DƐN bɔn mi na Wichita, Kanzas, Amɛrika, Disɛmba 10, 1936. Na mi na di big wan pan wi 4 we dɛn bɔn. Mi mama ɛn papa we na Wiliam ɛn Jen, bin de sav Jiova wit ɔl dɛn at. Mi papa na bin di kɔmni savant. Trade na so dɛn bin de kɔl di wan we de bifo na di kɔngrigeshɔn. Mi mama in yon mama we nem Ɛma Wɛbna, nain lan mi mama di tru tin dɛn we de insay di Baybul. Ɛma bin lan bɔku pipul dɛn di tru tin dɛn we de na di Baybul. Wan pan di pipul dɛn na Gatrud Stil, we bi sav as mishɔnari fɔ lɔng lɔng tɛm na Poto Riko. * So a bin gɛt bɔku fayn ɛgzampul dɛn fɔ falamakata.

Wan Satide ivintɛm we a bin ol fayv ia, mi ɛn mi papa bin de gi Wachtawa ɛn Kɔnsoleshɔn (we tide wi de kɔl Awake!) magazin dɛn to di pipul dɛn we bin de pas na di strit. Da tɛm de, wi kɔntri bin de fɛt Wɔl Wɔ Tu. Wan dɔktɔ we drɔnk bin kam ɛn kɔs kɔs mi papa bikɔs i nɔ gri fɔ put an pan di wɔ ɛn i tɛl mi papa se i na fredman. Di dɔktɔ kam rayt bifo mi papa in fes ɛn tɛl am se, “Wetin mek yu nɔ go slap mi, yu yala fredman!” A bin fred bɔt a rili kɔle mi papa.  I bin jɔs bizi de gi magazin to di pipul dɛn we gɛda. Dɔn wan sojaman kam pas, nain di dɔktɔ ala se, “Du sɔntin to dis yala fredman!” Di sojaman bin si se di man drɔnk, so i tɛl am se, “Go na os lɛ yu go soba!” Dɛn ɔl tu go. Sɔntɛnde a kin mɛmba ɛn gladi fɔ we Jiova bin gi mi papa maynd. I gɛt tu babin shɔp na Wichita, ɛn di dɔktɔ na bin wan pan in kɔstɔma dɛn!

We a bin ol et ia, mi mama ɛn papa sɛl dɛn os ɛn shɔp, bil wan smɔl os we pɔsin kin kɛr go ɛnisay we i wan go, dɔn dɛn go na Kolarado fɔ go prich na say we dɛn nid mɔ pipul dɛn fɔ prich. Wi bin go de nia Gran Jɔnkshɔn, usay mi mama ɛn papa bin de payɔnia ɛn yuz dɛn balans tɛm fɔ wok na fam ɛn mɛn animal dɛn. Bikɔs dɛn bin gɛt zil fɔ di prichin wok, Jiova bin blɛs dɛn, ɛn wi kam gɛt wan kɔngrigeshɔn. Insay Jun 20, 1948, mi papa bin baptayz mi ɛn ɔda pipul dɛn na wan watasay we de na wan mawnten. Tu pan di pipul dɛn na Bili Niskuls ɛn in wɛf we bin dɔn tek di trut. Lɛta dɛn bin du di sakit wok, ɛn dɛn bɔy pikin sɛf ɛn in wɛf bin du di sakit wok.

Wi bin ɛnjɔy tayt padi biznɛs wit bɔku pan di wan dɛn we wi ɔl bin de du di prichin wok ɛn wi bin de tɔk tin dɛn we bin de kɔrej wi, mɔ di wit di wan dɛn we de na di Stil famili, dat na Dɔn ɛn Alin, Dev ɛn Julia, ɛn Si ɛn Mata. Dɛn bin rili ɛp mi fɔ kam nia Jiova. Dɛn ɛp mi fɔ si se we pɔsin put Gɔd in Kiŋdɔm fɔs na in layf, i de rili gladi ɛn satisfay.

