NA MATYU 13:​24-26 Jizɔs bin se di Kiŋdɔm na ɛvin “tan lɛkɛ we wan man plant gud sid nain fam. Wan nɛt we ɔlman de slip, pɔsin we nɔ lɛk am go plant gras pan di gud sid we di man dɔn plant, dɔn i go . . .  Wɛn di plant dɛn dɔn gro ɛn bigin bia, pipul si se gras miks pan di wit.” Sɔm pipul dɛn we de rayt, dawt if dis parebul na sɔntin we bin rili apin, bɔt di Roman lɔ dɛn we bin de trade trade mek wi no se sɔntin lɛk dis go dɔn apin.

Wan Baybul dikshɔnari tɔk se ɔnda di Roman lɔ na bad tin we pɔsin plant gras na ɔda pɔsin in fam fɔ tɔn am gi am fɔ di bad tin we i du. Di pas we dɛn bin pas dis lɔ sho se dis kayn tin bin de rili apin. Wan man we nem Alɛstia Kɛr we stɔdi lɔ gud wan ɛksplen se insay di ia 533 afta Krays, wan Roman Ɛmparɔ we nem Jɔstinian bin pul in lɔ buk na do. Di nem we dɛn bin gi dis lɔ buk na Digest. Na di Roman pipul dɛn lɔ bin de insay dis buk ɛn dis buk bin gɛt kot dɛn we pipul dɛn we sabi lɔ gud gud wan bin dɔn rayt. Dɛn pipul dɛn ya bin liv insay di ia 100 to 250 afta Krays. Insay dis buk, wan pan dɛn pipul ya we sabi lɔ gud gud wan, we nem Ɔlpian, bin tɔk bɔt wan kes we apin insay di ia 101 to 200. Sɔmbɔdi plant gras na ɔda pɔsin in fam ɛn dat bin pwɛl di tin we dɛn plant. Di Digest tɔk bɔt di rayt we di fama gɛt so dat di pɔsin we dɔn plant gras na in fam go pe fɔ in plant we i dɔn pwɛl.

Dɛn tin ya bin apin insay Rom trade trade, we sho se di tin we Jizɔs tɔk bɔt na in parebul go dɔn rili apin.