1, 2. (a) Aw di tin dɛn we wi op fɔ difrɛn frɔm di tin dɛn we ɔda pipul dɛn op fɔ? (b) Wetin wi go tɔk bɔt insay dis atikul?

JIOVA dɔn gi wi wɔndaful tin dɛn we wi fɔ op fɔ. I dɔn prɔmis se i go pul ɔl di bad nem we dɛn dɔn put pan in nem ɛn mek wetin i want bi na ɛvin ɛn na dis wɔl. (Matyu 6:​9, 10) Na dɛn tin ya we impɔtant pas ɔl wi de wet fɔ lɛ i apin. Jiova dɔn prɔmis wi bak se i go gi wi layf we go de sote go na dis wɔl ɔ na ɛvin. Dat go rili wɔndaful! (Jɔn 10:​16; Pita In Sɛkɛn Lɛta 3:​13) Ɛn wi de wet fɔ si aw Jiova go kɔntinyu fɔ gayd ɛn sɔpɔt in pipul dɛn insay dis las dez.

² Di Baybul tɔk se fet na “we pɔsin shɔ se i go gɛt wetin i op fɔ.” Dis min se di wan dɛn we gɛt fet rili biliv se di tin dɛn we Jiova dɔn prɔmis go mɔs bi. (Di Ibru Pipul Dɛn 11:​1, NW) Bɔku pipul dɛn tide de op ɛn wish fɔ gɛt sɔm tin dɛn, bɔt dɛn nɔ kin shɔ if dɛn go gɛt wetin dɛn op fɔ. Fɔ ɛgzampul, sɔmbɔdi kin op fɔ win loto, bɔt i nɔ kin rili shɔ if i go win. Insay dis atikul, wi go si wetin wi kin du fɔ  gɛt mɔ fet pan di tin dɛn we Gɔd dɔn prɔmis wi. Wi go tɔk bak bɔt aw strɔng fet kin ɛp wi naw.

3. Wetin mek wi biliv se Gɔd go du ɔl wetin i dɔn prɔmis?

³ Dɛn nɔ bɔn ɛnibɔdi wit fet. Fɔ gɛt fet, wi nid fɔ alaw Gɔd in oli spirit fɔ gayd wi at. (Lɛta Fɔ Galeshya 5:​22) Di oli spirit kin ɛp wi fɔ no Jiova. We wi ɔndastand se na Jiova na di Ɔlmayti ɛn i gɛt sɛns, wi go rili biliv se i gɛt di pawa fɔ du ɔl wetin i dɔn prɔmis. Jiova insɛf bin tɔk bɔt di tin dɛn we i dɔn prɔmis lɛk se dɛn dɔn ɔlrɛdi apin we i se: “Ɔl dɛn tin ya dɔn bi!” (Rid Rɛvɛleshɔn 21:​3-6.) Wi no se Jiova kin du wetin i prɔmis ɔltɛm. In na Gɔd we if “i se sɔntin, i min am.” Na dat mek wi biliv ɔl wetin i dɔn tɛl wi se i go du tumara bambay.—Ditarɔnɔmi 7:​9.

4. Wetin Gɔd in savant dɛn we bin de trade trade bin gɛt fet pan?

⁴ Di Ibru Pipul Dɛn chapta 11 tɛl wi bɔt 16 man ɛn uman dɛn we bin gɛt strɔng fet pan di tin dɛn we Jiova dɔn prɔmis. I tɛl wi bak bɔt bɔku ɔda wan dɛn we bin mek Jiova gladi “fɔseka dɛn fet.” (Di Ibru Pipul Dɛn 11:​39, NW) Dɛn ɔl bin de wet fɔ di “pikin” we Jiova bin dɔn prɔmis. Dɛn bin no se dis “pikin” go dɔnawe wit ɔl di wan dɛn we na Gɔd in ɛnimi ɛn mek di wan ol wɔl bi Paradays bak. (Jɛnɛsis 3:​15) Ɛn dɛn pipul ya we na Gɔd in savant dɛn bin gɛt strɔng fet se Jiova go gi dɛn layf bak. Dɛn nɔ bin de op fɔ gɛt layf bak fɔ go de na ɛvin, bikɔs Jizɔs nɔ bin dɔn mek am pɔsibul yet fɔ lɛ dat bi. (Lɛta Fɔ Galeshya 3:​16) Bifo dat, dɛn bin de wet fɔ di tɛm we dɛn go de sote go na dis wɔl insay paradays.—Sam 37:​11; Ayzaya 26:​19; Ozie 13:​14.

