1-3. (a) Wetin fɔ impɔtant to wi pas ɔl? (b) Wetin-ɛn-wetin nɔ kin izi fɔ di wan dɛn we de lan nyu langwej? Us kwɛstyɔn dɛn dis kin mek wi aks? (Luk di pikchɔ nia dis atikul in taytul.)

TIDE, bɔku Jiova Witnɛs dɛn bizi de prich to “ɔl di neshɔn dɛn, trayb dɛn, langwej dɛn, ɛn pipul dɛn” so dat wetin Gɔd bin dɔn tɔk go bi. (Rɛvɛleshɔn 14:​6, NW) Yu na wan pan di wan dɛn we de lan ɔda langwej? Sɔm na mishɔnari, sɔm de prich na kɔntri usay dɛn nid mɔ pipul dɛn fɔ prich. Ɔda wan dɛn dɔn bigin fɔ atɛnd mitin na kɔngrigeshɔn we de tɔk difrɛn langwej na dɛn kɔntri.

² Ɔlman we na Gɔd in savant fɔ tek i padi biznɛs wit Gɔd ɛn in famili in padi biznɛs wit Gɔd as sɔntin we impɔtant pas ɔl. (Matyu 5:​3) Bɔt sɔntɛnde, wi kin so bizi dat i nɔ kin izi fɔ lɛ wi fɛn tɛm fɔ mek wi wangren stɔdi Gɔd in Wɔd gud gud wan. Bɔt ɔda tin dɛn de bak we nɔ kin izi fɔ di wan dɛn we de na kɔngrigeshɔn we de tɔk difrɛn langwej.

³ Di wan dɛn we de na kɔngrigeshɔn we de tɔk difrɛn  langwej nid fɔ lan nyu langwej, bɔt dɛn fɔ mek shɔ se dɛn de stɔdi bak di dip tin dɛn bɔt Gɔd. (Fɔs Lɛta Fɔ Kɔrint 2:​10) Aw dɛn go du dis if dɛn nɔ rili de ɔndastand wetin dɛn de tɔk na di kɔngrigeshɔn? Ɛn wetin mek mama ɛn papa dɛn we de na kɔngrigeshɔn we de tɔk difrɛn langwej fɔ mek shɔ se di tru tin dɛn na Gɔd in Wɔd de tɔch dɛn pikin dɛn at?

4. Wetin kin ambɔg wi padi biznɛs wit Jiova? Gi wan ɛgzampul.

⁴ We wi nɔ ebul fɔ ɔndastand di tin dɛn we wi de lan na di Baybul insay ɔda langwej, i kin rili ambɔg wi padi biznɛs wit Jiova. We Nɛimaya bin kam bak na Jerusɛlɛm, i kam fɔ no se sɔm pan di pikin dɛn we bin de de nɔ sabi tɔk di Ibru langwej. (Rid Nɛimaya 13:​23, 24.) Bikɔs dɛn pikin dɛn ya nɔ bin ebul fɔ ɔndastand Gɔd in Wɔd, dɛn padi biznɛs wit Jiova nɔ bin tayt igen.—Nɛimaya 8:​2, 8.

5, 6. Wetin sɔm mama ɛn papa dɛn we de na kɔngrigeshɔn we de tɔk ɔda langwej dɔn kam fɔ no? Wetin na di prɔblɛm?

⁵ Sɔm mama ɛn papa dɛn we de na kɔngrigeshɔn we de tɔk difrɛn langwej dɔn kam fɔ no se dɛn pikin dɛn padi biznɛs wit Jiova nɔ tayt igen. Bikɔs dɛn pikin dɛn nɔ de rili ɔndastand wetin dɛn de tɔk na di mitin, di tin we dɛn de yɛri nɔ de tɔch dɛn at. Wan man we nem Pedro we kɔmɔt Sawt Amɛrika wit in famili ɛn go de na Ɔstrelia, tɔk se: “Gɔd biznɛs fɔ gɛt sɔntin fɔ du wit di at ɛn di we aw wi de fil.” ^[1] (Luk di ɛndnot ɔnda di las paregraf.)—Lyuk 24:​32.

