1, 2. (a) Aw wi kam fɔ no se mɔtalman go bi Gɔd in padi? (b) Wetin wi de kam tɔk bɔt insay dis atikul?

FRƆM di tɛm we wi bɔn te to di tɛm we wi go day, wi nid lɔv. Wi nɔ jɔs nid di lɔv we kin de bitwin man ɛn uman, wi nid padi dɛn bak we lɛk wi. Bɔt na Jiova in lɔv wi nid mɔ. Bɔku pipul dɛn nɔ biliv se mɔtalman go ebul fɔ gɛt tayt padi biznɛs wit Gɔd bikɔs wi nɔ de si am ɛn na in gɛt pawa pas ɔlman. Bɔt wi no di tru!

² Di Baybul ɛp wi fɔ no se pipul dɛn dɔn kam fɔ bi Gɔd in padi. Wi fɔ lan frɔm di ɛgzampul dɛn we dɛn sɛt. Wetin mek? Na bikɔs fɔ mek padi wit Gɔd na di bɛst tin we wi go ɛva plan fɔ du na layf. So lɛ wi tɔk bɔt Ebraam in ɛgzampul. (Rid Jems 2:​23.) Aw Ebraam kam fɔ bi Gɔd in padi? Ebraam bin gɛt tayt padi biznɛs wit Gɔd bikɔs i bin gɛt fet, ɛn dɛn sabi am as “di papa fɔ ɔl dɛn pipul we biliv Gɔd.” (Lɛta Fɔ Rom 4:​11) As yu de tink  bɔt Ebraam in ɛgzampul, aks yusɛf dis kwɛstyɔn, ‘Aw a go falamakata di kayn fet we Ebraam bin gɛt ɛn mek mi padi biznɛs wit Jiova tayt mɔ ɛn mɔ?’

3, 4. (a) Ɛksplen wetin go dɔn tɛst Ebraam in fet pas ɛni ɔda tin. (b) Wetin mek Ebraam bin rɛdi fɔ sakrifays Ayzak?

³ Imajin Ebraam we i bin ol lɛk 125 ia de waka saful saful go ɔp wan mawnten. ^[1] (Luk di ɛndnot ɔnda di las paregraf.) Ɛn in bɔy pikin, Ayzak, we bin ol lɛk 25 ia so, de biɛn am. Ayzak bin ol fayawud na in an, ɛn Ebraam bin ol nɛf ɛn ɔda tin dɛn fɔ mek faya. Sɔntɛm dis travul bin tranga pas ɛni ɔda travul we Ebraam dɔn ɛva travul. Nɔto bikɔs i bin dɔn ol. I bin stil gɛt trɛnk. Da travul de bin tranga bikɔs Jiova bin tɛl am fɔ sakrifays in pikin!—Jɛnɛsis 22:​1-8.

⁴ Sɔntɛm dis tin we Gɔd bin tɛl Ebraam bin tɛst in fet pas ɛni ɔda tin. Sɔm pipul dɛn se na bad bad tin Gɔd du we i tɛl Ebraam fɔ sakrifay in pikin. Ɛn ɔda pipul dɛn se Ebraam bin rɛdi fɔ obe Gɔd bikɔs i nɔ bin lɛk in pikin. Pipul dɛn kin tɔk dɛn tin ya bikɔs dɛn nɔ gɛt fet, dɛn nɔ no wetin na rial fet ɔ wetin rial fet kin mek pɔsin du. (Fɔs Lɛta Fɔ Kɔrint 2:​14-16) Bɔt Ebraam nɔ bin jɔs de obe Gɔd fɔ obe sek, i bin de tink fɔs bifo i obe Gɔd. I bin obe bikɔs i bin gɛt rial fet. I bin no se Jiova nɔ go ɛva tɛl am fɔ du sɔntin we go ambɔg am sote go. Ebraam bin no se if i obe, Jiova go blɛs in ɛn in pikin. Wetin Ebraam bin nid fɔ lɛ i gɛt dis kayn rial fet? I bin nid fɔ no bɔt Jiova ɛn si di tin dɛn we Jiova go du fɔ am.