5, 6. Wetin Ebraam ɛn in famili bin de wet fɔ? Aw dɛn bin kɔntinyu fɔ gɛt mɔ fet? (Luk di pikchɔ nia dis atikul in taytul.)

⁵ Di Ibru Pipul Dɛn 11:​13 (NW) tɔk bɔt Jiova in fetful savant dɛn se: “Dɛn ɔl day fetful wan, pan ɔl we dɛn nɔ bin gɛt di tin dɛn we Gɔd prɔmis dɛn, bɔt dɛn bin si dɛn fa ɛn biliv.” Dɛn bin de wet fɔ di tɛm we dɛn go de na di nyu wɔl ɛn dɛn bin de imajin dɛnsɛf se dɛn de de. Wan pan dɛn na bin Ebraam. Jizɔs bin tɔk se Ebraam “bin gladi” fɔ si da tɛm de. (Jɔn 8:​56) Sera, Ayzak, Jekɔb, ɛn bɔku ɔda wan dɛn bin de wet fɔ di tɛm we di Kiŋdɔm, we na Gɔd “drɔ di plan ɛn bil am,” go rul di wanol wɔl.—Di Ibru Pipul Dɛn 11:​8-11.

⁶ Aw Ebraam ɛn in famili bin kɔntinyu fɔ gɛt mɔ fet? Dɛn bin kɔntinyu fɔ lan bɔt Jiova. Sɔntɛnde, Gɔd bin de yuz enjɛl dɛn, vishɔn, ɔ drim dɛn fɔ tɔk to dɛn. I go mɔs bi se bak, dɛn bin lan bɔt Jiova frɔm fetful wan dɛn we bin dɔn ol ɔ frɔm dɛn ol ol raytin dɛn. Ebraam ɛn in famili nɔ bin ɛva fɔgɛt di tin dɛn we Gɔd bin dɔn prɔmis, ɛn dɛn bin lɛk fɔ de tink bɔt di prɔmis dɛn. Dis bin mek dɛn nɔ gɛt wan dawt se Jiova go du ɔl wetin i dɔn prɔmis. So dɛn nɔ bin ɛva kɔmɔt biɛn Gɔd pan ɔl we dɛn bin de sɔfa ɔ we dɛn bin de du bad tin to dɛn.

7. Wetin Jiova dɔn gi wi fɔ ɛp wi fɔ gɛt mɔ fet? Wetin wi nid fɔ du?

⁷ Wetin go ɛp wi fɔ kɔntinyu fɔ gɛt mɔ fet? Jiova dɔn gi wi di Baybul fɔ tich wi bɔt di tin dɛn we i dɔn prɔmis fɔ du  tumara bambay. Insay di Baybul, i sho wi wetin wi fɔ du fɔ gɛt gladi at. Na dat mek i fayn fɔ lɛ wi de rid di Baybul ɛvride ɛn fala di advays dɛn we de de. (Sam 1:​1-3; rid Di Apɔsul Dɛn Wok [Akt] 17:​11.) Jiova de yuz bak “di slev we fetful ɛn gɛt sɛns” fɔ gi wi “it di rayt tɛm.” (Matyu 24:​45, NW) Jɔs lɛk Gɔd in pipul dɛn we bin de trade trade, wisɛf nid fɔ de rid bɔt di tin dɛn we Gɔd dɔn prɔmis ɛn tink gud wan bɔt dɛn. Dis go ɛp wi nɔ fɔ kɔmɔt biɛn Gɔd ɛn kɔntinyu fɔ wet fɔ di tɛm we in Kiŋdɔm go rul di wan ol wɔl.

8. Aw prea kin mek wi gɛt mɔ fet?

⁸ Wetin bak bin ɛp Jiova in pipul dɛn we bin de trade trade fɔ kɔntinyu fɔ gɛt mɔ fet? Dɛn bin de pre to Jiova fɔ lɛ i ɛp dɛn, ɛn we dɛn si se i de ansa dɛn prea, dat bin mek dɛn gɛt mɔ fet. (Nɛimaya 1:​4, 11; Sam 34:​4, 15, 17; Daniɛl 9:​19-21) Semweso, we wisɛf si se Jiova dɔn ansa wi prea dɛn ɛn i dɔn gi wi wetin wi rili nid di rayt tɛm, dat de mek wi gɛt mɔ fet pan am. (Rid Jɔn In Fɔs Lɛta 5:​14, 15.) Wi fɔ de “aks” Jiova bak fɔ gi wi in oli spirit so dat wi go gɛt mɔ fet.—Lyuk 11:​9, 13.