⁶ We wi rid sɔntin insay wi yon langwej, i kin tɔch wi at mɔ pas we wi rid am insay ɔda langwej. Ɛn bikɔs i nɔ kin izi fɔ tɔk to pɔsin insay ɔda langwej, dis kin mek wi rili taya ɛn i kin ambɔg di we aw wi de wɔship Jiova. Pan ɔl we wi want fɔ kɔntinyu fɔ sav Jiova na kɔngrigeshɔn we de tɔk difrɛn langwej, wi fɔ tinap tranga wan bak fɔ lɛ wi padi biznɛs wit Jiova nɔ pwɛl.—Matyu 4:​4.

7. Aw di Babilonian dɛn bin tray fɔ fos Daniɛl fɔ jɔyn dɛn rilijɔn ɛn tek dɛn kɔlchɔ?

⁷ We di Babilonian dɛn bin kɛr Daniɛl ɛn in padi dɛn go na Babilɔn, dɛn bin tray fɔ fos dɛn fɔ jɔyn dɛn rilijɔn ɛn tek dɛn kɔlchɔ. Aw dɛn bin tray fɔ du dat? Dɛn bin lan dɛn “aw fɔ rid ɛn rayt di Babilonian dɛn laŋwej” ɛn gi dɛn Babilonian nɛm dɛn. (Daniɛl 1:​3-7) Daniɛl in nyu nɛm bin tinap fɔ Bɛl, we na di men gɔd na Babilɔn. I go mɔs bi se Kiŋ Nɛbukanɛza bin want Daniɛl fɔ biliv se di gɔd na Babilɔn gɛt mɔ pawa pas Daniɛl in Gɔd, we na Jiova.—Daniɛl 4:​8.

8. Aw Daniɛl bin kɔntinyu fɔ gɛt tayt padi biznɛs wit Jiova?

⁸ Insay Babilɔn, na di fayn fayn it dɛn we di kiŋ bin de it nain dɛn bin de gi Daniɛl. Bɔt i bin “mek ɔp in maynd” se i nɔ go pwɛl Gɔd in lɔ. (Daniɛl 1:​8) Bikɔs Daniɛl bin de stɔdi Gɔd in “buk dɛn” we bin de insay Ibru langwej,  i padi biznɛs wit Jiova bin kɔntinyu fɔ tayt mɔ ɛn mɔ pan ɔl we i bin de na ɔda kɔntri. (Daniɛl 9:​2) Infakt, afta 70 ia dɔn pas frɔm we i bin kam na Babilɔn, dɛn bin stil de kɔl am bay in Ibru nem, we na Daniɛl.—Daniɛl 5:​13.

9. Aw Gɔd in Wɔd bin afɛkt di man we rayt Sam 119?

⁹ Wan ɔda ɛgzampul na wetin bin apin to di man we bin rayt Sam 119. I bin gɛt fɔ bia we pipul dɛn we de nia di Kiŋ bin de tɔk tin dɛn we sho se dɛn de agens am. Bɔt Gɔd in Wɔd bin gi am kɔrej, ɛn dis bin ɛp am fɔ lɛ i nɔ tan lɛk ɔda pipul dɛn. (Sam 119:​23, 61) I bin alaw Gɔd in wɔd fɔ afɛkt di we aw i de fil.—Rid Sam 119:​11, 46.

10, 11. (a) Wetin fɔ bi di men rizin we mek wi de stɔdi Gɔd in Wɔd? (b) Wetin go ɛp wi? Gi wan ɛgzampul.

¹⁰ Pan ɔl we wi kin rili bizi de wok na di kɔngrigeshɔn ɛn na wi wok ples dɛn, wi ɔl nid fɔ mek tɛm fɔ du wi famili wɔship ɛn stɔdi Gɔd in wɔd wi wangren. (Lɛta Fɔ Ɛfisɔs 5:​15, 16) We wi de stɔdi, wi nɔ fɔ jɔs de rid bɔku pej dɛn ɔ rid fɔ mek kɔmɛnt na mitin. Di men rizin we mek wi fɔ stɔdi Gɔd in Wɔd na fɔ mek i tɔch wi at ɛn mek wi gɛt mɔ fet.

¹¹ Fɔ mek dis apin, we wi de stɔdi, wi nɔ fɔ jɔs de tink bɔt aw dat go ɛp ɔda pipul dɛn. Wi fɔ de tink bɔt aw di tin dɛn we wi de rid go bɛnifit wi sɛf sɛf. (Lɛta Fɔ Filipay 1:​9, 10) Wi fɔ no se we wi de pripia fɔ go prich, fɔ di mitin dɛn, ɔ fɔ gi tɔk, wi nɔ kin du ɔl wetin wi de rid. Fɔ ɛgzampul, pan ɔl we pɔsin we sabi kuk kin tes di it dɛn we i de kuk bifo i sav am, i nɔ go liv nɔmɔ pan dɛn it dɛn de we i de tes. If i want fɔ gɛt wɛlbɔdi, i fɔ de mek fayn it dɛn fɔ insɛf. Semweso, if wi want lɛ wi padi biznɛs wit Jiova tayt mɔ ɛn mɔ, wi fɔ de stɔdi di Baybul ɔltɛm. Dis kayn stɔdi go rili ɛp wi.

