1, 2. (a) Wetin mek fɔ bi slev ɛn fɔ gɛt fridɔm na bin impɔtant tɔpik insay di apɔsul Pɔl in tɛm? (b) Udat Pɔl bin tɔk se de gi tru tru fridɔm?

DI FƆSTƐM Kristian dɛn bin de di tɛm we di Roman gɔvmɛnt bin de rul, ɛn di pipul dɛn we bin de da tɛm de bin prawd bɔt dɛn lɔ dɛn, di we aw dɛn de jɔj, ɛn di fridɔm we dɛn bin gɛt. Bɔt pan ɔl dat, da pawaful gɔvmɛnt de bin abop pan slev dɛn fɔ du bɔku pan dɛn tranga wok dɛn. Tɛm bin kam, we yu kɔnt tri pipul dɛn na Rom wan pan dɛn na bin slev. Fɔ tru, fɔ bi slev ɛn fɔ gɛt fridɔm na bin impɔtant tɔpik to di pipul dɛn, ɛn ivin di Kristian dɛn.

² Bɔku tɛm di apɔsul Pɔl bin de rayt bɔt fridɔm. Bɔt i nɔ bin tray fɔ sɔlv di prɔblɛm dɛn na di wɔl, jɔs lɛk aw plɛnti pipul dɛn bin de tray fɔ du da tɛm dɛn de. Bifo dat, Pɔl ɛn in kɔmpin Kristian dɛn bin du ɔl wetin dɛn ebul fɔ tich pipul dɛn di gud nyuz bɔt Gɔd in Kiŋdɔm, ɛn fɔ ɛp dɛn fɔ ɔndastand aw di day we Jizɔs Krays day fɔ pul wi pan sin ɛn day rili impɔtant. Pɔl bin tɛl in kɔmpin Kristian dɛn fɔ  fɛn usay tru tru fridɔm de. I bin rayt se: “Jiova na di Spirit, ɛn usay Jiova in spirit de, fridɔm de de.”—Sɛkɔn Lɛta fɔ Kɔrint 3:​17, NW.

3, 4. (a) Wetin Pɔl bin tɔk bɔt na di vas dɛn we de bifo Sɛkɔn Lɛta fɔ Kɔrint 3:​17 (NW)? (b) Wetin wi fɔ du fɔ gɛt di fridɔm we Jiova de gi?

³ Insay di sɛkɔn lɛta we Pɔl bin rayt to di Kristian dɛn na Kɔrint, i bin tɔk bɔt wetin bin apin to Mozis na Mawnt Saynay afta we i dɔn fɔ tɔk wit wan enjɛl we Jiova sɛn. Mozis in fes bin de shayn! We di Izrɛlayt dɛn bin si Mozis, dɛn bin fred, so i bin tek sɔntin kɔba in fes. (Ɛksodɔs 34:​29, 30, 33; Sɛkɛn Lɛta Fɔ Kɔrint 3:​7, 13) Pɔl bin ɛksplen se: “Bɔt we pɔsin tɔn to Jiova, i de pul di vel we kɔba in fes.” (Sɛkɔn Lɛta fɔ Kɔrint 3:​16, NW) Wetin Pɔl bin min?

⁴ Insay di atikul we de bifo dis wan, wi bin lan se na Jiova we na di Wan we mek ɔltin, na in nɔmɔ gɛt di fridɔm fɔ du ɔltin. So i mek sɛns fɔ se fridɔm de usay Jiova de ɛn “usay Jiova in spirit de.” Bɔt Pɔl bin tɔk se, if wi want fɔ gɛt dis fridɔm, wi fɔ kam nia Jiova. Dis min se wi fɔ gɛt tayt padi biznɛs wit am. We di Izrɛlayt dɛn bin de na di ɛmti land usay pɔsin nɔ go ebul liv, dɛn bin de si tin lɛk aw mɔtalman de si am nɔto lɛk aw Jiova de si am. I bin tan lɛk se dɛn kɔba dɛn at ɛn maynd wit sɔntin. Dɛn bin want fɔ yuz di nyu fridɔm we dɛn gɛt fɔ satisfay dɛnsɛf.—Di Ibru Pipul Dɛn 3:​8-10.

