1, 2. Wetin mek di tayt padi biznɛs we Jonɛthan bin gɛt wit Devid na wɔndaful ɛgzampul we wi fɔ falamakata?

JONƐTHAN go mɔs dɔn sɔprayz we i si di kayn maynd we Devid bin gɛt. Devid bin dɔn kil di jayant we nem Golayath ɛn i bin briŋ di “Filistin in ed” to Jonɛthan in papa, we na Kiŋ Sɔl we de na Izrɛl. (Fɔs Samiɛl 17:​57) Jonɛthan nɔ bin gɛt wan dawt fɔ se Gɔd bin de wit Devid, ɛn frɔm da tɛm de, Jonɛthan ɛn Devid kam fɔ bi tayt padi. Dɛn prɔmis dɛnsɛf se dɛn nɔ go ɛva kɔmɔt biɛn dɛnsɛf. (Fɔs Samiɛl 18:​1-3) Ɛn te Jonɛthan day, i nɔ ɛva kɔmɔt biɛn Devid.

² Jonɛthan nɔ bin kɔmɔt biɛn Devid, pan ɔl we na Devid Jiova bin pik fɔ bi di nɛks kiŋ na Izrɛl. Ɛn we Sɔl bin de tray fɔ kil Devid, Jonɛthan bin wɔri bɔt in padi. Jonɛthan bin no se Devid de na di ɛmti land we pɔsin  nɔ go ebul liv, we de na Ɔrɛsh, so i bin go de fɔ go ɛnkɔrej am so dat i go kɔntinyu fɔ abop pan Jiova. Jonɛthan tɛl Devid se “lɛ i nɔ fred” bikɔs Sɔl nɔ go si am. “I tɛl Devid se na Devid gɛt fɔ bi kiŋ na Izrɛl ɛn in di Jonɛthan go de nɛks to am.”—Fɔs Samiɛl 23:​16, 17.

3. Wetin bin impɔtant mɔ to Jonɛthan pas fɔ de biɛn Devid? Aw wi no dis? (Luk di pikchɔ nia dis atikul in taytul.)

³ Wi kin kɔle pipul dɛn we nɔ de kɔmɔt biɛn dɛn kɔmpin. Bɔt wetin mek wi de kɔle Jonɛthan, na jɔs bikɔs i nɔ bin kɔmɔt biɛn Devid? Nɔ-o, na bikɔs di tin we bin impɔtant mɔ to Jonɛthan, na fɔ de biɛn Jiova. Infakt, na dat bin mek i nɔ bin de kɔmɔt biɛn Devid ɛn na dat mek i nɔ bin de jɛlɔs am, pan ɔl we nɔto in go bi di kiŋ. Jonɛthan ivin ɛp Devid fɔ abop pan Jiova. Dɛn ɔl tu nɔ kɔmɔt biɛn Jiova ɛn dɛn ɔl tu nɔ kɔmɔt biɛn dɛnsɛf. Dɛn kip di prɔmis we dɛn bin dɔn mek ɛn na Jiova “na dɛn witnɛs ɛn nain go bi witnɛs bak fɔ dɛn pikin dɛn te go.”—Fɔs Samiɛl 20:​42.

4. (a) Wetin go mek wi rili gladi ɛn fil fayn? (b) Wetin wi go tɔk bɔt insay dis atikul?

⁴ Wisɛf nɔ fɔ kɔmɔt biɛn wi famili, wi padi dɛn, ɛn wi brɔda ɛn sista dɛn na di kɔngrigeshɔn. (Fɔs Lɛta Fɔ Tɛsalonayka 2:​10, 11) Bɔt di tin we impɔtant pas ɔl, na dat wi nɔ fɔ kɔmɔt biɛn Jiova bikɔs na in gi wi layf! (Rɛvɛleshɔn 4:​11) We wi nɔ kɔmɔt biɛn am, wi go rili gladi ɛn fil fayn. Bɔt wi no se wi fɔ de biɛn Jiova ilɛksɛf i nɔ izi. Insay dis atikul, wi go tɔk bɔt aw Jonɛthan in ɛgzampul go ɛp wi fɔ de biɛn Jiova we dɛn 4 tin ya mit wi na layf: (1) we wi fil se sɔmbɔdi we de oba wi nɔ fit fɔ lɛ wi rɛspɛkt am, (2) we wi gɛt fɔ disayd udat wi fɔ de biɛn, (3) we wan brɔda we de bifo na di kɔngrigeshɔn nɔ ɔndastand wi ɔ nɔ trit wi fayn, ɛn (4) we wi fil se i nɔ izi fɔ kip di prɔmis we wi bin dɔn mek.