9. Wetin na sɔm tin dɛn we wi fɔ pre fɔ?

⁹ We wi de pre to Jiova, wi nɔ fɔ jɔs aks am fɔ lɛ i gi wi wetin wi nid. Bɔt wi fɔ tɛl am tɛnki ɛn prez am ɛvride bikɔs i dɔn du bɔku wɔndaful tin dɛn! (Sam 40:​5) Jiova in pipul dɛn de pre bak fɔ dɛn brɔda ɛn sista dɛn we de ɔlsay na di wɔl. Fɔ ɛgzampul, wi “de mɛmba di wan dɛn we de na prizin.” Wi de pre bak fɔ “di wan dɛn we de bifo” wi. We wi de si aw Jiova de ansa wi prea dɛn, i de mek wi gɛt mɔ fet pan am ɛn wi go kam nia am mɔ ɛn mɔ.—Di Ibru Pipul Dɛn 13:​3, 7, NW.

10. Wetin bin ɛp bɔku pipul dɛn fɔ gɛt maynd ɛn fɔ kɔntinyu fɔ de biɛn Gɔd?

¹⁰ Insay Di Ibru Pipul Dɛn chapta 11, di apɔsul Pɔl bin tɔk se: “Sɔm uman dɛn . . . mit dɛn yon pipul we bin dɔn day, we rayz bak. Sɔm pipul bin sɔfa plɛnti bad bad tin dɛn we dɛn pipul we nɔ bin lɛk dɛn, du dɛn; dɛn bin sɔfa sote dɛn day, bɔt dɛn nɔ gri dinay Gɔd, pan ɔl we di pipul dɛn we nɔ bin lɛk Gɔd bin want kil dɛn. Ɔl dat na bikɔs dɛn bin biliv se, afta dɛn dɔn rayz frɔm dɛn grev, dɛn go gɛt layf we bɛtɛ pas di wan we dɛn bin gɛt.” (Di Ibru Pipul Dɛn 11:​35) Bɔku pipul dɛn kin bia we prɔblɛm kin mit dɛn ɛn dɛn kin kɔntinyu fɔ de biɛn Gɔd bikɔs dɛn gɛt strɔng fet se i go gi layf bak to di wan dɛn we dɔn day. Dɛn no se tumara bambay, Jiova go gi dɛn layf bak ɛn dɛn go de na dis wɔl sote go. Tink bɔt Nebɔth ɛn Zɛkaraya. Bikɔs dɛn bin de obe Gɔd, dɛn bin ston dɛn te dɛn day. (Fɔs Kiŋ 21:​3, 15; Sɛkɛn Kronikul 24:​20, 21) Dɛn bin trowe Daniɛl insay wan ol usay layɔn dɛn bin de we angri bad bad wan, ɛn dɛn bin trowe in padi  dɛn insay wam wam faya. Dɛn bin rɛdi fɔ day wans dɛn nɔ kɔmɔt biɛn Jiova. Dɛn man dɛn ya bin gɛt strɔng fet se Jiova go gi dɛn in oli spirit ɛn i go ɛp dɛn fɔ bia dɛn bad tin dɛn de we bin de mek dɛn sɔfa.—Daniɛl 3:​16-18, 20, 28; 6:​13, 16, 21-23; Di Ibru Pipul Dɛn 11:​33, 34.

11. Bikɔs di prɔfɛt dɛn bin gɛt fet, us prɔblɛm dɛn we dɛn bin bia?

¹¹ Dɛn bin de provok bɔku prɔfɛt dɛn ɔ put dɛn na jel. Sɔm pan dɛn prɔfɛt ya na Maykaya ɛn Jɛrimaya. Ɔda wan dɛn lɛk Ilayja, “bin de waka waka na dɛn dɛsat ɛn mawnten dɛn ɛn midul dɛn rɔk ɛn insay dɛn ol we de na di rɔk dɛn na dis wɔl.” Dɛn ɔl bin bia di prɔblɛm dɛn we de mit dɛn ɛn kɔntinyu fɔ de biɛn Gɔd bikɔs dɛn bin shɔ se dɛn “go gɛt wetin [dɛn] op fɔ.”—Di Ibru Pipul Dɛn  11:​1, 36-38, NW; Fɔs Kiŋ 18:​13; 22:​24-27; Jɛrimaya 20:​1, 2; 28:​10, 11; 32:​2.