5. (a) Uskayn fridɔm Jiova in spirit de gi? (b) Aw wi no se pɔsin go stil gɛt di fridɔm we Jiova de gi pan ɔl we in na slev ɔ i de na prizin? (c) Us kwɛstyɔn dɛn wi nid fɔ ansa?

⁵ Di fridɔm we Jiova in spirit de gi bɛtɛ pas di fridɔm we pɔsin de gɛt we i nɔ bi slev igen. Di fridɔm we da spirit de de gi bɛtɛ fa fawe pas di fridɔm we mɔtalman go ɛva gi. I de fri wi frɔm sin ɛn day, lay lay wɔship, ɛn di tin dɛn we dɛn de du. (Lɛta Fɔ Rom 6:​23; 8:​2) Dat na wɔndaful fridɔm! Ivin pɔsin we na slev ɔ pɔsin we de na prizin kin gɛt dis fridɔm. (Jɛnɛsis 39:​20-23) Dɛn bin put wan sista we nem Nansi Yuɛn ɛn wan brɔda we nem Arɔld Kiŋ na prizin fɔ lɔng tɛm fɔ wetin dɛn biliv; bɔt pan ɔl dat dɛn bin stil gɛt di kayn fridɔm we Gɔd in spirit de gi. Yu kin wach we dɛn de tɔk bɔt wetin bin apin to dɛn na JW TV. (Luk ɔnda INTAVYU ƐN ƐKSPIRIƐNS DƐN > WE WI DE BIA WIT PRƆBLƐM.) Naw lɛ wi tɔk bɔt tu kwɛstyɔn dɛn. Aw wi go sho se di fridɔm we wi gɛt rili valyu? Aw wi go yuz di fridɔm we wi gɛt di rayt we?

6. Aw di Izrɛlayt dɛn bin sho se dɛn nɔ gladi fɔ di fridɔm we Jiova bin gi dɛn?

⁶ We pɔsin gi wi gift we valyu, wi kin rili gladi ɛn tɛl am tɛnki. Bɔt di Izrɛlayt dɛn nɔ bin gladi fɔ di fridɔm we Jiova bin gi dɛn. Jɔs afta we Jiova pul dɛn  kɔmɔt na Ijipt, dɛn bin bigin fɔ kray fɔ di it ɛn drink we dɛn bin de gɛt de. Dɛn bin de grɔmbul bɔt di mana we Jiova bin gi dɛn fɔ it. Dɛn bin ivin want fɔ go bak na Ijipt! To dɛn, ‘di fish, di kɔkumba, di wata mɛlɔn, di lik, di yabas, ɛn di galik’ bin rili impɔtant pas di fridɔm we Jiova dɔn gi dɛn fɔ wɔship am. Na dat mek Jiova bin rili vɛks pan dɛn. (Di Nɔmba Dɛm 11:​5, 6, 10; 14:​3, 4) Dis de tich wi wan impɔtant lɛsin.

7. Aw Pɔl bin fala in yon advays we de na Sɛkɛn Lɛta Fɔ Kɔrint 6:​1? Aw wisɛf kin du di sem tin?

⁷ Pɔl bin tɛl ɔlman we na tru Kristian fɔ de sho se dɛn gladi, ɛn tɛl Jiova tɛnki fɔ we i yuz in Pikin Jizɔs Krays fɔ fri wi. (Rid Sɛkɛn Lɛta Fɔ Kɔrint 6:​1.) Pɔl nɔ bin pafɛkt, in na bin slev to sin ɛn day, ɛn dis bin de mek i rili fil bad. Bɔt pan ɔl dat, i tɔk se: “A tɛl Gɔd tɛnki we i mek wi Masta Jizɔs Krays sev mi!” Wetin mek i bin tɔk dat? Pɔl bin ɛksplen to in kɔmpin Kristian dɛn se: “Gɔd in Spirit we de gi layf . . . dɔn mek wi gɛt wanwɔd wit Jizɔs Krays, ɛn i dɔn pul wi ɔnda di pawa we sin ɛn day bin gɛt oba wi.” (Lɛta Fɔ Rom 7:​24, 25; 8:​2) Jɔs lɛk Pɔl, wi nɔ fɔ ɛva fɔgɛt se Jiova dɔn fri wi ɛn wi nɔ bi slev igen to sin ɛn day. Di day we Krays day fɔ wi dɔn gi wi di chans fɔ sav Gɔd wit klin kɔnshɛns ɛn dis de mek wi rili gladi.—Sam 40:​8.