5. Wetin mek i nɔ bin izi fɔ di pipul dɛn na Izrɛl fɔ de biɛn Gɔd we Sɔl na bin kiŋ?

⁵ I nɔ bin izi fɔ Jonɛthan ɛn di pipul dɛn na Izrɛl. Wetin mek? Wɛl, Kiŋ Sɔl we na Jonɛthan in papa, nɔ bin de yɛri Jiova in wɔd igen, so Jiova bin pul an pan am. (Fɔs Samiɛl 15:​17-23) Bɔt stil, Gɔd bin alaw Sɔl fɔ kɔntinyu fɔ rul fɔ lɔng tɛm. So i bin at fɔ lɛ di pipul dɛn de biɛn Gɔd we di kiŋ we Gɔd bin dɔn pik fɔ sidɔm na “in chia” bin de du soso bad tin dɛn.—Fɔs Kronikul 29:​23.

6. Wetin sho se Jonɛthan nɔ bin kɔmɔt biɛn Jiova?

⁶ Jonɛthan nɔ bin kɔmɔt biɛn Jiova. Tink bɔt wetin Jonɛthan bin du jɔs afta we Sɔl bigin mek tranga-yes pan Gɔd. (Fɔs Samiɛl 13:​13, 14) Da tɛm de, bɔku Filistin sojaman dɛn kam wit 30,000 chariɔt dɛn fɔ kam fɛt di pipul dɛn na Izrɛl. Sɔl in bin jɔs gɛt 600 sojaman dɛn, ɛn na in ɛn Jonɛthan nɔmɔ bin gɛt tin dɛn fɔ fɛt wit. Bɔt Jonɛthan nɔ bin fred. I bin mɛmba di wɔd dɛn we prɔfɛt  Samiɛl bin tɔk, we i se: “Bikɔs ɔf in nem, PAPA GƆD nɔ go ib una oba as nain dɔn se una nain yon.” (Fɔs Samiɛl 12:​22) Jonɛthan bin tɛl wan ɔda sojaman se: “PAPA GƆD de yuz bɔku pipul ɔ smɔl pipul if i wan fɔ ɛp.” So in ɛn di sojaman go atak sɔm Filistin dɛn ɛn kil bɔt 20 pan dɛn. Jonɛthan bin gɛt fet pan Jiova, ɛn Jiova bin blɛs am. Jiova bin mek di grɔn opin ɛn di Filistin dɛn bin fred. Dɔn dɛn bigin fɛt dɛnsɛf ɛn kil dɛn kɔmpin dɛn, ɛn di Izrɛlayt dɛn bin win di fɛt.—Fɔs Samiɛl 13:​5, 15, 22; 14:​1, 2, 6, 14, 15, 20.

7. Aw Jonɛthan bin trit in papa?

⁷ Pan ɔl we Sɔl bin kɔntinyu fɔ du bad tin na Jiova in yay, Jonɛthan bin stil de obe am pan sɔm tin dɛn we i kin tɛl am fɔ du. Fɔ ɛgzampul, dɛn ɔl tu bin kam togɛda fɔ fɛt fɔ Jiova in pipul dɛn.—Fɔs Samiɛl 31:​1, 2.

8, 9. Aw wi nɔ go kɔmɔt biɛn Gɔd we wi rɛspɛkt di wan dɛn we de oba wi?

⁸ Jɔs lɛk Jonɛthan, wisɛf kin de biɛn Jiova bay we wi de obe di gɔvmɛnt we de na di kɔntri usay wi de. Jiova de alaw “dɛn wan we de rul na di kɔntri” fɔ de oba wi, ɛn i want lɛ wi rɛspɛkt dɛn. (Rid Lɛta Fɔ Rom 13:​1, 2.) Na dat mek wi fɔ rɛspɛkt gɔvmɛnt  wokman ivin if i nɔ ɔnɛs ɔ wi fil se i nɔ fit fɔ lɛ wi rɛspɛkt am. Infakt, wi fɔ rɛspɛkt ɔl di wan dɛn we Jiova dɔn put oba wi.—Fɔs Lɛta Fɔ Kɔrint 11:​3; Di Ibru Pipul Dɛn 13:​17.

