Yɔŋ Wan dɛn, Una De Pe Atɛnshɔn pan di Gol dɛn we Una Dɔn Sɛt fɔ Sav Jiova?
“Put yu biznɛs na PAPA GƆD [“Jiova,” NW] in an, ɛn si we bɛtɛ de fala yu.”—PRƆVABS 16:3.
1-3. (a) Wetin ɔl yɔŋ wan dɛn gɛt fɔ du? Aw yu go kɔmpia dɛn? (Luk di pikchɔ nia dis atikul in taytul.) (b) Wetin go ɛp yɔŋ wan dɛn we na Kristian?
IMAJIN se yu plan fɔ go pan wan spɛshal program na wan tɔŋ we de fa say. Fɔ travul go de, yu nid fɔ tek bɔs. Fɔs, we yu go na di bɔs steshɔn, yu kɔnfyus bikɔs bɔku pipul dɛn ɛn bɔku bɔs dɛn de de. Bɔt bikɔs yu sabi usay yu de go ɛn us bɔs fɔ tek, dat go mek yu gladi. Yu nɔ go tek ɔda bɔs, bikɔs i go kɛr yu go na di rɔng say.
2 Layf tan lɛk we pɔsin de travul, ɛn una dɛn yɔŋ wan dɛn tan lɛk di pipul dɛn we de na di bɔs steshɔn. Bɔku tɛm, yu kin kɔnfyus bikɔs bɔku tin dɛn de fɔ disayd na layf. Bɔt if yu no usay yu rili want fɔ go, dat go mek i izi fɔ yu fɔ disayd di rayt tin. Usay yu go go?
3 Dis atikul ya go ansa da kwɛstyɔn de ɛn i go ɛnkɔrej yu fɔ pe atɛnshɔn pan di tin dɛn we go mek Jiova gladi. Dis min se yu fɔ fala Jiova in advays pan ɛnitin we yu want fɔ disayd na layf, lɛk if yu fɔ lan bɔku buk ɔ us wok yu fɔ tek ɔ if yu fɔ mared ɛn bɔn pikin dɛn. Ɛn i min bak se yu fɔ tray fɔ du di tin dɛn we yu dɔn plan fɔ du we yu de sav Jiova, Prɔvabs 16:3.
ɛn dat go mek yu kam nia Jiova mɔ ɛn mɔ. Yu go biliv tranga wan se Jiova go blɛs yu ɛn ɛp yu fɔ go bifo, if yu pe atɛnshɔn fɔ sav am.—RidWETIN MEK WI FƆ PLAN FƆ DU MƆ WE WI DE SAV JIOVA?
4. Wetin wi go tɔk bɔt insay dis atikul?
4 I fayn fɔ plan fɔ du mɔ we yu de sav Jiova. Wetin mek? Wi go kam tɔk bɔt tri rizin dɛn. Di fɔs ɛn sɛkɔn rizin dɛn go ɛp yu fɔ si se we yu de tray fɔ du di tin dɛn we yu dɔn plan fɔ du mɔ we yu de sav Jiova, dat go mek yu gɛt tayt padi biznɛs wit am. Di tɔd wan go sho wi wetin mek i fayn fɔ gɛt gol dɛn lɛk dɛn wan ya we yu yɔŋ.
5. Us impɔtant rizin we mek i fayn fɔ plan fɔ du mɔ we yu de sav Jiova?
5 Wan impɔtant rizin we mek wi fɔ plan fɔ du mɔ we wi de sav Jiova na fɔ tɛl am tɛnki fɔ di lɛk we i lɛk wi ɛn fɔ wetin i dɔn du fɔ wi. Wan pan di man dɛn we rayt di Sam buk bin tɔk se: “Na fayn tin fɔ mek pipul tɛl PAPA GƆD [“Jiova,” NW] tɛnki . . . PAPA GƆD [“Jiova,” NW], di wɔndaful wok we yu de du de mek mi at swit. A de siŋ bikɔs a kin gladi we a luk wetin yu mek wit yu an dɛn.” (Sam 92:1, 4) Tink bɔt ɔl wetin Jiova dɔn gi yu, lɛk yu layf, di fet we yu gɛt, di Baybul, di kɔngrigeshɔn, ɛn di op we yu gɛt fɔ de sote go na Paradays. We yu plan fɔ du mɔ we yu de sav Jiova, yu de sho Jiova se yu gladi fɔ ɔl dɛn tin ya ɛn dat de mek yu kam nia am mɔ ɛn mɔ.