12. Udat sɛt di bɛst ɛgzampul we wi kin falamakata? Wetin bin ɛp am fɔ bia we i bin de sɔfa?

¹² Jizɔs Krays bin sɔfa pas ɔlman ɛn i bin bia ɛn kɔntinyu fɔ de biɛn Jiova. Wetin bin ɛp am fɔ bia? Pɔl bin tɔk se: “Fɔseka di op we bin de bifo am dat bin mek i bia di tɛm we dɛn bin nel am na di tik, i nɔ shem atɔl, ɛn i dɔn sidɔm na Gɔd in rayt an, nia di chia we Gɔd sidɔm fɔ rul.” (Di Ibru Pipul Dɛn 12:​2, NW) Pɔl bin ɛnkɔrej Kristian dɛn “fɔ mɛmba” Jizɔs in ɛgzampul gud gud wan. (Rid Di Ibru Pipul Dɛn 12:​3.) Jɔs lɛk Jizɔs, bɔku Kristian dɛn we bin de trade trade bin day bikɔs dɛn nɔ bin kɔmɔt biɛn Jiova. Wan pan dɛn na bin Antipas. (Rɛvɛleshɔn 2:​13) Dɛn Kristian dɛn ya dɔn gɛt dɛn pe, bɔt di ɔda wan dɛn we na Gɔd in savant dɛn we bin dɔn de bifo dɛn, de wet fɔ di tɛm we dɛn go gɛt layf bak na dis wɔl. (Di Ibru Pipul Dɛn 11:​35) Jizɔs bi Kiŋ insay di ia 1914, dɔn afta sɔm tɛm, anɔyntɛd Kristian dɛn we bin dɔn day gɛt layf bak fɔ go de na ɛvin; dɛn nɔ go day igen ɛn dɛn ɛn Jizɔs go rul mɔtalman.—Rɛvɛleshɔn 20:​4.

13, 14. Us prɔblɛm dɛn we Rudɔlf Grekan bin bia? Wetin bin ɛp am fɔ kɔntinyu fɔ de biɛn Gɔd?

¹³ Bɔku pan Gɔd in savant dɛn de fala Jizɔs in ɛgzampul. Dɛn de tink gud wan bɔt di tin dɛn we Gɔd dɔn prɔmis ɛn dɛn de kɔntinyu fɔ de biɛn am ilɛksɛf dɛn de sɔfa. Lɛ wi tɔk bɔt Rudɔlf Grekan, we bin bɔn na Jamani insay di ia 1925. We i bin yɔŋ, in mama ɛn papa bin de ɛng pikchɔ dɛn bɔt Baybul stori na dɛn os. I bin tɔk se: “Wan pikchɔ bin de sho wulf ɛn ship pikin, di got pikin ɛn di lɛpɛt, di kaw pikin ɛn layɔn dɛn ɔl de togɛda, ɛn na wan lili bɔbɔ de mɛn dɛn.” (Ayzaya 11:​6-9) Dis bin ɛp Rudɔlf fɔ de tink bɔku tɛm bɔt Paradays ɛn  i bin mek i gɛt fet mɔ ɛn mɔ. Dis bin mek, i kɔntinyu fɔ de biɛn Jiova pan ɔl we fɔ lɔng tɛm di Nazi Gestapo ɛn di Communist Stasi na Ist Jamani bin de du bad bad tin to am.

