I dɔn de du dis frɔm di tɛm we mɔtalman sin ɛn nɔ pafɛkt igen. Infakt, jɔs afta we Adam ɛn Iv tɔn dɛn bak pan Gɔd, I bin tɔk bɔt wan prɔfɛsi we if wi ɔndastand am dat go mek wi gɛt kɔrej ɛn op. Dis prɔfɛsi de na Jɛnɛsis 3:​15 ɛn i prɔmis se Setan ɛn ɔl di bad tin dɛn we i de du nɔ go de igen.—Jɔn In Fɔs Lɛta 3:​8; Rɛvɛleshɔn 12:​9.

2. Aw Jiova bin ɛnkɔrej Noa?

² Tink bɔt aw Jiova bin ɛnkɔrej in savant Noa. Di pipul dɛn we bin de insay Noa in tɛm bin lɛk fɛt-fɛt ɛn dɛn bin lɛk fɔ du mami ɛn dadi biznɛs di we aw Gɔd nɔ want. Na Noa ɛn in famili nɔmɔ bin de wɔship Jiova. I go  mɔs bi se Noa in at bin pwɛl. (Jɛnɛsis 6:​4, 5, 11; Jud 6) Bɔt Jiova bin gi Noa di kɔrej we i bin nid fɔ kɔntinyu fɔ wɔship am ɛn fɔ du wetin rayt. (Jɛnɛsis 6:​9) Jiova bin tɛl Noa se i go dɔnawe wit da wikɛd wɔl de ɛn i tɛl Noa wetin i fɔ du so dat in ɛn in famili go sev. (Jɛnɛsis 6:​13-18) Jiova na Gɔd we bin de ɛnkɔrej Noa.

3. Aw Jiova bin ɛnkɔrej Jɔshwa? (Luk di pikchɔ nia dis atikul in taytul.)

³ Leta, Jiova bin ɛnkɔrej in savant Jɔshwa. I bin gɛt big big wok fɔ du. I bin gɛt fɔ lid Gɔd in pipul dɛn fɔ go na di land we Gɔd bin dɔn prɔmis ɛn win di pawaful ami dɛn we bin de na di neshɔn dɛn. Jiova bin no se Jɔshwa go fred so i bin tɛl Mozis: “Kɔl Jɔshwa, ɛnkɔrej am ɛn gi am trɛnk bikɔs na in go lid dɛn pipul dɛn ya fɔ krɔs ɛn na in go mek dɛn gɛt di land we yu go si.” (Ditarɔnɔmi 3:​28, NW) Afta dat, Jiova insɛf sɛf ɛnkɔrej Jɔshwa we i tɛl am se: “Wans nain PAPA GƆD [“Jiova,” NW] dɔn tɛl am se mek i tinap lɛkɛ man, i nɔ fɔ fred natin ɛn i nɔ fɔ gɛt ɛni dawt nain maynd bikɔs PAPA GƆD [“Jiova,” NW] we nain [Gɔd] go de wit am ɛnisay we i de go.” (Jɔshwa 1:​1, 9) Aw yu tink se dɛn wɔd dɛn ya bin mek Jɔshwa fil?

4, 5. (a) Aw Jiova bin ɛnkɔrej in pipul dɛn trade? (b) Aw Jiova bin ɛnkɔrej in Pikin?

⁴ Jiova nɔ jɔs de ɛnkɔrej in pipul dɛn wan bay wan. Fɔ ɛgzampul, Jiova bin no se di Ju pipul dɛn bin nid pɔsin fɔ ɛnkɔrej dɛn we dɛn bin de as slev na Babilɔn. I bin gi dɛn wan prɔfɛsi fɔ ɛnkɔrej dɛn. I bin se: “Nɔ fred, bikɔs a de wit yu, nɔ pwɛl at, bikɔs mi na yu Gɔd; a go gi yu trɛnk, a go ɛp yu, a go ol yu ɔp wit mi raytan we de win ɔltɛm.” (Ayzaya 41:​10) Leta, Jiova bin ɛnkɔrej di Kristian dɛn we bin de trade ɛn i de ɛnkɔrej wisɛf di sem we.—Rid Sɛkɛn Lɛta Fɔ Kɔrint 1:​3, 4.