We a bin ol 19 ia, wan padi to wi famili, we nem Bɔd Esti, bin tɛl mi fɔ jɔyn am fɔ payɔnia na di sawt pat na Amɛrika. Di sakit ovasia tɛl wi fɔ muf go na Rɔstin, Luwiziana, usay sɔm Witnɛs dɛn nɔ bin de du wɛl igen. I bin tɛl wi fɔ de kɔndɔkt di mitin dɛn ɛni wik ilɛk ɔmɔs pipul dɛn kam na di mitin. Wi fɛn wan fayn say ɛn bigin fɔ gɛt wi mitin. Wi bin de gɛt ɔl di mitin dɛn, bɔt fɔ sɔm tɛm, na wi tu nɔmɔ bin de atɛnd. Wi bin de du di pat bay tɔn ɛn di ɔda pɔsin go ansa ɔl di kwɛstyɔn dɛn. If di pat na wan we tu pipul dɛn fɔ du ɔp stej, wi tu de go ɔp ɛn du am ilɛk nɔbɔdi nɔ de fɔ wach wi! Leta, wan ol sista bigin fɔ atɛnd. As tɛm de go, sɔm Baybul stɔdi dɛn, wit sɔm witnɛs dɛn we bin dɔn lɛf fɔ go mitin, bigin fɔ kam na di mitin dɛn, ɛn i nɔ tu te wi kam gɛt kɔngrigeshɔn.

Wande, mi ɛn Bɔd bin mit wan man we de atɛnd Church of Christ. I tɔk bɔt sɔm skripchɔ dɛn we a nɔ bin no bɔt. Dat bin mek a sɔprayz ɛn i bin mek a tink siriɔs wan bɔt wetin a biliv. A bin tek lɛk wan wik so de bɔn di lamp in ɔyl midulnɛt fɔ gɛt ansa to di kwɛstyɔn dɛn we i bin aks. Dat bin ɛp mi fɔ mek mi padi biznɛs wit Jiova tayt mɔ ɛn mɔ, ɛn a bin de wet fɔ mitɔp ɔda pɔsin we de prich na ɔda chɔch.

I nɔ tu te, di sakit ovasia tɛl mi fɔ go na Ɛl Dorado, Akansas, fɔ ɛp di kɔngrigeshɔn. Di tɛm we a bin de de, a bin de go na Kolorado bɔku tɛm fɔ go bifo di wan dɛn we bin de pik man dɛn bay fos fɔ jɔyn di ami. Wan tɛm we mi ɛn sɔm payɔnia dɛn bin de go togɛda na mi motoka, wi gɛt aksidɛnt na Tɛksas we pwɛl di motoka bad bad wan. Wi kɔl wan brɔda we kam tek wi ɛn kɛr wi go na in os dɔn i kɛr wi go na di mitin bak. Na di mitin dɛn anawns se wi gɛt aksidɛnt, ɛn di brɔda dɛn bin ɛp wi wit mɔni. Di brɔda dɛn bin sɛl mi motoka 25 dɔla.

 Dɛn bin drayv wi go na Wichita, usay wan tayt padi to wi famili, we nem E. F. “Dɔk” Mɛkatni, bin de payɔnia. In tu bɔy pikin dɛn we nem Frank ɛn Fransis we na twin dɛn, na bin mi bɛst padi dɛn ɛn wi na padi dɛn stil. Dɛn gɛt wan ol motoka we dɛn sɛl gi mi 25 dɔla, di sem mɔni we dɛn bin pe mi fɔ mi yon we bin dɔn pwɛl. Dat na bin di fɔs tɛm we a si klia wan se Jiova de kia fɔ mi bikɔs a bin put di Kiŋdɔm fɔs na mi layf. We a bin de wit di Mɛkatni famili, dɛn sho mi to wan sista we gɛt zil, we nem, Bɛtɛl Kren. I mama we nem Rut, de prich wit zil na Wɛlintin, Kansas, ɛn i bin kɔntinyu fɔ payɔnia ivin we i bin dɔn ol 90 ia. Insay 1958, mi ɛn Bɛtɛl mared, ɛn i jɔyn mi fɔ payɔnia na Ɛl Dorado.