¹⁴ Rudɔlf bin bia bɔku ɔda prɔblɛm dɛn. Wan sik we dɛn kɔl tayfɔs bin kil in mama na Rivɛnsbrɔk kamp. In papa bin sayn wan pepa fɔ se i nɔto Jiova Witnɛs igen. Bɔt Rudɔlf bin kɔntinyu fɔ gɛt mɔ fet. Afta dɛn pul am na prizin, i bin bi sakit ovasia. Dɛn bin invayt am fɔ atɛnd di Giliad Skul ɛn dɛn bin sɛn am na wan kɔntri we nem Chili, usay i bin bi sakit ovasia bak. Na de i bin mared wan mishɔnari sista we nem Patsi. Bɔt i sɔri fɔ no se, afta wan ia, dɛn gyal pikin bin day. Afta sɔm tɛm, Patsi insɛf bin day. I bin ol 43 ia. Pan ɔl we dɛn prɔblɛm ya bin mit Rudɔlf, i bin kɔntinyu fɔ sav Jiova. Ivin we in dɔn ol ɛn i nɔ bin gɛt bɛtɛ wɛl bɔdi igen, i bin de sav as rɛgyula payɔnia ɛn ɛlda. Wi kin rid in tru tru stori insay di Ɔgɔst 1,  1997, Wachtawa, na pej 20 to 25. ^[1] (Luk di ɛndnot ɔnda di las paregraf.)

15. Gi ɛgzampul bɔt brɔda ɛn sista dɛn tide we de sav Jiova wit gladi at pan ɔl we dɛn de du bad bad tin to dɛn.

¹⁵ Tide, pipul dɛn we nɔ lɛk Jiova de du bad bad tin to bɔku pan wi brɔda ɛn sista dɛn, bɔt pan ɔl dat dɛn stil de sav Jiova wit gladi at. Bɔku pan dɛn de na prizin na kɔntri dɛn lɛk Ɛriteria, Siŋgapɔ, ɛn Sawt Koria bikɔs dɛn nɔ gri fɔ “fɛt wit sɔd.” (Matyu 26:​52). Fɔ ɛgzampul, i dɔn pas 20 ia naw we Izak, Nɛgidi, ɛn Pawlɔs dɔn de na prizin insay Ɛriteria! Dɛn dɔn de trit dɛn bad bad wan. Ɛn te naw, dɛn nɔ ebul fɔ mared ɔ kia fɔ dɛn mama ɛn papa dɛn. Pan ɔl dis, dɛn stil de biɛn Jiova, ɛn dɛn gɛt mɔ fet. Ivin di ɔfisa dɛn na di prizin de rɛspɛkt dɛn naw. Dɛn brɔda ya dɛn pikchɔ de na di jw.org Wɛbsayt. Dɛn de smayl pan ɔl we dɛn de sɔfa.

16. Wetin strɔng fet kin ɛp yu fɔ du?

¹⁶ Bɔku pan Jiova in pipul dɛn de we nɔ go yet na prizin ɔ we dɛn nɔ du bad bad tin to dɛn yet lɛk wi brɔda dɛn we wi jɔs dɔn tɔk bɔt. Bɔt bɔku dɔn sɔfa bikɔs dɛn po, dɛn ebi ebi ren, ɛn atkwek dɔn pwɛl usay dɛn de, ɔ wɔ dɔn apin usay dɛn de. Ɔda wan dɛn dɔn fala Ebraam, Ayzak, Jekɔb, ɛn Mozis dɛn ɛgzampul bay we dɛn nɔ mek nem fɔ dɛnsɛf ɔ rɔnata jɛntri, bɔt dɛn put dɛn maynd pan di tin dɛn we de mek dɛn kɔntinyu fɔ sav Jiova. Wetin ɛp wi brɔda dɛn fɔ kɔntinyu fɔ sav Jiova wit gladi at? Na di lɛk we dɛn lɛk Jiova ɛn dɛn gɛt strɔng fet pan di tin dɛn we i dɔn prɔmis. Dɛn no se Jiova go blɛs ɔl in fetful savant dɛn bay we i go gi dɛn layf we go de sote go na di nyu wɔl, usay di wan dɛn we nɔ de trit dɛn kɔmpin fayn nɔ go de igen.—Rid Sam 37:​5, 7, 9, 29.

17. Aw yu go kɔntinyu fɔ gɛt strɔng fet?

¹⁷ Insay dis atikul, wi dɔn si se fet na we pɔsin “shɔ se i go gɛt wetin i op fɔ.” Fɔ gɛt dis kayn fet, wi nid fɔ de pre to Jiova ɛn kɔntinyu fɔ de tink gud wan bɔt di tin dɛn we i dɔn prɔmis. Dɔn wi go ebul bia we dɛn du ɛnikayn bad tin to wi. Insay di nɛks atikul wi go tɔk mɔ bɔt wetin i min fɔ gɛt mɔ fet.