⁵ Jiova bin ɛnkɔrej in Pikin bak. Afta we Jizɔs baptayz, i yɛri vɔys na ɛvin we se: “Dis na mi pikin we a lɛk, a gladi fɔ am.” (Matyu 3:​17) Yu kin imajin aw dɛn wɔd dɛn ya go dɔn gi Jizɔs trɛnk we i bin de prich na dis wɔl?

6. Aw Jizɔs in parebul bɔt di talɛnt go ɛnkɔrej wi?

⁶ Jizɔs bin falamakata in Papa bay we i ɛnkɔrej ɔda pipul dɛn fɔ kɔntinyu fɔ fetful. I bin du dat na di parebul bɔt di talɛnt usay i se di masta bin tɛl in slev dɛn we bin fetful se: “Yu du wɛl, yu na gud bɔy we tru to in masta; yu dɔn du wɛl pan smɔl wok we a gi yu fɔ du, naw a go gi yu plɛnti big wok fɔ du. Kam ɛnjɔy wit yu masta!” (Matyu 25:​21, 23) Dɛn wɔd dɛn de bin ɛnkɔrej in disaypul dɛn fɔ kɔntinyu fɔ sav Jiova fetful wan!

7. Aw Jizɔs bin ɛnkɔrej in apɔsul dɛn? Aw i bin ɛnkɔrej Pita mɔ?

⁷ Pan ɔl we di apɔsul dɛn bin de agyu bɔku tɛm bɔt udat impɔtant, Jizɔs bin de peshɛnt wit dɛn ɔltɛm. Jizɔs bin ɛnkɔrej dɛn fɔ lɛ dɛn nɔ wet fɔ mek ɔda pipul dɛn wok fɔ dɛn bifo dat, dɛn  fɔ put dɛnsɛf dɔŋ ɛn wok fɔ ɔda pipul dɛn. (Lyuk 22:​24-26) Bɔku tɛm, Pita bin de mek mistek dɛn ɛn mek Jizɔs in at pwɛl. (Matyu 16:​21-23; 26:​31-35, 75) Bɔt Jizɔs nɔ bin ɛva drɛb Pita. Bifo dat, i bin ɛnkɔrej Pita ɛn ivin gi am di wok fɔ ɛnkɔrej ɔda pipul dɛn.—Jɔn 21:​16.

8. Aw Ɛzikaya bin ɛnkɔrej di pipul dɛn na Juda ɛn di bigman dɛn na di ami?

⁸ Ivin bifo Jiova in savant dɛn gɛt Jizɔs as ɛgzampul fɔ fala, dɛn bin no se dɛn nid fɔ ɛnkɔrej ɔda pipul dɛn. Tink bɔt Ɛzikaya. We di Asirian dɛn bin want fɔ atak Jerusɛlɛm, i bin gɛda di pipul dɛn ɛn di bigman dɛn na di ami fɔ ɛnkɔrej dɛn. Di pipul dɛn bin gɛt ‘kɔnfidɛns fɔseka Ɛzikaya in wɔd dɛn.’—Rid Sɛkɛn Kronikul 32:​6-8.

9. Wetin wi go lan frɔm Job bɔt aw fɔ ɛnkɔrej ɔda pipul dɛn?

⁹ Wi kin lan bak bɔt aw fɔ gi kɔrej to ɔda pipul dɛn frɔm Job in ɛgzampul. I bin tich ɔda pipul dɛn aw fɔ gi kɔrej pan ɔl we insɛf bin nid pɔsin fɔ ɛnkɔrej am. Job bin tɛl di wan dɛn we bin kam fɔ ɛnkɔrej am se if na in bin kam fɔ ɛnkɔrej dɛn, i bin fɔ dɔn tɔk tin dɛn we go mek dɛn gɛt trɛnk ɛn fil gud; nɔto tin dɛn we go mek dɛn at pwɛl. (Job 16:​1-5) Bɔt leta, Ilayu ɛn Jiova bin ɛnkɔrej Job.—Job 33:​24, 25; 36:​1, 11; 42:​7, 10.