6. (a) We wi plan fɔ du mɔ we wi de sav Jiova, aw dat de afɛkt wi padi biznɛs wit am? (b) Wetin na sɔm tin dɛn we yu go plan fɔ du we yu de sav Jiova di tɛm we yu yɔŋ?
6 Di sɛkɔn rizin we mek i fayn fɔ plan fɔ du mɔ we yu de sav Jiova na bikɔs we yu tray fɔ du di tin dɛn we yu dɔn plan fɔ du, dat go mek yu du gud wok fɔ Jiova. Dis go mek yu kam nia am mɔ ɛn mɔ. Di apɔsul Pɔl bin prɔmis wi se: “Gɔd nɔto pɔsin we nɔ de du wetin rayt, so i nɔ go fɔgɛt una wok ɛn di lɛk we una de sho se una lɛk in nem.” (Di Ibru Pipul Dɛn 6:10, NW) Yu nɔ tu smɔl fɔ sɛt gol dɛn. Fɔ ɛgzampul, Kristin bin ol 10 ia we i bin disayd fɔ de rid di stori dɛn bɔt Jiova in fetful Witnɛs dɛn ɔltɛm. Tobi bin ol 12 ia we i plan fɔ rid di wan ol Baybul bifo i baptayz. Makzim bin ol 11 ia ɛn in sista Noemi bin ol 10 ia we dɛn baptayz. Dɛn ɔl tu bin sɛt di gol fɔ sav na Bɛtɛl. Fɔ lɛ dɛn go pe atɛnshɔn pan wetin dɛn bin dɔn plan fɔ du, dɛn bin put di fɔm fɔ wok na Bɛtɛl pan wan wɔl insay dɛn os. We yu? Yu kin tink bɔt sɔm gol dɛn we yu go sɛt ɛn bigin wok naw so dat yu go du wetin yu don plan?—Rid Lɛta Fɔ Filipay 1:10, 11.
If yu no di tin dɛn we yu dɔn plan fɔ du, i kin izi fɔ mek yu disayd fɔ du di rayt tin dɛn
7, 8. (a) We wi sɛt gol dɛn, aw dat kin mek am izi fɔ disayd sɔntin dɛn? (b) Wetin mek wan yɔŋ sista bin disayd nɔ fɔ go yunivasiti?
7 Wetin na di tɔd rizin we mek i fayn fɔ plan fɔ du mɔ we yu de sav Jiova di tɛm we yu yɔŋ? We yu yɔŋ, yu gɛt bɔku tin dɛn fɔ disayd. Yu nid fɔ disayd ɔmɔs buk yu go lan ɔ uskayn wok yu go du ɛn bɔku ɔda tin dɛn. Dɛn tin dɛn ya we yu kin disayd fɔ du na layf tan lɛk di jɔnkshɔn dɛn we yu kin mit we yu de travul. If yu sabi usay yu de go, i kin izi fɔ no us rod fɔ tek. semweso, if yu no di tin dɛn we yu dɔn plan fɔ du, i kin izi fɔ mek yu disayd fɔ du di rayt tin dɛn. Prɔvabs 21:5 tɔk se: “Wɛn yu tek tɛm plan ɛn wok soba wan, yu de prɔfit.” If yu plan fɔ sɛt gud gol dɛn di tɛm we yu yɔŋ, i nɔ go te yu go ebul fɔ du wetin yu plan. Dis na wetin bin apin to Damaris di tɛm we i bin gɛt fɔ disayd sɔntin impɔtant na in layf we i bin yɔŋ.
