TINK bɔt di de we yu bin gladi pas ɔl na yu layf. Fɔ se na di tɛm we yu bin mared ɔ na di tɛm we yu bɔn yu fɔs pikin? Ɔ na di de we yu bin baptayz? I go mɔs bi se di de we yu baptayz bin impɔtant pas ɛni ɔda de to yu ɛn na de we bin mek yu gladi. Da de de, yu brɔda ɛn sista dɛn bin gladi fɔ si we yu de sho se yu lɛk Gɔd wit ɔl yu at, layf, maynd, ɛn trɛnk!—Mak 12:​30.

I go mɔs bi se frɔm we yu baptayz, yu gladi we yu de sav Jiova. Bɔt bɔku brɔda ɛn sista dɛn we dɔn baptayz nɔ gladi igen lɛk aw dɛn bin gladi. Wetin mek dis apin? Us rizin dɛn wi gɛt fɔ mek wi kɔntinyu fɔ sav Jiova wit gladi at?

Di Kiŋdɔm mɛsej de mek wi rili gladi. Wetin mek? Na bikɔs Jiova prɔmis se i nɔ go te igen dis Kiŋdɔm go dɔnawe wit dis wikɛd wɔl ɛn i go briŋ Gɔd in yon nyu wɔl. Zɛfinaya 1:​14 tɛl wi se: “Di big big de we PAPA GƆD de kam dɔn kam nia ɛn i de kam jisnɔ.” Bɔt if wi de fil se wi gɛt fɔ wet fɔ lɔng tɛm, wi nɔ go gɛt di gladi at we wi bin gɛt trade. Dis go mek wi nɔ de sav Gɔd bɛtɛ bɛtɛ wan igen.—Prɔvabs 13:​12.

We wi de wit wi brɔda ɛn sista dɛn, dɛn de ɛnkɔrej wi fɔ kɔntinyu fɔ sav Jiova wit gladi at. Di gud abit we Jiova in pipul dɛn gɛt na in go dɔn mek wi kam fɔ wɔship am di tru we ɛn mek wi bigin sav Gɔd wit gladi at. (Pita In Fɔs Lɛta 2:​12) Bɔt wetin go apin if dɛn kɔrɛkt wan pan wi brɔda ɔ sista dɛn bikɔs i nɔ bin obe Gɔd in lɔ dɛn? Dis kin mek sɔm dɛn at pwɛl na di kɔngrigeshɔn ɛn i kin mek dɛn nɔ gladi igen.

If wi gɛt want want, i kin mek wi nɔ gladi igen. Aw dis kin apin? Wɛl, Setan in wɔl de tray fɔ mek wi biliv se wi fɔ de bay tin dɛn we wi nɔ rili nid. So i go fayn if wi mɛmba wetin Jizɔs bin tɔk, we i se: “Nɔbɔdi nɔ go bi slev to tu masta di sem tɛm. If i bi so, i go lɛk wan masta, i nɔ go lɛk di ɔda wan. I go wok gud fɔ wan masta, bɔt i nɔ go wok gud fɔ di ɔda wan. Una nɔ go de du Gɔd wok ɛn bi slev to mɔni, di sem tɛm.” (Matyu 6:​24) Wi nɔ go ebul sav Jiova wit gladi at if wi de tray fɔ gɛt ɔl wetin de na dis wɔl.

Fɔ sav Jiova nɔto tin we tranga fɔ di wan dɛn we lɛk am. (Jɔn In Fɔs Lɛta 5:​3) Lɛ wi mɛmba wetin Jizɔs bin tɔk, we i se: “Una kam to mi, una ɔl we dɔn taya fɔ tot ebi lod, a go pul di lod kɔmɔt pan una ed, mek una go blo. Una opin una at fɔ di tru tin dɛn we a de lan una, ɛn una lan ɔl wetin a de tɛl una, bikɔs a de bia wit una ɛn a nɔ de tɔk pan una; if una du dat, una go blo. Dɛn tin we a de lan una nɔ at fɔ lan ɛn dɛn tin we a de gi una fɔ du  nɔ at fɔ du.” (Matyu 11:​28-30) Fɔ bi tru Kristian kin mek wi fil fayn ɛn i kin gi wi gladi at. Wi gɛt gud rizin dɛn fɔ gladi we wi de sav Jiova. Lɛ wi kam tɔk bɔt tri pan dɛn rizin dɛn ya.—Abakɔk 3:​18.

Wi de sav di Wan we gi wi layf, ɛn na Gɔd we gladi ɔltɛm. (Di Apɔsul Dɛn Wok [Akt] 17:​28; Fɔs Lɛta To Timoti 1:​11, NW) Wi no se na di Wan we mek wi na in gɛt wi layf. So lɛ wi kɔntinyu fɔ sav am wit gladi at, i nɔ mata ɔmɔs ia dɔn pas frɔm we wi baptayz.

Lɛ wi tɔk bɔt wan brɔda we nem Ɛktɔ, we dɔn sav Jiova as travlin ovasia fɔ 40 ia. “Pan ɔl we [i] dɔn ol,” i stil de ɛnjɔy fɔ sav Jiova. (Sam 92:​12-14) Ɛktɔ in wɛf sik ɛn dis dɔn ridyus di tɛm we Ɛktɔ de yuz fɔ sav Gɔd, bɔt dis nɔ stil mek i nɔ gladi. I bin se: “Pan ɔl we a nɔ gladi we a de si mi wɛf in sik jɔs de wɔs, ɛn i nɔ kin izi fɔ kia fɔ am, a nɔ de alaw dis fɔ mek a nɔ gladi we a de sav di tru Gɔd. A no se na Jiova gɛt mi layf, ɛn i gɛt rizin we mek i mek mɔtalman, so dis na gud rizin fɔ mek a lɛk am mɔ ɛn mɔ ɛn sav am wit ɔl mi at. A de tray tranga wan fɔ du di prichin wok ɛn a kin tray fɔ tink bɔt di op we di Kiŋdɔm de gi so dat a go stil gɛt gladi at.”