12, 13. Wetin mek bɔku pipul dɛn si am se we dɛn stɔdi di Baybul na dɛn yon langwej, i kin rili ɛp?

¹² Bɔku pipul dɛn we de na kɔngrigeshɔn we de tɔk ɔda langwej si am se we dɛn stɔdi di Baybul ɔltɛm insay di langwej we dɛn de ‘tɔk frɔm we dɛn bɔn,’ i kin rili ɛp. (Di Apɔsul Dɛn Wok [Akt] 2:​8) Ivin mishɔnari dɛn no se fɔ lɛ dɛn kɔntinyu fɔ tinap tranga wan fɔ sav Jiova na di kɔntri we dɛn de, nɔto di tin dɛn nɔmɔ we dɛn de lan na di mitin dɛn go ɛp dɛn fɔ du dat.

¹³ Wan brɔda we nem Alin we dɔn de lan Pashian langwej fɔ lɛk et ia naw, tɔk se: “We a de pripia fɔ mitin insay di Pashian langwej, a kin pe atɛnshɔn mɔ pan di langwej. Bikɔs mi maynd kin jɔs de pan aw fɔ lan di langwej, di tin we a  de rid nɔ kin rili tɔch mi at. Na dat mek a kin mek tɛm ɔltɛm fɔ de stɔdi di Baybul ɛn ɔda buk ɛn magazin dɛn insay mi yon langwej.”

14. Wetin mama ɛn papa dɛn fɔ mek shɔ se dɛn du? Wetin mek?

¹⁴ Mama ɛn papa dɛn we na Kristian fɔ mek shɔ se di tru tin dɛn na Gɔd in Wɔd de tɔch dɛn pikin dɛn at ɛn maynd. Lɛ wi tɔk bɔt Saj ɛn in wɛf we nem Myuriɛl, we dɔn tek pas tri ia na kɔngrigeshɔn we de tɔk ɔda langwej. Dɛn bigin fɔ si se dɛn bɔbɔ, we ol 17 ia, nɔ de ɛnjɔy di prichin wok ɔ di mitin dɛn igen. Myuriɛl tɔk se: “Fɔs tɛm, i bin lɛk fɔ prich insay Frɛnch, we na in yon langwej, bɔt naw i nɔ de gladi igen fɔ prich insay ɔda langwej.” Saj ɛksplen se: “We wi si se dis dɔn bigin fɔ ambɔg in padi biznɛs wit Jiova, wi disayd fɔ go bak na di kɔngrigeshɔn we wi bin de.”

15. (a) Wetin go ɛp mama ɛn papa fɔ disayd if dɛn fɔ go na ɔda kɔngrigeshɔn? (b) Wetin Ditarɔnɔmi 6:​5-7 se mama ɛn papa dɛn fɔ du?

¹⁵ Wetin go ɛp mama ɛn papa dɛn fɔ disayd if dɛn fɔ go bak na di kɔngrigeshɔn we dɛn de tɔk langwej we dɛn pikin dɛn de ɔndastand gud gud wan? Fɔs, dɛn fɔ disayd if dɛn rili gɛt bɔku tɛm fɔ tich dɛn pikin fɔ lɛk Jiova ɛn tich dɛn bak ɔda langwej di sem tɛm. Sɛkɔn, dɛn go si se dɛn pikin dɛn nɔ want fɔ prich, go na mitin, ɔ ivin  sav Jiova na kɔngrigeshɔn usay dɛn de tɔk ɔda langwej. Dɛn rizin dɛn ya fɔ mek mama ɛn papa dɛn disayd fɔ go bak na di kɔngrigeshɔn we de tɔk langwej we dɛn pikin dɛn de ɔndastand gud gud wan. Dɔn, afta di pikin dɛn dɔn gɛt tayt padi biznɛs wit Jiova, dɛn mama ɛn papa dɛn kin disayd fɔ go bak na di kɔngrigeshɔn we de tɔk ɔda langwej.—Rid Ditarɔnɔmi 6:​5-7.