8, 9. (a) Us wɔnin we di apɔsul Pita bin gi bɔt aw wi go yuz wi fridɔm? (b) Aw pɔsin go yuz in fridɔm di rayt we?

⁸ Wi nɔ fɔ jɔs tɔk se wi gladi fɔ wetin Jiova dɔn du fɔ wi, bɔt wi fɔ tek tɛm bak mek wi nɔ yuz di fridɔm we wi gɛt di rɔng we. Fɔ ɛgzampul, di apɔsul Pita bin wɔn wi se wi nɔ fɔ yuz di fridɔm we wi gɛt as chans fɔ du wetin bad na Jiova in yay. (Rid Pita In Fɔs Lɛta 2:​16.) Dis wɔnin mek wi mɛmba wetin  bin apin to di Izrɛlayt dɛn di tɛm we dɛn bin de na di ɛmti land usay pɔsin nɔ go ebul liv. Tide, wisɛf nid dis wɔnin ɛn sɔntɛm wi ivin nid am mɔ. Setan ɛn in wɔl de mek bɔku tin dɛn we wi go lɛk fɔ wɛr, it, drink, ɛn ɛnjɔy wisɛf. Biznɛs pipul dɛn we gɛt sɛns kin yuz fayn fayn pipul dɛn fɔ mek wi tink se wi fɔ bay tin dɛn we wi nɔ rili nid. I kin izi fɔ mek di pipul dɛn na di wɔl ful wi fɔ yuz wi fridɔm di rɔng we.

⁹ Di tin we Pita bin tɔk kin gɛt sɔntin fɔ du bak wit big tin dɛn na wi layf, lɛk fɔ disayd ɔmɔs buk wi fɔ lan, ɔ uskayn wok wi fɔ du. Fɔ ɛgzampul, dɛn kin mɔna di yɔŋ wan dɛn fɔ wok tranga wan so dat dɛn go tek dɛn na di bɛst yunivasiti dɛn. Bɔku pipul dɛn kin tɛl dɛn se if dɛn lan bɔku buk, dɛn go gɛt gud wok, mek bɔku mɔni, ɛn pipul dɛn go rɛspɛkt dɛn. Dɛn pipul dɛn ya kin tɔk bɔt tin dɛn we de sho se we pɔsin go yunivasiti, i kin gɛt mɔ mɔni pas di wan we jɔs stɔp na sɛkɔndari skul. Fɔ lan bɔku buk na tin we kin rili fayn to yɔŋ wan dɛn we dɛn gɛt fɔ disayd wetin dɛn want fɔ du na layf. Bɔt wetin dɛn ɛn dɛn mama ɛn papa fɔ mɛmba?

10. Wetin wi fɔ mɛmba we wi de disayd fɔ du sɔntin we gɛt fɔ du wit wi yon layf?

¹⁰ Sɔm pipul dɛn fil se bikɔs na dɛnsɛf gɛt fɔ disayd bɔt dɛn tin ya, dɛn fri fɔ disayd wetin dɛn want fɔ disayd, wans dɛn kɔnshɛns klia. Dɛn kin tink bɔt wetin Pɔl bin tɔk we i se: “If pɔsin fil bad, dat fɔ tap mi mek a nɔ du wetin a want du, a nɔ fri fɔ du wetin a lɛk?” (Fɔs Lɛta Fɔ Kɔrint 10:​29) Pan ɔl we wi gɛt di fridɔm fɔ disayd fɔ wisɛf ɔmɔs buk wi fɔ lan ɛn us wok wi fɔ gɛt, wi fɔ mɛmba se wi fridɔm gɛt say usay i stɔp ɛn ɛnitin we wi disayd fɔ du kin mek bad ɔ gud tin apin to wi. Na dat mek Pɔl bin tɔk se: “Sɔm pipul go se, ‘Wi kin du ɛnitin, nɔbɔdi nɔ go tap wi.’ Dat na tru. Bɔt nɔto ɔltin we pɔsin kin du, gud. Dɛn go se igen, ‘Wi kin du ɛnitin,’ bɔt nɔto ɔltin we dɛn de du, go ɛp ɔda pipul.” (Fɔs Lɛta Fɔ Kɔrint 10:​23) So pan ɔl we wi gɛt di fridɔm fɔ disayd wetin wi want fɔ du, di tin we impɔtant pas ɔl nɔto wetin wi want fɔ du.