5. Aw Ebraam go dɔn lan bɔt Jiova? Aw di tin dɛn we i lan bɔt Jiova bin mek i fil?

⁵ Ebraam bin nid fɔ no bɔt Jiova. Ebraam bin mɛn na wan siti we dɛn kɔl Ɔ. Insay da siti de, pipul dɛn bin de wɔship lay lay gɔd dɛn ɛn ivin Ebraam in papa sɛf bin de wɔship dɛn gɔd dɛn de. (Jɔshwa 24:​2) So aw Ebraam kam fɔ lan bɔt Jiova? Di Baybul sho se Noa in pikin we nem Shɛm na Ebraam in  fambul. Ɛn Shɛm bin de te Ebraam ol lɛk 150 ia so. Shɛm na man we bin rili gɛt fet, ɛn sɔntɛm i bin de tɔk bɔt Jiova to in fambul dɛn. Wi nɔ rili no, bɔt i pɔsibul se na dis we Ebraam kam fɔ lan bɔt Jiova. Wetin Ebraam bin lan mek i lɛk Jiova, ɛn dis tin we i lan bin ɛp am fɔ gɛt fet.

6, 7. Aw di tin dɛn we bin apin to Ebraam mek i gɛt mɔ fet?

⁶ Di tin dɛn we Jiova du fɔ Ebraam. Wetin bin apin to Ebraam we mek i gɛt mɔ fet pan Jiova? Sɔm pipul dɛn se di tin dɛn we wi de tink bɔt kin mek wi fil fɔ du sɔntin ɛn dis fil we wi de fil na in kin mek wi du sɔntin. Di tin we Ebraam bin lan bɔt Jiova bin tɔch in at ɛn dat bin mek i rili gɛt rɛspɛkt fɔ Jiova “we pas ɔl, we mek di wanol wɔl, ɛvin ɛn ath.” (Jɛnɛsis 14:​22) Di Baybul ɛp wi fɔ no se we wi “gri fɔ du ɔl wetin Gɔd want,” wi go sho se wi de fred Gɔd. (Di Ibru Pipul Dɛn 5:​7) Fɔ lɛ wi padi biznɛs wit Gɔd go tayt, wi nid fɔ fred Gɔd. (Sam 25:​14, NW) Na dis bin mek Ebraam obe Jiova.

⁷ Gɔd bin tɛl Ebraam ɛn Sera fɔ lɛf dɛn os we bin de na Ɔ ɛn go na ɔda kɔntri. Dɛn nɔ bin yɔŋ igen, ɛn dɛn bin gɛt fɔ liv na tɛnt te dɛn day. Pan ɔl we Ebraam bin no se bɔku prɔblɛm dɛn go mit am, i bin dɔn mekɔp in maynd fɔ obe Jiova. Bikɔs Ebraam bin de obe Gɔd, Gɔd bin blɛs am ɛn protɛkt am. Fɔ ɛgzampul, we dɛn bin pul Ebraam in fayn uman na in an, ɛn Ebraam in layf bin de pan denja, Jiova bin du wɔndaful tin fɔ protɛkt Ebraam ɛn Sera. Ɛn nɔto wan tɛm nɔmɔ Jiova bin du dis. (Jɛnɛsis 12:​10-20; 20:​2-7, 10-12, 17, 18) Dɛn tin ya we bin apin to Ebraam bin mek i gɛt mɔ fet.