⁹ Wan sista we nem Olga, we de na Sawt Amɛrika, bin sho se i de biɛn Jiova bay we i bin de rɛspɛkt in man pan ɔl we i nɔ bin de trit am fayn. ^[1] (Rid di ɛndnot ɔnda di las paregraf.) Sɔntɛnde in man nɔ bin de tɔk to am ɔ i kin tɛl am bad wɔd bikɔs in na Jiova Witnɛs. I bin ivin tɛl am se i go lɛf am ɛn kɛr di pikin dɛn go wit am. Bɔt Olga nɔ bin “tɔn di bad gi am bak.” I bin du in bɛst fɔ bi gud wɛf. I bin de kuk fɔ am, was in klos dɛn, ɛn kia fɔ in man in fambul dɛn. (Lɛta Fɔ Rom 12:​17) Ɛn we i ebul, i kin go wit in man fɔ go fɛn in fambul ɛn padi dɛn. Fɔ ɛgzampul, we in man bin want fɔ go na wan ɔda siti pan in papa in bɛrin, Olga bin pak pak ɔltin we dɛn nid. Dɔn di de fɔ di bɛrin, we in man bin de insay di chɔch, Olga bin wet fɔ am na do. Afta lɔng lɔng tɛm dɔn pas, Olga in man bigin fɔ trit am fayn bikɔs Olga bin de bia wit am ɛn i bin de rɛspɛkt am ɔltɛm. Naw Olga in man de ɛnkɔrej am fɔ go na di mitin dɛn ɛn i kin kɛr am go na mitin. Sɔntɛnde i kin ivin go mitin wit am.—Pita In Fɔs Lɛta 3:​1.

10. Aw Jonɛthan bin no udat i fɔ de biɛn?

¹⁰ We Sɔl bin se i go kil Devid, i nɔ bin izi fɔ Jonɛthan fɔ disayd udat i go de biɛn. I bin want fɔ de biɛn in papa, ɛn i bin want fɔ de biɛn Devid bak. Jonɛthan bin no se Gɔd de wit Devid bɔt Gɔd nɔ bin de wit Sɔl, so i bin disayd fɔ de biɛn Devid. I bin wɔn Devid fɔ mek i ayd ɛn i bin tɛl Sɔl wetin mek i nɔ fɔ kil Devid.—Rid Fɔs Samiɛl 19:​1-6.

11, 12. Aw di lɛk we wi lɛk Gɔd kin ɛp wi fɔ disayd nɔ fɔ kɔmɔt biɛn am?

¹¹ Wan sista na Ɔstrelia, we nem Alis, bin gɛt fɔ disayd udat i fɔ de biɛn. We i bin de stɔdi di Baybul, i bin tɛl in famili bɔt di tin dɛn we i bin de lan. I bin tɛl dɛn bak se i nɔ go sɛlibret Krismas wit dɛn igen ɛn i bin tɛl dɛn wetin mek. Fɔs, in fambul dɛn at bin pwɛl, ɛn leta dɛn bin vɛks pan am bad bad wan. Dɛn bin fil se Alis nɔ bisin bɔt dɛn igen. Dɔn Alis in mama bin tɛl am se i nɔ ɛva want fɔ si am igen. Alis bin se: “A bin sɔprayz ɛn a bin fil am bad bikɔs a rili lɛk mi famili. Bɔt a mekɔp mi maynd se na Jiova ɛn in Pikin fɔ de fɔs na mi at, ɛn a bin gɛt fɔ baptayz di nɛks asɛmbli.”—Matyu 10:​37.

¹² Fɔ de biɛn Jiova fɔ impɔtant to wi pas ɛnitin. I fɔ impɔtant to wi pas wi spɔt tim, wi skul, ɔ wi kɔntri. Fɔ ɛgzampul, Ɛnri bin lɛk fɔ ple wan gem we dɛn kɔl chɛs, wit in skul tim ɛn i bin want fɔ win ɔda skul dɛn so dat in skul go bi di bɛst. Bɔt bikɔs i bin de ple chɛs ɛni wikɛnd, i nɔ bin de gɛt bɛtɛ tɛm fɔ go fil savis ɔ mitin. Ɛnri bin se fɔ sɔpɔt in skul bin impɔtant to am pas fɔ de biɛn Gɔd. So i bin disayd fɔ stɔp fɔ ple chɛs fɔ in skul.—Matyu 6:​33.