11. Wetin mek Jiova fri wi frɔm sin ɛn day?

¹¹ We Pita bin wɔn wi fɔ lɛ wi nɔ yuz wi fridɔm di rɔng we, i bin tɔk se wi fɔ yuz am di rayt we fɔ bi “slev to Gɔd.” Di rizin we mek Jiova bin yuz Jizɔs fɔ fri wi frɔm sin ɛn day, na bikɔs i want wi fɔ sav Am te go.

12. Us ɛgzampul Noa ɛn in famili sɛt fɔ wi?

¹² Di bɛst we fɔ yuz wi fridɔm na bay we wi de yuz wi tɛm ɛn trɛnk fɔ sav Jiova gud gud wan. We wi du dis, dat go protɛkt wi frɔm di we aw pipul dɛn na di wɔl de tink ɛn du tin, ɛn wi nɔ fɔ alaw dɛn tin dɛn de fɔ bi di tin we impɔtant pas ɔl na wi layf. (Lɛta Fɔ Galeshya 5:​16) Tink bɔt wetin Noa ɛn in famili bin du. Insay Noa in tɛm, pipul dɛn bin lɛk fɛt-fɛt ɛn dɛn bin de du mami ɛn dadi biznɛs di we aw Gɔd nɔ want. Bɔt Noa ɛn in famili nɔ bin want di tin dɛn we pipul dɛn we bin de arawnd dɛn bin want ɛn dɛn nɔ bin de  du di tin dɛn we dɛn bin de du. Dɛn bin disayd fɔ yuz ɔl dɛn tɛm fɔ du di wok we Jiova bin dɔn gi dɛn. Dɛn bin bil di ak, gɛda it fɔ dɛnsɛf ɛn fɔ di animal dɛn, ɛn wɔn di pipul dɛn bɔt di Ebi Ebi Ren. “Noa du ɔl wetin PAPA GƆD [“Jiova,” NW] tɛl am fɔ du.” (Jɛnɛsis 6:​22) We Noa ɛn in famili bin du dis, dat bin mek dɛn sev.—Di Ibru Pipul Dɛn 11:​7.

13. Wetin Jiova dɔn tɛl wi fɔ du?

¹³ Wetin Jiova dɔn tɛl wi fɔ du tide? As Jizɔs in disaypul dɛn, wi no se Gɔd dɔn tɛl wi fɔ prich. (Rid Lyuk 4:​18, 19.) Tide, Setan dɔn mek bɔku pipul dɛn nɔ de si ɛn no se dɛn na slev to lay lay rilijɔn, prɔpati dɛn, ɛn pɔlitiks. (Sɛkɛn Lɛta Fɔ Kɔrint 4:​4) Jɔs lɛk Jizɔs, wisɛf gɛt di chans fɔ ɛp ɔda pipul dɛn fɔ kam fɔ no ɛn wɔship Jiova, di Gɔd de gi fridɔm. (Matyu 28:​19, 20) I nɔ izi fɔ prich to ɔda pipul dɛn. Na sɔm say dɛn, pipul dɛn nɔ want fɔ lan bɔt Gɔd, ɛn sɔm de ivin vɛks we wi go prich to dɛn. Bɔt na Jiova dɔn tɛl wi fɔ prich, so wi fɔ aks wisɛf dis kwɛstyɔn ya, ‘A de yuz di fridɔm we a gɛt fɔ du mɔ na Jiova in savis?’

14, 15. Wetin bɔku pan Jiova in pipul dɛn dɔn disayd fɔ du? (Luk di pikchɔ nia dis atikul in taytul.)

¹⁴ I fayn fɔ no se bɔku pan Jiova in pipul dɛn dɔn kam fɔ no se di tɛm fɔ lɛ dis wɔl dɔn nɔ de fa igen, ɛn dɛn dɔn disayd fɔ liv simpul layf ɛn stat fɔ payɔnia. (Fɔs Lɛta Fɔ Kɔrint 9:​19, 23) Sɔm pan dɛn de payɔnia usay dɛn de, ɛn ɔda wan dɛn de muf go na ɔda kɔngrigeshɔn usay dɛn nid ɛp. Insay di pas fayv ia, i pas 250,000 brɔda ɛn sista dɛn we dɔn stat fɔ payɔnia, ɛn naw wi gɛt pas 1,100,000 rɛgyula payɔnia dɛn. I rili fayn fɔ no se bɔku pan wi brɔda ɛn sista dɛn de yuz dɛn fridɔm fɔ sav Jiova dis kayn we!—Sam 110:​3.