8. Wetin go ɛp wi fɔ lan bɔt Jiova? Aw wi go ebul fɔ si wetin Jiova de du fɔ wi?

⁸ Yu tink se i pɔsibul fɔ bi Jiova in tayt padi? Yɛs, i pɔsibul! Jɔs lɛk Ebraam, wisɛf nid fɔ lan bɔt Jiova ɛn si di tin dɛn we Jiova de du fɔ wi. Tide, wi gɛt bɔku tin dɛn fɔ lan bɔt Jiova pas wetin Ebraam bin gɛt. (Daniɛl 12:​4; Lɛta Fɔ Rom 11:​33) Di Baybul gɛt ɔl wetin wi nid fɔ no bɔt di Wan “we mek di wanol wɔl, ɛvin ɛn ath.” Wetin wi de lan go mek wi lɛk Jiova ɛn ɛp wi fɔ rili rɛspɛkt am. Dis lɔv ɛn rɛspɛkt we wi gɛt fɔ Gɔd go mek  wi obe am. We wi du dis, wi go si aw i de protɛkt ɛn blɛs wi, ɛn dis go mek wisɛf si wetin Jiova de du fɔ wi ɛn dis go mek wi gɛt fet mɔ ɛn mɔ. We wi sav Jiova wit ɔl wi at, wi go gɛt satisfay maynd, kolat, ɛn gladi at. (Sam 34:​8; Prɔvabs 10:​22) Di mɔ we wi lan bɔt Jiova ɛn si aw i de blɛs wi, na di mɔ wi padi biznɛs wit am go tayt.

9, 10. (a) Wetin wi nid fɔ du fɔ gɛt tayt padi biznɛs wit pɔsin? (b) Wetin sho se Ebraam bin valyu in tayt padi biznɛs wit Jiova? Wetin i bin du fɔ mek di padi biznɛs go kɔntinyu?

⁹ Tayt padi biznɛs tan lɛk sɔntin we rili valyu: wi nid fɔ du sɔntin “ɔltɛm” fɔ mek di padi biznɛs go bifo. (Rid Prɔvabs 17:​17.) I nɔ tan lɛk dia dia flawa pɔt we dɛn de yuz jɔs fɔ mek ples fayn. I tan lɛk fayn flawa we nid wata ɛn pɔsin fɔ kia fɔ am fɔ lɛ i go gro fayn. Ebraam bin valyu in padi biznɛs wit Jiova ɛn i bin de du sɔntin fɔ mek di padi biznɛs kɔntinyu. Aw i bin du dat?

¹⁰ Ebraam bin kɔntinyu fɔ du tin dɛn we go sho se i de fred Gɔd ɛn obe am mɔ ɛn mɔ. Fɔ ɛgzampul, we i travul go na Kenan wit in famili ɛn savant dɛn, i mek Jiova kɔntinyu fɔ ɛp am we i want disayd fɔ du ɛnitin, ilɛksɛf na big tin ɔ smɔl tin. We Ebraam bin ol 99 ia, dat na wan ia bifo dɛn bɔn Ayzak, Jiova bin tɛl Ebraam fɔ sakɔmsayz ɔl di man dɛn na in os. Yu tink se Ebraam bin dawt Jiova ɔ tray fɔ fɛn we fɔ mek i nɔ du wetin Jiova dɔn tɛl am? Nɔ-o, i bin abop pan Jiova ɛn du wetin Jiova tɛl am “da sem de de.”—Jɛnɛsis 17:​10-14, 23.