10, 11. (a) Wetin mek Jɛftha in gyal pikin bin rili nid pɔsin fɔ ɛnkɔrej am? (b) Udat dɛn wi go ɛnkɔrej insay wi yon tɛm?

¹⁰ Jɛftha in gyal pikin sɛf bin nid pɔsin fɔ ɛnkɔrej am. We in papa we na Jɔj Jɛftha bin de go fɛt di Amɔnayt dɛn, i bin prɔmis Jiova se if i ɛp am fɔ win di fɛt, di fɔs pɔsin we go kam mit am we i kɔmɔt fɛt, go go wok na Jiova in tabanakul. Di Izrɛlayt dɛn bin win, ɛn di fɔs pɔsin we bin kam mit Jɛftha na bin in gyal pikin; in wangren pikin. Jɛftha in at bin pwɛl. Bɔt i bin kip in prɔmis ɛn sɛn in gyal pikin fɔ go wok na di tabanakul te i day.—Di Jɔj Dɛm 11:​30-35.

¹¹ Pan ɔl we dis nɔ bin izi fɔ Jɛftha, i go mɔs bi se na in gyal pikin mɔ i nɔ bin izi fɔ. Bɔt i bin rɛdi fɔ du wetin in papa bin dɔn prɔmis. (Di Jɔj Dɛm 11:​36, 37) Dis min se i nɔ go ɛva mared ɔ bɔn pikin dɛn. Di famili layn nɔ go kɔntinyu. Dat bin mek i bin rili nid pɔsin fɔ ɛnkɔrej am. Di Baybul se: ‘Dat dɔn bi kɔstɔm na Izrɛl se, fɔ 4 dez ɛvri ia, di yɔŋ titi dɛn fɔ go’ tɛl tɛnki to “Jɛftha we kɔmɔt Giliad in gyal pikin.” (Di Jɔj Dɛm 11:​39, 40) Jɛftha in gyal pikin mek wi tink bɔt Kristian dɛn we nɔ mared so dat dɛn go ebul fɔ du mɔ fɔ Jiova. Yu kin tɛl dɛn tɛnki ɛn ɛnkɔrej dɛn?—Fɔs Lɛta Fɔ Kɔrint 7:​32-35.

12, 13. Aw Pita bin ɛp in brɔda dɛn fɔ “biliv traŋa wan” wetin dɛn bin dɔn lan?

¹² Wan nɛt bifo Jizɔs day, i bin tɛl di apɔsul Pita se: “Saymɔn, Saymɔn, Setan dɔn gɛt pamishɔn fɔ fana una ɔl lɛkɛ rɛs. Bɔt a dɔn pre fɔ yu Saymɔn mek yu nɔ tap fɔ biliv mi. Wɛn yu dɔn biliv mi traŋa wan, tray mek yu brɔda dɛnsɛf biliv mi traŋa wan.”—Lyuk 22:​31, 32.

¹³ Pita na bin wan pan di wan dɛn we bin de bifo na di Kristian kɔngrigeshɔn trade. (Lɛta fɔ Galeshya 2:​9, NW) I bin ebul fɔ ɛnkɔrej in brɔda dɛn bikɔs i bin gɛt maynd fɔ du wetin i bin du na Pɛntikɔst ɛn ivin afta dat. Afta lɔng tɛm we i dɔn de sav Jiova, i bin rayt to in brɔda dɛn se: “A want kɔrej una ɛn a want tɛl una se ɔl wetin Gɔd dɔn du fɔ una sho se i lɛk una, fɔ tru; una nɔ fɔ mek ɛnitin mek una dawt dat.” (Pita In Fɔs Lɛta 5:​12) Di lɛta dɛn we Pita bin rayt, bin ɛnkɔrej di Kristian dɛn we bin de insay in tɛm. Ɛn dɛn stil de ɛnkɔrej wi tide as wi de wet fɔ di tɛm we wetin Jiova dɔn prɔmis go bi.—Pita In Sɛkɛn Lɛta 3:​13.