8 Damaris bin gɛt gud risɔlt we i dɔn sɛkɔndari skul, ɛn i bin fɔ dɔn go yunivasiti fɔ stɔdi lɔ we i nɔ go ivin pe natin. Bifo dat, i bin disayd fɔ wok na bank. Wetin mek? Na bikɔs we i bin smɔl, i bin dɔn disayd se i go payɔnia. I bin tɔk se: “Dat bin min se a de du wok we nɔ de tek ɔl mi tɛm. If a bin dɔn bi lɔya, a fɔ dɔn gɛt bɔku mɔni. Bɔt a nɔ bin fɔ dɔn ebul fɔ fɛn wok we nɔ go tek ɔl mi tɛm.” Damaris dɔn de payɔnia fɔ 20 ia. Yu tink se i bin fil se i sɛt fayn gol we i yɔŋ ɛn na di rayt tin i bin disayd fɔ du? Yɛs. Na di bank usay i de wok, i dɔn mit bɔku lɔya dɛn. Na da wok de i bin fɔ de du if i bin dɔn go yunivasiti. I tɔk se bɔku pan dɛn nɔ gladi atɔl wit dɛn wok. Damaris fil se ɔl dɛn tɛm ya we i dɔn de payɔnia, dɔn ɛp am fɔ mek i rili gladi ɛn i nɔ de fil lɛk aw dɛn de fil.
9. Wetin mek wi gladi fɔ wi yɔŋ wan dɛn?
9 Plɛnti yɔŋ wan dɛn ɔlsay na di wɔl de rili du wɛl, ɛn wi nid fɔ tɛl dɛn tɛnki. Dɛn padi biznɛs wit Jiova ɛn di tin dɛn we dɛn plan fɔ du we dɛn de sav Jiova, dɔn bi di men tin na dɛn layf. Dɛn yɔŋ wan ya de rili ɛnjɔy layf ɛn dɛn de lan fɔ mek Jiova dayrɛkt dɛn pan ɔltin, lɛk ɔmɔs buk dɛn fɔ lan, uskayn wok dɛn fɔ tek, ɛn if dɛn fɔ mared ɔ bɔn pikin. Sɔlɔmɔn bin rayt se: “Trɔs PAPA GƆD [“Jiova,” NW] wit ɔl yu at.” I tɔk bak se: “Mek i put an pan ɔl wetin yu de du, ɛn yu go si yu we klia.” (Prɔvabs 3:5, 6) Yɔŋ wan dɛn, Jiova rili lɛk una! Una rili gɛt valyu to am, ɛn i go protɛkt, gayd, ɛn blɛs una.
RƐDI GUD GUD WAN FƆ TƐL ƆDA PIPUL DƐN BƆT JIOVA
10. (a) Wetin mek di prichin wok fɔ bi wan pan di tin dɛn we rili impɔtant to wi? (b) Aw yu go ebul fɔ ɛksplen gud gud wan di tin dɛn we yu biliv?
10 We yu pe atɛnshɔn pan di tin dɛn we go mek Jiova gladi, dat go mek yu want fɔ tɛl ɔda pipul dɛn bɔt am. Jizɔs bin tɔk se, “dɛn go prich di gud nyuz na ɔl di neshɔn dɛn fɔs.” (Mak 13:10, NW) So wi nɔ fɔ westɛm fɔ du di prichin wok ɛn i fɔ bi wan pan di tin dɛn we rili impɔtant to wi. Yu go ebul fɔ sɛt gol fɔ de prich ɔltɛm? Yu go ebul fɔ payɔnia? Bɔt wetin yu go du if yu nɔ de rili ɛnjɔy fɔ prich? Ɛn aw yu go ebul fɔ ɛksplen gud gud wan di tin dɛn we yu biliv? Dɛn tu tin dɛn ya go ɛp yu: Fɔs, pripia gud gud wan ɛn sɛkɔn, nɔ taya fɔ tɛl ɔda pipul dɛn wetin yu no bɔt Jiova. If yu du dat, yu go sɔprayz fɔ si aw yu de rili ɛnjɔy fɔ prich.