11. Wetin mek Ebraam bin de wɔri bɔt Sɔdɔm ɛn Gomɔra? Aw Jiova bin ɛp am?

¹¹ Bikɔs Ebraam bin de obe Jiova ɔltɛm, ilɛksɛf na smɔl tin i tɛl am fɔ du, dat bin mek dɛn padi biznɛs tayt. I bin si am se i kin tɔk to Jiova bɔt ɛnitin, ɛn ivin aks am kwɛstyɔn dɛn we bin de mɔna am. Fɔ ɛgzampul, we Jiova bin se i go dɔnawe wit di siti dɛn na Sɔdɔm ɛn Gomɔra, Ebraam bin de wɔri. Wetin mek? Na bikɔs i bin de fred se gud pipul dɛn go day wit bad pipul dɛn. Sɔntɛm, i bin de wɔri bɔt in brɔda in pikin, we nem Lɔt. Lɔt ɛn in famili bin de na Sɔdɔm. Ebraam bin abop pan Jiova we na di “jɔj fɔ di wanol wɔl,” so i put insɛf dɔŋ fɔ tɔk to Jiova bɔt wetin de wɔri am. Jiova bin de peshɛnt wit in padi ɛn sho am se i gɛt sɔri-at. Jiova bin ɛksplen to am se ivin we i want jɔj pipul dɛn, i de luk fɔ di gud pipul dɛn ɛn i de sev dɛn.—Jɛnɛsis 18:​22-33.

12, 13. (a) Aw di tin dɛn we Ebraam bin lan bɔt Jiova ɛn di tin dɛn we bin apin to am bin ɛp am leta? (b) Wetin sho se Ebraam bin biliv Jiova?

¹² Wi dɔn si klia wan se di tin dɛn we  Ebraam bin lan bɔt Jiova ɛn di tin dɛn we bin apin to am bin ɛp am fɔ mek in padi biznɛs wit Jiova go bifo. So leta, we Jiova bin tɛl Ebraam fɔ sakrifays in pikin, Ebraam bin no se Jiova bin de peshɛnt wit am, sɔri fɔ am, ɛn protɛkt am ɔltɛm. Ɛn i bin no bak se Jiova na pɔsin we i kin abop pan. Ebraam bin rili no se Jiova na Gɔd we gud, so i nɔ bin fil se Jiova dɔn jɔs chenj ɛn bigin du bad. Wetin mek wi se so?

¹³ Bifo Ebraam lɛf in savant dɛn, i tɛl dɛn se: “Una wet na ya wit di dɔŋki. Mi ɛn di bɔbɔ de go yanda fɔ go wɔship PAPA GƆD. Wi go kam mit una bak.” (Jɛnɛsis 22:​5) Wetin Ebraam bin min we i tɔk dɛn wɔd ya? Fɔ se na lay i bin de lay se i go kam bak wit Ayzak we i no se i de go sakrifays am? Nɔ, nɔto so i bi. Di Baybul se Ebraam bin no se Jiova ebul fɔ gi layf bak to Ayzak ilɛksɛf i day. (Rid Di Ibru Pipul Dɛn 11:​19.) Ebraam no se Jiova bin dɔn mek i ebul bɔn bɔy pikin pan ɔl we in ɛn Sera bin dɔn rili ol. (Di Ibru Pipul Dɛn 11:​11, 12, 18) So i bin no se natin nɔ de we Jiova nɔ ebul fɔ du. Ebraam nɔ bin no wetin go apin da de de. Bɔt i bin biliv se if nid de, Jiova go gi layf bak to in pikin so dat ɔl wetin I dɔn prɔmis go bi. Na dat mek dɛn kɔl Ebraam “di papa fɔ ɔl dɛn pipul we biliv Gɔd.”

14. Wetin na sɔm prɔblɛm dɛn we wi kin gɛt we wi de sav Jiova? Aw Ebraam in ɛgzampul go ɛp yu?

¹⁴ Tide, Jiova nɔ de tɛl wi fɔ sakrifays wi pikin dɛn, bɔt i want lɛ wi obe in lɔ dɛn. Sɔntɛnde wi nɔ kin ɔndastand di rizin we mek i gi wi dɛn lɔ ya ɔ wi kin fil se in lɔ dɛn tranga fɔ obe. Yu kin fil da we de? Fɔ sɔm pipul dɛn, di prichin wok nɔ kin izi. Sɔntɛm dɛn kin shem ɛn i nɔ kin izi fɔ lɛ dɛn tɔk to pipul dɛn we dɛn nɔ sabi. Ɔda wan dɛn kin fred fɔ biev lɛk pɔsin we de sav Jiova we dɛn de na wokples ɔ we dɛn de na skul. (Ɛksodɔs 23:​2; Fɔs Lɛta Fɔ Tɛsalonayka 2:​2) We dɛn tɛl yu fɔ du sɔntin we nɔ izi fɔ du, tink bɔt Ebraam in fayn ɛgzampul. Ebraam bin gɛt fet ɛn i bin gɛt maynd. We wi de tink gud wan bɔt di fayn ɛgzampul we fetful man ɛn uman dɛn na di Baybul sɛt, i go mek wi falamakata dɛn ɛn kam nia wi Padi, we na Jiova.—Di Ibru Pipul Dɛn 12:​1, 2.

