BIFO dis de apin, a bin dɔn bigin lɛk di trut. Mi mama bin gɛt sɔm buk ɛn magazin dɛn we de tɔk bɔt di Baybul, ɛn a bin rili lɛk dɛn. A bin lɛk di pikchɔ dɛn mɔ. Mi papa nɔ bin want mek mi mama tich mi bɔt di tin dɛn we i de lan na di Baybul. Bɔt, a bin rili want fɔ no ɛn a bin de aks kwɛstɔyn dɛn, so i bin de stɔdi mi we mi papa nɔ de na os. Fɔseka dis, misɛf bin disayd fɔ pre to Jiova ɛn tɛl am se a want fɔ gi mi layf to am. So insay 1943 a bin baptayz na Blakpul, insay Ingland, we a bin ol tɛn ia.

Frɔm da tɛm de mi ɛn mi mama bin de go fil savis ɔltɛm togɛda. Dɛn tɛm dɛn de wi bin de yuz gramafon dɛn fɔ prich. Dɛn bin big ɛn ebi, dɛn we lɛk 4 ɛn af kilo (10 pawn). Jɔs imajin smɔl bɔbɔ lɛk mi, de tray fɔ kɛr wan pan dɛn!

 Bay di tɛm we a ol 14 ia, a bin rili want fɔ bi payɔnia. Mi mama bin tɛl mi fɔ tɔk fɔs to di servant to the brethren (we wi de kɔl tide sakit ovasia). I tɛl mi se i go fayn fɔ lan wok we go ɛp mi fɔ sɔpɔt misɛf we a de payɔnia. So na dat a bin du. Afta we a bin dɔn wok fɔ tu ia, a aks wan ɔda sakit ovasia wetin i tink fɔ mek a payɔnia. I bin tɛl mi se, “Go du am!”

So insay Epril 1949, mi ɛn mi mama bin giwe ɔl wi prɔpati ɛn muf go na Midultin, nia Manchɛsta, usay wi bin bigin fɔ payɔnia. Afta 4 mɔnt, a bin pik wan brɔda fɔ bi mi payɔnia patna. Di branch ɔfis bin se i go fayn mek wi muf go na wan kɔngrigeshɔn we dɛn bin jɔs mek na Ilam. Mi mama bin de payɔnia wit wan sista na wan ɔda kɔngrigeshɔn.

A bin ol 17 ia, bɔt na mi ɛn mi payɔnia patna bin de kɔndɔkt di mitin dɛn bikɔs wi nɔ bin gɛt brɔda dɛn we fit fɔ du di wok na dis nyu kɔngrigeshɔn. Leta, a bin muf go na Bɔkstin Kɔngrigeshɔn, we nɔ bin gɛt bɔku pɔblisha dɛn ɛn dɛn bin nid ɛp. Di tin dɛn we bin apin to mi bin ɛp mi fɔ rɛdi fɔ di asaynmɛnt dɛn we a go gɛt leta.

Insay 1951, a bin fil di fɔm fɔ atɛnd di Wachtawa Baybul Skul na Giliad. Dɔn, insay Disɛmba 1952, dɛn bin kɔl mi fɔ jɔyn di ami. A beg dɛn se a nɔ want fɔ jɔyn di ami bikɔs a de yuz ɔl mi tɛm fɔ du di prichin wok, bɔt di kɔt nɔ bin gri ɛn dɛn bin put mi na prizin fɔ siks mɔnt. Na prizin a bin de we a gɛt mi inviteshɔn fɔ atɛnd di klas we mek 22 na Giliad. Jɔs afta we dɛn pul mi na prizin insay Julay 1953, a bin tek wan ship we dɛn kɔl Georgic fɔ go na Nyu Yɔk.

As a rich so, a bin atɛnd di 1953 Nyu Wɔl Sosayti Asɛmbli. Leta a bin yuz tren fɔ go na Sawt Lansin, na Nyu Yɔk usay di skul bin de. A bin jɔs kɔmɔt na prizin, so a nɔ bin gɛt bɛtɛ mɔni. We a kam dɔŋ di  tren, a tek bɔs fɔ go Sawt Lansin, bɔt a bin gɛt fɔ lɛnt 25 sɛnt fɔ pe mi transpɔt frɔm wan ɔda pasenja.