Aw yu go pripia fɔ tɛl ɔda pipul dɛn bɔt Jiova? (Luk na paregraf 11 ɛn 12)
11, 12. (a) Wetin yu go du fɔ pripia fɔ tɛl ɔda pipul dɛn bɔt Jiova? (b) Aw wan yɔŋ brɔda bin yuz di chans we i bin gɛt fɔ tɔk bɔt Jiova na skul?
11 Yu kin stat bay we yu de pripia fɔ ansa sɔm kwɛstyɔn dɛn we yu skulmet dɛn kin aks. Fɔ ɛgzampul, “Wetin mek yu biliv Gɔd?” Atikul dɛn de na Di Ibru Pipul Dɛn 3:4, Lɛta Fɔ Rom 1:20, ɛn Sam 139:14. Ɔda wɔkshit dɛn de bak we yu go yuz fɔ pripia yu ansa dɛn fɔ bɔku ɔda kwɛstyɔn dɛn.—Rid Pita In Fɔs Lɛta 3:15.
jw.org wɛbsayt we go ɛp yu fɔ ansa da kwɛstyɔn de. If yu luk ɔnda di say we se BIBLE TEACHINGS > TEENAGERS, yu go si wan wɔkshit we gɛt di taytul “Why Do I Believe in God?” Du di tin dɛn we yu fɔ du insay da wɔkshit fɔ pripia yu yon ansa dɛn. Dɔn bak insay da wɔkshit de, yu go si tri Baybul vas dɛn we yu kin yuz:12 Tɛl yu skulmet dɛn se dɛn kin fɛn ansa dɛn fɔ dɛnsɛf na jw.org. Na dat Luka bin du. In klasmet dɛn bin de tɔk bɔt difrɛn rilijɔn dɛn. Dɔn Luka notis se di skulbuk tɔk tin dɛn bɔt Jiova Witnɛs dɛn we nɔ kɔrɛkt. Pan ɔl we Luka bin de fred, i bin aks di ticha if i go alaw am fɔ tɛl in klasmet dɛn wetin mek dɛn tin dɛn de rɔng. Di ticha bin alaw Luka fɔ ɛksplen wetin i biliv, ɛn i bin ebul fɔ sho di wɛbsayt to ɔlman na in klas. Ɛn di ticha bin gi omwɔk to ɔlman na di klas fɔ wach di fim we gɛt di taytul, Aw fɔ Win Pɔsin We De Tek Advantej pan Yu Ilɛksɛf Yu Nɔ Fɛt Am? Yu go ebul fɔ imajin aw Luka bin gladi fɔ we i bin ebul fɔ tɔk bɔt Jiova na skul?
13. Wetin mek wi nɔ fɔ giv-ɔp we wi gɛt prɔblɛm dɛn?
13 We yu gɛt prɔblɛm dɛn, lɛ dat nɔ mek yu at pwɛl, bifo dat, kɔntinyu fɔ du di tin dɛn we yu bin dɔn plan fɔ du. (Sɛkɛn Lɛta To Timoti 4:2) Na dat Katarina bin du. I bin ol 17 ia we i bin sɛt di gol fɔ prich to ɔl in wokmet dɛn. Bɔt wan pan dɛn bi de tɛl am bad wɔd bɔku tɛm. Bɔt dat nɔ mek Katarina fɔgɛt bɔt in gol. Di fayn we aw i bin de biev bin tɔch wan pan in wokmet dɛn we nem Ans. Ans bigin fɔ rid wi buk ɛn magazin dɛn, i stɔdi di Baybul ɛn i bin baptayz. Katarina nɔ bin no bɔt ɔl dis bikɔs i bin dɔn transfa go ɔda say. So i bin rili sɔprayz we afta 13 ia, in ɛn in famili bin de na mitin ɛn di brɔda we bin gi di pɔblik tɔk, na Ans! I bin rili gladi fɔ we i nɔ bin giv-ɔp fɔ prich to in wokmet dɛn.