Afta wi dɔn tink bɔt di fayn ɛgzampul dɛn we dɛn dɔn sɛt fɔ wi, wi disayd fɔ rɛdi wisɛf fɔ ɛnitin we Jiova in ɔganayzeshɔn go tɛl wi fɔ du. Dɛn bi sɛn wi as spɛshal payɔnia na Wɔlnɔt Rig, insay Akansas. Dɔn insay di ia 1962, wi bin gladi we wi gɛt di inviteshɔn fɔ atɛnd di 37 klas fɔ Giliad Skul. Wi bin gladi fɔ si Dɔn Stil na di sem klas. We wi gradiet, dɛn sɛn mi ɛn Bɛtɛl na Nayrobi, insay Kenya. Wi bin de wɔri we wi de lɛf Nyu Yɔk, bɔt wi wɔri bin tɔn to gladi at we wi mit wi brɔda dɛn na di iapɔt na Nayrobi!

Kwik kwik wan wi bin kam lɛk Kenya ɛn di prichin wok we wi de du de. Wi fɔs Baybul stɔdi dɛn we bin de tray na Kris ɛn Meri Kanaya. Dɛn stil de yuz ɔl dɛn tɛm fɔ sav Jiova na Kenya. Di ɔda ia, dɛn tɛl wi fɔ go na Kampala, insay Yuganda. Na wi na bin di fɔs mishɔnari dɛn na dis kɔntri. Wi bin gladi dɛn tɛm dɛn de bikɔs bɔku pipul dɛn bin want fɔ lan di tru tin dɛn we de na di Baybul, ɛn dɛn bin bi Witnɛs. Bɔt afta tri ɛn af ia na Afrika, wi go bak na Amɛrika fɔ bɔn ɛn men wi pikin. Di de we  wi bin de lɛf Afrika, wi bin de wɔri pas aw wi bin wɔri we wi bin de lɛf Nyu Yɔk. Wi bin dɔn lɛk di pipul dɛn na Afrika ɛn wi bin de op se wi go kam bak wande.

Wi bin kam de na di wɛst pat na Kolorado, usay mi mama ɛn papa de. I nɔ tu te, wi bɔn wi fɔs gyal pikin we nem, Kimbali, ɛn 17 mɔnt leta, wi bɔn Stɛfini. Wi tek wi nyu asaynmɛnt we na fɔ mɛn wi pikin dɛn as sɔntin we rili siriɔs. Wi mekɔp wi maynd fɔ mek wi tu fayn gyal pikin dɛn lɛk di trut. Wi want fɔ falamakata di fayn ɛgzampul dɛn we dɛn bin dɔn sɛt fɔ wi. Na tru se i fayn fɔ sɛt fayn ɛgzampul we yu de mɛn pikin, bɔt dat nɔ kin mek di pikin disayd fɔ sav Jiova. Dis kin mek wi rili tink. Mi smɔl brɔda ɛn sista bin lɛf di trut. Jɔs lɛk aw wi bin de op, wi pikin dɛnsɛf bin kam falamakata di fayn ɛgzampul dɛn we wi bin de sɛt fɔ dɛn.

Wi bin de ɛnjɔy fɔ mɛn wi gyal pikin dɛn ɛn wi bin de tray fɔ du tin togɛda ɔltɛm as famili. Bikɔs wi bin de nia Aspɛn, Kolorado, wi ɔl disayd fɔ de go sket na di sno so dat wan wan tɛm wi go de du am togɛda. Dis bin mek wi gɛt tɛm fɔ tɔk wit wi gyal pikin dɛn as wi bin de rayd na di ski lift dɛn togɛda. Wi bin de du kampin wit dɛn bak ɛn wi bin de ɛnjɔy di tɔk dɛn we wi bin de tɔk arawnd di kamp faya. Pan ɔl we dɛn bin yɔŋ, dɛn de aks kwɛstyɔn dɛn lɛk, “Wetin a go du we a big?” ɛn “Uskayn pɔsin a go want fɔ mared?” Wi tray tranga wan fɔ mek wi gyal pikin dɛn lɛk Jiova. Wi bin ɛp dɛn fɔ plan fɔ yuz ɔl dɛn tɛm fɔ sav Jiova ɛn ɛp dɛn fɔ si wetin mek i mek sɛns fɔ mared pɔsin nɔmɔ we want fɔ yuz ɔl in tɛm fɔ sav Jiova. Wi tray fɔ ɛp dɛn bak fɔ si se i nɔ fayn fɔ lɛ dɛn mared we dɛn tu yɔŋ. Wi bin de tɛl dɛn se “Nɔ mared te yu ol lɛk 23 ia so.”