We wi bin de na Giliad dɛn bin tren wi fayn fayn wan fɔ “bi ɔltin to ɔlkayn pipul dɛn.” (Fɔs Lɛta Fɔ Kɔrint 9:​22, NW) Dɛn bin sɛn mi, Pɔl Brun, ɛn Remɔnd Lich fɔ go na di Filipins, bɔt wi bin gɛt fɔ wet fɔ sɔm mɔnt fɔ wi visa dɛn. Dɔn wi yuz ship fɔ travul go Rotadam insay Nɛdaland. Afta dat, wi bin krɔs di Mɛditarenian Si, di Suɛz Kanal, ɛn di Indian Oshɔn go na Maleshya ɛn Ɔŋ Kɔŋ. Dɔn, afta we wi tek 47 dez na wata, wi bin rich na Manila Novɛmba 19, 1954.

Na dis nyu kɔntri wi bin lan nyu kɔlchɔ, ɛn nyu langwej. Bɔt we wi bin jɔs bigin,dɛn sɛn wi tri na wan kɔngrigeshɔn na Kisɔn Siti, usay bɔku pipul dɛn de tɔk Inglish. So afta siks mɔnt, na smɔl wɔd dɛn nɔmɔ wi bin sabi insay Tagalɔg. Bɔt di ɔda wok we wi bin gɛt bin chenj dat.

Insay Me 1955, wande we mi ɛn brɔda Lich kɔmɔt fil savis kam na os, wi bin fɛn sɔm lɛta dɛn we bin se dɛn dɔn pik wi as sakit ovasia dɛn. A bin ol 22 ia da tɛm de, bɔt na dis nyu asaynmɛnt a go lan nyu we aw fɔ “bi ɔltin to ɔlkayn pipul dɛn.”

Fɔ ɛgzampul, a bin gi mi fɔs pɔblik tɔk as sakit ovasia na wan stɔ nia wan vilej. Dɛn tɛm dɛn de insay di Filipins, wi bin de gi tɔk dɛn na say dɛn usay bɔku pipul kin de! We a bin de go na difrɛn kɔngrigeshɔn dɛn, a bin gi tɔk dɛn na say dɛn we fiba bafa usay ɔlman fri fɔ go, na makit dɛn, bifo dɛn big ɔl dɛn, usay dɛn de ple baskɛtbɔl, na pak dɛn, ɛn wan wantɛm na dɛn kɔna dɛn na strit. Bɔt wan tɛm na San Pablo Siti, a nɔ bin ebul fɔ gi mi tɔk na makit bikɔs big big ren bin de kam. So a bin tɔk to sɔm machɔ brɔda dɛn fɔ mek a gi di tɔk na Kiŋdɔm Ɔl. Lɛta, di  brɔda dɛn aks if dɛn go ripɔt dis as pɔblik mitin bikɔs nɔto do a gi di tɔk!

A kin lɔj na di brɔda dɛn os ɔltɛm. Pan ɔl we di os dɛn bin simpul, dɛn bin klin. Bɔku tɛm, na smɔl mata a kin prɛd na grɔn fɔ slip. Di wangren say fɔ was na do usay ɔlman go si yu, so a lan aw fɔ kɔba misɛf we a de was. I bin de travul wit bɔs ɛn sɔntɛnde a bin de yuz bot fɔ go na ɔda ayland dɛn. Ɔl di tɛm dɛn we a dɔn de sav, a nɔ ɛva gɛt motoka.

A bin lan Tagalɔg pan ɔl we a nɔ ɛva tek langwej klas. A bin de du dis bay we a de lisin we di brɔda dɛn de tɔk na fil savis ɛn na mitin. Di brɔda dɛn bin rili want fɔ ɛp mi fɔ lan, ɛn a bin gladi fɔ di peshɛnt we dɛn gɛt ɛn we dɛn bin ɔnɛs wit mi.

As tɛm de go, a bin gɛt fɔ ajɔst misɛf mɔ bikɔs a bin kam gɛt nyu asaynmɛnt dɛn. Insay 1956, we Brɔda Netan Nɔ bin kam, wi bin gɛt kɔnvɛnshɔn. Na mi dɛn bin pik fɔ tɔk wit di pipul dɛn we de gi nyus. A nɔ bin dɔn ɛva du dis, bɔt ɔda brɔda dɛn ɛp mi fɔ lan. I nɔ ivin rich wan ia, we wi bin gɛt ɔda kɔnvɛnshɔn, ɛn na mi na bin di kɔnvɛnshɔn ovasia. Brɔda Frɛdrick Franz bin kɔmɔt na di wɔl ɛdkwata kam fɛn wi, ɛn a bin lan bɔku tin frɔm am. We i bin de gi di pɔblik tɔk, i bin wɛr barɔng Tagalɔg we na wan kɔntri klos we di pipul dɛn na Filipin de wɛr. Dis bin mek di brɔda dɛn rili gladi, ɛn dat bin ɛp mi fɔ no se a fɔ rɛdi fɔ du tin lɛk di pipul dɛn wans i nɔ bad.