NƆ FƆGƐT DI GOL DƐN WE YU DƆN SƐT
14, 15. (a) Wetin yu fɔ mɛmba we ɔda pipul dɛn de mɔna yu fɔ du di tin dɛn we dɛn de du? (b) Wetin yu fɔ du fɔ mek yu go kɔntinyu fɔ tinap tranga wan we ɔda pipul dɛn de mɔna yu?
14 Dis atikul dɔn ɛnkɔrej yu fɔ pe atɛnshɔn pan di tin dɛn we go mek Jiova gladi ɛn fɔ sɛt gol we go mek yu gɛt tayt padi biznɛs wit Jiova. Bɔt bɔku pan yu kɔmpin yɔŋ wan dɛn jɔs want fɔ ɛnjɔy dɛn layf. Ɛn sɔntɛnde, dɛn kin want mek yu du wetin dɛn de du. Tɛm go kam we yu go nid fɔ mek ɔlman no se di tin we impɔtant to yu, na fɔ du di tin dɛn we yu dɔn plan fɔ du. Nɔ alaw ɔda pipul dɛn fɔ mek yu fɔgɛt di tin dɛn we yu dɔn plan fɔ du. If yu bin de na di bɔs steshɔn we wi bin tɔk bɔt na paregraf wan na dis atikul, yu bin fɔ dɔn go insay ɛni bɔs jɔs bikɔs di pipul dɛn we de insay de, de ɛnjɔy dɛnsɛf? Nɔ, yu nɔ go du dat!
15 So wetin yu go du fɔ mek yu go kɔntinyu fɔ tinap tranga wan we ɔda pipul dɛn de mɔna yu fɔ du wetin dɛn de du? Na fɔ avɔyd fɔ de na say dɛn we i nɔ go izi fɔ yu fɔ bia we pipul dɛn de mɔna yu fɔ du wetin dɛn want. (Prɔvabs 22:3) Tink bɔt di bad tin dɛn we go apin to yu if yu du tin dɛn we nɔ rayt. (Lɛta Fɔ Galeshya 6:7) Ɛn na fɔ put yusɛf dɔŋ ɛn gri se yu nid gud advays. Lisin to wetin yu mama ɛn papa dɛn ɛn ɔda machɔ brɔda ɛn sista dɛn na di kɔngrigeshɔn de tɛl yu.—Rid Pita In Fɔs Lɛta 5:5, 6.
16. Aw di tin dɛn we bin apin to Kristɔf de sho se i impɔtant fɔ mek wi put wisɛf dɔŋ?
16 Kristɔf bin put insɛf dɔŋ, so dat bin mek i gri fɔ lisin to gud advays. Jɔs afta we i baptayz, i bigin fɔ de go na wan say usay pipul dɛn kin go tren ɔltɛm. Na de i bin mit ɔda yɔŋ pipul dɛn we bin aks am fɔ jɔyn dɛn spɔt klɔb. I bin tɔk to wan ɛlda bɔt dat, ɛn di ɛlda bin tɛl am fɔ tink bɔt sɔm pan di bad tin dɛn we go apin, lɛk di kɔmpitishɔn we go de de. Bɔt pan ɔl dat, Kristɔf bin disayd fɔ jɔyn di spɔt tim. Afta sɔm tɛm, i bin notis se na so so fɛt-fɛt ɛn bad tin dɛn bin de apin de. I bin go tɔk bak to di ɛlda dɛn, ɛn dɛn bin gi am advays dɛn frɔm di Baybul. Kristɔf bin tɔk se, “Jiova bin gi mi gud pipul dɛn we de advays mi, ɛn a bin lisin to Am, pan ɔl we i bin tek sɔm tɛm.” Yu de put yusɛf dɔŋ fɔ gri fɔ lɛ dɛn advays yu?