14, 15. Aw di Baybul buk dɛn we di apɔsul Jɔn bin rayt de ɛnkɔrej wi?

¹⁴ Di apɔsul Jɔn insɛf na bin wan pan di wan dɛn we bin de bifo na di Kristian kɔngrigeshɔn trade. I bin rayt  wan fayn Gɔspɛl bɔt Jizɔs in prichin wok. Dis Baybul buk dɔn de ɛnkɔrej Kristian dɛn we bin de trade ɛn i stil de ɛnkɔrej wi tide. Fɔ ɛgzampul, na insay di buk we Jɔn rayt nɔmɔ wi go rid wetin Jizɔs tɔk fɔ se na lɔv de sho se wi na in tru tru disaypul dɛn.—Rid Jɔn 13:​34, 35.

¹⁵ Di tri lɛta dɛn we Jɔn rayt gɛt valyu tin dɛn we de ɛnkɔrej wi. We wi at pwɛl bikɔs wi mɛmba wi mistek dɛn, wi kin fil bɛtɛ we wi rid se Jizɔs in day de “pul ɔl wi sin kɔmɔt pan wi ɛn mek wi klin.” (Jɔn In Fɔs Lɛta 1:​7) If wi de fil bad bɔt wisɛf ɔ wetin wi bin dɔn du, wi go fil fayn we wi rid se “Gɔd pas wi at.” (Jɔn In Fɔs Lɛta 3:​20) Pan ɔl di wan dɛn we rayt di Baybul, na Jɔn nɔmɔ bin rayt se “Gɔd na di wan we nɔ de tap fɔ lɛk.” (Jɔn In Fɔs Lɛta 4:​8, 16) Insay in sɛkɔn ɛn tɔd lɛta dɛn, i ɛnkɔrej Kristian dɛn fɔ kɔntinyu fɔ “waka na di tru rod.”—Jɔn In Sɛkɛn Lɛta 4; Jɔn In Tɔd Lɛta 3, 4.

16, 17. Aw di apɔsul Pɔl bin ɛnkɔrej di Kristian dɛn we bin de trade?

¹⁶ Di apɔsul Pɔl bak bin sɛt fayn ɛgzampul fɔ ɛnkɔrej in brɔda dɛn. Jɔs afta Jizɔs day, bɔku pan di apɔsul dɛn bin de na Jerusɛlɛm usay di gɔvnin bɔdi bin de. (Di Apɔsul dɛn Wok [Akt] 8:​14; 15:​2) Di Kristian dɛn na Judia bin de prich bɔt Krays to pipul dɛn we bin ɔlrɛdi biliv se  na wangren Gɔd de. Bɔt di oli spirit bin sɛn Pɔl fɔ go prich to Grik ɛn Roman pipul dɛn ɛn ɔda pipul dɛn we de wɔship lay lay gɔd dɛn.—Lɛta Fɔ Galeshya 2:​7-9; Fɔs Lɛta To Timoti 2:​7.

¹⁷ Pɔl bin travul na di say we dɛn de kɔl tide, Tɔki. I bin go bak na Gris ɛn Itali. I bin prich to pipul dɛn we nɔto Ju we bin de na dɛn say dɛn de, ɛn i bin bigin kɔngrigeshɔn dɛn. Tin nɔ bin izi fɔ di nyu Kristian dɛn. Dɛn yon pipul dɛn bin de trit dɛn bad so dɛn bin nid pɔsin fɔ ɛnkɔrej dɛn. (Fɔs Lɛta Fɔ Tɛsalonayka 2:​14) Arawnd di ia 50, di apɔsul Pɔl bin rayt lɛta fɔ ɛnkɔrej di nyu kɔngrigeshɔn na Tɛsalonayka. I bin se: “Wi de tɛl Gɔd tɛnki ɔltɛm fɔ una wɛn wi de pre fɔ una. Ɛnitɛm we wi de pre to wi Gɔd we na wi Papa, wi kin tɛl am ɔl wetin una de du bikɔs una biliv pan Jizɔs, ɛn wi kin tɛl am aw una de wok traŋa wan.” (Fɔs Lɛta Fɔ Tɛsalonayka 1:​2, 3) I bin tɛl dɛn bak fɔ de ɛnkɔrej dɛnsɛf ɛn i bin rayt se: “Una fɔ stil de kɔrej ɛn ɛp una kɔmpin Kristiɛn dɛn.”—Fɔs Lɛta Fɔ Tɛsalonayka 5:​11.