Wi tray tranga wan fɔ de atɛnd di mitin dɛn ɛn prich ɔltɛm togɛda as famili jɔs lɛk aw wi mama ɛn papa bin de du wit wi. Wi arenj fɔ lɛ sɔm pipul dɛn we de yuz ɔl dɛn tɛm fɔ sav Jiova fɔ kam de na wi os. Ɛn sɔntɛnde wi kin tɔk bɔt di tɛm we wi bin de du mishɔnari wok. Wi bin de op se wande wi ɔl 4 go go na Afrika togɛda. Wi gyal pikin dɛn bin rili want fɔ du dat.

Wi bin de du wi famili stɔdi ɔltɛm, ɛn wi bin de akt sɔm tin dɛn we go apin na skul. Wi gyal pikin dɛn bin de akt di pat usay Witnɛs de ansa kwɛstyɔn dɛn. Dɛn bin de ɛnjɔy am we dɛn de lan dis we ɛn i bin de gi dɛn kɔnfidɛns. As dɛn de big, dɛn bin de kɔmplen fɔ lɛ wi du di famili stɔdi. Wande, mi at bin pwɛl so a tɛl dɛn fɔ go na dɛn rum dɛn ɛn a tɛl dɛn se wi nɔ go du di stɔdi. Dɛn bin shɔk ɛn bigin fɔ kray ɛn se dɛn want fɔ stɔdi. Wi bigin fɔ si se  wi dɔn rili ɛp wi pikin dɛn fɔ lɛk Gɔd biznɛs. Dɛn bin kam lɛk di stɔdi ɛn we bin de alaw dɛn fɔ tɔk wetin de na dɛn at. Sɔntɛnde, i nɔ kin izi fɔ wi we dɛn kin se dɛn nɔ gri wit sɔm tin dɛn bɔt di trut. Bɔt, wi bin kam fɔ no wetin rili de na dɛn at. Afta wi tɔk bɔt di tɔpik ɛn aks kwɛstyɔn dɛn, dɛn kin satisfay wit di we aw Jiova in tink bɔt da tin de.

Dis wok fɔ mɛn wi pikin dɛn bin pas kwik kwik wan pas aw wi bin de imajin. Di ɛp we Jiova in ɔganayzeshɔn ɛp wi bin mek wi ebul fɔ mɛn dɛn fɔ lɛk Jiova. Wi bin rili gladi we wi tu gyal pikin dɛn stat fɔ payɔnia afta we dɛn dɔn sɛkɔndari skul, ɛn dɛn lan wok dɛn we dɛn go du fɔ sɔpɔt dɛnsɛf. Dɛn go na Klivland, Tɛnisi, wit tu ɔda sista dɛn fɔ go prich na say we dɛn nid mɔ pipul dɛn fɔ prich. Wi rili mis dɛn, bɔt wi gladi we dɛn de yuz ɔl dɛn tɛm fɔ sav Jiova. Mi ɛn Bɛtɛl bigin fɔ payɔnia bak, ɛn dis bin mek wi ebul fɔ du mɔ fɔ Jiova. Wi du sɔbstityut sakit wok ɛn kɔnvɛnshɔn wok.

Bifo wi gyal pikin dɛn go na Tɛnisi, dɛn bin dɔn go na di branch ɔfis we de na Ingland. Na de Stɛfini, we bin ol 19 bin mit Pɔl Nɔtin, wan yɔŋ Bɛtɛlayt. Leta, we Kimbali travul, i mit wan in wokmet we nem Brayan Liwɛlin. We Stɛfini ol 23 ia, in ɛn Pɔl bin mared. Brayan ɛn Kimbali bin mared di ɔda ia, dat na di tɛm we i bin ol 25 ia. So dɛn nɔ mared te dɛn ol 23 ia. Wi bin gladi wit ɔl wi at fɔ di man dɛn we dɛn pik.