¹⁵ Wetin bin ɛp dɛn brɔda ɛn sista dɛn ya fɔ yuz dɛn fridɔm di rayt we? Tink bɔt Jɔn ɛn Judit we dɔn sav na bɔku kɔntri dɛn fɔ di pas 30 ia. Dɛn ɛksplen se we Payɔnia Savis Skul bin bigin insay 1977, di skul bin ɛnkɔrej di studɛnt dɛn fɔ muf go na say dɛn we dɛn nid mɔ pipul dɛn fɔ prich. Fɔ mek dɛn go du dat, Jɔn ɛn Judit bin nid fɔ liv simpul layf. So Jɔn bin nid fɔ de chenj di wok we i bin de du bɔku tɛm. Leta, dat bin mek dɛn go na ɔda kɔntri fɔ go prich. Wetin bin ɛp dɛn fɔ bia prɔblɛm dɛn lɛk fɔ lan nyu langwej, fɔ ajɔst to nyu kɔlchɔ, ɛn di wɛda? Dɛn bin pre to Jiova ɛn abop pan am fɔ ɛp dɛn. Aw dɛn fil we dɛn dɔn de sav Jiova dis kayn we ɛn ɔl dɛn tɛm ya? Jɔn bin se: “A bin fil se a de du di bɛst wok we a dɔn ɛva du na mi layf. Jiova  rial to mi jɔs lɛk aw papa we lɛk in pikin kin bi. Naw a dɔn ɔndastand gud gud wan wetin Jems 4:​8 min: ‘Una kam nia Gɔd ɛn i go kam nia una.’ A no se a dɔn fɛn wetin a bin de luk fɔ, mi layf dɔn gɛt minin ɛn naw a satisfay.”

16. Aw bɔku bɔku pipul dɛn dɔn yuz dɛn fridɔm di rayt we?

¹⁶ Jɔs lɛk Jɔn ɛn Judit, sɔm brɔda ɛn sista dɛn kin payɔnia fɔ lɔng tɛm. Bɔt bikɔs wi ɔl nɔ bi di sem, sɔm pipul dɛn kin payɔnia fɔ shɔt tɛm nɔmɔ. Bɔt stil, bɔku pan dɛn de ɛp fɔ bil ples dɛn we wi de yuz fɔ wɔship Jiova ɔlsay na di wɔl. Fɔ ɛgzampul, na lɛk 27,000 brɔda ɛn sista dɛn bin kam fɔ ɛp wit di bildin wok na wi wɔl ɛdkwata we de na Wɔwik, insay Nyu Yɔk. Sɔm bin go de fɔ tu wiks, sɔm bin go fɔ sɔm mɔnt, ɛn ɔda wan dɛn bin go fɔ wan ia ɔ mɔ. Bɔku pan dɛn brɔda ɛn sista dɛn ya bin mek bɔku sakrifays dɛn fɔ lɛ dɛn go ebul wok na Wɔwik. Dɛn na fayn fayn ɛgzampul dɛn bɔt pipul dɛn we de yuz dɛn fridɔm fɔ prez ɛn ɔnɔ Jiova, we na di Gɔd we de gi fridɔm!

17. Wetin wi go ɛnjɔy if wi yuz di fridɔm we wi gɛt di rayt we?

¹⁷ Wi rili gladi fɔ no Jiova ɛn fɔ gɛt di fridɔm we i de gi di wan dɛn we de wɔship am. Lɛ wi sho se dis fridɔm rili impɔtant to wi bay di tin dɛn we wi de disayd fɔ du. Bifo wi yuz wi fridɔm di rɔng we, i go fayn fɔ mek wi yuz am fɔ sav Jiova gud gud wan. If wi du dis, wi go ɛnjɔy di blɛsin we Jiova dɔn prɔmis we i se: “Gɔd go fri dɛn, so dat dɛn nɔ go rɔtin igen, dɛn go fri, lɛkɛ aw Gɔd in pikin dɛn dɔn fri.”—Lɛta Fɔ Rom 8:​21.