18. Aw di gɔvnin bɔdi we bin de trade bin ɛnkɔrej Filip?

¹⁸ Insay di fɔstɛm Kristian dɛn tɛm, Jiova bin yuz di gɔvnin bɔdi fɔ ɛnkɔrej ɔl di Kristian dɛn; ivin di wan dɛn we de bifo na di kɔngrigeshɔn. We Filip bin prich to di Samɛritan dɛn bɔt Krays, di gɔvnin bɔdi bin sɔpɔt am. Dɛn bin sɛn Pita ɛn Jɔn we na bin gɔvnin bɔdi mɛmba dɛn fɔ go pre fɔ di nyu Kristian dɛn fɔ mek dɛn go gɛt oli spirit. (Di Apɔsul Dɛn Wok [Akt] 8:​5, 14-17) Filip ɛn di nyu brɔda ɛn sista dɛn bin rili gladi fɔ we di gɔvnin bɔdi bin ɛnkɔrej ɛn sɔpɔt dɛn!

19. Aw di Kristian dɛn we bin de trade bin fil we dɛn bin rid di lɛta we di gɔvnin bɔdi bin sɛn?

¹⁹ Leta, di gɔvnin bɔdi bin nid fɔ disayd sɔntin we impɔtant. Fɔ se, Kristian dɛn we nɔto Ju bin nid fɔ sakɔmsayz lɛk aw di Ju pipul dɛn bin de du, fɔ fala di Lɔ we Gɔd bin gi Mozis? (Di Apɔsul Dɛn Wok [Akt] 15:​1, 2) Afta di gɔvnin bɔdi bin pre fɔ oli spirit ɛn stɔdi di skripchɔ dɛn, dɛn bin disayd se fɔ sakɔmsayz na sɔntin we nɔ impɔtant. Dɔn dɛn rayt lɛta dɛn fɔ ɛksplen wetin dɛn dɔn disayd ɛn sɛn brɔda dɛn fɔ kɛr dɛn go na di kɔngrigeshɔn dɛn. We di Kristian dɛn rid dis lɛta, dɛn bin “gladi fɔ di mɛsej we kɔrej dɛn.”—Di Apɔsul Dɛn Wok [Akt] 15:​27-29, 30, NW; 31, 32.

20. (a) Aw di Gɔvnin Bɔdi insay wi yon tɛm de ɛnkɔrej wi ɔl? (b) Us kwɛstyɔn wi go tɔk bɔt insay di nɛks atikul?

²⁰ Tide, di Gɔvnin Bɔdi fɔ Jiova Witnɛs dɛn kin ɛnkɔrej Bɛtɛlayt dɛn, brɔda ɛn sista dɛn we de yuz ɔl dɛn tɛm fɔ sav Jiova, ɛn wi ɔl. Jɔs lɛk di brɔda dɛn we bin de trade, wisɛf de gladi we dɛn de ɛnkɔrej wi! Dɔn fɔ ɛnkɔrej di wan dɛn we dɔn lɛf fɔ sav Jiova fɔ kam bak, insay 2015, di Gɔvnin Bɔdi bin pul wan buk we gɛt di taytul, Kam Bak to Jiova. Bɔt yu tink se na di ɛlda dɛn nɔmɔ fɔ ɛnkɔrej pipul dɛn ɔ na wi ɔl fɔ ɛnkɔrej dɛn? Di nɛks atikul go ansa dis kwɛstyɔn.