Jiova bin dɔn mek in Pikin day fɔ wi, ɛn dis dɔn mek am pɔsibul fɔ lɛ wi gɛt gladi at. Fɔ tru, “Gɔd so lɛk mɔtalman dat i gi in wangren Pikin we i lɛk; so dat ɛnibɔdi we biliv pan am nɔ go day, bɔt i go gɛt layf we go de sote go.” (Jɔn 3:​16) So dis dɔn mek we fɔ lɛ Gɔd fɔgiv wi sin dɛn ɛn gɛt layf we go de sote go if wi sho se wi gɛt fet pan di day we Gɔd mek in Pikin kam day fɔ wi. Dis na wan fayn rizin fɔ lɛ wi gladi! Ɛn di gladi we wi gladi fɔ di day we Jiova mek in Pikin kam day fɔ wi go mek wi sav Am wit gladi at.

Wan brɔda we nem Jesus, we bin de na Mɛksiko, bin tɔk se: “Mi na bin slev to mi wok, sɔm tɛm de a bin de du fayv shift dɛn, wan afta di ɔda, pan ɔl we nɔto bay fos fɔ du so. A bin de du am jɔs fɔ gɛt mɔ mɔni. Bɔt a kam lan bɔt Jiova ɛn aw i bin gi in Pikin we i lɛk fɔ kam day fɔ mɔtalman. A bin rili want fɔ sav am. So a gi mi layf to Jiova, ɛn afta we a dɔn wok fɔ di kɔmni fɔ 28 ia, a bin mekɔp mi maynd fɔ lɛf di wok ɛn yuz ɔl mi tɛm fɔ du di prichin wok.” Na dis we Jesus bin bigin fɔ sav Jiova wit gladi at.

Wi de liv klin layf, ɛn dis de mek wi gladi. Yu mɛmba aw yu layf bin tan lɛk bifo yu kam fɔ no Jiova? Di apɔsul Pɔl bin mɛmba Kristian dɛn na Rom se “fɔs tɛm [dɛn] na bin slev ɔnda sin” bɔt naw dɛn dɔn bi “slev fɔ Gɔd fɔ du wetin rayt.”  Bikɔs dɛn bin de liv klin layf, dɛn bin op fɔ gɛt layf we go de sote go. (Lɛta Fɔ Rom 6:​17-22) Wisɛf de obe Jiova in lɔ dɛn, so wi nɔ de gɛt di pwɛl at we pipul dɛn de gɛt bikɔs dɛn de du mami ɛn dadi biznɛs wit pɔsin we dɛn nɔ mared ɔ put an pan fɛt-fɛt biznɛs. Dis na sɔntin we fɔ rili mek wi gladi!

Lɛ wi tɔk bɔt Jemi we na bin bɔksa, we nɔ bin biliv se Gɔd de, ɛn we bin biliv se ɔltin jɔs kam bay chans. We Jemi bigin fɔ go Kristian mitin dɛn, di kayn lɔv we i bin si di pipul dɛn gɛt bin tɔch in at. Fɔ mek Jemi lɛf di kayn layf we i bin de liv, i bin beg Jiova fɔ ɛp am fɔ lɛ i biliv se I de. Jemi bin tɔk se: “Smɔl smɔl, a kam fɔ no se Gɔd de, ɛn a kam fɔ no bak se in na Papa we lɛk wi ɛn na Gɔd we gɛt sɔri-at. Di obe we a de obe Jiova in lɔ dɛn dɔn protɛkt mi bikɔs if a nɔ bin fɔ dɔn chenj, sɔntɛm dɛn fɔ dɔn kil mi, jɔs lɛk aw dɛn dɔn kil sɔm pan mi padi dɛn we wi ɔl bin de du bɔksin. Di tɛm we a gladi pas ɔl na mi layf na di tɛm we a dɔn tek fɔ sav Jiova.”

Aw wi fɔ fil we wi de wet fɔ di tɛm we dis wikɛd wɔl go dɔn? Mɛmba se wi de du wetin Gɔd want ɛn wi de wet fɔ di tɛm we wi go gɛt layf we go de sote go. “So una lɛ wi nɔ taya fɔ du gud, if wi nɔ taya fɔ du gud, di tɛm go kam we wi go gɛt di pe.” (Lɛta Fɔ Galeshya 6:​8, 9) We Jiova de ɛp wi, lɛ wi kɔntinyu fɔ bia, ɛn tray tranga wan fɔ gɛt di kwaliti dɛn we wi go nid fɔ lɛ wi sev we “da big trɔbul” go kam. Lɛ wi ɔl kɔntinyu fɔ sav Jiova wit gladi at.—Rɛvɛleshɔn 7:​9, 13, 14; Jems 1:​2-4.

Wi biliv se Jiova go blɛs wi fɔ di bia we wi de bia bikɔs i no di kayn wok we wi de du ɛn di lɛk we wi lɛk in ɛn in nem. If wi kɔntinyu fɔ sav Jiova wit gladi at, wi go tan lɛk Devid we bin rayt sɔm pat dɛn na di Sam buk. I bin tɔk se: “A de mɛmba se PAPA GƆD de wit mi ɔltɛm ɛn bikɔs i de wit mi, a nɔ de fred natin. So, a gladi bad, mi at layt lɛk fɛda pila; a nɔ de yagba fɔ natin.”—Sam 16:​8, 9.