17, 18. (a) Wetin Jiova want fɔ yɔŋ pipul dɛn tide? (b) Wetin yu go du fɔ lɛ yu nɔ rigrɛt di tin dɛn we yu dɔn disayd fɔ du we yu go dɔn big? Gi wan ɛgzampul.
17 Di Baybul tɔk se: “Ɛnjɔy yusɛf, yɔŋman [ɔ uman], we yu yɔŋ, ɛn lɛ yu at mek yu gladi we yu yɔŋ.” (Ɛkliziastis 11:9) Jiova want yu fɔ gladi we yu yɔŋ. Insay dis atikul, yu dɔn si se wan tin we yu fɔ du fɔ lɛ yu gladi na we yu pe atɛnshɔn pan di tin dɛn we yu dɔn plan fɔ du we go mek yu gɛt tayt padi biznɛs wit Jiova. Ɛn yu dɔn lan bak se yu fɔ fala di advays dɛn we Jiova de gi pan ɔl di tin dɛn we plan fɔ du. If yu nɔ westɛm fɔ du dɛn tin dɛn de na yu layf, i nɔ go te yu go si aw Jiova de gayd yu, protɛkt yu, ɛn blɛs yu. Tink bɔt ɔl di gud advays dɛn we Jiova de gi yu insay in Wɔd, ɛn fala di advays we se: “Mɛmba PAPA GƆD we mek yu, naw we yu yɔŋ.”—Ɛkliziastis 12:1.
18 Yɔŋ wan dɛn de gro ɛn bi big pipul dɛn kwik kwik wan. Bɔt i sɔri fɔ no se as tɛm de go bɔku pan dɛn kin rigrɛt se, dɛn nɔ bin sɛt di rayt gol dɛn ɔ dɛn nɔ bin sɛt ɛni gol atɔl di tɛm we dɛn bin yɔŋ. Bɔt if yu pe atɛnshɔn pan di tin dɛn we yu dɔn plan fɔ du we go mek yu gɛt tayt padi biznɛs wit Jiova, dat go mek yu gladi fɔ di tin dɛn we yu bin dɔn disayd fɔ du we yu bin yɔn. Na da we de Mijana de fil. I bin rili gud pan spɔt di tɛm we i nɔ bin dɔn ol 20 ia yet. Ɛn dɛn bin ivin kɔl am fɔ tek pat pan di Winta Olimpik Gem dɛn. Bɔt i nɔ bin go. Bifo dat, i bin disayd fɔ yuz ɔl in tɛm fɔ sav Jiova. I dɔn pas 30 ia naw, we i stil de yuz ɔl in tɛm fɔ sav Jiova wit in man. Mijana tɔk se pipul dɛn we want fem, ɔnɔ, pawa, ɛn bɔku mɔni, nɔ de ɛva gɛt tru tru gladi at. I bin tɔk bak se di bɛst gol we pɔsin fɔ sɛt na fɔ sav Gɔd ɛn fɔ ɛp ɔda pipul dɛn fɔ no bɔt am.
19. Wetin mek i fayn fɔ pe atɛnshɔn pan di tin dɛn we yu dɔn plan fɔ du we yu yɔŋ?
19 Una yɔn wan dɛn, una rili fit fɔ lɛ wi tɛl una tɛnki bikɔs pan ɔl di prɔblɛm dɛn we de mit una, una stil de kɔntinyu fɔ yuz una layf fɔ sav Jiova. Una de sɛt gol dɛn we go mek una gɛt tayt padi biznɛs wit Jiova, ɛn una de si di prichin wok as wan pan di impɔtant tin dɛn na una layf. Dɔn bak una nɔ de alaw di pipul dɛn na di wɔl fɔ mek una fɔgɛt di tin dɛn we una dɔn plan fɔ du. Una fɔ biliv se di wok we una de wok tranga wan nɔ go go fɔ natin. Una gɛt brɔda ɛn sista dɛn we lɛk una ɛn we de sɔpɔt una. So “put yu biznɛs na PAPA GƆD [“Jiova,” NW] in an, ɛn si we bɛtɛ de fala yu.”