 A bin nid fɔ ajɔst misɛf mɔ we a bi distrikt ovasia. Dɛn tɛm dɛn de, wi bin de sho di fim we gɛt di taytul The Happiness of the New World Society. Bɔku tɛm wi kin ple di fim na say dɛn usay pipul dɛn kin bɔku, so sɔntɛnde insɛkt dɛn kin ambɔg wi. Di prɔjɛktɔ in layt bin de mek insɛkt dɛn kam bɔku, ɛn dɛn bin de fasin pan di prɔjɛktɔ. I nɔ bin izi fɔ klin am afta di fim sho! I nɔ bin izi fɔ arenj ɔl dis, bɔt a bin de fil fayn we a de si pipul dɛn de kam fɔ kam lan bɔt Jiova in ɔganayzeshɔn we de ɔlsay na di wɔl.

Na sɔm eria dɛn, di Katolik prist dɛn bin de mɔna di big man dɛn na di kɔntri fɔ lɛ dɛn nɔ alaw wi fɔ gɛt wi asɛmbli dɛn. Dɛn kin riŋ dɛn chɔch bɛl dɛn bak ɛnitɛm we wi de gi tɔk nia dɛn chɔch dɛn so dat nɔbɔdi nɔ go yɛri we di spika de tɔk. Pan ɔl dis, pipul dɛn bin kɔntinyu fɔ lan di trut, ɛn bɔku pipul dɛn na dɛn eria dɛn de, de wɔship Jiova naw.

Insay di ia 1959, dɛn kɔl mi fɔ sav na di branch ɔfis. We a bin de de, a lan bɔku tin dɛn frɔm wetin bin de apin to mi. Afta sɔm tɛm, dɛn bin tɛl mi fɔ go visit ɔda kɔntri dɛn. Da tɛm de, pɔsin we dɛn de sɛn fɔ go visit ɔda kɔntri dɛn, dɛn bin de kɔl am zon ovasia. Na wan pan dɛn tɛm ya we a bin de travul a bin kam fɔ no Janet Dumɔnd, we na bin mishɔnari na Tayland. Wi bin de rayt lɛta dɛn to wisɛf fɔ sɔm tɛm, dɔn leta wi mared. Wi dɔn sav Jiova wit gladi at fɔ 51 ia.

A dɔn ɛnjɔy fɔ go to Jiova in pipul dɛn na 33 kɔntri dɛn. A rili gladi bikɔs mi fɔs asaynmɛnt dɛn dɔn ɛp mi fɔ lan aw fɔ liv  wit pipul dɛn we gɛt difrɛn kɔlchɔ ɛn we mɛn na difrɛn say dɛn! Dɛn kɔntri dɛn ya we a bin go ɛp mi fɔ ɔndastand klia wan se Jiova lɛk ɔlkayn pipul dɛn.—Di Apɔsul Dɛn Wok [Akt] 10:​34, 35.

Mi ɛn Janɛt rili gladi we wi de sav wit di brɔda dɛn na di Filipins, ɛn wi de kɔntinyu fɔ sav na di branch ɔfis na Kisɔn Siti. I dɔn pas 60 ia naw frɔm we a bigin fɔ sav na ya, ɛn di publisha dɛn dɔn bɔku fa fawe pas trade. Ɛvin afta ɔl dɛn tɛm ya, a stil nid fɔ rɛdi fɔ ajɔst to ɛnitin we Jiova se. Fɔ ɛgzampul, bikɔs di ɔganayzeshɔn dɔn mek sɔm chenj dɛn dis biɛn tɛm ya, wi bin gɛt fɔ rɛdi fɔ ajɔst wisɛf mɔ.

Wi dɔn du ɔl wetin wi ebul fɔ du wetin Jiova de tɛl wi, ɛn wi rili satisfay we wi de liv wi layf dis we. Wi dɔn tray bak fɔ ajɔst wisɛf we wi si se wi nid fɔ du dat so dat wi go ɛp wi brɔda dɛn fayn fayn wan. Fɔ tru, wans na dat Jiova want lɛ wi du, wi dɔn mekɔp wi maynd fɔ “bi ɔltin to ɔlkayn pipul dɛn.”