13. Aw di kɔmɔt we wi nɔ want fɔ kɔmɔt biɛn Gɔd go ɛp wi fɔ bia wit wi famili prɔblɛm dɛn?

 ¹³ Sɔntɛnde i kin at fɔ lɛ wi de biɛn difrɛn pipul dɛn na wi famili di sem tɛm. Fɔ ɛgzampul, wan brɔda we nem Kɛn, tɔk se: “A bin want fɔ de go fɛn mi mama we bin dɔn ol ɛn wan wan tɛm, a bin want fɔ lɛ i kam de wit wi. Bɔt mi mama ɛn mi wɛf nɔ de mitɔp.” I kɔntinyu fɔ tɔk se: “A nɔ bin ebul fɔ satisfay dɛn ɔl tu togɛda.” Kɛn bin tink bɔt wetin di Baybul se ɛn i kam fɔ no se insay dis kayn prɔblɛm, i gɛt fɔ du wetin in wɛf want ɛn de biɛn am. So i fɛn we fɔ sɔlv di prɔblɛm, we in wɛf bin gladi wit. Dɔn i bin ɛksplen to am wetin mek i fɔ trit in mama fayn. I bin ɛksplen to in mama bak wetin mek i fɔ rɛspɛkt in wɛf.—Rid Jɛnɛsis 2:​24; Fɔs Lɛta Fɔ Kɔrint 13:​4, 5.

14. Aw Sɔl bin trit Jonɛthan bad?

¹⁴ Wi kin sho se wi nɔ de kɔmɔt biɛn Jiova if wan brɔda we de bifo na di kɔngrigeshɔn nɔ trit wi fayn. Na Gɔd bin pik Sɔl fɔ bi kiŋ, bɔt stil, i nɔ bin de trit in pikin fayn. I nɔ bin ɔndastand wetin mek Jonɛthan lɛk Devid. So we Jonɛthan bin tray fɔ ɛp Devid, Sɔl in at bin wam bad bad wan, ɛn Sɔl bin mek Jonɛthan shem bifo bɔku pipul dɛn. Bɔt pan ɔl dat, Jonɛthan bin stil rɛspɛkt in papa. Ɛn i bin de biɛn Jiova  ɛn Devid, bikɔs i no se na Devid Gɔd dɔn pik fɔ bi di nɛks kiŋ na Izrɛl.—Fɔs Samiɛl 20:​30-41.

15. If wan brɔda nɔ trit wi fayn, wetin wi fɔ du?

¹⁵ Tide, na di kɔngrigeshɔn dɛn, di brɔda dɛn we de bifo kin tray fɔ trit ɔlman fayn. Bɔt dɛn brɔda ya nɔ pafɛkt. Dis kin mek, sɔntɛnde, dɛn nɔ kin ɔndastand wetin mek wi du sɔntin. (Fɔs Samiɛl 1:​13-17) So if dɛn nɔ trit wi fayn ɔ dɛn nɔ ɔndastand wi, lɛ wi stil kɔntinyu fɔ de biɛn Jiova.

16. Aw wi go sho se wi nɔ de kɔmɔt biɛn Gɔd ɛn wi nɔ de tink bɔt wisɛf nɔmɔ?

¹⁶ Sɔl nɔ bin want fɔ lɛ Devid bi kiŋ, na Jonɛthan i bin want fɔ bi di nɛks kiŋ. (Fɔs Samiɛl 20:​31) Bɔt Jonɛthan bin lɛk Jiova ɛn i nɔ bin want fɔ kɔmɔt biɛn am. Jonɛthan nɔ bin de tink bɔt insɛf nɔmɔ, so i bin mek Devid padi ɛn i bin kip di prɔmis we i bin dɔn mek to am. So ɛnibɔdi we lɛk Jiova ɛn we nɔ want fɔ kɔmɔt biɛn am de “du wetin i se i go du no mata wetin i min.” (Sam 15:​4) Bikɔs wi nɔ want fɔ kɔmɔt biɛn Gɔd, wi go kip wi prɔmis dɛn we wi dɔn mek. Fɔ ɛgzampul, if wi gri fɔ du biznɛs wit ɔda pɔsin, wi go du wetin wi dɔn se ilɛksɛf i nɔ izi. If wi de gɛt prɔblɛm na wi mared, wi go sho se wi lɛk Jiova we wi nɔ kɔmɔt biɛn wi man ɔ wi wɛf.—Rid Malakay 2:​13-16.

17. Aw dis atikul dɔn ɛp yu?

¹⁷ Jɔs lɛk Jonɛthan, wi nɔ want fɔ kɔmɔt biɛn Gɔd ivin we i nɔ izi. So lɛ wi nɔ kɔmɔt biɛn wi brɔda ɛn sista dɛn if dɛn nɔ trit wi fayn. Dis go mek Jiova gladi ɛn i go mek wisɛf gladi. (Prɔvabs 27:​11) Wi shɔ se i go ɛp wi di bɛst we ɔltɛm ɛn i go kia fɔ wi. Insay di nɛks atikul, wi go lan bɔt sɔm pipul dɛn insay Devid in tɛm we nɔ bin kɔmɔt biɛn Jiova ɛn Devid ɛn sɔm pipul dɛn we bin kɔmɔt biɛn dɛn.