16, 17. Wetin dɔn ɛp sɔm mama ɛn papa dɛn fɔ tich dɛn pikin dɛn bɔt Jiova?

¹⁶ Sɔm mama ɛn papa dɛn dɔn fɛn we dɛn fɔ tich dɛn pikin dɛn bɔt Jiova insay dɛn yon langwej pan ɔl we dɛn de atɛnd mitin na kɔngrigeshɔn we de tɔk difrɛn langwej. Wan papa we nem Chals gɛt tri gyal pikin dɛn we ol lɛk 9 ɛn 13 ia. Dɛn de atɛnd mitin wit wan grup we de tɔk Lingala. I bin tɔk se: “Wi bin disayd fɔ de stɔdi ɛn du wi famili wɔship wit di pikin dɛn insay wi yon langwej. Bɔt wi bin disayd bak fɔ de praktis ɛn ple gem wit di pikin dɛn insay Lingala so dat dɛn go de lan di langwej we dɛn de ɛnjɔy dɛnsɛf.”

¹⁷ Wan papa we nem Kɛvin gɛt tu gyal pikin dɛn we ol fayv ɛn et ia. I de wok tranga wan fɔ tich in gyal pikin dɛn di trut bikɔs dɛn nɔ de rili ɔndastand di mitin dɛn we di famili de atɛnd na kɔngrigeshɔn we de tɔk difrɛn langwej. I tɔk se: “Mi ɛn mi wɛf de stɔdi wit wi tu gyal pikin dɛn insay Frɛnch we na  dɛn yon langwej. Wi bin plan bak fɔ de atɛnd Frɛnch mitin wan tɛm insay di mɔnt, ɛn we wi kin gɛt vakeshɔn wi kin atɛnd kɔnvɛnshɔn dɛn we de insay wi yon langwej.”

18. (a) We yu want fɔ ɛp yu pikin dɛn, aw Lɛta Fɔ Rom 15:​1, 2 go ɛp yu fɔ disayd di rayt tin? (b) Us advays dɛn we ɔda mama ɛn papa dɛn dɔn gi? (Luk di ɛndnot ɔnda di las paregraf.)

¹⁸ Ɔl famili gɛt fɔ disayd wetin na di bɛst tin fɔ dɛn pikin dɛn ɛn dɛn padi biznɛs wit Jiova. ^[2] (Luk di ɛndnot ɔnda di las paregraf.) (Lɛta Fɔ Galeshya 6:​5) Myuriɛl se pan ɔl we in ɛn in man bin rili want fɔ de na kɔngrigeshɔn we de tɔk difrɛn langwej, dɛn bin disayd fɔ go bak so dat dɛn go ɛp dɛn bɔy pikin fɔ lɛk Jiova mɔ ɛn mɔ. (Rid Lɛta Fɔ Rom 15:​1, 2.) Tide, Saj no se dɛn bin disayd fɔ du di rayt tin. I tɔk se: “Frɔm we wi bin muf go bak na di kɔngrigeshɔn usay dɛn de tɔk Frɛnch, wi bɔy pikin dɔn du wɛl na di trut ɛn i dɔn baptayz. Naw in na rɛgyula payɔnia. I de ivin tink bɔt fɔ go bak na wan grup we de tɔk difrɛn langwej!”

19, 20. Aw wi go sho se wi lɛk Gɔd in Wɔd?

¹⁹ Jiova lɛk ɔlman. I dɔn mek di Baybul de insay bɔku bɔku langwej dɛn so dat “ɔlkayn pipul dɛn” go lan di tru tin dɛn we de na di Baybul. (Fɔs Lɛta To Timoti 2:​4, NW) Jiova no se wi padi biznɛs wit am go tayt mɔ ɛn mɔ we wi rid di Baybul insay di langwej we wi de ɔndastand gud gud wan.

²⁰ Wi ɔl nid fɔ wok tranga wan fɔ kɔntinyu fɔ gɛt tayt padi biznɛs wit Jiova. Wi kin du dis bay we wi de stɔdi di Baybul ɔltɛm insay di langwej we wi de ɔndastand gud gud wan. Wi go ɛp bak wi famili fɔ kɔntinyu fɔ gɛt tayt padi biznɛs wit Jiova, ɛn wi go sho bak se wi rili lɛk Gɔd in Wɔd.—Sam 119:​11.