Wi gyal pikin dɛn tɛl wi se di fayn ɛgzampul we wi ɛn dɛn granpa ɛn grani sɛt bin ɛp dɛn fɔ obe Jizɔs fɔ “put di Kiŋdɔm fɔs,” ilɛksɛf tin tranga. (Mat. 6:​33, NW) Insay Epril 1998, dɛn bin invayt Pɔl ɛn Stɛfini fɔ di 105 klas na di Giliad Skul, afta dat dɛn bin sɛn dɛn na Malawi, insay Afrika. Insay da sem tɛm de, dɛn bin invayt Brayan ɛn Kimbali fɔ go wok na Bɛtɛl insay Lɔndɔn ɛn leta dɛn bin transfa dɛn na di Bɛtɛl we de insay Malawi. Wi bin rili gladi, bikɔs wi pikin dɛn bin de yuz dɛn layf di bɛst we.

Insay Janwari 2001, a bin gɛt di fon kɔl we wi bin tɔk bɔt fɔs. Brɔda Mere, di ovasia fɔ di Transleshɔn Savis, ɛksplen se dɛn de arenj fɔ du wan Inglish kɔz wit transletɔ dɛn arawnd di wɔl so dat dɛn go ɔndastand Inglish gud wan. Ɛn i tɛl mi se bikɔs a ol 64 ia, dɛn go want lɛ a bi wan pan di ticha dɛn. Mi ɛn Bɛtɛl pre bɔt dis ɛn wi tɛl wi mama dɛn we bin dɔn ol fɔ lɛ dɛn advays wi. Dɛn ɔl tu bin want lɛ wi go, pan ɔl we wi nɔ go de fɔ ɛp dɛn. A kɔl bak ɛn tɛl dɛn se wi go gladi fɔ du da wɔndaful wok de.

Dɔn dɔktɔ kam no se mi mama gɛt kansa. A tɛl am se wi go lɛf ɛn ɛp mi sista Linda fɔ kia fɔ am. Mama bin tɔk se “Una nɔ du da kayn tin de. A go fil bad if una nɔ go.” Linda insɛf bin fil di sem we. Wi bin gladi we dɛn alaw wi fɔ go pan ɔl we i nɔ bin izi, ɛn wi bin gladi bak fɔ we wi padi dɛn na di eria bin de ɛp! Di de afta wi lɛf fɔ go na di Watchtower Educational Center na Patasin, Linda kɔl ɛn tɛl wi se Mama dɔn day. Wi put ɔl wi atɛnshɔn pan wi nyu wok, jɔs lɛk aw i go dɔn ɛnkɔrej wi fɔ du.

Wi bin gladi fɔ no se wi fɔs asaynmɛnt na di Malawi branch, usay wi gyal pikin  dɛn ɛn dɛn man dɛn bin de sav Jiova. Wi bin gladi fɔ de togɛda! Dɔn wi bin go tich di kɔz na Zimbabwe, dɔn na Zambia. Afta wi dɔn tich di kɔz fɔ tri ɛn af ia, dɛn tɛl wi fɔ go bak na Malawi ɛn rayt ɛkspiriɛns bɔt di Witnɛs dɛn we bin dɔn sɔfa de bikɔs dɛn nɔ gri fɔ put an pan pɔlitiks ɛn wɔ. *

Insay 2005, wi bin de wɔri we wi de go bak na wi os na Basɔlt, Kolorado, usay mi ɛn Bɛtɛl bin kɔntinyu fɔ payɔnia. Insay 2006, Brayan ɛn Kimbali bin kam de nia wi fɔ mɛn dɛn tu gyal pikin dɛn we nem, Makɛnzi ɛn Ilizabɛt. Pɔl ɛn Stɛfini de stil sav na Malawi, ɛn Pɔl de sav na di Branch Kɔmiti. Naw we a dɔn de rich 80 ia, a kin gladi we a de si yɔŋ man dɛn we a bin de wok wit de du di wok dɛn we a bin de du. Wan tin we mek we gladi na bikɔs dɛn bin dɔn sɛt fayn ɛgzampul dɛn fɔ wi ɛn wisɛf dɔn tray fɔ fala dɛn ɛgzampul dɛn de fɔseka wi pikin dɛn ɛn wi granpikin dɛn.