15. Wetin mek wi shɔ se Ebraam nɔ ɛva rigrɛt we i obe Jiova?

¹⁵ Yu tink se Ebraam bin ɛva rigrɛt we i obe Jiova in lɔ dɛn? Di Baybul tɛl wi se Ebraam “tɔn prɔpa olpa we i kik di bokit.” (Jɛnɛsis 25:​8) We Ebraam  bin dɔn ol 175 ia, i go dɔn de tink bɔt di lɔng layf we i gɛt ɛn fil fayn. Wetin mek? Na bikɔs in padi biznɛs wit Jiova bin impɔtant to am pas ɛni ɔda tin. Bɔt we wi rid insay di Baybul se Ebraam bin tɔn “prɔpa olpa,” dis nɔ min se i nɔ bin want fɔ liv.

16. Wetin na sɔm tin dɛn we go mek Ebraam gladi insay Paradays?

¹⁶ Di Baybul se Ebraam “bin de wet . . . fɔ go na di tɔŋ we Gɔd bin dɔn plan ɛn bil, we tinap traŋa, ɛn we nɔ go fɔdɔm.” (Di Ibru Pipul Dɛn 11:​10) Ebraam bin biliv se wande i go si da tɔŋ de, dat na Gɔd in Kiŋdɔm we go rul di wan ol wɔl. Ɛn Ebraam go rili si am! Tink bɔt aw Ebraam go gladi fɔ de na dis wɔl we i go dɔn tɔn Paradays ɛn kɔntinyu fɔ mek in padi biznɛs wit Gɔd tayt mɔ ɛn mɔ. I go gladi fɔ no se in fet bin ɛp Gɔd in savant dɛn fɔ lɔng lɔng tɛm! Insay Paradays, i go kam fɔ no se di sakrifays na Mawnt Mɔria na bin ɛgzampul we bin de sho sɔntin we rili impɔtant. (Di Ibru Pipul Dɛn 11:​19) Ɛn i go lan aw di pen we i bin fil we i bin de rɛdi fɔ sakrifays Ayzak dɔn ɛp bɔku fetful pipul dɛn fɔ ɔndastand di pen we Jiova bin fil we i gi in Pikin, Jizɔs Krays, fɔ day fɔ mɔtalman. (Jɔn 3:​16) Ebraam in ɛgzampul dɔn ɛp wi ɔl fɔ rili valyu Jizɔs in sakrifays, we na di bɛst we we Jiova dɔn sho se i lɛk wi!

17. Wetin yu dɔn mekɔp yu maynd fɔ du? Wetin wi go tɔk bɔt na di nɛks atikul?

¹⁷ Lɛ wi ɔl mekɔp wi maynd fɔ falamakata Ebraam in fet. Jɔs lɛk Ebraam, wi nid fɔ lan bɔt Jiova ɛn si wetin i go du fɔ wi. As wi de kɔntinyu fɔ lan bɔt Jiova ɛn obe am, wi go si aw i de blɛs wi ɛn protɛkt wi. (Rid Di Ibru Pipul Dɛn 6:​10-12.) Mek Jiova bi wi Padi sote go! Insay di nɛks atikul, wi go tɔk bɔt tri mɔ ɛgzampul dɛn bɔt fetful pipul dɛn we kam fɔ bi Gɔd in padi.